NTAWE UKUNDUTIRA

Yanditswe na
Kuya 11 Gashyantare 2016 saa 03:13
Yasuwe :
0 0

Ntarakunda ngo nkundwe nkundwakazwe sinizeraga iby’urukundo, numvaga rutanabaho bitewe n’uburyo nabonaga abagore n’abagabo batandukana ndetse no gucana inyuma kw’abashakanye byariyongereye mu buryo bugaragara. Byatumye nibwira ko nta rukundo rukibaho ndetse numva kugira umugabo nizera bizangora nkabona ntawe uzaza atambeshya. Aho nari ntarafatwa na gakoco y’urukundo, ari yo ngiye kuvuga muri make muri iyi nkuru…

"Isaro, kuva nabaho sindabona umukobwa ku isi ukurusha uburanga”. Ayo ni amagambo Cyusa akunda kumbwira kuva twamenyana. Mbere najyaga ngira ngo ni amareshya mugeni yo mu basore kuko iyo narebaga ubumuga mfite sinumvaga ukuntu mu banyarwandakazi bose ari jye mwiza.

Mu mwaka w’2012 ni bwo nahuye na Cyusa bwa mbere. Yari umuhungu mwiza ku buranga, w’umusirimu kandi wishoboye mu buryo bufatika. Kuva nahura na Cyusa ubuzima bwanjye bwarahindutse. Twahuye bwa mbere duhuriye ku bantu tuzi twembi ariko uburyo yaganiraga atanga ibitekerezo byubaka numva binkoze ahantu.

Bikubitaye n’ukuntu yasekaga neza noneho nkananirwa kumukuraho ijisho. Ariko na we akajisho yakanteragaho kuko iyo narebaga hirya nkongera nkamureba twahitaga dukubitana amaso ngasanga na we yari ari kunyitegereza, tukamwenyura tugakomeza ibiganiro. Twaratandukanye duhana za email kuko nari mfite urugendo muri iyo minsi nzamaramo amezi make. Nagiye ntarwiyambitse ntekereza Cyusa. Natashye ibinyamuneza byanyishe natekereza ukuntu twakubitanaga amaso twiyibye mu kurebana nkisetsasetsa nta muntu turi kumwe. Namaze iminsi ishusho ye iguma ingaruka mu maso nkumva ibinezaneza biranyuzuye.

Nkigera aho nagombaga kuzindukira, Cyusa yaranyandikiye ambaza n’amakuru y’urugendo. Nkibona izina rye numvise meze amababa, gusoma birananira numva utuntu tunyirutse mu mubiri cyane. Yagiraga ati “Isaro uraho? Nizere ko wagize urugendo ruhire kandi unezerewe aho uri. Gira ugaruke natwe tukubone, ubundi utwereke ibirori, byanze bikunze abasore bifuza umukobwa nkawe ni benshi, ubu urutonde ni rurerure niba utarahitamo”.

Ako kabaruwa nagasomye inshuro zitabarika ari ko nisetsasetsa nk’umuntu bakirigise. Niriwe byananiye kuyisubiza kubera ibyishimo no kubura amagambo nkoresha. Ku mutima numvaga namubwira nti: “Abahari bose ubaye umwe muri bo wabakuramo”. Nyuma yo gusoma kenshi nsubiramo sinahise mwereka aho ngeze mutekereza cyane, nuko ndamusubiza nti: “Nzaza vuba kandi nanjye bizanshimisha kongera kukubona. Abasore bo biracyari mu nzira. Igihe cy’ibirori nikigera ni wowe wa mbere nzabwira”. Niko kunsubiza ati: “Ntacyo uzatubwire amatariki uzatahira tuzaze kukwakira twitwaje igihuru (indabo)”.

Naramusubije ariko nibagirwa kumuha itariki. Ariko nkigaruka yahise amenya ko nahageze. Yatangiye kumpamagara tukavugana ndetse akajya antumira tugahura, rimwe na rimwe tugasangira. Aho amenyeye ko nkunda indirimbo za kera akajya anjyana aho baziririmba ndetse tugahurira no mu zindi gahunda zitandukanye. Uko twagiye duhurira muri twinshi ni ko nagiye mbona ingeso ze nziza ndetse mukunda kurushaho. Buri munota nabaga ntera akajisho kuri telefoni ndeba ko atampamagaye.

Yatangiye kunyereka ko yankunze mbere y’uko abimbwira. Iyo yageraga ahantu akabona akantu nakunda yarakanguriraga ndetse tugera aho kurara tutavuganye bitunanira, kumara icyumweru tutabonanye bigera aho biranga. Twashakishaga impamvu byanze bikunze yatuma tubonana. Iyo saa tatu z’ijoro zageraga tutaravugana numvaga meze nk’umurwayi.

Byaje kurangira dukundanye ndetse ambwira ko yifuza kubakana urugo nanjye. Mu ijwi rye rituje twasohotse, yamfashe mu kiganza arambwira ati: “Isaro ndagukunda kandi nifuza ko wambera umugore. Mu bakobwa bose nahuye na bo nta n’umwe ukurusha ubwiza bwaba ubwo ku mutima n’ubwo ku mubiri. Nifuza kuzagira urugo rurimo urugwiro rwawe, nifuza guhora nkubona iruhande rwanjye, nifuza kubakana ubuzima nawe, nifuza ko waba nyina w’abana banjye”.

Akimbwira ayo magambo numvise mbaye nk’ufashwe n’amashanyarazi. Muri ako kanya nibaza mu mutima niba ibiri kuba ari jye bibayeho cyangwa niba ndi kurota. Sinatinze kumusubiza kuko igisubizo cyari hafi cyane. Nuko nanjye ndamwenyura nti: “Nanjye ndagukunda kandi ndabyemeye”. Ni uko nambaye impeta y’urukundo ndetse muri jye numva ubuzima burahindutse, bufashe indi shusho.

Urukundo rwacu rwafashe indi ntera twiyumvanamo kurushaho, duseka kurushaho, dutangira gupanga gahunda z’ejo hacu hazaza. Byahise bikomera dutangira kubwira imiryango yacu yombi uko bimeze ndetse ko twafashe icyemezo cyo kuzabana. Imiryango yacu yarabyishimiye ndetse nyuma yo gusura imiryango yombi, Cyusa yahuje n’iwacu nanjye mpuza n’iwabo.

Bamwe mu ncuti zacu ntibatinze gutangira kuduca intege ndetse harimo bamwe twari duhuriyeho. Ndibuka umugabo umwe wari utuzi twembi wamutumyeho amubwira ko amushaka. Nuko mu magambo make aramubwira ati: “Numvise ko wafashe icyemezo na Isaro, none ndagira ngo nkugire inama mu byo ugiyemo.

Urugo ndumazemo imyaka irenga icumi ariko ruragoye. Rutugora dufite abagore bujuje ibyangombwa byose, none uriya ugiye gushaka w’akamuga azakumarira iki? Abakobwa beza muri iki gihugu baruzuye kandi sinshidikanya ko ubishatse no mu gihe cy’ukwezi utaba uhisemo uw’akataraboneka kandi uzagufasha gutera imbere. Nari ngutumyeho ngo nkubwire ubitekerezeho nibiba ngombwa ubivemo hakibona”.

Cyusa yahise aseka, nuko muri rya jwi rye rituje aramusubiza ati: “ Kumugara kubi ni mu mutwe. Umukobwa namukunze ibyo uvuga nabibonye kandi tuzubaka urugo rwiza. Abo bakobwa bandi nabo ndababona, ariko muri bose nta n’umwe undutira Isaro”. Uwo mugabo agerageza kumwumvisha ko ari mu byo atazi, ndetse amutega iminsi ko azicuza ariko ko ahari azongera akamugira inama za kigabo.

Haciye iminsi dutangira imyiteguro y’ubukwe ndetse turabukora. Bwabaye ubukwe bwiza, imiryango n’incuti bose bose bishimye. Ubu dufite urugo rukomeye, ruteye imbere ariko ikiruta byose rwuzuye urukundo. Ibyishimo twagize kuva muri iyo minsi kugeza ubu bigenda byikuba kenshi ndetse n’indi migisha ari na ko yisukiranya. Imyaka yose tumaranye nta kintu kigeze gituma dushwana bikomeye cyangwa ngo dutongane. Aracyansubiriramo ko nta mukobwa ku isi duhwanyije ubwiza, biracyaryohera amatwi yanjye. Mu by’ukuli nyuma y’ibi nasanzwe urukundo nyakuli rukibaho .

Isi n’ibyayo byose bizashira, ariko urukundo ruzahoraho! Nsoza reka nanjye nungemo muri aya magambo nti: “Ibyaremwe byose, abatuye isi n’abazayitura nta mugabo uruta, nta n’uzaruta Cyusa wanjye”.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza