UMUKUNZI W’UBUDASA

Yanditswe na
Kuya 10 Gashyantare 2016 saa 12:07
Yasuwe :
0 0

Mu mwaka w’2014 nibwo ninjiye mu rukundo ariko nakwita ko ari intambara idafite gitabara. Nahuye n’uwo mwana turakundana. Uwo nakundanye nawe, benshi mu muryango wanjye ntibamukunze, ndetse na bamwe mu nshuti zanjye ntibamukunze.

Impamvu batamukunze, byose byatewe naho twamenyaniye ndetse n’akazi yakoraga. Nakomeje kurwana intambara itagira gitabara ariko nshiduka ari nk’imwe ya Dawidi wishe Goriyati. Byatangiye ubwo narindi mu rugo nishwe n’irungu ndimo ndeba agasobanuye(firime), nyuma karangiye mpita mpaguruka nerekeza mu kabari kari hafi yo murugo, nkihagera mbona umukobwa mwiza wacuruzagamo ariko sinamwitaho cyane ubundi nisabira icyo kunywa.

Ngisaba icyo kunywa, yaje ansanga aho nicaye ambaza icyo nywa, mubwira ko nywa primus ikonje. Yarayinzaniye, ubundi manura akavumbi umwuma urashira. Sinahatinze cyane, nahanyweye n’irindi cupa, ubundi ndishyura ndataha. Natashye ngenda nibaza k’umukobwa mwiza nkuriya ukora mukabari, mbyibazaho igihe kinini mbura igisubizo, ariko nkumvako ari kwakundi abana b’abakobwa bananirana bakigira ibirumbo, sinabitindaho cyane mpita niryamira.

Namaze iminsi igera kuri irindwi ntajya mukabari nibereye murugo dore ko nari umushomeri, nirirwaga ndeba amafirime ndetse nibereye no kumbuga nkoranyambaga. Ubwo narindimo ndeba firime, nagiye kumva numva barampamagaye kuri terefoni, ngiye kureba nsanga ni inshuti yanjye yitwa David. Nahise mwitaba, dore ikiganiro twagiranye :

Njyewe: allo!
David: allo! Bite muvandimwe?
Njyewe : ni byiza. Amakuru se?
David: ni meza rwose ubu ndimo nitegura wikendi.
Njyewe: wampaye gahunda se!
David: ndaza kuza ntinze, ariko genda hafi kuri ka kabari muturanye ube ufata kamwe ninza ndishyura ntugire ikibazo.
Njyewe: urakoze.
Nambaye agapantaro keza n’agashati keza ubundi ngenda ngana kuri kakabari duturanye, nkihagera nkuko bisanzwe nakubitanye amaso na wamukobwa uhakora, ndamusuhuza ari nako mwitegereza cyane, mutuma primus ikonje nkuko bisanzwe doreko ariyo nakundaga, arayinzanira ndayinywa ari nako ndikwirebera uturirimbo tugezweho.

Nakomeje kunywa ndizihirwa rwose sinakubwira ariko ninako amasaha yagendaga, nkomeza gutegereza David ngo aze ndaheba, ariko mu mutima nkumvako isaha iyariyo yose araza kungeraho. Namaze primus yagatatu atari yaza, nibwo natangiye kwibaza byinshi nti: “ese ubu David ataje nabigenza nte? Ubu ntanatanu mfite mumufuka! Yebabawe wasanga bankubitiye mukabari! ”.

Nakomeje kwibaza ibibazo bidafite ibisubizo, ariko kubera David yari inshuti yajye nkagumana icyizere ko isaha n’isaha yangeraho. Nahise mpamagara David kuri terefone numva itari kumurongo, mbonye ko amasaha yicumye kandi ntamubona nigira inama yo kwegera wa mukobwa ngo mubwize ukuri, turaganira:
Njyewe: umva nkubwire gato!
Uwo mukobwa: ntakibazo mbwira.
Njyewe: umva sha mpuye n’ikibazo, kandi ndagirango unyumve pe!
Uwo mukobwa: ikihe kibazo?
Njyewe: umva hari inshuti yanjye yambwiye ngo nze hano irahansanga kandi iranyishyurira, none terefone ye ntiri kumurongo, ndakeka ko yayifunze.
Ako kanya nyirabuja yari ku ruhande abyumvise, ahita atera ijwi hejuru ati:” Umva erega ntiwava hano utishyuye, ahubwo turagukuramo imyenda. ”
Uwo mukobwa: umva mabuja mureke rwose iyo aba uwo kwambura aba yagiye atanatubwiye, njye natayazana uzayakure ku mushahara wanjye.
Njyewe: urakoze cyane pe! Ejo nzayazana.

Nasohotse mfite ikimwaro cyinshi cyane, ntekereza ko abantu bamfashe nk’ingegera, mpita njya kuryama. Ntibyatinze ngiye kumva numva David arampamagaye ambaza niba nkiri kuri ako kabare, n’uburakari bwinshi ko yambeshye, musobanurira ibyambayeho byose ambwira ko terefone ye yari yazimye, ampa gahunda ko aza kundeba mu gitondo.

Bwarakeye David araza, dore uko twavuganye:
Njyewe: sha David nukuri naraye nsebye cyane. Uziko buriya bamfashe nk’ingegera koko? Sha sinzi niba kuhahingutsa amaso byankundira.
David: umva bireke, ahubwo ngwino tujyeyo. Fata ibi bihumbi makumyabiri, nituhagera wishyure ideni warayemo andi asigaye turayanywera.
Twahise dugenda ngezeyo mpita nishyura wa mukobwa ukora mukabari, ahita yishima cyane tugirana iki ikiganiro:
Uwo mukobwa: sha nukuri urantunguye pe! Ayo nari nayahebye da! Icyakora urakoze werekanye ubutwari.
Njyewe: sha nyine biriya bibaho, dore uriya musore wicaye hanze niwe nari nategereje nijoro.
Uwo mukobwa: muri abana beza pe! Tubakirize iki?
Njyewe: twese tunywa bimwe tuzanire primus zikonje ndetse nawe urebe icyo ufata, nibinakunda uze twicarane hanze tuganire.
Uwo mukobwa: yego ndaje mbakire.
Uwo mwana w’umukobwa yatwakiye neza cyane aratwishimira turaganira, ariko David kubera ko yabonaga nari meze nkaho natwawe n’umukobwa, yameraga nkaho ahuze gato akatureka tukaganira. Twabashije kuganira ndetse ampa na nimero ye ya terefone ngo nzajye muhamagara.
Twahanye gahunda yo kongera guhura kuwa gatanu atakoze, duhurira muri resitora imwe muri Kigali noneho tubasha kuganira neza.
Njyewe: umva sha nukuri narakwishimiye cyane pe! Nabonye ko ari wowe wambera urukundo rudashira.
Uwo mukobwa: egoko reka da! Ubwo se byakunda? Sha njye ubuzima ndimo ntibunyemerera gukundana, kuko naje nje gushaka amafaranga yo kuzabeshaho umuryango wanjye, kandi umenye ko abakobwa bakora mu kabare ntimwashobokana pe!
Njyewe: none se ibyo byakubuza gukundana? Umva sha njye rwose nzabyihanganira aho waba ukora hose nagukunze mba nagukunze.
Uwo mukobwa: aha! Ndumva sinzi, umva sha reka dutahe ibindi turabivugana kuri telefone.

Twaratashye nyuma ngeze mu rugo nsanga inkuru yahakwiye ngo nsigaye nkundana n’umukobwa wo mukabari w’indaya, abo murugo bose barancyuriraga ndetse na bashiki banjye bose bakampa urw’amenyo, bigera n’aho David inshuti yajye magara ambwira ko ntakwiye gukundana n’umukobwa ukora mu kabare. Nabimye amatwi njye ngakomeza nkamukunda nubwo tutari twagafashe umwanzuro wo gukundana.
Mama yaje kujya mu bitaro, arwarira mu bitaro bya Ruhengeri, ninjye wari umurwaje bashiki banjye baragiye ku ishuri. Icyantunguye, ubwo nari kumwe na mama turimo kuganira mbona wa mukobwa araje, ngira ubwoba ko mama namubona arahita andakarira, kuko yaramwumvaga ariko ataramubona.
Yangezeho arampobera asuhuza mama.

Mama; umva uyu mwana mwariganye?
Njyewe: yego. Nako , simbyibuka neza.
Mama : mwana wanjye ko utambwira ni iki? Mbwira ntakibazo.
Njyewe: ni wa mukobwa mwambujije ko dukundana.
Mama: yooo! Ukuntu ari umwana mwiza, rwose nimwikundanire. Uraho mukazana mwiza?
Uwo mukobwa: meze neza mama! Andi makuru?
Mama: amakuru ni ay’uburwayi, nukuri muzikundanire mbifurije umugisha w’Imana.

Byaranshimishishe cyane, guhera ako kanya uwo mukobwa ambwira ko ankunda, nanjye mbimuhamiriza imbere ya mama wanjye ko mukunda. Hashize amezi atatu ajya kunyereka iwabo mu Mutara, anyereka ababyeyi be turamenyana, kugeza ubu yabonye akazi muri hoteri dore ko yari yarize ibijyanye n’amahoteri, nanjye ubu mfite akazi turi kwitegura kurushinga vuba aha.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza