YAMPINDURIYE UBUZIMA

Yanditswe na
Kuya 9 Gashyantare 2016 saa 11:09
Yasuwe :
0 0

Igihe kimwe ntangira umwaka wa gatatu wa Kaminuza, naje gukandagirwa ubwo twari ku murongo tugiye gufata ifunguro ryo ku mugoroba, bitewe n’amahane n’urugomo nagiraga ubundi uwo muntu yagombaga kuba angoreweho dore ko benshi banyitaga Osama kubera imyifatire mibi yankemangwagaho.

Nahise ndakara kuko hatabonaga neza ariko ndebye mu maso mbona ni umwari utagira uko asa ahubwo ndamushimira nti urakoze! ibintu bitari bisanzwe mu mico yanjye nawe mbona ampanaguye ku rukweto n’agatambaro nsa nk’uhinze umushitsi n’ubwoba kuko zari zisa nkizishaje cyane biteye isoni ariko ndiyumanganya dukomeza urugendo.

Aha wakwibaza uti nari umuntu uteye ute?

Ubusanzwe abari banzi bose kuva na kera nari umuntu urangwa n’ubugome buvanze n’uburwanyi, umusinzi kabuhariwe, kutiyitaho bivanze n’umwanda ku mubiri no kunywa itabi birenze ku buryo ntawenyegeraga cyane kubera umwuka mubi wandangwagaho.

Muti se uwo mukobwa mwongeye guhurira he?

Uwo mwari yari mushya mu kigo kuko yari aje kurangiza icyiciro cya 2, nagiye kubona mbona yinjiye mu ishuri ryanjye afitiwe urugwiro na bose cyane abasore kuko yari afite uburanga buhebuje mwibutse ankandagira numva nshaka ko twazabyumva kimwe ariko nareba uko nitwaraga nkumva nta cyizere nakwiha imbere ye. Muri iryo shuri nari umuhanga cyane ku buryo barwaniraga ko mbasobanurira amasomo.

Natangiye kujya ntangira kwambara utwenda tumeshe, gusokoza, gutera sirage inkweto, kwirinda intonganya mu ishuri no gukopera byose mbikora kugira ngo ngaragare neza imbere ye ariko ibyo byose namaze ukwezi tutaravugana ho na rimwe mu gihe abasore bose wasangaga bamuganiriza banamutereta bityo nkanafuha kandi tutaziranye.

Muri icyo gihe cyose umukobwa yakundaga kundeba mu gihe twabaga twiga nanjye namureba tukagira isoni bityo niyemeza kuzamwibutsa wa munsi wa mbere ankandagira. Najyaga ngerageza kuba namubona ari wenyine ariko nkabona ari mu kigare n’abandi kuburyo nigeze kugeza saa tanu z’ijoro nkimucunga ngo mubone wenyine ariko biranga, rimwe bya mahirwe mbona arasohotse avuye kwiga wenyine ndamwegera mwibutsa ankandagira ati ndabyibuka ariko arigendera nsigara mfite agahinda kubera ko ntakindi yongeyeho.

Abenshi mu banzi batangiye kunyibazaho kubwo kwiyitaho nagaragazaga, ituze, no kubana neza ndetse nubusinzi ndabureka ntagira kujya nsoma gake mu kinyabupfura no kutanywa agatabi ku manywa.

Wakwibaza uti se byakomeje bite n’uwo mukobwa watinyaga?

Mu isomo ry’ubushakashatsi, uwo mwari baduhaye insanganyamatsiko nyihuriraho nawe, umukobwa duhana gahunda ya saa mbiri z’ijoro turicarana ariko yandeba mu maso akagira isoni nanjye simurebe kubera ko nabaga natumuye ku ntore, gusa birangira musobanuriye iryo somo yumva aranyuzwe.

Ibyo byararangiye akajya ansaba ko twajya twigana amasomo yose nkajya rimwe mwima akanya kubera ko abanyeshuri bari batangiye kujya banserereza ngo narobye n’andi magambo yo guserereza y’abasore ku buryo naguraga agashati gashya ngatinya kukambara kubera ko bahitaga bakomera ngo ndi gutereta kandi bigakaza n’umurego kubera ko namusabaga kujya ahantu hatuje mu kwirinda abivugira ibyo bishakiye akaba ari nabyo byatumaga badukeka amababa ariko ntibabihe agaciro kuko bari banzi ho kuba ntakwigondera umwari mwiza nkuwo cyangwa se ngo abe yanyemera nk’inshuti n’ukuntu itabi ryari ryaranzonze.

Kubera ko uwo mukobwa yasengeraga akanaririmba mu barokore, nahise ntangira gusengerayo byo kujijisha ariko natunguwe no gutangira kunyurwa n’inyigisho bavuga uwatsinzwe n’ijambo ry’Imana nkajya mpaguruka njijisha ariko umwuka w’Uwiteka urantwara nkajya mbikora by’ukuri.

Umukobwa umwaka wose twarabanye tugirana inama muri byose ariko nta bya ndagukunda birimo ahubwo tubana nk’abavandimwe kuburyo n’amabanga yose twayabwiranaga nkatinya kumubwira iby’urukundo nawe kandi bikaba uko ariko tukaba twararebanaga akana ko mu jisho gahatse byinshi.

Muri icyo gihe , abasore bamwifuzaga batangiye kujya bantera ubwoba , ubutumwa bwanditse, intumwa zishinzwe kunserereza, abambwira ko nzakubitwa ninkomeza gutesha umutwe ngo umwana w’Afande bityo ntangira kugendera kure uwo mwari kugirango niheshe amahoro.

Umukobwa yatangiye kubibona gutyo akajya ambaza impamvu ntashyushye nk’ibisanzwe nkamwereka ko ari ibisanzwe. Impano yabonaga zose ziturutse ku bamwifuza ninjye wazifunguraga ndetse n’ubutumwa yahabwaga n’abandi yazaga kubimbwira.
Ibyo byatumye twiyumvanamo ariko tukabikora nk’abavandimwe , nari nararetse za ngeso mbi zose natangiye mvuga zari zarangize umuntu udasobanutse, dore ko kandi nkurikije abamushotoraga n’abamusabaga urukundo , abasore beza b’abakire iwabo, abafite amamodoka byatumaga mufata nk’umujyanama gusa kuko nabonaga ibyo ankorera nkumva birandenze dore ko akenshi twifurizanyaga kuzashaka neza.

Yaje kuzana umukino bita kakawete mu ishuri aba ariwe ukoresha amatombora, nyuma nkajya mbona impano nyinshi, amabaruwa arimo utugambo tw’urukundo, n’udukorwa dutandukanye duteye ubwuzu twerekana ko nakunzwe byo gupfa. Kubera uburyo twisanzuranagaho nahitaga mbimubwira nkanabimwereka nawe akambwira ibyo yahawe n’uwe ariko simenye uwantoye gusa amenera ibanga ambwira ko uwantoye amuzi ko nimugurira(byo gutebya) azamumbwira.

Yaje kumbwira ko umukobwa unkorera ibyo byose yamubonye abikora (yari azi ko nkunda kumupinga) bituma nanga uwo mukino nkawurwanya nkanashaka no kubyica ariko umukobwa akansaba imbabazi ngo sinkitware ntyo dore ko namwubahaga. Igihe cyo gusoza uwo umwaka cyarageze ari naho twagombaga kwibwirana nanze kujyayo ambwira ko mbuze byamubabaza ariwe wabiteguye ati mbikore kubera we nanjye ndamwubahiriza.

Mu gihe cyo kwibwirana natunguwe nuko byamugezeho mbona asutse amarira ati musaza wanjye(ninjye yavugaga) niwe natoye abantu bayoberwa ibyo aribyo aza kumpobera ampa impano zitangaje; impundu , amashyi sinakubwira ku buryo uwo mwaka ntabeshya ko aritwe witiriwe kubera ako gashya. Nyuma yaho umukobwa yaje kumbwira ko yantoye abishaka ko yari yarabuze aho abivugira kugirango mbyemere yereka n’abandi basore uwo yashyizeho umutima.

Aha wakwibaza uti byarangiye bite?

Mu gihe twiteguraga gutangira umwaka wa nyuma yaje kurwara bituma agira umwaka w’imfabusa ariko ku ishuri abantu bose babonaga ko nabuze umuntu, nkiga nta mbaraga mfite, amanota aragabanuka nagiraga ahari. Nahoraga musura iwabo nubwo mbere byabanje kugorana nkajya nirukanwa(yari ikinege kandi mu rugo rwabo harindwaga n’inzego z’umutekano), ariko baje kwemera ndetse igihe nabaga namusuye yasaga nk’ukize, bityo babona yarembye rimwe nkumva barampamagaye ngo nze, kandi ninjye bumvaga ahamagara gusa bityo bituma bamfata nk’inshtuti y’umuryango ikomeye.

Kaminuza narayirangije mpita mbona akazi keza nawe ajya kurangiza wa mwaka kandi akenshi buri wikendi najyaga njya kumwigisha kuko twari twaramaze kwiyumvanamo bya nyabyo.
Kuva yarwara sinigeze nsubira mu ngeso mbi, ndi indakemwa mu mico no mu myifatire , haba mu kwiyubaha, no kuba inyangamugayo ndetse nirinda ibintu byose byampesha isura mbi dore ko ubu ndi umurokore ukomeye utishushanya.

Kugeza ubu nawe yararangije kandi twese dufite akazi turizera ko Imana yo yaduhuje izakomeza guha umugisha urugo rwacu kuko ubu twakoze ubukwe kandi tumeze neza biturutse kuba yarampinduye umugabo uhamye afatanyije n’ubuntu bw’Imana.

Imana ihabwe icyubahiro!


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza