Mu ishavu ryo kubyara umwana utabona, hashibutsemo urukundo rwo gufasha

Yanditswe na Philbert Girinema
Kuya 8 Werurwe 2018 saa 01:38
Yasuwe :
0 0

Bahati Vanessa ni umubyeyi w’umutima ukomeye ufite abana bane b’abahungu. Bucura muri bo yavutse mu 2015, avukana uburwayi bukomeye bw’amaso ku buryo nyuma yo kuvuzwa impande n’impande abaganga bagaragaje ko adashobora kuzigera abona na rimwe urumuri rwo ku Isi.

Byari ibihe bigoye cyane kuri Bahati dore ko mu mfuruka zose yakiraga ubutumwa bw’abantu bamuca intege, bamwereka ko asa n’ugushije ishyano kwibaruka umwana utabona.

Iyo muganira, avuga uburyo mu rugendo rwo kuvuza umwana we kuva akiri uruhinja yigiyemo amasomo akomeye mu buzima. Ngo yabonye abantu benshi bateye imbere kandi babana n’ubumuga akabishimangira atanga urugero ku muhanzi utunzwe na muzika mu Buhinde kandi afite ubumuga bukomeye.

Ibi bihe byose n’inama yahawe n’abaganga batandukanye, byatumye yakira umwana we yiyemeza kumugaragariza urukundo kurusha gutekereza ku bumuga yavukanye.

Umunsi ku wundi, Vanessa w’imyaka 27 y’amavuko yaje gusanga ngo hari abandi bana bafite ibibazo bimeze nk’iby’uwe kandi babayeho mu buzima bugoranye ku buryo bamwe baba baratereranywe n’imiryango yabo.

Yagize ati “Hari aho nageze [mu Burasirazuba] nsanga umwana utabona, bamuraza hamwe n’amatungo, ntibamufata nk’umwana ufite icyo ashobora kwimarira.”

Ngo ibi n’indi mibereho nk’iyo ni yo yatumye yiyemeza gutanga ubufasha no guharurira inzira abandi babyeyi mu bukangurambaga buganisha ku kwita ku mwana wese hatitawe ku buryo yavutse.

Jordan, bucura mu bana ba Bahati Vanessa yavukanye ubumuga bwo kutabona

Yita ku bana bakomoka mu miryango ikennye

Ku ikubitiro, nyuma yo kwiyemeza gufasha abana bo mu miryango ikennye bafite ubumuga bwo kutabona, Bahati yashinze Umuryango yitiriye umwana we, Jordan Foundation.

Uyu muryango ukora mu buryo bwemewe n’amategeko mu Rwanda, watangiranye abana 20 bo mu bice by’icyaro mu miryango yo mu cyiciro cya mbere cy’ubudehe.

Ati “Twaciye mu kigo gishinzwe abafite ubumuga bwo kutabona, tujya mu mirenge, mu midugudu. Twashatse abo mu cyaro cyane kuko aribo bakunze guhura n’ibibazo byinshi.”

Abo bana, Bahati yabashyize mu nzu ye mu Karere ka Gasabo ahazwi nko mu Gatsata, abashakira abarimu babigisha n’abakozi bo kubitaho mu buzima bwa buri munsi.

Abenshi bari bafite ibibazo by’imirire mibi bakigezwa muri iki kigo, babanza kuvuzwa no kondorwa. Bose yabashakiye za mituweli, ababyeyi babo nabo akajya abafasha mu gihe bashatse kubasura.

Ati “Tugendera ku ngengabihe nk’iy’amashuri asanzwe. Mu kiruhuko, abana bajya mu ngo zabo. Kuko imiryango yabo ikennye; dushakira itike ababyeyi ku buryo batwara abana mu biruhuko hanyuma tukabaha n’amafaranga yo kuzabagarura.”

Muri aba bana 20, ngo harimo abo imiryango yabo idashobora kwikoza ku buryo iyo abandi batashye bo basigara bagakomeza kwitabwaho. Iyo bibaye ngombwa, kuko n’abakozi baba bagomba kujya mu biruhuko; abo babiri batereranywe abajyana mu rugo rwe akabitaho kimwe n’abe.

Umushahara we niwe ubeshejeho Jordan Foundation

Uyu mubyeyi kuva yashinga Jordan Foundation tariki ya 1 Ugushyingo 2015; akoresha amafaranga ye bwite mu bikorwa byo kwita ku buzima bw’aba baziranenge.

Yishimira ko yagize umugabo umutera inkunga, akamushyikigira muri uru rugendo rwo kurerera u Rwanda abana bafite icyerekezo. Ngo muri icyo gihe cyose amaze gutanga agera kuri miliyoni 63 Frw mu bikorwa byo kwita kuri aba bana.

Ati “Ku kwezi nibura dukoresha miliyoni eshatu n’ibihumbi 200. Ni amafaranga ava mu mushahara wanjye, ni mu rugo rwanjye, no mu bufasha mpabwa n’umugabo wanjye.”

Yizeye ko 2019 izasiga mu Rwanda hari ishuri ryakira abana batabona bakigira ubuntu.

Imwe mu mpamvu yatumye Bahati ashinga Jordan Foundation, avuga ko yari yatekereje ku burezi bw’umwana we agasanga amashuri ari mu Rwanda yakira abatabona, yigamo n’abifite ni ko gutekereza no ku bandi bakennye.

Yishimira ko Akarere ka Gasabo kamuhaye ikibanza cyo kubakaho ishuri rizigwamo n’abana bo mu miryango ikennye bafite ubumuga bwo kutabona.

Ati “Ikibanza twarakibonye dusigaje kubona abantu batwubakira. Turakomeza gushyiramo imbaraga ku buryo nibura umwaka utaha twaba dufite ishuri ryakira nibura abana 100.”

Yahembwe na Madamu Jeannette Kagame

Mu 2017, Madamu Jeannette Kagame yahembye Bahati Vanessa nk’umwe mu rubyiruko rwakoze ibikorwa by’indashyikirwa. Ni igihembo avuga ko cyamushimishije kuko kigaragaza ko ibyo akora hari ababiha agaciro.

Ati “Byaranshimishije cyane kuba abayobozi bacu babona ibyo dukora bakadushima. Biduha izindi mbaraga tukumva ko tutagomba guhagarara ahubwo dukomeza kurushaho. Aho tugeze hose bamaze kutumenya, bumva ko kuba Madamu Jeannette Kagame yarashimye ibyo dukora atari ibintu by’abatekamutwe.”

Uyu mubyeyi agira inama bagenzi be ko bakwiye kwita kuri buri mwana, bakamugaragariza urukundo kuko aricyo gituma ejo he haba heza kurushaho. Asaba kandi abafite umutima wo gufasha kubikora batarangamiye inyungu ahubwo bayobowe n’urukundo.

Yishimira ko kuva yatangiza uyu muryango, abana babiri bavujwe bagakira bagasubira mu miryango yabo ndetse hagakorwa n’ubukangurambaga bwo kwita ku bana bafite ubumuga bwo kutabona binyuze muri siporo.

Abana barererwa muri Jordan Foundation baturuka mu miryango ikennye
Aba bana bahabwa amasomo asanzwe nk'ababana n'ubumuga hanyuma mu biruhuko bagataha
Jordan Foundation yatangiranye abana 20 bo mu miryango itishoboye
Bahati Vanessa washinze Jordan Foundation ari kumwe na bamwe mu bana barererwa muri Jordan Foundation
Hari abana barererwa muri iki kigo bafite ababyeyi badashobora kubikoza ku buryo bo bakomeza kwitabwaho na Bahati mu biruhuko
Mu biruhuko, ababyeyi bahabwa amafaranga y'amatike yo kujyana abana mu rugo
Bahati asobanura ko bamwe muri aba bana bakuwe mu miryango yabo babayeho nabi bakabanza kuvuzwa no kondorwa
Uyu muryango umaze gukora ibikorwa bitandukanye by'ubukangurambaga bwo kwita ku batabona
Yaretse ibindi bikorwa byose byamubyarira inyungu, ahitamo gukoresha inzu ye mu kwita ku bana batabona

Amafoto: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza