YARI UWANJYE

Yanditswe na
Kuya 11 Gashyantare 2016 saa 12:37
Yasuwe :
0 0

Hari mu mwaka wa 2008 mu kwezi kwa Gicurasi, ubwo nahuraga bwa mbere n’umukunzi wanjye, duhuriye mu munsi mukuru w’isabukuru y’amavuko y’umukobwa biganaga.

Marita yari umukobwa w’inkumi, wari uzwi cyane, wigaga kaminuza kandi anakora akazi bisanzwe; ibi bikaba byaratumaga agira incuti nyinshi zitandukanye zirimo abo bigana n’abo bakorana, ku buryo ku munsi mukuru w’isabukuru ye y’amavuko yari yatumiye abantu benshi batandukanye barimo abo bigana, n’abo bakorana ndetse n’izindi nshuti ze zitandukanye .

Marita sinari muzi, ariko nakoranaga n’inshuti ze, ku buryo zatumiwe sikansaba kuziherekeza.

Twageze mu birori nyuma y’amasaha y’akazi. Nari umukozi ngendana n’abakozi, ku buryo n’aho twicaye mu batumiwe, twari ahiherereye mu cyumba nakwita ko cyari cyubashywe. Abanyeshuri nabo bari bafite aho bicaye ab’abahungu, ndetse n’ab’abakobwa bari batatanye hirya no hino mu mirimo itandukanye, bateka, bakira abashyitsi, n’ibindi.

Ibirori byararyoshye karahava, bigeraho dusa naho duhuje ibiganiro, abatumiwe bose twicara hamwe, tunakirirwa hamwe. Umuriro waje kubura, haca akanya katari gato, tuza kumurikirwa.

Umutima wanjye wabaye nk’utokojwe n’ibyishimo ubwo Uwigikundiro, ihogoza ryanjye yinjiraga atuzaniye itara ryo kumurika. Mu ndoro yuje urugwiro n’ubupfura yaradusuhuje twese umwe ku wundi, aherukira kuri njye.

Nasaga nk’umushyitsi mukuru muri icyo gihe kuko sinari menyeranye na bo. Abo dukorana bari basanzwe basura Marita kandi bamenyeranye n’incuti ze. Uwigikundiro yari umwe mu ncuti magara za Marita.

Mu ijwi rituje yarambajije ngo; “ese babakiriye uko bikwiye?”, abo twari twajyanye barandangariye bategereje icyo nsubiza, ariko baratebya bavuga bati turakuzi ubwo warobye bati subiza ibyo bakubajije nta kindi wongeyeho.

Uwigikundiro yari umwari ukiri muto mu maso, ufite itoto, impuhwe, umutima mwiza, gusabana, by’akarusho yari afite igikundiro kuko bose niwe bavugishaga baseka, bamwishimira bavuga inkuru nyinshi, mu mwanya muto yabonaga aje kureba abashyitsi, yasubiraga gusohoka ubona abatumiwe basusurutse kubera ibiganiro bye, yisanzura kuri bose. Abenshi mu batumiwe bamwisanzuragaho.

Njye aho nari nicaye mu mfuruka, nasaga nk’uwifashe mapfubyi, kubera ko nari mushya muri abo bantu, ariko ku mutima, nari nashize, ndimo nibaza niba abana beza ku mutima no ku mubiri bakibaho koko nk’uwo narimo ndeba!

Nibazaga niba ibyo nabonaga byari inzozi cyangwa ukuri. Si ukubeshya yari yantashye ku mutima adakomanze. Nabyita ko yari yamfashe aranyigarurira nta mbunda akoresheje.

Ibyo nibwiraga byose ntiyari anyitayeho, nari nabuze n’uburyo twahuza amaso byibura ngo mwicire ijisho; kugeza ubwo umuriro wabuze akazana itara akamvugisha, ubwo nahise nibwira ngo, byibura ntahane ibyo.

Uwigikundiro, yigaga mu mwaka wa kabiri wa kaminuza. Yari yarigeze kugira incuti yo mu bwana yamutaye ikajya gukora mu mahanga, bamaze gukura. Yari umwana w’uburere budasanzwe. Nkuko byavugwaga n’abo bigana, nubwo ataherukaga amakuru y’uwo bakundanye bakiri bato, ntiyigeze ajya mu bindi bintu byinshi, yakomeje kwiga nta bindi bimurangaza, kandi ntiyarazwiho kugira incuti ye bwite imwihererana, yariyubahaga kuburyo rubanda rwabimutinyiraga.

Nkimara kumva ibyo byose, nifashe mapfubyi, numvaga atari uwanjye ndikurushywa n’ubusa. Aho nari ndi, naribwiye ngo byibura ndibutahire kubyinana nawe gusa nishime birangire.

Nabyo siko byagenze. Mugihe nagerageje kumubaza izina yambwiye adashidikanya ko yitwa Celine. Mubajije nimero ya terefoni ambwira ko ntayo agira. Yansubizaga aseka yishimye, nkarangazwa n’uburanga bwe budasanzwe, kuburyo ibyo yambwiraga naje kumenya uburemere bwabyo ntakimubona.

Nyuma yo kwakira abashyitsi we ntiyatinze aho, yahise yitahira. Izina rya Celine yari yambwiye ntiryari ryo, yabimpishuriye hashize amezi atatu yose.

Umunsi mukuru waje kurangira, turataha ariko, natashye numva ntakiri umuntu, narimo ntekereza gusa Uwigikundiro. Namaze igihe kirenga amezi atatu nta gakuru ke mperuka. Na Marita nari nizeye ko yashoboraga kumungezaho nari naramubuze, narabuze uburyo bwose bwashoboraga kumungezaho.

Sinahwemye kumutekereza. Ijoro n’amanywa namutekerezaga nk’aho ari umukunzi wanjye twakundanye, kandi mu by’ukuri siko byari bimeze.

Nyuma y’amezi atatu naje gutungurwa nuko twahuriye mu mujyi wa Muhanga twembi dutembera, nashimishijwe nuko yanyibukaga, nanyuzwe nuko yari agifite ya nseko nziza. Dusubira mu nkuru zo kwa Marita biratinda. Ntibyatinze noneho twaje guhana nimero ya terefone.

Mu bihe byakurikiye twakunze kuvugana kenshi, kuri njye numvaga urukundo rwaratutumbye rwarabaye rwinshi. Ariko kuri we yaje kumbwira ko turi incuti bisanzwe, nubwo namubwiraga ko namukunze, kandi ko yandutiraga bose: nshika intege.

Narihebye, numva ko atari uwanjye. We yakomeje kujya ampamagara tukavugana, nubwo njye numvaga naramurakariye, akanyereka ko nta mutima mubi afite. Najyaga nibuka ibyo numvaga hirya no hino, bavuga ngo ni umukobwa utavugirwamo, ngo afite umukunzi we hanze, ngo aracyarerwa n’iwabo, ngo yananiye abasore benshi; nuko nkibwira nti: harya ndikurushywa n’iki?

Nakoreraga Muhanga, nawe ariho yiga, tugakunda guhurira mu nzira kenshi, kwifata bikananira nkibuka nongeye kumukunda.

Naje gufata icyemezo, cyo kwiva inyuma nkamukunda nta kindi nitayeho, nkamuhata urukundo nkaho ari njye mukunzi w’isezerano, ngahorana gahunda zimumpoza iruhande, nkagaragara mu buzima bwe. Ibi nabikoze igihe kirekire, ariko nari nariyemeje ko ntazongera kumubwira ko mukunda, ahubwo ko nzamugaragariza urukundo gusa.

Hashiize imyaka ibiri naje guhagarara ku kazi, biba ngombwa ko mva Muhanga, njya gutura i Kigali. Natangiye gucika intege mu rukundo, ariko ntangira kubona ko we byibura hari ikintu kiyongereye mu rukundo. Byageze aho ajya kunyereka iwabo, baranyakira, ariko nyuma nza kumenya ko batankunda, kandi ko ngaragara nk’umusongarere. Narababaye, noneho ndiheba bidasanzwe, ndavuga ngo n’ubundi nari narabibonye kuva kera: si uwanjye pe!

Haciye igihe, ngitekereza kuri ibyo, nta n’akazi ndabona, numva ubuzima buranyanze. Ariko gusa we mu bushobozi yari afite bw’umunyeshuri uri kurangiza amashuri yanyerekaga ko byibura ankunda, bidahambaye, ariko akanyereka ko anzirikana, anyitayeho.

Yaje kurangiza kwiga, nawe aza muri Kigali. Umunsi umwe muhamagara igitaraganya mubwira ko hari ikintu nshaka kumubwira kidasanzwe. Yaje yihuta, maze mubwira ko nafashe icyemezo cyo kujya mu giporisi, nkajya kure y’umujyi, kure y’abantu.

Yabyakiranye ikiniga kinshi, ambwira ko adashaka ko mujya kure, ngo ko kandi igihe cyari kigeze ngo twembi dutekereze ejo hazaza hacu.

Yagize ati: “sinshaka ko unsiga… njye nawe dufite ejo hazaza heza turi kumwe…” iri jambo ryaranyubatse, rinsubizamo ibyiringiro, ndahembuka. Ku bwanjye yasubije ikibazo nari maze imyaka itatu nibaza.

Yaje kubona akazi, nanjye nongera kubona akazi, nkorera muri Kigali, ku ishuri ryabo barambara, nitabira ibirori byabo kuva ku ishuri kugera mu rugo, ntibyatinze muri uwo mugoroba yanyerekanye iwabo nk’inshuti ye bazarushingana (fiancé).
Ibi ntibyashiriye mu magambo gusa, nyuma y’umwaka twaje kurushinga. Turatunga turatunganirwa.

Ubu iteka iyo ndebye Uwigikundiro ku munsi w’ibyishimo twibukiranya ibihe twaciyemo, bitatworoheye, akanyibutsa uburyo yambeshye ko yitwa Celine kugira ngo ntamumenyera, bikatunezeza; kumutima ngasigara ntekereza nti burya bwose Yari Uwanjye pe!


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
NTAWAZIMYA URWO ATACANYE
11/02/16 - 05:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza