Abanyarwandakazi batangije ibikorwa by’ubumuntu bikora ku mitima ya benshi

Yanditswe na Cyprien Niyomwungeri
Kuya 12 Werurwe 2018 saa 06:47
Yasuwe :
0 0

Ku Isi hari ibikorwa byinshi bitwara akayabo abantu bishimisha ariko ugasanga bibagora kwibuka ko hari abatagira kirengera, abari mu kaga, abashonje, abakeneye uwababera ijwi n’abandi bababaye.

Ibikorwa by’ubumuntu binyura Imana kuko nayo yivugira ko yizihirwa cyane no ‘gutanga kuruta guhabwa’. Hari abaguye imitima yabo barenga ugushaka kwabo bazirikana n’abafite ibibazo bitandukanye, biyemeza kubabera akabando, itara n’impamba ibasindagiza mu buzima bwa buri munsi.

Ibyo bikorwa bya kimuntu ntibabikoreshejwe no gutunga ibya Mirenge ku Ntenyo, ahubwo ni umutima uzirikana wuje urukundo rw’ikiremwamuntu n’uburenganzira kigomba. Izi ntore ni nyinshi hirya no hino ku Isi ariko none turibanda kuri bake mu bagore b’Abanyarwanda bakoze ibikorwa bigahaza ukwifuza kwa benshi.

Anna Dushime

Umunyarwandakazi Anna Dushime utuye mu Budage mu Mujyi wa Berlin, ntazahwema gusabirwa umugisha na buri wese wamumenye ku bw’ubumuntu yagize agacumbikira impunzi zo muri Syria zameneshejwe mu gihugu n’intambara n’imvururu z’urudaca ziri mu gihugu cyazo.

U Budage ni kimwe mu bihugu byahungiyemo impunzi nyinshi, aho Leta yiyemeje guha ubuhungiro abagera kuri 800, 000. Benshi mu baturage b’iki gihugu ntibishimiye iki cyemezo ndetse hari abatarashakaga ko hagira umwimukira ukandagira ku butaka bwacyo.

Anna Dushime w’imyaka 27 y’amavuko, benshi bahaye inyito ‘y’umukobwa w’umutima’, yimye amatwi ibyifuzwa n’umubare munini w’Abadage badashaka impunzi mu gihugu cyabo aha icumbi Mohamed, umugore we n’abana babo babiri. Aba bakomoka mu Mujyi wa Aleppo muri Syria.

Dushime nta bushobozi buhambaye afite. Ni umwe mu barokotse Jenoside yakorewe Abatutsi muri Mata 1994. Mu kiganiro yagiranye na CNN yasobanuye ko yahaye icumbi izi mpunzi nyuma yo gusubiza amaso inyuma akibuka icuraburindi u Rwanda rwanyuzemo muri Jenoside yakorewe Abatutsi.

Yavomye imbaraga mu kwibuka uburyo we n’umuryango we bameneshejwe mu gihugu bakagana iy’ubuhungiro muri Uganda. Muri iyi nzira y’inzitane yuje inzara n’inyota ngo bahuye n’umugabo wagiriye impuhwe nyina wari ubahungishije ari ibisekeramwanzi abafasha kuva mu maboko y’umubisha bagana iy’ubuhungiro, arabacumbikira, aranabafungurira.

Yagize ati “Nibutse uburyo mama yaduhunganye turi abana bato cyane, ni byo byabaye ubwo nabonaga turiya twana tubiri [abana ba Mohamed]”

Mu minsi ya mbere, Dushime yacumbikiye uyu muryango w’abantu bane mu nzu nto akodesha. Nyuma yaje kwifashisha Leta y’u Budage ibaha icumbi babamo by’igihe kirekire. Yakomeje kandi gukusanya inkunga mu banyamutima nka we ashakira uyu muryango ibyangombwa mu buzima.

Anna Dushime w’imyaka 27 yahawe igihembo cy'indashyikirwa kubera kwita ku mpunzi zo muri Syria zahungiye mu Budage
Anna Dushime yacumbikiye Mohamed, umugore we n’abana babo babiri bakomoka mu Mujyi wa Aleppo muri Syria
Uyu muryango wagiriye umugisha kuri Anna Dushime

Uwiragiye Kellya

Kellya Uwiragiye w’imyaka 26, ni umwe mu rubyiruko rwakoze ibikorwa by’ubumuntu binyuze mu gufasha abantu, by’umwihariko abafite ubumuga bwo kutumva no kutavuga abinyujije mu muryango yashinze witwa ‘Media for Deaf Rwanda’.

Ubusanzwe umushinga Media for Deaf Rwanda, ufite ibikorwa byinshi birimo gukorana bya hafi n’abantu bafite ubumuga bwo kutumva no kutavuga cyane binyuze mu itangazamakuru, hakareberwa hamwe uko ryatuma bibona mu bikorwa by’iterambere.

Uyu mushinga wibanda ku burezi bw’abana bato bafite ubumuga bwo kutumva no kutavuga, kugira ngo babashe gukura bakoresha ururimi rw’amarenga bityo bumvikane n’abandi bantu mu byo bakora byose.

Uwiragiye afite inzozi zo kubona nta mwana ufite ubumuga bwo kutumva no kutabona wasigaye inyuma kubera amashuri, kubashyiriraho uburyo bwo gutanga umusanzu mu iterambere, gufashwa muri serivisi zose zirimo n’izo kwa muganga no kudahezwa mu bizamini by’akazi byo kuvuga ngo ni uko bakoresha amarenga.

Mu 2015, Media for Deaf yahawe igihembo cyitwa “Celebrating Young Rwandan Achievers (CYRWA Award), nk’urubyiruko rw’indashyikirwa, na Madamu Jeannette Kagame binyuze mu Muryango Imbuto Foundation na Minisiteri y’Urubyiruko n’Ikoranabuhanga. Yanahawe igihembo n’Umwamikazi w’u Bwongereza, Elisabeth II, kizwi nka Queen’s Young Leaders Award.

Uwiragiye yahawe igihembo n’Umwamikazi w’u Bwongereza, Elisabeth II
Umushinga wa Uwiragiye wagiriye benshi akamaro bihereye no mu bana bato

Isabelle Kamariza

Isabelle Kamariza yashinze Umuryango w’Ubugiraneza ‘Solid Africa’ ufasha abarwayi batagira kivurira mu bitaro kubona amafunguro no kubakemurira ibindi bibazo bahurira nabyo mu bitaro. Uyu muryango ukorera ibi bikorwa cyane cyane muri CHUK.

Kamariza afatanyije n’urundi rubyiruko n’inshuti z’uyu muryango zirimo Rotaract Club Rwanda muri Werurwe 2010, bishyuriye abarwayi bari barabuze ubwishyu bw’ibitaro muri CHUK no ku Muhima.

Uyu muryango kandi ntubishyurira amafaranga y’ibitaro gusa ahubwo unabafasha kubona amatike abasubiza iwabo, bagaherekezwa bagatega imodoka kuko abenshi baba barageze mu bitaro bajyanwe n’imbangukiragutabara, dore ko hari n’abo usanga batazi i Kigali.

Isabelle Kamariza yashinze Umuryango w’Ubugiraneza ‘Solid Africa’ ufasha abarwayi batagira kivurira mu bitaro kubona amafunguro
Ibikorwa bya Kamariza byakoze benshi ku mutima
Kamariza (uwa mbere ibumoso) ari mu bahembwe na Imbuto Foundation mu 2013 kubera ibikorwa by'indashyikirwa

Kabanyana C. Ketsia

Kabanyana C.Ketsia washinze akaba ari na we uyobora Umuryango DCF (Dorcas Consolation Family), ufasha abana batishoboye. Abinyujije muri uyu muryango yakoranye n’abagore bakora uburaya, abereka uburyo babuvamo, bakibumbira muri koperative zatuma biteza imbere.

Muri Werurwe 2017, Kabanyana yahembwe na Ambasaderi wa Leta Zunze Ubumwe za Amerika mu Rwanda, Erica J. Barks-Ruggles, mu bagore batatu bagaragaje umurava n’imiyoborere myiza mu mibereho yabo.

Kabanyana C.Ketsia (uwa kabiri ibumoso) ari mu bahembwe na Ambasaderi wa Amerika mu Rwanda, Erica J. Barks-Ruggles

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza