Umuhate udasanzwe w’abagore batwara abagenzi kuri moto mu Mujyi wa Kigali (Video)

Yanditswe na Rabbi Malo Umucunguzi
Kuya 8 Werurwe 2018 saa 11:43
Yasuwe :
0 0

Umurimo wo gutwara moto mu rwa Gasabo ni umwuga utunze benshi haba mu byaro no mu Mujyi wa Kigali, gusa uhagaze ku muhanda unyurwaho buri mwanya n’abawukora b’abagabo gusa, mu gihe mu ibarurishamibare ryakozwe rigaragaza ko abagore mu Rwanda nibura ari 52%.

Bazakubwira ko ari umurimo usaba umuhate, kudacika intege, kudakangwa n’imbeho y’itumba cyangwa izuba ry’impeshyi, kuko buri saha ingendo zikorwa, moto zinyuranamo.

Nyiramajyambere Claudine w’imyaka 40 ni umwe mu batinyutse uyu mwuga nyuma y’ibintu byinshi yabanje gucamo birimo ubuzunguzayi, ubucuruzi bwahawe akato mu Mujyi wa Kigali.

Mu kiganiro na IGIHE yagize ati “Nari mfite abana bato. Kageze (akazi) aho gashaka kunanira kubera ko nacishagamo nkatwita, nkabyara. Narongeye nsa n’ubiretse njya kwiga kudoda, nadoderaga ku Muhima mu isoko. Mbona nabyo ntibinshobokeye nsubira mu kuzunguza. ”

“Naragendaga nkacuruza ikote, ryanyungura nka 5000Frw nkajya kwiga moto. Ubwo nari mfite uruhushya rw’agateganyo. Nkarangura, inyungu mbonye navanagaho make yo guhaha ariko nkasubira kwiga moto kugira ngo ndengere uruhushya rwanjye rwo gutwara kuko nari narakoze ibizamini by’imodoka byarananiye, naratsinzwe, narashiriwe.”

Nyuma y’imbaraga n’umuhate Nyiramajyambere yakoreshaga, yaje kubona Uruhushya rwa burundu rwo gutwara. Yagishije inama abamotari bahuraga, ahera kuri Velo moteri (Vélo moteur) mu 2011 ayitwara imyaka ibiri, mbere yo kubona moto nini.

Kuva icyo gihe Nyiramajyambere ahamya ko akazi ko gutwara moto kamaze kumuteza imbere kandi akagahuza n’inshingano ze nk’umugore, zirimo kwita ku rugo no gukurikirana uburere n’imibereho y’abana be.

Yakomeje agira ati “Abana banjye bamaze gukura, umuto afite imyaka 13. Iyo ndi mu muhanda mpamagara umwe wenda nkamuha iposho, nabo bazi kwihahira ni abagabo.”

Avuga ko yinjira mu muhanda saa kumi n’imwe z’umuseso agatangira gushaka abagenzi, ahagana saa tanu akajya kuruhuka. Ngo iyo abana batararangiza gutunganya amafunguro arabafasha, agasubira mu muhanda saa cyenda z’amanywa, agakora kugeza saa mbili z’ijoro.

Akomeza agira ati “Iyo mpuye n’abandi badamu usanga [gutwara moto] nabo bibashishikaje, ahubwo bakibaza uburyo babigeraho. Ikintu tubashishikariza ni ukwitinyuka kuko ikintu utinyutse ukishyiramo ngo ‘ndashoboye’ uragishobora. Icya mbere ni ubushake. ”

“Nkanjye mbere narakoraga, nkaroba, nkishyura nyiri moto, ariko muri iyo myaka nabashije kubona udufaranga, hari akazu nubatse hano za Kayonza nubwo ari gato ariko karahari. Kandi abana nabashije kubarihira amashuri bariga, ubu mbasha kubatunga. Numva uko ndi, iyo nagiye mu muhanda mba nezerewe. ”

Uyu murimo kandi awusangiye na Mukeshimana Vestine uwukora guhera mu 2008, kandi atwara moto buhanga ndetse iyo umubona ku cyapa ategereje abagenzi cyangwa atwaye, ntiwamutandukanya na bagenzi be b’abasore cyangwa abagabo.

Yagize ati “Uyu murimo urantunze, unyishyurira abana amafaranga y’ishuri, wamfashije no kubona aho mba. Ubu mfite abana bane, batatu biga mumashuri yisumbuye, umwe niwe usigaye mu mashuri abanza.”

Nubwo aterura amafaranga uyu murimo umwinjiriza, avuga ko ari mwiza kandi watunga abadamu benshi bawitabiriye. We ngo yinjira umuhanda na moto ye saa moya z’igitondo, agataha nka saa mbili z’ijoro.

Aba bombi bahuje umurimo na Tuyisenge Dorcas, nubwo we ari mushya muri uyu mwuga kuko ngo atarawumaramo amezi arenga abiri.

Yagize ati “Kuva kera numvaga nkunze ikintu cyitwa ikinyabiziga. Natangiriye ku modoka, nza kumva ko na moto nshobora kuyitwara, njya kuyiga, nkora ikizamini rimwe mpita ntsinda, niko gutangira aka kazi.”

“Usanga abantu benshi batangara ngo umukobwa w’umumotari, umudamu w’umumotari… kubera ko turacyari bake. Nibikuremo ibintu by’ubwoba, baze dukore, nta cyatunanira.”

Abagore barashyigikiwe

Nikuze Sandrine ushinzwe Ishami ry’Abagore mu Kigo SafeMotos gifasha abamotari kwizigama no gukoresha ikoranabuhanga mu gutwara abagenzi, avuga ko ku bukangurambaga n’ubufasha kiri kugenda giha abagore, bari kwitabira umurimo wo gutwara moto.

Yagize ati “Kugeza ubu dufite abamotari batatu bari mu muhanda bari gukora, hari abagera kuri 30 bari kwiga amategeko y’umuhanda bashaka gutwara moto, hari n’abandi 10 bari kwiga gutwara moto twizeye neza ko nabo bazagera aho bakuru babo bageze.”

Abamotari bakoranye n’icyo kigo bahabwa amahugurwa ku kwizigama no gutanga ubutabazi bw’ibanze, bagahabwa na moto ku nguzanyo bishyura buhoro buhoro.

Nikuze avuga ko ubufasha batanga buri mu byiciro bitatu, icya mbere kigizwe n’abantu badafite impushya zo gutwara z’agateganyo, icya kabiri cy’abafite impushya z’agateganyo bashaka kwiga moto n’icya gatatu cy’abafite impushya za burundu zo gutwara moto.

Yakomeje agira ati “Iyo uri mu cyiciro cya mbere tukurihira kwiga amategeko y’umuhanda, ukabona ibitabo, ugakora ikizamini. Iyo ugitsinze ujya mu cya kabiri ho kwiga gutwara moto. Hose uba wigira ubuntu, tukakurihira ibintu byose usabwa. Ugahita ujya mu cyiciro cya gatatu. ”

“Mu cyiciro cya gatatu tugufasha kubona moto yo gutwara. Gahunda ihari ni uko amezi atatu ya mbere tuzajya tubaha moto bazitware nta kwishyura. Ni ukuvuga ngo inyungu yose uzajya ukorera izajya iba ari iyawe kugira ngo uzamuke.”

Gusa ngo babasaba kwizigamira nibura 90 000Frw muri ya mezi atatu binyuze mu ikoranabuhanga rya SafeMotos, kuko ifitanye ubufatanye n’ikigo kimwe gicuruza moto mu Rwanda gihita kiyiha umugore akagenda yishyura gake gake.

Mukeshimana Vestine akora umwuga wo gutwara abagenzi kuri moto guhera mu 2008
Nyiramajyambere Claudine yatangiye atwara Vélo moteur nyuma atera intambwe yo gutwara moto
Nikuze Sandrine ushinzwe Ishami ry’Abagore mu Kigo SafeMotos gifasha abamotari kwizigama no gukoresha ikoranabuhanga mu gutwara abagenzi

Amafoto: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza