UKO UWARI DATABUJA YABAYE DATABUKWE

Yanditswe na
Kuya 11 Gashyantare 2016 saa 12:32
Yasuwe :
0 0

Tariki 5, Gicurasi, 2012 mfata bisi Nyabugogo aho nagombaga kunyura iy’ubutaka kuva Tanzania–Malawi–Mozambique kugera Johannesburg.

Inzira yambereye iy’umusaraba kuko nagiye mfatwa ngafungwa kubw’amahirwe bakandekura ngakomeza urugendo kubera ko nta visa nari mfite yanyemereraga kurenga muri Tanzania.
Nageze South-Africa maze ukwezi kose mu nzira , Aho bus ingejeje nkarara aho hanze , amafaranga yari amaze kunshirana kuko nagendaga nyatangamo za ruswa ku mipaka kugirango nambuke , ibyo kurya no gukaraba byo murabyumva byari ibitangaza .

Amaherezo ngera Johannesburg mu rugo rw’uwo Muherwe baranyakira banyereka aho ngomba kubana n’abandi bakozi mu nzu ya , nsanga bafite abandi bakozi bagera kuri 15 bose bakaba bari bene wabo n’uwo muherwe yagiye Akura mu Rwanda bakaza kumukorera akazi kameze nk’ubuhake aho wakoraga nk’imyaka 7 bakaguhembera rimwe bagusezereye .

Icyakora baduhaga make yo kugura imyenda , inkweto ,…. ibyo kurya no kunywa byabaga ari munange ariko ntacyo byabaga bitumariye kuko twakoraga iminsi yose no ku Cyumweru ndetse kakaba akazi kavunanye ko gupakurura amakesi ya za byeri

Ariko njye kuko depot nakoragaho yakinganga kare, byatumaga ngera mu rugo mbere y’abandi ho nk’amasaha 3, iteka nahageraga naniwe cyane nkirambika mu cyumba ntegereje ko abandi bataha saa tanu z’ijoro ngo tugire ku meza rimwe .

Nihanganira uwo muruho kuko intego yari ukuzatahukana ubukire naho byazaba kera.

Kuzinduka mu gitondo ngataha bwije buri munsi byatumaga ntamenya ubuzima bw’abirirwa aho mu rugo ndetse nari ntarabona n’abana na Boss.

Rimwe natashye mbere y’abandi, nk’ibisanzwe nirambitse mu cyumba, Ngiye kumva numva umuntu akomanze ku muryango wa annexe twabagamo ngira ngo ni umukozi wo mu rugo wari uje kubika imyenda twari twanitse kuko imvura yari itangiye gutonyanga,

Hinjira umukobwa mwiza cyaane nari mbonye aho bwa mbere , nshidukira hejuru kuko nari nambaye agakabutura nubusa mu gatuza.

Ati“ Oh sorry, numvise radio isakuza ngira ngo ntawurimo kuyumva. Ariko wowe uri mushya hano !? “

“ Nibyo maze amezi atandatu ino. nitwa Jonathan , nkorera Nyiriki gipangu ”

“ hahaha , eeh! Njye nitwa Sandrine gusa abenshi banyita SANDO, hano ni mu rugo ariko nabaga mu Bufaransa niho nigaga Universite ” …abivuga amwenyurira !!

“ nishimiye kubamenya rwose ”

“ Waje tukarebana agafilime mfite hariya muri salon ”

” Murakoze ariko iyo ndebye televiziyo amaso arandya cyaaane “

Naramubeshyaga kuko twari twarihanangirijwe na Boss ko tutagomba kugera muri salon ye..

” yooh pole !! , ariko disi uzajye kwivuza .”

” Yeah nzajyayo vuba “

” Ok, ni ahejo buriya nzaca kuri depot ndebe uko mukora ”

” ça nous fera plaisir “

” eeh uzi igifaransa se ?” ..asa nutunguwe..

:” eeh narangije secondaire muri section ya lettre twigaga ku gafaransa natwe”

:” yooh ni byiza cyaaane , ko utakomeje kwiga se ?”

” nabuze ubushobozi “

” yoooh humura Imana irabizi “…. Mbona agize impuhwe nyinshiii

: “ Murakoze kundema agatima !”

Iryo joro naraye nibaza ku bugwaneza n’ubwiza bwa SANDO bunkeraho .

Nyuma y’iminsi itatu nk’ibisanzwe natashye mbere y’abandi , SANDO aba agarutse mu cyumba cyacu …

Ati: “ hellooo bite se akazi kari kameze gute ?”

” Yeah none twacuruje cyaane byagenze neza “

” yooh ni byiza , ariko se mujya muruhuka ?”

” hahaha, turuhuka nijoro iyo turyamye .”

” Nooh , ! nzabwira papa azajye abaha ka conge daa “

“ mwaba mutuvuganiye rwose “

“ ariko kuki umvuga unshyira mu bwinshi “

:” erega ni ukububaha “

:” oya njye simbikunda “

” Ndabimenye sinzongera “

” phone yanjye yagiyemo code , ejo wazayinjyanira kubatekinisiye , dore n’amafaranga uzishyura “

Ayimpaye sinzi ukuntu niyicokoje mbona code ivuyemo ndayimusubiza..

” Eeh uri magicien se? “….Abivuga atangayee cyaaane

” hahah sinzi ukuntu nanjye mbigenje “

” Eeeh uranyemeje chouu! “ …….

Kuva ubwo saa mbiri z’umugoroba zageraga SANDO yageze mu cyumba cyacu , tukiganirira bigatindaa ,…..

Ntacyantindiraga nk’isaha zo gutaha ngo njye kwirebera SANDO wari warantwaye roho ariko nkirinda kumugaragariza urukundo ngo bitamviramo kwirukanwa ntahembwe kuko akazi kacu katagiraga kontaro.

Nyuma y’imyaka itatu umunsi umwe boss atashye kare, ntitwumva guhinda kw’imodoka ye kuko twari twatwawe naka zouk. Njye na SANDO twariho twibyinira , Boss akinguye asanga nagwatiranye n’umukobwa we.

Mbega ibyagooo!!!! …

Boss ati: “ Ndarotaaa cyaangwaaa !!”

SANDO ashatse kuvuga ise amukubita urushyi rwaka umuriro …

Njyewe: “Kwakwa kwari ukubyina gusa nta kindi twigeze dukora”….ntangira kudidimanga mvuga ibyo ntabajijwe….kandi mu by’ukuri nari ntarigera ndyamana na SANDO n’umunsi n’umwe, numvaga ko umunsi twabikoze no gupfa nzapfa kuko bavugaga ko Boss yaba agira imbunda.

Boss “Iyo ni iticket nguhembeye kunsuzugura, ejo mu gitondo uzagende na bus ya mbere sinzongere kukubona mu maso yanjye ” ampa amadolari 400 mu myaka itatu yose nari mukoreye …

Mu gitondo cya kare nzinga utwangushye njya gufata bus, nkigera muri gare bahita banyiba ka gatelephone ntakaza Nomero ya SANDO ubwo .

Kugaruka nta dollari nari rimwe nzanye ntacyo byari bimbwiye kuko numvaga kubaho ndafite SANDO byose ari ubusa.

Imbuga nkoranyambaga zose nazishakiyeho mbura irengero rya SANDO .

Ariko burya ngo uwo Imana yagambiriye kugirira neza ntawe uyikoma mu nkokora

Mu ntangiriro za 2015 nibwo naje kugerageza amahirwe nkora ikizami cy’igifaransa nuzuza nimpapuro zo gusaba kujya kwiga mu Bubiligi Imana inkorera igitangaza mbona buruse nyuma y’imyaka itandatu nari maze sogonderi.

Tariki 5/5/2015 nibwo nanjye nuriye rutemikirere bwa mbere mu buzima .

Nyuma y’amezi 3 ndi kwitemberera Brussels numva umuntu ankozeho mpindukiye mbona ni SANDO , iyooooh nabaye nk’uguye igihumure ,,… amarira y’ibyishimo arashoka turahoberana biratinda.

Tujyana iwanjye ambarira ukuntu nyuma yo kunyirukana bwakeye yigarukira i Burayi ntiyongera kwifuza kubona se mu maso ye ati :” Amajoro yose nabaga nsenga ngo Imana izongere iduhuze”

Nti;“Nari nzi ko ntazongera kukubona‘’

Nawe ati “Urukundo rwanjye ni wowe , ntuwundi nari kuzakunda iyo ntongera kuzakubona “Imana ishiiiimwe sinzi icyo nayitura peee! ”.

Ubu turi gutegura ubukwe mu kwezi kwa 6 kwa 2016, Kandi Imana yaduhaye inshuti nyinshi hano.

ubu SANDO yababariye se, njyeweho namubabariye kera nyuma yo kumenya ko ibyo nari nafashe nk’ubugome bwe ariho Imana yashatse kunyuza imigisha yanjye.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza