NJYE NAMWISE SHYAKA

Yanditswe na
Kuya 10 Gashyantare 2016 saa 12:23
Yasuwe :
0 0

.......Nari nzi ko ubuzima burangiye, ndiheba , ubuzima bwanjye guhera ubwo bwinjira mu mwijima , imitekerereze yanjye irahungabana, gusa urukundo rurakaramba, nirwo rwankuye mubyo nabonaga nk’amazi abira bimpindukira amata n’ubuki......

Nasoje amashuri yisumbuye muri 2010, ubwo natangiye kwibwira ko kuba ndi imfura ngomba gufasha mama guhangana n’ibibazo byo mu rugo dore ko Papa we yari yaramaze gutandukana na mama, gusa kuba umukobwa uvuka mu bakobwa, abo mu muryango bakanca intege, naje kugira amahirwe mbona umusore wari ukodesheje mu gipangu twabagamo wari ufite Papeterie aza kumpa akazi ko kwakira abantu, ntibyari byoroshye bitewe n’abantu b’urujya n’uruza gusa byaramfashije, nkabona amavuta yo kwisiga n’amafaranga make yo gufasha mama kugaburira barumuna banjye.

Ubwo ubuzima bwaje gukomeza gusa umukoresha wanjye yitwaje ko twatahaga mu gipangu kimwe, rimwe na rimwe yaritinzaga abandi twakoranaga bagataha, bikaza gutuma dutaha dutinze kuko akenshi yansabaga ko murinda ngo dutahane bikangora kubyanga , naje kugwa mu ikosa ryo kuryamana nawe birangora kubyakira kuko byari ubwa mbere bimbayeho, gusa kuko namutinyaga ntago byigeze binyorohera kugira icyo mbiganiraho nawe, hashize ukwezi bibaye naje kubiganiriza UWASE , umwe mu bakobwa bari inkora-mutima zanjye.

Abyumvise akubitwa n’inkuba maze mu magambo ye ntazibagirwa n’agahinda kenshi ati:"...Wo kanyagwa we yaba yaraguteye inda cyangwa Sida ko numva watereye iyo?..." kuva ubwo natangiye kugira ubwoba, numva ko ubuzima burangiye gusa mu byo twaganiriye nzirikana ko yari yangiriye inama yo kujya kwa muganga, gusa kubw’amahirwe nasanze ntaranduye Sida, gusa nta byera ngo de, nasanze ntwite.

Nabayeho ubuzima bugoye nyuma yo kumenya ibyambayeho, kubibwira nyir’ubwite bitanyoroheye, no kubibana ntakibishoboye, naje gufata umwanzuro wo kubimubwira kuko nabonaga amaherezo y’inzira ari mu nzu, maze turi mu modoka dutashye, ndamubwira nti:" Nifuzaga ko hari ikintu mumfasha." aseka cyane ati:"Ubaye iki se kandi." kuko numvaga nashize ubwoba, ntazuyaje nahise mubwira nti:"Uziko amakosa twakoze, yazanye ingaruka?" maze uhereye ubwo ntiyongera kumvugisha.

Bukeye nibwo yanyoherereje ubutumwa bugufi, maze ibyago byanjye Telephone mba nari nayisigiye mama, ubwo butumwa ntibwari burebure gusa bwariburimo amagambo atyaye:
"...Niba washakaga kumbwira ko utwite, imitwe y’abakobwa ndayizi, suko bakura ibyinyo di, ahubwo umbwire ayo nari ntaraguhemba mbe nyaguhaye ubundi numara kumubyara uzabe aribwo ugaruka ku kazi sawa..."

Mama abonye ubwo butumwa niko kunsanga mu nzu atarwambaye, ambwira n’akari imurori ababaye cyane, byaramugoye kubyemera , biranamubabaza ku buryo bw’indengakamere kugeza ubwo ntabonye n’uko nisobanura cyangwa ngo tubiganireho, ijambo yabashije kumbwira ni:" Nsohokera mu nzu wa ndaya we!"

Nabanje gusaba imbabazi gusa nyuma aza gushyiraho n’imbaraga ubwo mba mvuye mu rugo gutyo, nta handi nari mfite ho kujya, maze mbanza guca aho nakoraga kuririra MANZI ngo ndebe ko nibura yagirira umwana we ntwite akagira icyo amfasha, gusa byarangiye anteye utwatsi.

Gusa urukundo ruratabara, ubwo naririraga MANZI hari umwe mu bo twakoranaga wari waranyitayeho kuva naza gukora aho, gusa ntaho nakundaga guhurira nawe kuko we yazaga aje gukora amasuku agahita ataha, maze n’agahinda kenshi ndimo nsohoka aho twakoraga aransuhuza ampereza agapapuro yari yanditseho amagambo yuzuye urukundo n’ubumuntu.

Ati:"....... Humura wirira muvandi!.... isi ni uko iteye gusa iryo siryo herezo ry’ubuzima bwawe, wihangane wikomeze kandi nubona ntaho kujya ufite njyewe nagerageza kugufasha nubwo bitoroshye, mbana na mushiki wanjye twenyine ntitwifashije, gusa ntiwabura icyo urya naho urara. Sawa ibihe byiza Imana ikurinde. SAFARI."

nubwo nari nuzuye agahinda n’intimba nyinshi, ariko maze gusoma ayo magambo natekereje ko hakiri icyizere cyo kubaho, maze ngerageza gushaka nimero ye ya telefoni nza kuyibona mu masaha y’umugoroba maze ndamuhamagara, mu ijwi rye ritoya ambaza niba ntarataha, maze andangira aho musanga anjyana aho bari bacumbitse.

Nsanga mushiki we yatetse turarya twese nta kuvuga, ari mushiki we ntiyari anzi ari nawe yari yabuze imbaraga zo kubwira mushiki we ibyanjye, tumaze kurya asaba mushiki we kunyereka aho ndyama, uwo munsi naraye ntafatanyije amaso, ndara nibaza ibiri kumbaho nabiburiye igisobanuro, maze bucyeye SAFARI azinduka ajya mu kazi maze nanjye mbyuka mfasha mushiki we gutunganya imirimo isanzwe yo mu rugo, tuyirangije twaje kuganira ambajije ibyanjye mubwiza ukuri nta na kimwe nsize inyuma, biramubabaza cyane gusa nawe ansezeranya ko azambera umuvandimwe, Imana iba impaye umuryango mushya.

Iminsi yakomeje kwicuma, SAFARI tutajya dufata igihe kirambuye cyo kuganira, gusa mu bikorwa akanyitaho mu bushobozi bwe bwose, ntirengagije kandi ko na mushiki we twabaga twirirwanye mu rugo ntako atabaga yagize, inda nari ntwite imaze kugira amezi arindwi, naje kurwara ikibyimba mu nda, maze bitewe no kudahita nivuriza igihe biza gukomera, naje kujya kwa muganga, nivuza ku buryo bugoranye, SAFARI asimburana na mushiki we mu kundwaza, ariwe wishyura ibisaba amafaranga byose, maze mu ngaruka nagize muri ubwo burwayi, hajemo no kubyara umwana utujuje igihe ndetse mbyara bambaze gusa Imana ikinga akaboko ntiyahasiga ubuzima. SAFARI yitaye ku mwana ntaho ankinze kandi atari se, byatumye noneho numva mukunze cyane kuko nabonaga ari nka marayika Imana yanyoherereje.
nyuma y’inzira ikomeye y’uburwayi naje kuva mu bitaro nkize neza, n’imfura y’umuhungu mu mugongo.

Gusa maze kuba umubyeyi ubuzima bwarahindutse, SAFARI atangira kujya anganiriza, rimwe na rimwe akambaza uko nteganya ubuzima bw’ejo hanjye hazaza, byari bigoye kuri njye gusubiza icyo kibazo kuko akenshi iyo nitekerezagaho numvaga ubuzima bwanjye busa naho burangiye.

Gusa umutima ukunda ntiwihishira, nyuma y’iminsi mike yaje kunsaba ko tuganira ndi kumwe na mushiki we, muri byinshi twaganiriye aza kunsaba ko umwana nabyaye yaba uwe akamwita se, ananyemerera ko nimbimukorera icyo nzamusaba cyose azakimpa, nyuma y’agahe gato mbitekerezaho , namwemereye icyo yansabye , nanjye musaba ko niba bishoboka twabana nk’umugore n’umugabo kugirango nibura nzabone igihe cyo kumwitura ibyiza byose yangiriye.

Tumaze kubyemeranyaho twateguye umunsi wo kwita umwana izina, dusezerana ko ari naho tuzabwirira abo mu miryango yacu ibyo twateguye, Mama wari umaze igihe kinini atazi aho mba yongeye kwishima ko nkiri muzima , maze we n’abandi bake twari twatumiye tubatekerereza ubuzima twanyuzemo , maze kuko ab’ibanze bari bahari tubasaba n’uburenganzira ko twifuza gushinga urugo, ntawazuyaje bose barabyemeye none mu mpera za werurwe 2016 dufite ubukwe.

Nyuma y’icyo kiganiro kirekire, umuhango wari waduteranirije aho wo kwita umwana izina warakomeje, igihe cy’uwari yaramaze kwitwa se kigeze ansaba kuvuga izina ry’umwana mu mwanya we, kuko njye byari bintunguye nirinze kwizimba mu magambo nzirikanye ibyiza byose yankoreye, ndebye ishyaka yarwaniye umwana, kugirango azabe urwibutso rwacu njye namwise "SHYAKA"
Ubu turanezerewe mu myiteguro y’ubukwe.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza