URUKUNDO RWISHAKIYE INZIRA

Yanditswe na
Kuya 10 Gashyantare 2016 saa 01:32
Yasuwe :
0 0

Mu buzima nahuye n’abakobwa benshi tukibwira ko dukundana ariko mu by’ukuri nta rukundo rwari rundimo ,ahubwo nuko numvaga ntashaka kuba jyenyine.

Muri bo twabaga turi kumwe bose, nta n’umwe twamaranaga amezi arenze atatu kuko iyo nakubonagaho imico mibi nahitaga mbivamo, bitadinze nkaba mbonye undi.
Burya ngo ibijya gushya birashyuha, kubera gusabana cyane no kugira inshuti nyinshi , umunsi umwe twari turi gutegura igikorwa cyo kujya gusura abarwayi CHUK , kandi ninjye wari ubikuriye. Twari twategetse ko tugomba kugenda twese twambaye imipira isa.

Hari umukorwa wari ugiye kumpa umupira we ngo tuwandikeho nk’uko iyacu yari yanditseho. Nagiye kumureba ndi kumwe n’inshuti yanjye y’umuhungu ya hafi.

Tumaze kubonana nabwiye uwo muhungu buhoro nti “Urabona uburyo uriya mukobwa ari mwiza, buriya murumuna we ni mwiza cyane kumurusha”, kandi ni ukuri ntitwari tuzi ko anafite murumuna we.

Twamaze kumusezeraho mbwira uwo mukobwa nti ‘unsuhurize murumuna wawe’ na we mbona arabyemeye aseka ngo araza kubikora. Yahise ambaza niba murumuna we muzi, maze ndiyemera mubwira ko muzi ari nayo mpamvu musabye kumunsuhuriza.

Nti “ Umva sha urumva ntamumenya koko? Reba ukuntu uri mwiza buriya we birahebuje”
Bidatinze rero uwo mukobwa kuko twaganiraga cyane twitana mushiki ( sister) na musaza ( brother), nanyuzagamo nkamubaza amakuru ya murumuna we, akambwira ko ameze neza ndetse agacishamo akanyereka amafoto ye kuri Watsapp.
Nyuma rero sinzi ukuntu twaje kunyura iwabo ndi kumwe n’izindi nshuti zanjye, tuhageze ndamubwira ngo bite ko utazana sheri (Cherie) ngo musuhuze (namwitaga sheri nubwo tutari twakabonanye cyangwa ngo tuvugane).

Bidatinze nagiye kubona mbona umukobwa mwiza w’imibiri yombi aje kudusuhuza. Mubonye numva ibintu binyirukanse mu mubiri , mera nk’igisusa gikubiswe n’ubushyuhe.

Buri wese uko bamusuhuzaga, yagenda yivuga izina, ariko njye angezeho yahise avuga ngo ‘wowe nari nkuzi witwa Ishimwe’, ntangazwa n’ukuntu yamenye, nanjye ku mutima nti uyu ni we Ange bambwiye.

Nyuma twarahavuye ubuzima burakomeza bisanzwe, ariko Ange yari yaratwaye ubwenge bwanjye.

Rimwe ubwo nari ndi kwirebera filime, nagiye kubona mbona nimero ntazi irampamagaye, mba ndayitabye.Nabanje kuyoberwa uhamagaye, ariko nyuma aza kumbwira izina rya mukuru we, mpita menya ko ari Ange.
Twakomeje kuganira, nza kumubwira ko namukunze, ariko agirango ni imikino. Nakomeje mwumvisha ko ntari gukina, arambwira ngo nimbe ndetse hari aho bamutumye turongera kuvugana.

Akimara gukupa nasigaye ntekereza uburyo nza kumubwira uburyo namukunze. Bidatinze yarongeye arahamagara turaganira ndetse mugezaho icyifuzo cyanjye numva abyakiriye neza, ariko ambwira ko aza kunsubiza neza ku mugoroba.
Bidatize Ange yaje kwemera kumberera umutuzo,urumuri, umukunzi nanjye musezeranya kumubera Umunezero mu buzima bwe bwose.
Inzira y’umusaraba twanyuzemo
Nibwiraga ko kuba mukuru wa Ange twari dusanzwe turi inshuti byibuze azishimira urukundo rwanjye na murumuna we ariko siko byaje kugenda, kuko ahubwo niwe warurwanyije bikomeye, anyangisha ababyeyi babo baranyanga bikomeye ngo ndi Umusitari ,ikirara n’ibindi byinshi.

Nyuma naje gusanga Ange na mukuru we badahuje se, ari nabyo bituma mu rugo iwabo batamukunda. Ange afite bakuru be bane kandi iwabo barifashije, ariko imirimo yose yo mu rugo yayikoraga wenyine bakuru be biyicariye, yasaga n’umukozi wo mu rugo iwabo.

Mu muryango we bakomeje kunyanga, ndetse Ange agerageza kwiyahura ariko ndamubuza, ngo ntiyashoboraga kubaho atamfite.

Uko twabyikuyemo

Burya ngo urukundo ni nk’amazi rwishakira inzira. Bitewe n’urukundo twakundanaga, twagerageje gushakisha uburyo bwose bwadufasha ngo ababyeyi be bankunde.

Negereye abandi bo mu muryango we mbagira inshuti, ndetse biza kugera no kuri mukuru we ndamuganiriza, anyemerera ko ari we wanteranyije n’ababyeyi babo ndetse anansaba imbabazi, kandi yemera ko azasubiza ibintu mu buryo.Yemeye kandi kureka kujya bavunisha Ange nkuko nari mbimusabye.

Ubu hashize amezi atatu tumeranye neza n’umuryango wa Ange, turasurana kandi bishimiye urukundo rwanjye n’umukobwa wabo.
Kubera ko nkiri kwiga, twihaye ko tuzakora ubukwe muri 2020 tugatumira inshuti n’abavandimwe tukabereka ibirori.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza