YAMPANAGUYE AMARIRA Y’URUKUNDO

Yanditswe na
Kuya 11 Gashyantare 2016 saa 07:40
Yasuwe :
0 0

Yakomeje ambwira ati : Muvandimwe,dore ugize amahirwe ubonye akazi nyuma y’imyaka myinshi uri mu bushomeri , uzabe umukozi ushimwa kandi wubaha bose kandi wibuke ko usize inshuti yawe i Kigali

Naraye niteguye, Erneste umukunzi twari tumaranye imyaka itatu turi mu mushinga w’ubukwe yazindutse aza kumperekeza angeza Nyabugogo. Saa kumi n’ebyiri nibwo nahagurutse Nyabugogo nerekeza i Nyaruguru. Nkigerayo nakiriwe neza n’abakozi bagenzi banjye ngira amahirwe yo kubona icumbi hafi y’akazi. Yari inyubako y’ igipangu kirimo imiryango 10 icumbikira abakozi batandukanye .

Ishyaka n’umuhate byo gukora akazi byatumaga nzinduka kandi ngataha bwije. Urukumbuzi rwari rwose , ngihembwa aya mbere nihutiye kugaruka Kimisagara kwa mukuru wanjye wamfashije ngo mushimire.

Nkimara kugera mu rugo, telefoni yarampamagaye,mu kwitaba numva ijwi rituje “Nitwa Mutangana Clement, umuturanyi mu gipangu. Nukwihangana ntabwo twabashije kubonana ngo ngusobanurire uko ibintu bya hano bigenda,nari mfite akazi kenshi ngataha bwije , nari ngeze iwawe nsanga udahari nje kukubwira uburyo twishyura amazi n’umuriro”

Yakomeje ambwira ko iyo tariki ariyo bayakusanyiriza hamwe akaba ariwe ubikurikirana maze ambwira ko ayanjye ayantangira nkazayamwishyura nagarutse.
Nkihagera nabajije abandi umuryango wa Clement. Umuryango wa mbere ukinjira niho yabaga. Narakomanze mbona umusore utuje arakinguye ampa karibu ariko kuko nari nuzuye ivumbi sininjiye twavuganye ahagaze ku muryango ambwira bike ku buzima bwo mu gipangu, yongeraho ko ariwe bagize ushinzwe umutekano. Numvise binsekeje ndamwenyura maze muha amafaranga ndamushimira nkomeza nerekeza mu nzu yanjye.

Clement wakurikiranaga imibereho myiza y’ababaga mu gipangu nawe ahacumbitse, yasabanaga na buri wese, kandi igihe cyose akarangwa no gutera urwenya. Ntiyahwemaga kumbaza niba maze kumenyera icyaro.

Hari ku wa gatandatu saa sita ubwo Erneste yazaga kunsura bwa mbere.Nagombaga kumwereka abaturanyi by’umwihariko Clement nka chef w’igipangu .Byari ibyishimo kubona umukunzi yaje kunsura akagirana ubusabane n’abavandimwe nari narungutse. Clement ntiyahwemaga kumbaza amakuru ya Erneste cyane ko yari yahavuye babaye inshuti, akanyibutsa kuzirikana ko n’ubwo ari kure ngomba kumushyira ku mutima. Yabaga akangurira buri wese gukunda akazi kamuzanye, ibyo byatumye mubonamo umujyanama udasanzwe.

Erneste wari warantwaye,twitegura kwambikana impeta yahoraga angaragariza urukundo mu magambo meza yambwiraga n’ubutumwa kuri telefone akansura kenshi n’ibindi , Hari hashize amezi abiri tudaherukana niteguye kongera kubwira no kubwirwa amagambo meza y’urukundo twabwiranaga atari kuri telefoni…

Tutaravugana byinshi nagaruye ubwenge amfashe mu maboko ambwira ati “ Rwose umbabarire urabizi ko nagukundaga ariko ihangane unyumve nakoze ikosa ryo kumutera inda ya kabiri ihangane tube tubihagaritse.. ”. Ibindi bisobanuro yakomeje kumpa sinabyumvise kuko numvise ntaye ubwenge.Nahise ntaha mbwira mukuru wanjye ibyambayeho arankomeza, anyumvisha ko nzabona undi ariko buri munota nabaga ndi gushushanya ubuzima nabanyemo na Erneste uko namukunze n’ukuntu yampemukiye.Numva nzinutswe gukunda.

Amarira n’agahinda byari byose iyo week-end ntasohoka , ariko kubera uburemere bw’akazi nagomba gukora kuwa mbere , nasubiye i Nyaruguru ku cyumweru nimugoroba. Sinongeye kuboneka cyane mu gipangu natahaga bwije kandi narahindutse ntakivuga.
Iminsi yaratambutse, rimwe ngisohoka mu biro,nabonye ubutumwa kuri telefone “ndabizi ko ubabaye ariko humura uzabona uguhoza.Brother Clement”.

Mu by’ukuri, siniyumvishaga uko yamenye amakuru yanjye, nageze mu gipangu nsanga yicaye hanze mubwira ko ubutumwa yampaye ashobora kuba yibeshye aramwenyura arahaguruka amfata ku rutugu aranyongorera ati “Humura uriya siwe bucura mu bahungu, humura mukobwa mwiza”.

Clement wakurikiranaga amakuru yanjye ntabizi, yatangiye kumba hafi maze ubutumwa bumpumuriza, amagambo meza kurusha ayo nabwiwe bituma numva igihu cy’agahinda kigenda cyeyuka buhoro buhoro ku mutima.

Nabonye konji imara ukwezi ntaha i Kigali.Ubwo nasuraga inshuti nta kindi bambazaga atari ubukwe byongera kubyutsa agahinda natewe na Erneste . Bamwe nkababwira ko tubirimo abandi nkababwiza ukuri. Clement wari umaze igihe anyitaho kandi aziko ndi muri konji yongeye kunsetsa ambwira ko hashize umwaka wose atambona amenyesha ko azaza kunsura i Kigali ariko ntibyakunze kuko nari narapanze gahunda yo gusura imiryango yari mu yindi ntara. Bari biteguye ko nje kubatumira ariko kuri jye byari agahinda.

Konji yararangiye nsubira mu kazi, ubwo nageraga aho taxi zihagarara , mu gihe ndi kureba umu motari wangeza aho ntaha, Igikapu nari mfite mu ntoki numvise gifashwe n’umuntu wanturutse inyuma n’ ijwi rituje “wivunika naje kukwakira Mutarutwa nakunze urudakuka nkagukumbura ubudasiba”.

Nakebutse ngo ndebe umvugishije numva umusaya wahuye n’uwa Clement arampobera ati n’ubwo umaze imyaka itanu I Kigali ndumva igera kuri 20. Yahise amfata ukuboko twerekeza aho moto ye iparitse naherutse nyurira sinamenye uko tugezeyo, yagendaga ambwira amagambo meza yageraga ku mutima nkumva ni nk’umuti uvura ubushye.

Tukinjira mu gipangu ntiyaretse ndenga umuryango we,yaranyinjije azana amazi ankarabya intoki ati “Nyemerera ndebe ko utahindutse Karabo keza kaberanye no gutakwa mu mutima wanjye”.

Yaranyitegereje kugeza ubwo numvise isoni zose zije nipfuka mu maso. Yari yateguye ifunguro ryiza, natunguwe n’uko nasanze hari ibigori Atari ku mwero wabyo, ambwira ko yabitumije kure kuko yari azi ko mbikunda.

Yarantamitse ,tumaze gufungura aramperekeza anyinjiza mu nzu arambwira ngo “Waranyuze bidasubirwaho”. Umutima wanjye wari watangiye gutwarwa ariko nakubita agatima kuri telefoni ahora yitaba umuntu yita Cheri n’utundi tuzina n’ibyo Erneste yankoreye nkumva ntacyo bivuze.

Nari ngiye mu misa ya kabiri ubwo abantu 4 bari bahagaze imbere ya Kiliziya baganira harimo babiri dukorana, muri bo nabonyemo umusore wari uberewe w’uburanga buhebuje afite inseko nziza ari kubaganiriza,uko nabegeraga mbona ni Clement twari tumaranye umwaka n’igice ntaramwitegereza neza.

Sinabashije kubipfana nkiva mu misa nahise mpitira ku rugi rwe rwari rwegetseho ndakingura, yari mu cyumba arasohoka asanga mpagaze muri salon, kubera igihagararo n’uburebure narisumbukuruje ndamwongorera nti “Uri mwiza cyaneee” yahise amfata aranterura arambwira ngo “Urakoze kumbwira ijambo ridasanzwe icyampa nkaba umwiza wawe”.

Umunsi umwe yansohokanye ahantu nyaburanga muri ako gace, atangira kunyibutsa imikino yose nakinnye mu bwana harimo kibariko, mabigibigi ageze kuwo kwihishanya ansaba ko nakwipfuka nkabara akihisha nagejeje ku icumi ndareba ,nsanga afite agatambaro k’umweru de , arambwira ngo ndabizi warababaye, wararize kuko wahemukiwe, amarira ntabwo ari ku maso ari ku mutima, nanjye singuhanagura ku maso ahubwo ndakumenyesha ko urukundo nagukunze rurusha kwera aka gatambaro. Nzaruhanaguza amarira yose warize mu rukundo. Nyemerera umpe umwanya maze wibagirwe icyitwa kubabara.”

Namusubije ngira nti "Wamaze gusiza ikibanza mu mutima wanjye ngwino uturemo utuzemo uwo mutuzo nibwo butunzi butazasaza”. Hakurikiyeho ibihe by’umunezero gusa. Clementine mushiki we yaje kumusura maze arambwira ati “Uyu niwe wumvaga nahoraga nita Cheri wanjye, niwe ungwa mu ntege”.

Urukundo ruzima rwaravutse, anyereka umuryango nanjye mwereka uwanjye, baradushyigikira dusezerana kubana akaramata imbere y’amategeko n’imbere y’Imana,ankunda bidasanzwe yambereye umubyeyi kandi ni umujyanama Imana yampaye.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza