Ibyo numva byagabanya ubushomeri mu Rwanda

Ibyo numva byagabanya ubushomeri mu Rwanda


Yanditswe kuya 20-01-2012 - Saa 07:29'

Iyi nkuru ni igitekerezo cy’umusomyi wa IGIHE.com witwa Philbert Muzima uba muri Canada.

Nifuje kugeza ku basomyi ba IGIHE.com no ku bayobozi ibitekerezo byanjye biturutse ku nkuru yanditswe na Rachel Mukandayisenga akayita : " Ibigo bifashije mu imenyerezamwuga ubushomeri bwagabanyuka”. http://igihe.com/spip.php?article20237

Igitekerezo cya Eugene Ruzindana ni ingenzi. Icyakora aho avuga ko kugishyira mu bikorwa byagomba itegeko simbona ko ari ngombwa. Nibwira ko ahubwo hagomba gushyirwaho programme ya leta yo gukangurira no gufasha ibigo bya leta n’ibyigenga guha abanyeshuri uburyo bwo kwimenyereza umurimo.

Iyo programme yafasha nk’ibigo bitanga stage gusonerwa cyangwa kugabanirizwa imisoro ndetse yanafasha ibigo guhemba abanyeshuri bari muri stage n’ibindi.

Ntangazwa n’ukuntu mbona mu Rwanda bahanika cyane ibisabwa ngo umuntu ahabwe akazi. Ugasanga n’akazi katari ak’ubuyobozi karasaba experience y’imyaka igera kuri itanu. Ni ugukabya cyane niba atari uburyo bwo guheza abarangije amashuri vuba.

Bityo rero na none mu rwego rwo gufasha ibigo byigenga guha akazi abakirangiza amashuri (ngo hirindwe rya vangura riheza abakirangiza amashuri), muri ya programme navuze haruguru yo gufasha ibigo guha stage abakirangiza amashuri, leta ishobora no kwemerera ibyo bigo kwishyura umushahara cyangwa igice cy’umushahara mu gihe kigenwe ku bakozi bashya bahawe akazi.

Ese ibi mvuga hari ahandi bikorwa?

Abanyarwanda bati “Akanyoni katagurutse ntikamenya iyo bweze”. Hano muri Canada no mu baturanyi bacu bo kwa Obama ndetse no mu Bufaransa bene izi programmes zirahari zigamije guha abanyeshuri experience bazakenera mu kazi, gufasha ibigo byigenga gutanga stage no guha akazi abazirangije.

Nko muri Canada hari iyitwa Federal Student Work Experience Program (FSWEP) ifasha abanyeshuri gukora baniga ( http://jobs-emplois.gc.ca/fswep-pfete/index-eng.htm ).

Muri Québec naho bagira uduhimbazabasyi mu rwego rw’imisoro n’imari (incitatifs financiers et fiscaux) baha ibigo byigenga ngo bihe akazi abaturutse hanze mu rwego rwa integration d’immigrants, abafite ibibazo by’ubumuga, abari kuri aide social ngo bakunde bayiveho, n’ibindi.

Muri Amerika naho bafite programmes zo mu bwoko bwa incitatifs financiers et fiscaux zifasha ibigo byigenga guhanga no gutanga imirimo. Ikigo kigaragaje ko cyatanze akazi gisonerwa imisoro kandi kigahabwa inkunga yo kumenyereza abakozi bashya.

Ese ibi u Rwanda rwabishobora?

Ibi byose u Rwanda rwabishobora ku rwego rw’ubushobozi rufite. Icyangombwa ni ubushake bwo kubikora. Ntibihagije rero gushyiraho itegeko ngo ibigo byigenga bihatirwe gutanga stage, ahubwo ni ngombwa kubifasha. Umubare w’abafashaka stage bafashwa n’iyo programe waterwa n’ubushobozi igihugu gifite n’imyanya ishoboka mu bigo bizabakira, politiki ya leta mu rwego rw’imirimo ikeneye abakozi babishoboye kurusha iyindi, igice cy’abanyarwanda bakeneye kwinjizwa mu mirimo (nk’abacitse ku icumu rya jenoside, imfubyi, abamugaye, abahoze ari abasirikare, n’ibindi).

Nta wasaba leta n’ibigo byigenga kwakira buri wese ushaka stage, ndibwira ko ubwo bushobozi butaboneka ako kanya, niyo mpamvu hashyirwaho ibigenderwaho mu gutoranya abemererwa stage harimo ibi ndondoye haruguru n’ibindi bijyanye n’amashuri bize n’ibindi ibigo na leta barebera hamwe.

Ese birakwiye ko uri mu imenyerezamwuga adahembwa?

Iyi programme mvuga nsanga bikwiye abari muri stage bayihemberwa kuko baba bakora, bakagira uruhare mu nyungu z’ikigo bakorera. Byongeye kandi nk’uko byanditse no muri Bibiliya, “Toute peine mérite salaire”Lc 10, 7.

Mu Bufaransa, stage yose y’amezi arenze abiri irahemberwa. Kandi naho Leta ibigiramo uruhare ngo ibigo bibashe kwakira, gukoresha no guhemba abari mu “ imenyerezamwuga”. Muri Canada naho ni uko abari muri FSWEP barahembwa. Mbona ari akarengane rero ko mu Rwanda umuntu akorera leta cyangwa uruganda ntabihemberwe ngaha ngo ni uko atari umukozi ari mu kwimenyereza.

Ibi byose nsanga byafasha mu kugabanya ubushomeri kuko ibigo byinshi byabasha gutanga stage zihemberwa no guhanga imirimo. Ibi bikongera umubare w’abasora, bikagabanya ubukene binateza imbere ubukungu bw’igihugu kuko uko bahembwa ari nako bahaha.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO