Inzu z’imideli zashinzwe n’abagore zimaze kwandika izina mu Rwanda

Yanditswe na Dusabimana Aimable
Kuya 12 Werurwe 2018 saa 09:09
Yasuwe :
1 0

Uko isoko ry’imideli ikorewe mu Rwanda ryagiye ryaguka ni ko hagiye higaragaza ubwiganze bw’iyakozwe n’inzu zikomeye zashinzwe n’abagore mu buryo bwatumye muri iki gihe nta watinya kuvuga ko icyate kinini ari bo bagifite muri uyu mwuga.

U Rwanda ni kimwe mu bihugu biza imbere ku Isi muri gahunda zitandukanye zo guteza imbere umugore binyuze mu byiciro bitandukanye, ku Isi ruza ku isonga mu kubaha imyanya mu buyobozi, by’akarusho mu Nteko Ishinga Amategeko aho rufitemo abagera kuri 64%.

Si umwihariko w’Inteko Ishinga Amategeko gusa kuko no mu zindi nzego zigize ubuyobozi bw’igihugu umugore afite umugabane munini nubwo urugendo mu guteza imbere ihame ry’uburinganire rugikomeje.

Mu bindi byiciro by’ubuzima bw’igihugu, mu bucuruzi n’ahandi na ho abagore ntibasigaye inyuma, mu bijyanye n’imideli, inzu zikomeye z’abahanga mu guhanga udushya n’imyambarire igezweho uhasanga benshi bateye imboni icyashara bakihangira imirimo bahereye kuri duke kuri ubu bakaba bageze ku rwego rushimishije.

Iyo ugerageje kubarura inzu z’imideli zimaze kubaka izina mu Rwanda ushimishwa no gusanga abafashe iya mbere benshi ari ab’igitsinagore ndetse bamwe bakibarirwa mu rubyiruko ariko bihagazeho ku mufuka.

Inzu z’imideli zigezweho mu Rwanda, inyinshi zashinzwe n’abanyarwandakazi b’umwete. Muri zo harimo Haute Baso, Inzuki Designs, Seraphina, Sandy N.A, Uzi Collections, Uzuri K&Y, Ki-pepeo Kids clothing, Sonia Mugabo, Rwanda Clothing n’izindi zigenda zivuka umunsi ku wundi zose ziha akazi benshi ndetse zikagura uruganda rw’ibijyanye n’imideli mu Rwanda.

IGIHE yaganiriye na bamwe mu bagezweho n’inyungu yavuye muri izi nzu zashinzwe n’abagore, akanyamuneza ni kose kuri bo by’umwihariko benshi ni urubyiruko. Abanyarwandakazi bihangiye imirimo ndetse bagateza imbere bagenzi babo na bo bibatera ishema ku mutima ariko hari urundi rugamba batangiye kwitegura rubategereje.

Inzu ya Uzuri K&Y ni imwe mu zimaze gutera imbere mu buryo bugaragara mu zashinzwe n’Abanyarwandakazi. Kevine na Ysolde bashinze iyi nzu beze imbuto z’umugisha ku bashomeri kuko bamaze guha akazi abakozi 35, bakaba bari no kwigisha abandi 100 muri iyi minsi bazatangira umwaka utaha.

Yagize ati “Dukora inkweto bita ’sandale’ zifite umwihariko wo kuba zikorwa mu bikoresho bita (Eco friendly) cyangwa se ’organic’ bifasha kubungabunga ibidukikije. Ziraramba kandi zikunzwe n’abanyarwanda kuko zikorerwa iwacu.”

Yongeyeho ati “Imyaka izaza Uzuri K&Y izaba ari ikigo gikomeye cyohereza iby’iwacu mu mahanga. Kandi giha abantu benshi akazi. Izamenyekana ku isi hose nk’uruganda rw’inkweto rwatangiriye mu Rwanda bityo tube tubaye bamwe mubateje imbere igihugu biciye mu bikorwa.”

Mu ijambo rimwe iyo agenera ubutumwa Abanyarwandakazi n’urundi rubyiruko agira ati “Ntibakitinye!”

Iyi nzu ya Uzuri K&Y ifite uruganda i Gahanga muri Kicukiro n’iduka muri Kigali Heights ndetse yanatangije irindi ryagenewe abagenzi ku Kibuga mpuzamahanga cy’Indege cya Kigali.

Muri izi nzu zashinzwe n’Abanyarwandakazi, iyitwa Kipe-peo Kids Clothing ifite umwihariko wo kuba yibanda ku myambaro y’abana gusa. Yatangijwe na Priscilla Ruzibuka Umutashya mu 2016.

Yagize ati “Twabonye ko nta bandi bari babikora duhitamo kubikora kandi biranakenewe ku isoko ry’u Rwanda. Umwihariko wacu, ni imyenda y’abana gusa. Nta bakuru dukorera. Kugeza ubu dufite abadozi umunani n’abandi bakora imirimo yindi.”

Priscilla Ruzibuka Umutashya w’imyaka 27 yatoranyijwe nk’uwegukanye igihembo cya “Queen’s Young Leader Award” gitangwa n’Umwamikazi w’u Bwongereza. Iteranyirizo ry’imyambaro ikorwa na Kipe-peo Kids Clothing ribarizwa Kimironko ndetse ikagira n’iduka mu nyubako ya Kigali Heights.

Teta Isibo washinze Inzuki Designs nayo iri za mbere zikomeye mu Rwanda, avuga ko muri urwo rugendo bagiye kumaramo imyaka umunani bishimira ko Abanyarwanda muri iki gihe batangiye kurushaho kwiyumvamo ibyakorewe imbere mu gihugu.

Yagize ati “Tugitangira akenshi abakiriya twakiraga ni Abanyarwanda baba mu bihugu byo hanze, ba mukerarugendo n’abanyamahanga baba mu Rwanda, ariko ubu usanga n’Abanyarwanda baba imbere mu gihugu baratangiye gukunda no kwiyumvamo ibikorerwa iwabo. Kugeza ubu twatangiye no kohereza ibyo dukora mu bindi bihugu, ubu biragurwa ku kigero kikiri hasi (10%) ariko twitezeho kuzamuka mu bihugu birimo USA, Canada n’ibituranye n’u Rwanda.”

Inzuki Designs yibanda cyane ku mideli igezweho, ibikomo n’indi mitako yambarwa ahanini n’abagore. Bazwiho umwihariko w’imitako yambarwa mu ijosi ikorwa mu birere n’ibindi bikoresho biboneka cyane muri Afurika. Iyi nzu kandi izwi no mu bijyanye no gutaka aho abantu bakorera, n’ibijyanye n’ibikoresho byo mu nzu byiganjemo umwimerere gakondo.

Teta Isibo mu mwaka ushize ni umwe mu bashyizwe na Forbes Magazine ku rutonde rwa ba Rwiyemezamirimo 30 bari munsi y’imyaka 35 batanga icyizere mu bikorwa by’iterambere ry’ubukungu muri Afurika.

Ibyo wamenya kuri zimwe mu nzu z’imideli zashinzwe n’abagore zimaze kwandika izina mu Rwanda

- Uzuri K&Y

Inzu ya Uzuri K&Y ni imwe mu zimaze gutera imbere mu buryo bugaragara mu zashinzwe n’Abanyarwandakazi. Kevine na Ysolde bashinze iyi nzu beze imbuto z’umugisha ku bashomeri kuko bamaze guha akazi abakozi 35, bakaba bari no kwigisha abandi 100 muri iyi minsi bazatangira umwaka utaha.

Iyi nzu ya Uzuri K&Y ifite uruganda i Gahanga muri Kicukiro n’iduka muri Kigali Heights ndetse yanatangije irindi ryagenewe abagenzi ku Kibuga mpuzamahanga cy’Indege cya Kigali.

Kevine na Ysolde bashinze iyi nzu beze imbuto z’umugisha ku bashomeri kuko bamaze guha akazi abakozi 35, bakaba bari no kwigisha abandi 100 muri iyi minsi bazatangira umwaka utaha
Imirimo ku bantu 35 yatanzwe na Uzuri K&Y yashinzwe na Kevine na Ysolde batangiye no gutoza abandi 100 bazinjira mu mwuga mu mwaka utaha
Ysolde na Kevine bashinze Uzuri K&Y

- Haute Baso

Haute Baso’ imaze kuba ubukombe mu by’imideli mu Rwanda, izwi cyane mu myenda ikora irimo amakanzu n’amashati yo mu bitenge; amakoti afite ibara rya gisirikare; imitako irimo ‘imigongo’, izwi cyane mu muco nyarwanda n’izindi ngeri zinyuranye.

Aba bahanzi b’imideli kandi bamaze kwitabira ibikorwa byo kumurika imideli bitandukanye by’imideli Kampala Fashion Week (Uganda), Origin Africa Trade Show (Madagascar), Collective Rw na Mercedes Benz Fashion Week (Afurika y’Epfo), iza mu bikomeye cyane muri Afurika. Banambitse kandi ibyamamare bitandukanye birimo n’abagize Itsinda rya Sauti Sol ryo muri Kenya.

Imyambaro ya Haute Baso imurikwa mu birori bitandukanye
Haute Baso ni imwe mu nzu z'imideli zashinzwe n'abagore zimaze kuba ubukombe mu Rwanda
Umwenda ugaragaraho Perezida Paul Kagame n'ikote ry'amabara ya Gisirikare ni imwe mu myambaro yakozwe na Haute Baso


- Inzuki Designs

Inzuki Designs, bibanda cyane ku mideli igezweho, ibikomo n’indi mitako yambarwa ahanini n’abagore. Bazwiho umwihariko w’imitako yambarwa mu ijosi ikorwa mu birere n’ibindi bikoresho biboneka cyane muri Afurika. Iyi nzu kandi izwi no mu bijyanye no gutaka aho abantu bakorera, n’ibijyanye n’ibikoresho byo mu nzu byiganjemo umwimerere gakondo.

Inzuki Designs ni kimwe mu bikorwa Perezida wa Estonia yasuye ubwo aheruka kugenderera u Rwanda. Mbere yo gusubira iwabo muri Estonia, Perezida Kersti Kaljulaid yatambagiye Umujyi wa Kigali ndetse asura bamwe mu bikorera. Yasuye ba rwiyemezamirimo bakora ibijyanye na Made in Rwanda by’umwihariko asura ibikorwa bya Inzuki Designs.

Miss Uwase Vanessa n'umuvandimwe we Lise Nelly Umutoni ni bamwe mu bakoranye na Inzuki Designs mu kumenyekanisha ibikorwa byayo
Inzuki Designs ikora n'imitako ifite umwihariko wa gakondo y'u Rwanda
Teta Isibo washinze Inzuki Designs hamwe na Perezida wa Estonia


- Sonia Mugabo

Rwiyemezamirimo w’umuhanzi w’imideli, Sonia Mugabo, ku myaka 26 amaze kwandika izina mu Rwanda ndetse no mu mahanga kubera inzu yise ‘SM’ [Sonia Mugabo] ikora kandi igacuruza imyambaro ivanzemo umwimerere wa Afurika n’imyambaro igezweho, benshi bemeza ko ari iwabo w’abazi kurimba.

Mu mwaka ushize ni umwe mu bashyizwe na Forbes Magazine ku rutonde rwa ba Rwiyemezamirimo 30 bari munsi y’imyaka 35 batanga icyizere mu bikorwa by’iterambere ry’ubukungu muri Afurika.

Uretse kuba ibyo akora abikunda, Sonia yanagize amahirwe yo kwimenyereza umwuga mu bijyanye no kurimba muri Magazine ikomeye kw’Isi ‘Teen Vogue’ y’i New York muri Leta Zunze Ubumwe za Amerika.

Sonia Mugabo afite iduka muri Marriot Hotel, aho usangamo amashati y’abagabo yise “Gusimbuka urukiramende”, kikaba ari n’ikintu kitari gisanzwe mu mideli y’uyu muhanzi wakunze kwibanda cyane ku byambarwa n’abagore, imyambaro myinshi ye ikoze muri Cotton.

Ikanzu nziza yakozwe na Sonia Mugabo
Sonia Mugabo afite iduka muri Marriot Hotel
Sonia Mugabo(wa kabiri uturutse iburyo) ni umwe muri ba rwiyemezamirimo bakiri bato batanga icyizere muri Afurika
Uwambaye imyenda ya Sonia Mugabo aba aberewe

- Uzi Collections

Uzi Collections ni imwe mu nzu z’imideli zimaze kumenyekana mu Rwanda, aho imaze gushyira hanze ubwoko bune (Colletions) bw’imyenda, burimo iyiswe ‘ Zuba Collection’. Bamaze kwitabira amamurika atandukanye arimo na collective Rw Fashion Week 2016 na 2017.

Uzi Collections ikorera ibikorwa byayo mu iduka ririhereye mu Karere ka Kicukiro hafi y’ahazwi nka Zinia. Yashinzwe na Remera Mukahigiro Nathalie afatanyije na Rwema Lauren.

Uzi Collections ikora amakanzu ari mu bwoko butandukanye
Uzi Collections ikorera ibikorwa byayo mu iduka ririhereye mu Karere ka Kicukiro hafi y’ahazwi nka Zinia


- Ki-pepeo Kids clothing

Kipepeo Kids Clothing ni iduka rifite umwihariko wo kwambika abana. Ni inzu imaze kugera ku isoko mpuzamahanga, aho nko mu mwaka ushize bitabiriye imurikagurisha ryabereye New York ryahuzaga abarenga 6000 bakora ibijyanye no kwambika abana.

Priscilla Ruzibuka Umutashya w’imyaka 27 yaherukaga gutoranywa nk’uwegukanye igihembo cya “queen’s young leader award” gitangwa n’Umwamikazi w’u Bwongereza. Ni igihembo gihabwa urubyiruko rwagaragaje ibikorwa bidasanzwe bihindura ubuzima bwa benshi mu bihugu bya Commonwealth.

Guhera muri Mutarama 2017, Ruzibuka afasha abagore batishoboye kubona amahugurwa yo kudoda imyenda y’abana, hanyuma akabaha akazi.

Igitekerezo yagikuye ku mugore wigeze kuba umukozi wo mu rugo iwabo, mama we amufasha kubona amahugurwa ku kudoda none ubu ni umushoramari ukomeye muri Tanzaniya.

Ki-pepeo Kids Clothing ifite iduka muri Kigali Heights


- Rwanda Clothing

Iyi nzu yashinzwe na Joselyne Umutoniwase mu 2010. Asanzwe ari umuhanzi w’imideli. Mbere yo kwinjira muri uwo mwuga yabanje gukora umwuga wo kuyobora filime nyuma aza kwiyegurira ibijyanye n’o guhanga imyambaro y’umwihariko.

Yifuza ko amahanga ya kure nko muri Leta Zunze Ubumwe za Amerika n’i Burayi yazambikwa n’Abanyarwanda. Muri iyo mpinduramatwara yifuza no gukora n’abahanga mu mideli muri ayo mahanga mu kurushaho guhanga udushya. Na we ni umwe mu bamaze gutanga imirimo yakuye benshi mu bushomeri.

Joselyne Umutoniwase watangije Rwanda Clothing ni umwe mu Banyarwandakazi bamaze kwiteza imbere babikesha ubuhanga mu guhanga imideli
Rwanda Clothing yibanda ku mwihariko wa kinyafurika

- Seraphina

Mu nkubiri y’ivuka ry’inzu z’imideli no muri Nzeri 2016 hashinzwe iyitwa ‘Seraphina’ yatangijwe na Ines Claudia Hirwa na mugenzi we Diane Umugwaneza, yazanye umwihariko wo gukora imyenda igaragaza umuco gakondo.

Seraphina iherereye mu iduka rya Bold Kigali riherereye mu nyubako ya Kigali Heights. Hirwa uri mu batangije Seraphina ari mu bitabiriye inama mpuzamahanga ‘Accelerate Summit 2016’ ndetse atoranywa muri ba rwiyemezamirimo 26 batanga icyizere.

'Seraphina’ yatangijwe na Ines Claudia Hirwa n'undi mugenzi we witwa Diane Umugwaneza
Umwe mu myambaro ikorwa na 'Seraphina'


- Sandy N.A

Iyi nzu y’imideli n’indi mitako nayo ni imwe mu mishinga ikomeye yatangijwe n’abagore mu Rwanda. Yashinzwe na Sandrine Ashimwe w’imyaka 24. Yize muri Kaminuza ya Daystar yo muri Kenya.

Yatangije Sandy N.A Ltd avuye muri Kenya, yifuza ko Abanyarwanda bacika ku muco wo kugura imitako n’imyambaro yo mu mahanga bakayoboka ibyakorewe iwabo. Yitabiriye amaserukiramuco atandukanye arimo Kenya Fashion Awards (2014), Techno Kigali Fashion Week (2015) ndetse na Kigali Arts Festival (2016).

Sandrine Ashimwe watangije inzu ya Sandy N.A
Sandy N.A ikora imikufi yambarwa, ikoze mu masaro n'imitako y'igitenge
Umwe mu mirimbo ikorwa na Sandy N.A


- Glo Creations

Glo Creations ni inzu yongera agaciro k’ibitambaro, yashinzwe n’Umunyarwandakazi Gloria Kamanzi Uwizera, aho yibanda mu gukora imitako yo mu nzu n’imyambaro hifashishijwe ibishushanyo n’amarangi. Glo Creations ikorera mu Kiyovu, umanukiye kuri peyaje, iruhande rw’inzu ebyiri za RSSB.

Uwizera washinze iy’inzu mu 2008, afite ubuhanga bwihariye mu kongerera ibitambaro ubwiza n’agaciro akoresheje uburyo bw’amashusho n’amarangi busanzwe bumenyerewe mu bihugu byo muri Afurika y’Uburengerazuba na Aziya buzwi nka ‘batik’.

Uwizera avuga ko igitekerezo cyaje ubwo yari umunyeshuri muri Sénégal, atangira kwiga tekiniki yo gushyira amashusho n’amarangi ku myenda mu gihe gito cyane; amaze amezi agera ku icumi akaba yarafashe umwanzuro wo kuza kubikorera mu Rwanda.

Ibitambaro byongerewe ubwiza n'agaciro na Glo Creations
Uwizera akoresha amarangi mu kongera ubwiza bw'ibitambaro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza