2017: Munezero ntiyoroheye Kagame

Yanditswe na

Pacifique Munezero

Kuya 18 Werurwe 2013 saa 11:56
Yasuwe :
0 0

Benshi bakwita Nyakubahwa ariko unyemerere njye nkwite Musangirangendo kuko twafatanyije urugamba watuyoboyemo. Nzi neza ko ninkubwira ko ndi Munezero inararibonye y’umukada utuye ku Kicukiro mu murenge wa Niboyi ntacyo biri bukwibutse. Ni mu gihe kandi kuko ndi umuntu muto cyane. Gusa ndi nk’abandi benshi bakurikira ibiba ntacyo turi bubikoreho ariko ntibitubuze gushaka kubyumva no kubisesengura.
Musangirangendo Kagame rero nyemerera ngutembereze mu mateka yacu ntarondogora nkwibutse ibyo (...)

Benshi bakwita Nyakubahwa ariko unyemerere njye nkwite Musangirangendo kuko twafatanyije urugamba watuyoboyemo. Nzi neza ko ninkubwira ko ndi Munezero inararibonye y’umukada utuye ku Kicukiro mu murenge wa Niboyi ntacyo biri bukwibutse. Ni mu gihe kandi kuko ndi umuntu muto cyane. Gusa ndi nk’abandi benshi bakurikira ibiba ntacyo turi bubikoreho ariko ntibitubuze gushaka kubyumva no kubisesengura.

Musangirangendo Kagame rero nyemerera ngutembereze mu mateka yacu ntarondogora nkwibutse ibyo mbona wowe na bamwe mu banyamuryango mwibagirwa cyangwa mwiyibagiza. Mbona mukunda kwibagirwa ko nta narimwe mu mibereho yacu twigeze tugira icyo tugeraho bitabanje kugorana, bitabanje gutera urujijo ndetse rimwe na rimwe bikenda kudutanya. Byinshi ntibyari byoroshye ariko byarashobotse.

1. Ngusubize ku isooko y’urugamba

Musangirangendo Kagame uribuka ko twari abanyarwanda iyo ishyanga bamwe ari impunzi zari zimaze imyaka 30 zifata irasiyo mu makambi zikumva ari umuvumo tuzabana nawo akaramata. Twarimo abandi babashije kwibera abagande mu bandi bahindura amazina ndetse wabita abanyarwanda mukaba mwabipfa. Bamwe bumvaga umukiro wabo warakemuye ibibazo byabo ugakemura n’iby’abandi. Hari ndetse n’abandi bari barabaye ibyatwa by’ibyegera bya hafi ya Museveni ibyo twarimo bakabyita umukino w’abana ariko uko iminsi yahitaga bikagenda bikomera maze bagashaka kubyiyitirira cyangwa kubiyobora. Najyaga nkureba ubireba ukamwenyura nkabona ko ubyumva ariko ukicecekera. Burya se wajyaga utureba mu miterere yacu itandukanye ukumva ko umunsi umwe tuzahuza umugambi kandi tukawuharanira mpaka tuwusohoje? Ntibyari byoroshye ariko byarashobotse.

2. Nkwibutse se ibihe bikomeye byo ku Rugamba

Njyewe Munezerero sinafashe imbunda ariko nafashe inkoni manuka imisozi nzamuka indi mbwiriza kandi nkangurira bagenzi banjye gushyigikira urugamba rwacu. Nta misozi ntazi ari za Nakivala za Ntungamo na Mpororo na Nshungerezi hose narahagenze kandi nahakoze byiza bituma aho abakada bateraniye mfata ijambo ntadidimanga. Ibyo ntazi mu mateka y’Inkotanyi ni bike kuko nabikurikiranye ubushake n’ubushishozi. Mu byo ntazibagirwa harimo ukuntu wacu Fred Rwigema akimara kwicwa na aduyi habayeho kwiheba ndetse benshi bakabona ko urugamba rurangiye ko dutsinzwe. Kuri benshi ikibazo cyari ukumenya njba biyahura cyangwa niba basubira inyuma. Aho nari ndi nkumva bamwe bavuga ngo aho bigeze kereka uwazana Polo (dore ko ari nako bakwitaga) ni we watuvana mu maboko ya aduyi.

Ubwo ariko abandi nabo ntibabikozwe kuko bavugaga ngo ntitwamukira! Ibi byavugwaga n’abazi ko mutihanganira utagera ku cyo mwamusabye kugeraho, cyane cyane iyo yabigizemo intege nke. Muri bo ndetse harimo n’abo mwari mwarahuriye mu kazi mukabazonga mubasaba kuba nta makemwa mwirengagiza ko bitorohera buri wese.

Bajyaga banatubwira kandi baguseka ukuntu ngo abaganda wayoboraga bakuvugiragaho ko ngo ushaka kubarusha gukunda ubuganda kandi uri umunyamahanga. Abo ni abo wabaga wasanze mu bunyoni n’ibindi bikorwa bitajyana n’inshingano zabo ukabahana wihanukiriye ukabazonga. Ariko icyo nibuka ni uko benshi basozaga bavuga ngo nyamara aho tugeze ni habi Polo ni we wadushobora. Uko wahatuvanye umwanzi amaze kuducura inkumbi ntawe utabizi kugeza tumwambukije ikivu na Nyungwe. Ntibyari byoroshye ariko byarashobotse.

3. Nkwibutse se tugera Kigali?

Mbabazwa cyane n’uko kenshi abantu batinya kuvuga ko urugamba rwatikiriyeho abacu benshi ndetse ngatinya ko abato batazigera babimenya . Nyamara ubundi nta gisebo kirimo kuko nta ntsinzi itagira igitambo. Mu batangiye urugamba abageze I Kigali twari abarame kandi iteka mbishimira Imana.

Twahatahanye intsinzi ariko ntitwavuga amacumu nk’abacyuye urugamba kubera impamvu ebyiri. Iyambere ni uko twinjiye dusimbuka imirambo urabizi. Iya kabiri ni uko twasanze igihugu ari amatongo utarapfuye yarahunze n’abarokotse tubavana mu myobo y’inyaga. Ndetse byari bigoye kumva ko urugamba rurangiye kuko wabonaga hatangiye urundi.

Ndibuka ikinyamakuru cyo nasomye bwa mbere kivuga ibohorwa rya Kigali umwe mu bayobozi ba Habyarimana yatanze interview ari i Goma avuga ngo batsinzwe igitero ariko ko batatsinzwe intambara. Ndetse kuko yari ahagaze mu nkambi y’abantu miliyoni ati mwirebere namwe the people has voted with feet ( abaturage batoresheje ibirenge) mu yandi magambo ati badukurikiye kuko banze gutegekwa n’inyenzi-nkotanyi. Icyo gihe na bamwe muri twe bibazaga niba koko bizashoboka ko tuyobora mu mahoro abantu batojwe ko turi babi kandi nta kiza twabifuriza ngo bizashoboke. Bamwe twibazaga niba koko u Rwanda ruzongera gusubirana ngo rube igihugu kimwe cy’abavuga rumwe bikadushobera. Nakurikiye uko wagiye ubyifatamo nsanga waraturushaga kureba kure nk’aho ibiba ubu byose wari warabiteganije. Ntabwo byari byoroshye ariko byarashobotse.

Igishushanyo kigendeye ku ifoto y'umusirikare w'Inkotanyi warimo arakura umuturage mu rufunzo amubohora

4. Nkwibutse se ibya Twagiramungu na Bizimungu?

Ndibuka tuguseka twimyoza n’umujinya mwinshi twibaza impamvu turwana tugatsinda uri ingenzi muri twese ariko ugaharira Bizimungu. Havuzwe byinshi ntasubiramo ariko nibuka ko wangaga ko byitwa kwigaranzura nk’aho ari cyo twarwaniye. Ndibuka kandi ko watubwiraga ko igikuru atari ni nde uyobora ahubwo igikuru ari igituma impinduka twarwaniye iboneka mu buryo burambye. Mbese bijya gusa n’ibyo wavugaga ejobundi ko icyangombwa atari wowe ahubwo icya ngombwa ari stability y’u Rwanda.

Nyuma ariko Bizimungu waje kumubona! Bizimungu yabaye Bizimungu turamuyoberwa! Arafata arakomeza yabwirwa ntiyumve maze ibyari ibyo kujya inama abihindura gukangata kuyobora bihinduka gutegeka. Si bwo ka gati kari kamanitswe n’uwicaye kamanurwaga n’uhagaze!
Icyo gihe ndibuka ko benshi twatangiye kwibaza ukuntu umuntu umwe ashobora kutugira ingwate y’imiterere ye yihariye. Bamwe umujinya warabarenze batangira kuvuga ngo awa! Abandi ndibuka ko banavugaga ngo rwose nimumureke mumugendeshe gahoro ejo tudaha uruvugiro bamwe basanzwze bavuga ko yari umuhutu w’agakingirizo cyangwa shikeleti bakanjakanja yashiramo isukari bakajugunya.

Ndibuka ariko ko hari n’abandi babonaga ko Bizimungu atubereye agahwa mu kirenge katubuza gutambuka. Ndetse icyo gihe umubano wacu na Uganda ntiwari mwiza ku buryo hari ababonaga mu gukereza impinduka no kubangamira imiyoborere myiza yarashoboraga kuduteza ibibazo birenze ibyo abaganda bajyaga kuduteza.

Igihe yavagaho hari benshi bibazaga niba uzamusimbura amahanga agakunda bigahama. Nyamara byarahamye ariko ntibyari byoroshye.

Ariko se musangirangendo Kagame ujya wibuka Twagiramungu twandikishije mu masezerano ya Arusha atugira ayo ifundi igira ibivuzo? Ujya wibuka ko bitatinze gato maze Twagiramungu twingingiye kurahira yipfusha ubusa nk’umwana wanga kunywa amata akaba aratwanitse aratwanuye. Twagiramungu yageze ubwo afata abarwaniye impinduka nk’abana, inama ayoboye ntizirangire. Ba burugumestri bananirwa kujyaho ngo Twagiramungu yanze. Byose yarabyangaga kugeza ‘ubwo anavanyweho akanga ngo yeguye. Ujya wibuka ariko igikuba cyacitse ngo ubwo atakiri Minisitiri w’Intebe ishyano ryaguye kuko yanditse mu masezerano ya Arusha? Ujya wibuka se ko yagiye ubuzima bukoroha kandi bugakomeza? Ntacyo bikwibutsa se ku mpaka turimo? Ubutaha nzakwibutsa n’ibindi twaciyemo bitoroshye. Nzakwereka igihirahiro twabayemo by’amahirwe ukaba hafi ntitugitindemo ariko mbere yaho reka nsoze ngira icyo nkubwira.

Mu gusoza

Abazungu baca umugani ngo amateka aradidimanga ( l’histoire bégaie) bashaka kuvuga ko ibiba byose biba bifite ibyabaye bisa cyangwa bijya gusa nabyo.

Nk’uko ikindi gihe abasilikari bakuru bagize bati ibihe turimo twabivanwamo na Kagame kandi bakabivuga bazi kamere yawe yihariye. Bakabivuga atari wowe nkorokoro mu nkotanyi. Bakabivuga atari wowe gisore cy’igayi, Bakabivuga atari wowe wize ngo uminuze kurusha abandi, ahubwo bakabivuga kubera kamere yawe yo kutavirira icyo wiyemeje. Kamere yo kwanga amafuti utitaye k’uyakoze nk’uko bari bakuzi aho twabaga mu kazi ko hejuru wakoraga Uganda. Kamere y’ubunyangamugayo budashidikanywaho. Wakabaye wumva intabaza y’abavuga ngo komeza igihugu kibanze kigire aho kigera.

Isomo rya kabiri ni uko ukwiye gutinya ikibi gusa ariko icyiza kabone n’iyo cyavugirizwa induru ntuzakivirire. Nk’uko abantu batumvaga ukuntu RPF izayobora igihugu cy’amatongo n’abataye iby’abo, nyamara ubu ikaba iyoboye miliyoni 11 z’abanyarwanda bayiririmba ibyiza yabakoreye. Nk’uko abantu batumvaga uko Pasteri atwigarika agashinga ubuyanja ahonda agatoki ku kandi ngo amaherezo indi jenoside izaba yafunzwe ubuzima bugakomeza. Nk’uko abantu batumvaga ko Twagiramungu yahunga ntiduhungabane. Menya ko ntawe ukumira ukuri. Menya ko niba ineza y’abanyarwanda ari uko ukomeza ukabanza ukabanyuza muri ibi bihe bibi udakwiye gutinya ngo induru y’amahanga yaduhagama. Kamara ni Abanyarwanda.

Ariko se Kagame musangirangendo ubundi waba warasomye inyandiko ikindi gihe nise nta munyapolitiki witegeka? Niba utarayisomye kanda hano.

Pacifique Munezero, umusomyi wa IGIHE.com/ Kicukiro, Niboyi.
[email protected]

Icyitonderwa : Iyi nkuru ikubiyemo ibitekerezo bwite by’uwayanditse, nawe niba wifuza kutwoherereza inkuru ikubiyemo igitekerezo cyawe kuri buri ngingo iyo ariyo yose wifuza, uhawe ikaze kuri email ikurikira : [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .