WOWE NAKUNZE, MURAGE NATUNZE

Yanditswe na
Kuya 11 Gashyantare 2016 saa 03:02
Yasuwe :
0 0

Buri jambo ryose nasomaga, amarira yarisukaga. Numvaga ntasobanukiwe neza ibyo amaso yanjye yarebaga. Byari agahinda n’umubabaro. Bwari bwo bwa mbere Uwicyeza ambwiye amagambo aremereye, ambwiye ko atakinkunda, ko abona tudashobora kuzabana, ari byo nari naramusabye.

Yari yanyandikiye ibaruwa ikubiyemo agahinda yavugaga ko yatewe no kuba yaramenyanye nanjye. Bwari bwo bwa mbere nkundanye n’umukobwa akaba ari we utinyuka kumbwira ko atakinkunda. Bwari ubwa mbere bimbaho!

Hari ku mugoroba ntashye i Nyamirambo mvuye ku kazi, mu kavura kajojoba. Ngikingura umuryango nsanga ku meza iwanjye harambitse ibaruwa ifunguye, iri kumwe n’indabyo z’ibara rimwe ry’umweru. Nta wundi yari igenewe, yari ibaruwa Uwicyeza yari yanzaniye, kuko yari asanzwe aca iwanjye agasiga arambitse impano ku meza.

Ntawe utari umuzi mu muryango, niwe wari inshuti yanjye magara twasangiraga byose. Umutima wanjye wari umaze igihe wibaza niba koko akinkunda, kuko turari tukimeranye neza. Igitima cyahise kinsimbuka, ngifungura nsangamo amagambo y’urucantege, ambwira ko yifuza ko ubucuti bwacu bwahagararira aho, ko ntazongera kumuhamagara ukundi.

Byari bigoye kubyakira,kuko sibwo butumwa numvaga nifuzaga kwakira muri icyo gihe, nubwo urukundo rwacu rwacumbagiraga bwose.
Ari wowe wabigenza ute? Nahise ncika intege, numva nzinutswe n’iby’urukundo byose.

Inshuti zanjye zahoraga zingira inama, zimbwira ko nkwiye kurekana na Uwicyeza, ariko kuri njye numvaga ko mu gihe ugiranye ikibazo n’uwo ukunda icy’ingenzi atari ugutandukana, ahubwo mukwiye kwicara mukabicoca.

Nyuma y’umwaka umwe narazinutswe ibyo gukundana naje kuza kumenyana na Francine, duhuriye mu kazi muri Banki y’Abaturage y’u Rwanda. Yakundaga kunganiriza ku buzima bwe, akambaza ubwanjye, nuko tuza kugenda tuba inshuti gahoro gahoro.

Francine yari atandukanye cyane na Uwicyeza. We yakundaga kumbaza cyane ibinyerekeyeho, kandi njye sinabikundaga habe na gato! Yajyaga ambwira ko gutandukana n’uwo ukunda bisa nk’uko umunsi wira, ugahita undi ukaza, ashaka kumpindura ibitekerezo nyamara ntibyari bigishobotse.

Umutima wanjye Uwicyeza yari yarawutwaye wose, nta wundi numvaga nashoboraga kuwuha. Kera kabaye, twaje kuza gukundana na Francine, ambera umukunzi mubera undi. Yagiye anyibagiza ibihe nagiranye na Uwicyeza.

Uko umubano wacu warushagaho gukomera niko nagiye ndushaho kumukunda. Francine yanyitagaho, kandi yanyerekaga ko nta mugambi wo kuzandeka. Francine yambwiraga ko mu rukundo yagiye ababazwa kenshi, ko yakundanye n’abasore bakamuhemukira ko atifuza ko nazamubabaza.

Yari azi neza ko ntashobora kumuhemukira, kandi nanjye nibyo namusezeranyije, mubwira ko ubushobozi nibuboneka tuzahita twambikana impeta akaba umugore wanjye nkaba umugabo we.

Twaje kwiha imyaka ibiri, tuvuga ko tuzaba twamaze gutunganya ibyo dusabwa byose tukabana. Icyo gihe hari mu 2010, ari nabwo ubuyobozi bwa Banki bwangezagaho ko bwahisemo kunyohereza kujya kwiga hanze, mu Butaliyani, nkamarayo imyaka ine.

Mbega agahinda; ubuzima koko ntibuteguza. Sinari narigeze ngira igitekerezo cyo kujya kwiga hanze! Cyakora mbere yo kumenyana na Francine, ho nari narakigize, ndetse nuzuza ibipapuro zibisaba nzishyikiriza umukoresha.

Bambwiye ko bagendeye ku byo nari nanditse nsaba, kandi ko bigendanye n’ubushobozi bambonagamo ari njye wagombaga guhabwa ayo mahirwe. Nta kindi nagombaga gukora, kandi yari amahirwe akomeye ngize mu buzima.

Francine byamugoye kubyakira, ariko ambwira ko anyemerera kujya hanze kwiga, tukazakomeza gukundana, akazantegereza nkazagaruka tukabana. Umwe mu minsi ntazibagirwa, ni umunsi dusezeranaho, niwo munsi nongeye kurira, mbabajwe n’uko nari ngiye gusiga umukunzi wanjye ntabishaka.

Tujya kugenda, Francine yaramfashe arampobera, arampfumbata duhoberana twese amaso yazenzemo amarira, bitunanira kwihangana turaturika turarira.

Nkigera mu Butaliyani ubuzima bwahise buhinduka. Nasanze babayeho ubuzima butandukanye n’ubwacu. Ho, abenshi mu basore baho babaho bafite inshuti, bibanira nk’umugabo n’umugore bitandukanye n’iby’iwacu i Rwanda.

Ariko kandi, kuba kure ya Francine byaje kutubera imbogamizi, umubano wacu ugenda uzamo agatotsi, nuko nza gukundanirayo n’undi mukobwa w’umutaliyani witwa Karaviti.
Nyuma y’amasomo naje kugaruka mu Rwanda, nzanana na Karaviti twarashyingiranywe, nsanga na Francine nawe yarashatse. Ubu tubana na Karaviti tumaze no kubyara umwana kandi urukundo rwacu rugenda rurushaho gukura ijoro n’umunsi, twifuza ko rwarushaho gukomera.
Karaviti ndamukunda, sinteze kumureka; niwe mizero y’ubuzima bwanjye.

Buri tariki ya 14 Gashyantare, ku munsi w’abakundana mba numva namugenera impano nubwo rimwe na rimwe bitajya bikunda ku bw’akazi kenshi ariko mba numva nifuza kumwitura urukundo yampaye. Nk’uko umubiri utabaho nta maraso awutemberamo numva nanjye ntabaho ntamufite. Nzamukunda muteteshe, mutoneshe, niwe buzima bwanjye.

Mpora nsaba Imana ngo izamundindire ubuzima bwe bwose, nzakomeze kumuba hafi, mwiteho, nite no ku muryango wanjye.

Amateka yose wacamo y’urukundo wihangane uzabona ugukunda kurusha abandi mwishimana; ntugaheranwe n’agahinda uwo wakundaga nagutererana ntuzate icyizere, Imana igera aho ikakumva ikagusubiza. Karaviti niwe nakunze, niwe murage natunze!


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza