NTA YINDI MPAMVU YAMUMPAYE URETSE URUKUNDO RUDACAGASE YAREMANYWE

Yanditswe na
Kuya 10 Gashyantare 2016 saa 04:03
Yasuwe :
0 0

Ku munsi wa mbere ntangiye akazi ko mu rugo kwa Mama Latifa ku Muhima, numvise mpishimiye kandi nabonaga Claudine anyerekera uko ngomba gukora nta kibazo amfiteho nk’ umunyacyaro wize amashuri abanza gusa.

Byari mu 1998.Mu by’ ukuri Claudine yari umwana wabaga kwa Nyirasenge kubera amasomo ndetse yambwiye ko akomoka i Shyorongi. Nabonye turi mu kigero kimwe, mubaza imyaka ye ambwira ko yavutse muri 1981, numva turangana. Claudine yari umwana utagira uko asa mu mico no mu myifatire. Wabonaga ko ari umwana wahawe uburere mu buryo budasanzwe, kandi uburanga bwe bugatera benshi kumwifuza.

Buri gihe uko namubonaga, namufataga nk’umuntu udasanzwe bitewe no kwicisha bugufi kwe. Iyo imirimo yambanaga myinshi yarazaga akamfasha. N’ubwo nahise menyera akazi kandi abo mu rugo bose bankunda, nyuma y’amezi arindwi, nagize impanuka amazi ashyushye yamenetse ku kirenge . Icyo gihe nari mu rugo na Claudine twenyine.

Ndimo mbabara kandi ntaka mbona Claudine aje yiruka areba ku kirenge amfata ku matama arambwira ati “Pascal, gerageza wihangane”. Yahise azana amavuta n’ isukari ashyira ku kirenge ambwira ko bivura ubushye. Yahise aterefona Mama Latifa(Mabuja). N’ ubwo bambwiye ko ngomba kuhaguma kugeza nkize, nyuma y’iminsi ine ndwaye nasabye ko naba ntashye nkazagaruka nakize.

Mama Latifa na Claudine babanje kubyanga ariko bageze aho baranyemerera. Claudine yaramperekeje tugeze Nyabugogo turicara dutegereje ko taxi KIGALI-BASE yuzura, aranganiriza ambaza uko nabonye Kigali. Yarambajije ngo “uzanzanira iki uvanye muri komini?” nanjye nti “ukunda iki kiva muri komini?” arandeba atuje cyane aramwenyura arambwira ati “nkunda imineke ya kamara”. Numvise bintangaje! Naramusezeye ntaha iwacu kuri Base.

Nyuma y’iminsi mike nahise nkira ndetse njya gusura babyara banjye. Marume (Karangwa) yarambajije ati “Niko sha, kuki wagiye i Kigali utavuze?” nanjye nsubiza ko byantunguye. Yansabye ko naguma kuri Base nkamufasha gucuruza.

Mu gihe nabaga kuri Base, nakomeje kujya nandikirana na Claudine. Kalisa yabimfashamo kuko yatahaga muri week-end aje kureba umuryango. Ni we nahaga utubaruwa dore ko ari we wari waranjyanye gukora kwa Mama Latifa.

Hari ibaruwa nabonye yanditsemo aya magambo “Sha Pascal, ubu ngiye kwiga. Burya narangije icyiciro rusange (tronc commun) sinabasha gukomeza, none ubu tante agiye kunyishyurira privee i Gitarama. Uzansengere mbitsinde, nziga sciences humaine”.

Numvise ko kuba agiye kwiga tutazongera kuvugana. Dore uko nibajije nti “Ariko se byashoboka ko umunyamashuri yakomeza kuvugana n’ inkandagirabitabo nkanjye?” .

Nyuma y’ imyaka ibiri Marume yarambajije ati “Harya ufite iyihe gahunda? Uzakomeza gutwara imodoka mu misozi wihisha abapolisi kugeza ryari?” ndamusubiza nti “gahunda ni ugukorera uruhushya rwo gutwara imodoka”. Aranseka arambwira ati ubona wakwigira imodoka hano mu cyaro ukazabona category? Ndamusubiza nti “nagerageza.”

Yambwiye ko ngomba kujya gukorera kuri depot ye iri Nyabugogo nkiga muri Auto-ecole kandi nkamenya umujyi. Umunsi ukurikiye yahise anyohereza i Kigali. Nimugoroba najyaga kwiga kuri Auto-ecole Saint Famille. Marume yamfashaga buri kimwe akampa amafaranga yose nkeneye.

Ibyo byanteye guhita nsindira uruhushya rw’ agateganyo (permit provisoire) ariko nza kumva ko hari umugabo utekinika. Uwo mugabo twaribonaniye muhereza Frw 250.000 anyemerera kuzampa category B. ibyo ntibyampiriye kuko nyuma y’iminsi itanu narafunzwe.

Mu gihe nari mfungiwe muri gereza ya KIMIRONKO, nagiye kumva ngo bagusuye. Ubwo natekereje ko ari Karangwa, Kalisa cyangwa Mama nk’uko bisanzwe ariko natangajwe no kubona Claudine imbere yanjye.

Naramubajije nti “bite Claudine?” araceceka. Ndebye mu maso ye mbona amarira , ubwo mu gihe nkibaza ibibaye aba arampobeye tumara nk’ iminota itatu. Ndongera nti “bite Claudine?” nabwo araceceka ahubwo afata agatambaro yihanagura mu maso. Twaricaye ntiyagira ijambo avuga ahubwo ankuramo urukweto mu kirenge cy’ibumoso ankoraho.

Byaranyobeye nibaza ibiri kuba numva ndi nk’umusazi. Yambajije atuje cyane kandi afite ikiniga ati “mperuka warahiye kuri iki kirenge none ko nta nkovu mbonaho?” naramusubije nti “imana yankijije igisebe n’inkovu byose” nawe ati “Kalisa yaje mu rugo atubwira ibyabaye, mpita mfata gahunda yo kuza kukureba”
Twaraganiriye cyane ambwira ko yakoze ikizamini cya leta kandi yumva azatsinda akabona bourse. Dutangiye gutera urwenya, abacungagereza bati murekere aho amasaha yo kuganira yarangiye. Nasubiye muri gereza nuzuye agahinda.

Mbifashijwemo na marume, nyuma y’iminsi mike naje gufungurwa kandi ngirwa umwere. Sinzibagirwa ko umunsi nari nicaye Nyabugogo ku kazi, nagiye kumva ngo hari umuntu ugushaka. Narasohotse ngeze hanze mbona Claudine aramwenyuye. Nibajije ukuntu yamenye aho nkorera ariko nkeka ko yabibwiwe na Kalisa. Naratitiye ngiye kumusuhuza ahita ampobera atitaye ko nambaye imyambaro y’akazi. Twaricaye turaganira ambwira ko Mama Latifa yamutegetse kuzashyingiranwa n’umusore w’umuyisilamu kandi wize.

Yambwiye ko bashaka kumushyingira Hamoud (Umusore w’umucuruzi KICUKIRO centre akaba n’inshuti y’umuryango). Uwo Hamoud nari muzi kuko yajyaga aza mu rugo nkikora kwa Mama Latifa. Claudine yambwiye ko atamushaka. Numvise ntangaye kuko Hamoud yari umukire pe! Claudine ati “ Mama Latifa ambuza kumenyana n’umukafiri cyangwa umusore w’umukene.

Muri 2003, natsindiye category A na B, ntangira gutwara DAIHATSU mvana ibirayi muri Ruhengeri na Gisenyi, ariko nkacishamo nkanasura Claudine muri KIE kuko yari yarabonye bourse akajya kwiga icungamutungo. Iyo nageraga muri home yanyakirizaga ka mukaru mu cyumba cye akabwira bagenzi be ko turi inshuti.

Sinzibagirwa umunsi bari mu kiruhuko, namusabye ko twahurira i Remera aza kubyemera. Twajyanye muri RESTO-BAR, mubaza icyo afata ambwira ko akunda FANTA CITRON. Yatangiye anganiriza ambwira ko ari umusirikare muri RDF.
Narasetse cyane kuko numvaga ari urwenya, ahita afungura isakoshi akuramo agafoto anyereka yambaye imyambaro ya gisirikari ari n’abandi. Numvise numiwe, ndetse arambwira ngo nkajyane we agiye mu butumwa bw’ akazi, arampobera ahita agenda.

Nyuma y’iminsi itatu turabonana arambaza ati “ntabwo wishimiye ko ndi afande?” nanjye nti “narabikunze cyane” yarasetse arambwira ngo mubabarire. Nti kuki? Ati “kuko narakubeshye ngo ndi umusirikare kandi hariya nari ndi mu ngando mbere yo kujya muri kaminuza, niho nambaye iriya myambaro”.

Claudine utagira uko asa yakomeje kunyereka urukundo bigera ubwo musaba ko twabana, na we aranyemerera. Mbere yo gukora ubukwe Mama Latifa yagize ati “ Allah azabahe umugisha naje kubona ko umwana akwiye kwihitiramo uwo akunze” Mu by’ukuri Mama Latifa ni we wenyine wari muri islam mu muryango we kuko yashakanye n’umuyisilamu.

Muri 2008 Nagiye gusaba i Shyorongi ndamuhabwa, nyuma tujya kwa padiri i Rulindo. Ubu dufite abana babiri Kimironko. Claudine yabonye Masters muri Mount Kenya, akora muri RSSB. Njye ncuruza piece de rechange kuva muri 2011.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza