URUKUNDO RUDASANZWE

Yanditswe na
Kuya 10 Gashyantare 2016 saa 11:42
Yasuwe :
0 0

Nta gihe kiryoha nk’icyo kurambagiza ariko bikaba akarusho iyo urambagiza ufite intego ihamye.
Umutima mwiza wuje urukundo iyo uguhitiyemo uwo ukunda ukagira intego yo kurushinga(urugo),ugatangira ubimubwira wowe birakuvuna kenshi kuko akenshi nyine we uba umutunguye dore ko na kenshi aba atari anakuzi.

Umunsi umwe nagufatiye isafari(urugendo) njya ku Rwesero n’amaguru namanukiye i Rutare. Mu kumanuka ako gahanda nageze hejuru ya Rwesero bwije mbona ndi mw’ikorosi rirerire nitegereje mbona bishoboka kuba hari akayira kahagera ntakomeje umuhanda.Nibaza uwo ndi bubaze inzira(kuko bwari bwije),nabonye umugore wari hafi ndamwegera mubaza niba yandangira akayira kangeza ku Rwesero.

Muri ako kanya yariganyiriye aribaza ati’ubu se ninde uri bukwereke ko hano haba abakobwa gusa?”.Ansaba kujya mu nzu ngo mbe ntegereje,ndinjira mu kwicara anzanira ikigage mu gacuma mba ninywera.
Agikomeje kwibaza uri bunyereke inzira abona murumuna w’umugabo we araje maze amusaba kujya kunyereka inzira.
Ariko ncyicaye aho ngaho nabonaga muri koridoro abakobwa bahengereza uko bakurikirana mu burebure.Muri bo hari uwo nateye imboni numva ndamubengutswe.

Nyuma twarahagurutse jye na wa mugabo turamanuka turi mu nzira aza kumbwira ko yumva anyishimiye kandi ko no mu bukwe afite kuwa gatanu (dore ko uwo munsi hari kuwa gatatu) ngomba kumuherekeza agiye gusaba no gukwa.

Narabimwemereye,umunsi uragera tujya gukwa.Muri ubwo bukwe nakomeje kubona umukobwa nkumva ndamukunze ariko nje kubyigaho neza nsanga ni wawundi nabonaga muri babandi bampengererezaga muri koridoro.
Dutashye naciye agapapuro gatoya ndamwandikira nandikaho utu tugambo”Wowe nkunda nakunze kandi nzakunda,ndifuza ko wazambera maman w’abana banjye.Igisubizo cyawe kizanyongeramo imbaraga”.
Nagahaye umuhungu nabonaga biriwe begeranye musaba ko yaza kukampera uwo mwana.

Nibyatinze mu gatondo ko kuwa gatandatu nibwo navuye ku Rwesero nzamuka nsubira i Rutare. Naje gusanga uwo mwana mu nzira yambaye imyenda y’ishuri ambwira ko yiga i Rutare kuri APE GIRUBUKI.Naboneyeho umwanya wo kumwibwira,mubwira ko nitwa MAHORO Aimable nawe ambwira ko yitwa UWIMBABAZI Consolee.

Twaraganiriye nawe anyemerera ko ankunze.Twarakundanye biratinda,utubaruwa turacicikana,imitoma sinakubwira dore ko nanasanze we yaranayindushaga nubwo nanjye nibwiraga ko ntoroshye mu mitoma.
Icyo gihe nakoreraga i Rutare ndetse kenshi akajya aza mu masaha ya sasita kuba aruhukiye aho nabaga.

Yansabye kenshi ko turyamana ndabyanga mubwira ko ntashobora gusambanya umwana ukiri kwiga.Ikindi numvaga nzarongora ntarasambana.
Umukobwa yarankunze pe,kurusha hafi uko namukundaga.Mubyukuri naramukundaga cyane ariko we byari birenze kuko yaje no kumbwira ko atagitsinda amasomo kubera kuntekereza.
Nyuma nasabye Papa we ko yamwimura akamujyana kwiga ahandi kuko jye ntabasha kwimuka ku kazi.

Byarakunze iwabo bamusabira umwanya i Musanze muri APICULE.Nyuma y’ibyo umukobwa yakomeje kujya anyoherereza utubaruwa twuzuye imitoma uko agiye cyangwa avuye mu biruhuko akajya anyuraho mbere yo kujya iwabo ndetse icyifuzo cye cy’ibanze kwari ugukorana imibonano mpuzabitsina.

Nakomeje mbimwangira cyane dore ko twararanye amajoro agera nko kuri cumi n’atanu yose ariko nta mibonano.Yageze n’ubwo anyinginga anampa urugero ngo mugace k’iwabo niwe mukobwa utarabyara.Yabivuze muri aya magambo:
We:Cheri uzi ko mugace k’iwacu arijye mukobwa utarabyara?
Njyewe:None se Cherie,ubwo se urashaka kubyara ukiri no kwiga?Ko nakubwiye ko tuzakora imibonano umaze kurangiza wakwihanganye ko usigaje imyaka ibiri?(yari muwa kane MCB).
We:Ariko Cheri,ko ubanza utankunda?Kuki udashaka ko tubyara?
Njyewe:Cherie,ntabwo twaryamana rwose utararangiza kuko niyumvisha ko umukobwa akoze imibonanao mpuzabitsina akiri kwiga kandi ari mu rukundo,byamuviramo kujya atsindwa amasomo kenshi kubera umwanya munini yafata yibuka iby’urwo rukundo.

Yanyeretse ko ababaye cyane ariko aratuza.Muri icyo gitondo(kuko icyo kiganiro twakigiranaga nijoro turyamye) naramuherekeje ajya ku ishuri dore ko yari yaje noneho avuye mu biruhuko. Mugihe kitageze ku kwezi umukobwa yaragarutse anzaniye ikayi yuzuyemo imivugo yampimbiye handitsemo n’ibihe byose twagiranye.
Namubajije impamvu avuye ku ishuri igihembwe kitarangiye ambwira ko yagezeyo arandota ahanuka kugitanda ajyanwa mubitaro nyuma ubuyobozi bw’ikigo bumwohereza iwabo kuba arwariyeyo kuko bwabonaga agenda arushaho kuremba.

Yanambwiye uburyo akigera mu rugo yaryamye,nyuma Mama we aza gusanga arimo asoma iyo kayi,maze ngo arayimwaka asangamo izo nkuru zose.Yambwiye uburyo Mama we yasohotse aca inkoni araza amusohora mu buriri n’inkoni nyinshi amusaba gusubira ku ishuri,maze umukobwa afata inzira yiyizira kubanza kundeba no kunyereka ya kayi kuko atari yarigeze ayinyereka na rimwe kandi nkaba ntari nzi ko anampimbaho imivugo.

Naramuhumurije,ndamwihanganisha kandi musaba kujya kwiga no kugerageza agashyiramo imbaraga mu kwiga yarangiza tugahita dukora Mariage. Nanamwumvishije ko Mama we kumukubita atari ukumwanga,ahubwo ari uburere buri mubyeyi agerageza guha umwana we amurinda ibyamurangaza.

Nageze aho nimukira gukorera ahandi ngerageza kubimuhisha ngo mbe muhaye agahe ko kwiga agabanye ingendo zo kunsura ndetse najye nirinde ntazagera ubwo nsindwa nkamusambanya atararangiza,intego zanjye zigapfa.

Icyantangaje ni uko nyuma y’igihe gito nimutse naramuhishe aho nagiye(kuko nari nimukiye i Gatuna) yangezeho avuye ku ishuri agiye mu biruhuko.
Muri iyo minsi twararanye amajoro atatu kandi buri joro ansaba ko dukora imibonano mpuzabitsina ariko ndamuhakanira mubwira ko byanga bikunda tutazigera tubikora atararangiza kwiga segondere.

Consolee yakomeje kubabara cyane kuburyo k’umunsi wa gatatu mugitondo namuherekeje aho nari nateguye kumugeza twahageze sa tatu musezeyeho aranga nanjye binanira kugenda nawe biramunanira biza kugera sa cyenda tugihagaze aho hantu.
Kubw’amahirwe haje umugabo aradusuhuza yari atwaye imodoka y’uruganda rw’icyayi,atubaza aho tujya mubwira ko Consolee arimo ajya ku Rwesero,umugabo atwemerera kumugeza ku cyamutara.Nasabye Consolee ko bajyana aranga ariko ndinginga aremera.

Ikiruhuko kirangiye umukobwa yaragarutse araharara mugitondo akomeza ku ishuri. Kuko muri uwo mwaka aribwo yari kurangiza,yagiye mwibukije ko agomba gushyiraho umwete akazatsinda ubundi tugahita dukora marriage nta kabuza.

Ni ukuri iyo m’urukundo ugizemo intego zihamye,rurakuryohera rukakubera rwiza.
Uyu mukobwa twagiranye ibihe byiza pe.Iyo yanyingingaga ngo dukore imibonanano narebaga uburyo yifashe,nkumva akajwi abimbwirisha kandi kenshi twabaga tunaryamye,nkumva mbaye nk’ufashwe n’amashanyarazi,ariko nkabyanga kuko numvaga muby’ukuri nidusambana atararangiza,kwiga bizamunanira ajye yumva yaza tukiryamira gusa bityo amaherezo nkazamurongora atarangije bikamvuna nshaka uburyo arangiza kwiga.

Uru rukundo twembi rwaraturyoheye,cyane ko yari afite na barumuna be baje kunkunda cyane ndetse na Papa we yari yarankunze kuko namugiriye inama yo kwimurira umukobwa we ku kindi kigo,maze akabona ko m’ubyukuri ntagahunda zo gutesha umutwe umwana wabo.

Nyuma yaho amaze kurangiza,hashize igihe gito abona akazi m’Umutara binatuma twunguka imbaraga zo gukora marriage.
Tariki ya 27/09/2007 twakoze marriage imiryango yombi iranezererwa cyane,k’uburyo papa we yahise aduha inka ngo ibe ikimenyetso cy’uko yishimiye kurushaho urukundo rwacu.

Mu gihe marriage yari yegereje,umukobwa yaje kumpamagara kuri terefone ansaba imbabazi uko yagiye ansaba ibyo ntashakaga(imibonano) nyuma nakomeza kumwangira we ngo akumva ko ntanamukunda ndetse ngo ntamukeneye.
Umva uburyo yambwiye”Cheri,niba hariho abandi basore batekereza nkawe ibyaribyo byose bazajya mw’ijuru.Ni ukuri rukundo rwacu rwambereye urudasanzwe”.
Ubu twubatse urugo rw’amahoro n’amahirwe,dufite abana batatu beza cyane kandi urugo rwacu ni intangarugero mu kagari dutuyemo.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza