2017: Hari abatinya Baringa!

Yanditswe na Philbert Girinema
Kuya 14 Ukuboza 2015 saa 10:10
Yasuwe : XX
0

Urabona ku Gisimenti hano hafi yo kwa Lando? Niho nari ndi ejo bundi aha ku wa Kabiri w’icyashize mu iduka riri imbere ya harya kwa Ndori, maze nsohotse ngize ngo ndinjira mu modoka nsanga nafungiranyemo imfunguzo zanjye.

Biba bibaye ngombwa ko nsubira mu rugo kujya kuzana iza kabiri. Nabanje gushidikanya ngo mfate moto kuko ariyo inyaruka bigeze aho mbivamo nifatira twegerane ya make, cyane dore ko n’ubundi nta cyanyirukansaga kuko gahunda zanjye zahise zihinduka.

Ubwo nahise nambuka ntegera kuri cya cyapa cyo munsi yo kwa Lando ariko mu gihe tagisi itaraza ntegereza gato mu gikundi cy’abantu bari abaho, bamwe bateze izijya mu mujyi abandi bateze iza Kacyiru na Nyabugogo unyuze ku Kinamba. Muri uko gutegereza rero sinzi uko naje kwandarika amatwi yanjye gato ngwa ku kiganiro bagenzi banjye bagiranaga ntabishaka rwose ariko, kwirarira ni bibi, byageze aho kukivirira birananira pe! Ndetse bigeze aho nisanga ndimo kumviriza. Uwiteka ambabarire!

Babanje bavuga iby’i Burundi umwe abwira undi uko inkoho (imbunda) ngo zaraye zivuga kugera mu gitondo ndetse n’ukuntu yabyiyumviye kubera ko umuvandimwe uriyo yamuterefonnye agashyira terefoni mu idirishya akamwumvisha. Yakomeje amuganyira ko ikimubabaje ari ukuntu uwo munyagwa (yavugaga uwo umuvandimwe we) yavuye hano mu kwa cyenda ngo agiye gutangiza abana amashuri.

Ati “Nyamara ntako ntamugize nara mwinginze ngo aze tugume tubyigane kuko n’ubundi aho umwaga utari urw’urukwavu rwisasira batanu. Ati “Niba ari urumubungamo simbizi kuko yaranze arashorera ngo ejo bitazamuviramo gusenya dore ko umugabo we wagiye rugikubita yanamuhozaga ku nkeke amubaza igihe azagarukira ngo bagumye bahangane n’ibihe aho kurambirana mu mihana.”

Umugabo yabwiraga ibyo byose ariko we yamutegaga amatwi acecetse undi nawe wari wacitse ururondogoro agakomeza kuvuga ibyizo mbunda z’i Burundi ko zamusubije mu 1994 akarara yicaye kugeza mu gitondo. Byageze aho bombi baraceceka ariko haciye umwanya wa wundi wabarirwaga inkuru arabanza ariruhutsa maze yitsa ijwi ati “Nyamara ni ugusenga dukomeje kuko ndabona isi yarasaze…. induru ni zose hose ….ntaho bukikera. Mfite ubwoba ko aho bukera ( arahigima)… . Ni ugusenga na twe bitazatugeraho”.

Umugore ati “Erega burya abakina n’intambara ni abatayizi! Njye mpangayikishijwe n’ibibera i Burundi narahajishe igisabo ariko icyiza cy’iwacu i Rwanda ni uko buri wese, uretse abari impinja muri 1994 intambara n’ingaruka zayo arayizi. Utariciwe muri jenoside, yapfushije mu ntambara cyangwa agerwaho n’ingaruka z’íntambara na jenoside ku buryo icyatuma imbunda zongera kuvuga muri iki gihugu cyava hanze ariko nticyava mu banyarwanda.” Undi na we ati “Erega nanjye ikimpangayikishije ni uko numvise abazungu bakobye, ari abo banyamerika ari n’abo bafaransa none se urumva ikizakurikiraho ari ikihe. Ni ukuri ibi bintu njye binteye ubwoba kubera bariya bazungu basa nkabashaka kwinjira mu byacu ku neza no ku nabi.

Sinamenye igihe twagereye ku Kinamba mba mvuyemo ntamenye amaherezo y’icyo kiganiro ariko ngenda mbitekerezaho inzira yose kugera iwanjye. Ndetse simbahishe ko uko nazamukaga hariya ku Rwibutso ngaterera ijisho hagati y’intoki aho ndimo kubaka nanyuzagamo nkakoma ku gatima nti ‘se aho none?’ Ngeze mu rugo mfunguye radiyo nakubitanye n’inkuru ko inama y’Abaminisitiri imaze kwemeza 18 Ukuboza nk’ itariki ya referendum yo gutorra Itegeko nshinga ryemera ko Perezida Kagame abishatse yakwiyamariza izindi manda 3 zikurikirana.

Ku mugoroba narakomeje mbyibazaho bintera gufata ikaramu ngo nongere mbyunguraneho ibitekerezo n’abasomyi ba IGIHE.com, cyane cyane nibanda kukugereranya iyi manda ya gatatu abanyarwanda basaba Kagame n’ibiba mu bindi bihugu bya Afurika aho bamwe mu bakuru b’ibihugu bagundira ubutegetsi bakanahindura itegeko nshinga, haba Burundi, Congo Brazzaville, Togo, Burkina Faso, Uganda n’ahandi.

Harya ngo agahwa kari ku wundi karahandurika?

Hambere aha muri Congo ya hano hirya Kabila yashatse kwiyongeza manda abaturage bamubera ibamba. Bamanutse ari igihiriri umujyi bawubuza guhumeka ahita asubika icyo cyemezo. Byari binamugoye cyane kuko no mu bamushyigikiye bose ntibabivugagaho rumwe kuko harimo n’ abategereje ko avaho ngo bajyeho.

Nyuma yaho Perezida wa Burkina Faso Blaise Compaore yaranangiye ati “Ndarivugurura igishatse kibe.” Na none abaturage bariye karungu bati “Uramutse uhinduye itegeko nshinga igihugu kirashya” ndetse n’ingabo zibijyamo ziti “Ahubwo twe turakwiyirukanira ariko ugushaka kw’abaturage kubahirizwe.” Compaore yahiye ubwoba akizwa n’amaguru.

Mu minsi yashize mwumvise induru zavugiye hejuru ya Perezida wa Congo yindi ubwo Sassou Nguesso ku ngufu yarihinduraga mu matora atagira umurongo yaranzwe n’ubwitabire buke yakurikiwe n’induru ndende nta mpundu na mba.

Hafi aha mu baturanyi b’abarundi Nkurunziza ati “Amatora azoba kandi ni jye nzokwiyamamaza”, bagenzi be bo muri CNDD bati “Witatira ibyo twemeje igirayo ucyuye igihe.” Barabanza baramutsembera abura ijwi rimwe mu be kugira ngo byemerwe. Aranga arahatiriza ati “Amatora azaba mwunamye cyangwa mupfukamye kandi ni jye uzokwiyamamaza!” Nyumvira nawe. Amatora yabaye mu masasu anarangwa n’ubwitabire buke cyane muri Bujumbura, ku buryo no mu byaro aho bitabiriye babanje guhabwa ibishyimbo muri ya mashashi y’úmuhondo mwabonye ashushanyijeho kalendari. Induru n’ imiborogo ni buri munsi, imirambo yuzuye amabarabara.

Ubwo nandika ibi mu gihugu kindi cy’abaturanyi cya Uganda rurageretse! Kizza Besigye na Amama Mbabazi bariye karungu kandi aho bagiye hose bakirizwa urufaya rw’amashyi n’ábaturage batagira ingano bagaragaza ko ari benshi banyotewe impinduka. Si ukubakomera mashyi gusa ahubwo abaturage bageze aho babatura ibibazo byabo nk’ ibura ry’ imiti n’ ibikoresho mu mavuriro. Imvugo ya Museveni nayo igaragaramo ubwiyizere buke ku buryo aherutse no gutangaza ko abaturage nibabigaragaza mu matora atazazuyaza kurekura ubutegetsi. Ni umwaka utaha tukareba.

Ibi biba muri ibi bihugu iyo tubigaya hari abavuga ngo agahwa kari wundi karahandurika. Ibiba muri ibi bihugu bya Afurika birimo níbyo twegeranye dukwiye kubirebana ubushishozi tukabisesengurana ubwenge bigatuma tubona ibyo tutabona aho kuduhahamura. Ni na byo nkomeza nsobanura hasi aha.

Ni masomo ki tuvana mu nduru ziva mu ihindurwa ry’itegeko nshinga ahandi?

Bamwe bahera ko bavuga ko ahenshi mu havugwa induru ari aho amahanga yatanze inama z’uko bareka kuvugurura itegeko nshinga maze abayobozi bakanangira bikagera ubwo bivamo induru zashyize ibyo bihugu mu kaga n’akangaratete. Bamwe bagashya ubwoba bati “Ubwo Amerika yavuze ngo ntiduhindure itegeko nshinga, ibihugu bikomye by’ i Burayi birimo u Bwongereza, u Buholandi, u Bubiligi nitutumva ibyo bavuga ngo tubikurikize amaherezo biradushyira mu kaga nk’ akabaye ahandi!”
Nanjye ntababeshye nababwira ko byari kunshimisha iyo biriya bihugu by’ ibihangange biza guha agaciro icyifuzo cya miliyoni enye z’abanyarwanda kandi bikacyubaha. Ariko kuba atariko byagenze ntibintera impungenge na mba kubera impamvu zikurikira kandi dukwiye kumva.

Twari dukwiye gushishoza tukabanza tukibuka kandi tukumva neza ibi bikurikira:

Icya mbere ni ukwibuka ko mu buryo butandukanye n’íbibera muri ibyo bihugu, Perezida Kagame ubwe ntawubimubajije kuva muri 2010 yavuze ko nta mugambi ndetse nta n’umugambi afite wo gukomeza kuyobora nyuma ya 2017. Ndetse ntiyabivuze rimwe yabivuze inshuro eshanu zose mu buryo no mu bihe bitandukanye.

Icyo gihe uko yabivugaga benshi bagwaga mu kantu batangira kwibaza uko bizagenda ndetse bamwe bumva arabatengushye n’ubwo bari bazi neza ko ari byo byanditse mu itegeko nshinga. Ibi bitandukanye n’uko Kabila, Nkurunziza, Nguesso, Museveni, Compaore bagiye bifata ku kibazo cyo kumenya niba bazahindura itegeko nshinga ngo bakomeze. Bo ntibigeze bajya imbere y’abanyagihugu ngo bavuge ikibari ku mutima ahubwo bakomeje kubabika mu rujijo kugera ku munota wa nyuma.

Icya kabiri ni uko abantu ba mbere batangiye gusaba Perezida wa Repubulika kwisubiraho ari abaturage biganjemo abatari intyoza muri politiki ubwo za Nyamasheke na Nyaruguru bamuririraga nk’abana batakamba ngo akomeze.

Nyuma hakabona gukurikiraho bamwe mu banyapolitiki nka Musa Fazil Harerimana wo mu ishyaka PDI babaye nk’abahwituwe n’abaturage aba basanzwe. Iby’abandi bagiye basaba basa nk’ábasubiramo ibyavuzwe n’abandi njye simbiha agaciro kanini kuko rimwe na rimwe byasaga nko kwigana cyangwa gukurikira intero igezweho.

Icya gatatu ahubwo mpa agaciro kanini ni impaka zabaye mu banyamuryango ba FPR cyane cyane izabimburiye izindi muri Gashyantare 2013 aho abanyamuryango barimo n’abitwa bakuru muri bo batunguwe cyane n’umukoro bahawe. Niba mwibuka neza izo mpaka zaranzwe n’ubwisanzure bukomeye ndetse bamwe mu banyamuryango bagaragaza ko batifuza ko itegeko nshinga ryavugururwa banatanga n’impamvu zirimo izifatika. Impaka zafashe umugoroba wose zikurikizaho ijoro zigeza mu gicuku hafi gusatira undi munsi.

Icyo gihe, hari abavugaga ko basanga byakwanduza umurage uzira ikizinga wa Perezida Kagame ndetse bikaba byamubuza kwinjira mu mateka ya Afurika mu gihe akoza imitwe y’intoki ku muryango wayo, naho abandi bakavuga ko byaba byiza ahaye inkoni y’ubushumba undi ahubwo akamuba hafi. Ndetse hagaragaye n’ abavuga ko yakomeza gufasha igihugu na RPF ariko atari Perezida.

Impaka zisesuye zarakomeje ziza kwiganzamo ababonaga ko nta mpamvu yo kwitesha amahirwe bafite yo kuyoborwa n’umuyobozi w’imbonekarimwe nka Kagame mu gihe Imana ikimubatije. Uwakwifuza gusobanukirwa n’izo mpaka yasoma inyandiko yigeze gusoka kuri IGIHE yitwaga “Bazarase dutege icyico ngo batagira ngo?”(Kanda hano).

Impamvu mbigarutseho mvuga ko mbiha gaciro kanini ni uko iyo biza kuba ari ibintu ‘byatekinitswe’ koko bitaba byarabaye impaka zikomeye gutyo kandi zitunguye abazigiyemo ndetse ngo umwanzuro urarane. Ahubwo biba byaravuye aho byemejwe mu nzira y’ibusamo abatabyemera bakaniganwa ijambo nk’uko ahandi byagiye bigenda. Ariko impaka zarakomeje no mu binyamakuru, mu materaniro anyuranye kugeza ubwo bigeze mu baturage aba bo mu mirima no mu nka mu misozi ya kure maze abaturage bagera kuri Miliyoni imwe bakabisaba mu nyandiko. N’ ubwo hari abavuga ko bariya baturage bashishikarijwe kubikora njye simbibona nk’ ikibazo kandi ndasobanura.

Ku ruhande rumwe, niba barya baturage barizanye kubushake bwabo bivuze ko koko ryavugururwa rishingiye ku bushake bw’abaturage akaba ari nta zindi mpaka. Ariko no ku rundi niba ari abanyepolitiki bagiye kubashakisha bakabasobanurira nabwo icyo bivuze ni kimwe kuko icyo twemeranywaho twese twabonye ni uko baje bameshe bakeye baririmba bakandika bakanasinya.

Nta waje ashorejwe ikiboko. Nta cyo bihindura kuko politiki si ikindi erega! Politiki ni ugushyira ku murongo uko ubona igihugu cyayoborwa warangiza ugaharanira kubisobanurira abandi ukabemeza ngo bagukurikire kandi ukazibuka kubereka ko bahisemo neza igihe uzaba wongeye kubasaba gukomeza kugushyigikira. Icyo twemeranywaho twese ni uko nta nduru n’urugomo byabayemo. Yewe n’ababinenga nta wigeze ahingutsa iryo jambo kuko nta muntu n’umwe wigeze ajya ku ka rubanda ngo avuge ko yabihatiwe, nta n’umwe!

Icya Kane ni uko nta mwiryane no gucikamo ibice mu ngabo byabayeho ku buryo nta kwikanga ko polisi cyangwa ingabo zaba zitemera ubwo busabe bw’Abanyarwanda.

Icya gatanu ni uko ivugururwa ritaciye iy’ibusamo kuko ryasabye ko byemezwa n’Imitwe yombi y’Inteko Ishinga Amategeko.

Icya Gatandatu ari na cyo gisigaye ni uko kwemezwa burundu bizaca muri referandumu isesuye.

Amatangazo ava mu mahanga afite gaciro ki?

Icya ngombwa ni Abanyarwanda. Icya ngombwa ni uko kuva ku Gisimenti ukagera mu Izindiro unyuze Kimironko ntawimyoza. Icya ngombwa ni uko kuva Nyabugogo ukagera Kicukiro unyuze Gikondo SEGEM na Rwandex moto na tagisi zigenda uko bisanzwe n’ibikorwa bikomeza ntawe ubangamiwe.

Icya ngombwa ni uko Kuva Kagitumba ukagera Bugarama unyuze Rwamagana, Muhanga, Huye na Rusizi inzira ari nyabagendwa. Icya ngombwa ni uko Kuva Rusumo ukagera Rubavu mu Bugoyi abahinga bahinga, ababaza bakabaza, abubaka bakubaka uko bisanzwe. Icya ngombwa ni uko abana biga, akazi kagakomeza, amavuriro akavura, inkuru n’ibiparu bigakurikirwa inseko zisanzwe.

Ituze ntiryakamye nk’uko byabaye ahandi. Igihugu kirahumeka amahoro kikeza amahore! Aho uri hose mu biganiro by’abantu uba wumva atari bo bazarota referandumu imaze gukorwa kuko ari yo nzira yonyine izabahamiriza ko bazakomeza kuyoborwa n’uyu muyobozi wacu w’imbonekarimwe.

Nk’uko nigeze kubivuga hejuru aha, byari kuba byiza rwose iyo bariya basanzwe badufasha muri byinshi baza kumva ubusabe bw’ abanyarwanda. Ariko indorerwamo bareberamo ikibazo cyacu zitandukanye n’ izacu. Nta mugayo kandi kuko ibyo twanyuzemo atari bimwe. Bo icyo bakesha abayobozi babo ni ukubaho neza cyane.

Twe icyo dushaka ku bayozozi bacu cya mbere ni ukubaho. Hagakurikiraho kubaho ntawe dukesha kubaho. Hagakurikiraho kubona iby’ibanze birimo ibidutunga, ubuvuzi, uburezi. Bizabagora rero kuyobokwa n’umunyarwanda ubona imiyoborere ya Kagame nk’ impamvu ye yo kugira umutekano, yo kugira icyo agaburira abana, yo kubona amata aturuka kuri Girinka no kongera imyaka y’imibereho biturutse kuri mituweri na gahunda yo kwegerza ubuvuzi abaturage.

Akaduruvayo n’imvururu byo ntibishoboka

Kugereranya ibya Burkina Faso, Congo zombi cyangwa iby’u Burundi ni urugomo mu rundi kuko nta n’amahuriro. Ibyaho byavuye hejuru bitsindagirwa abo hasi, naho ibyo mu Rwanda byavuye hasi byemererezwa hejuru na n’ ubu biracyingingirwa uwo hejuru! Ibyaho byagaragayemo abaturage benshi baniganwe ijambo naho mu Rwanda buri wese yahawe umwanya wo kwisanzura agaragaza ibitekerezo bye ndetse na Green Party itaranyuzwe yarareze kirakirwa itsindwa ku manywa y’ihangu.

Ibyo muri biriya bihugu byagaragayemo gucikamo ibice kw’inzego z’umutekano bizana akaduruvayo, mu Rwanda impaka zabaye imirimo ikomeza nta duka ryafunze ndetse umusaruro w’ubukungu wakomeje kuzamuka.

Ibyo muri biriya bihugu byagaragayemo abayobozi baharaniye bashikamye gukomeza kuyobora, naho mu Rwanda n’ubu Kagame biracyari ugufatiriza no kwirinda gukoma rutenderi ngo hato adatera ubwatsi bwa busabe.

Ibyo muri biriya bihugu byaturutse ku baturage bagaye ibyo bakorewe n’ubuyobozi maze biva hasi baharanira impinduka naho mu Rwanda ni abaturage bavuye hasi bashaka ko bakomeza ibyo bagezeho kandi bagakomereza aho bageze ku muvuduko umwe cyangwa urenzeho.

Aho akavuyo gashoboka ni aho ingabo na polisi zicikamo ibice cyangwa zigahitamo kurebera no kuba inkundarubyino. Mu Rwanda akavuyo n’imvururu ntibyabona aho bimenera kuko Igisirikari na Polisi birumva kandi bikumvira kandi ntibijya byibagirwa ko icyo bibereyeho ari ineza y’abanyarwanda.

Mu Rwanda akaduruvayo n’imvururu ntibishoboka kuko Abanyarwanda banyuze mu isomo rikomeye ry’umutekano muke ku buryo intambara yonyine bahagurukira ari yo kurwana ku mutekano, ariko nta na rimwe bashobora guhagurutswa no kuwuhungabanya.

Mu Rwanda nzi kandi mbona buri munsi akaduruvayo n’imvururu ntibishoboka kuko Abanyarwanda barahuze, buri wese ari mu twe tumuteza imbere, buri wese mu rugero rwe afite utwo atunze kandi nudatunze ibintu atunze icyizere cyo gutunga kuko ari mu gihugu gitanga icyizere.

U Rwanda nzi ni urw’abacikije kaminuza bitabira urugamba, ni urw’abatanze imbuto yo gutera n’inka zabo bashyigikira urugamba, ni urwabageze Mbandaka bakagaruka bataye ishyamba ry’ishyanga baje kubaka u Rwanda aho bo n’ababo barimo kurupfuka ibikomere. U Rwanda nzi ni urw’abagore bikuye ibitenge byabo bakabitanga ngo bikingire ubwiherero bw’amatora ya 2010 kandi n’ejo bundi bazabitanga! Nta mvururu n’akaduruvayo mbona. Ashwi habe na mba!

Icyo nemera ni uko ibyabaye mu Rwanda ari ibintu bidasanzwe bituruka ku byabaye mu gihugu bidasanzwe mu myaka ishize nayo idasanzwe. Ibyabaye ni igihango hagati y’Abanyarwanda na Kagame bakesha kugira igihugu kigendwa, igihugu gifite ijambo, igihugu gishimwa, igihugu gihashya inzara n’indwara, igihugu gitanga inka, igihugu kirinzwe kandi kitavogerwa. Igihugu kiza mu bya mbere mu miyoborere, kiza mu bya mbere mu guteza imbere ishoramari, cya mbere mu isuku, cya mbere mu mutekano.

Ibyabaye mu Rwanda ni ibintu bidasanzwe ariko bifite igisobanuro. Uzatinya imvururu yaratinze kuko yagombye kuba yarazitinye impaka zitangiye, ntiyari akwiye kuzitinya zirangiye!

Mu nyandiko yo mu cyumweru gitaha nzabagezaho isesengura ku mpamvu zitera abatangaza ko Kagame atakomeza kuyobora kubibona batyo. Nzabereka ingero z’ uko imitekerereze ye igenda ikwira muri Afurika bigatera impungenge bamwe ku mpamvu nzabasobanurira nkanabaha ingero. Nizere ko IGIHE.com izemera kubihitisha kuko nigeze kubyandika ikabinyonga ku mpamvu itanansobanuriye.

Abaturage baturutse imihanda yose berekeza mu Nteko Ishinga Amategeko gukurikirana uko abadepite n'abasenateri biga ku busabe bwabo bwo kuvugurura Itegeko Nshinga

Ibikubiye muri iyi nyandiko ni ibitekerezo bwite by’umwanditsi Munezero Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza