Ababiligi bagarutse!

Yanditswe na Gatete T
Kuya 25 Ugushyingo 2018 saa 02:46
Yasuwe :
0 0

Intambara yarangiye, amahoro yagarutse mu Rwanda! FPR (Front Patriotique Rwandais) Inkotanyi yahagaritse Jenoside yakorewe Abatutsi mu 1994.

Dr. Rwamasirabo Emile, umwe mu bakada bakuru ba FPR, ubu ni umuyobozi muri Kaminuza y’u Rwanda. Arabarizwa mu Mujyi wa Bruxelles mu Bubiligi.

Filip Reytjens wigisha muri Kaminuza ya Antwerp wiyita impuguke ku Rwanda yamusabye ko bahura.

Dr Rwamasirabo nta mpamvu afite yo kwemera ko iyo nama iba.

Aba bombi barwaniye mu ngabo zari zihanganye ku rugamba. Uyu mwarimu yari Umujyanama ku butegetsi bwakoze Jenoside bwakubiswe inshuro na FPR.

Dr Rwamasirabo ni umugabo w’inyangamugayo, yemeye ko bahurira muri cafétaria y’ahitwa Porte de Namur i Bruxelles.

Nyuma yo gutakambira Dr Rwamasirabo ko u Rwanda rwakomeje kumwima viza, uyu Mubiligi yahise amwereka igitabo aherutse kwandika, gikubiyemo abari bagize Guverinoma ya mbere nyuma ya Jenoside guhera ku nzego z’ibanze kugeza ku zo hejuru, akagenda yerekana ubwoko bwa buri muntu.

Filip Reytjens avuga ko yasanze FPR idasaranganya ubuyobozi mu buryo bungana hagati y’Abatutsi n’Abahutu.

Dr. Rwamasirabo yarabirebye ariko ntibyamutangaje. Nk’umuntu wahunze ubwicanyi bw’Abatutsi bwo mu 1970, icyo gihe yigaga ibijyanye n’Ubuvuzi muri Kaminuza y’u Rwanda, abereye umuyobozi.

Yarebye Umubiligi Reytjens aramubaza, ati “Uri mu kihe cyiciro, uri umushakashatsi cyangwa impirimbanyi ya politiki?

Na we aramusubiza ngo “Ndi umushakashatsi.”

Dr Rwamasirabo yakomeje ati “Ni iyihe ndangagaciro inyigo yawe ishingiyeho nyuma y’uko inyandiko nk’izi zibiza amacakubiri ziba intandaro ya Jenoside, mu gihe tutararangiza gushyingura abacu mu cyubahiro? Ugamije iki muri ubu bushakashatsi? Ubutumwa bwawe bugenewe bande?

Umubiligi yihishe inyuma yo gukora muri Kaminuza yasubije ko ibyo akora bishingiye ku bushakashatsi no kuba ari impuguke ya politiki y’u Rwanda.

Dr Rwamasirabo yahise amusubiza ati “Ibyo uvuga ni politiki idashinga!”

Yahise amubaza ati “Nje mu Bubiligi, ngatangira gukora urutonde rw’Aba-Flamant n’Aba-Walloon, muri guverinoma yanyu, utekereza ko igihugu cyawe cyampa viza?’’

Ubwo bushakashatsi wumva bwazafasha iki Ababiligi? Ubwo ikiganiro cyabo kibakirasoje.

Mu gihe Dr. Rwamasirabo yarangizaga amashuri mu by’Ubuvuzi, muri Kaminuza ya Cheikh Anta Diop muri Sénégal, ni bwo yasobanukiwe ko politiki y’ivangura rigamije kwiharira ubuyobozi ‘divide and rule’ yaturutse mu bakoloni.

Mu bitekerezo bye, yumvaga rya joro yarokotse ari Abahutu bashakaga kumwica.

Byatumye Umunya- Sénégal babanaga mu cyumbawari usobanukiwe politiki na Pan Africanism kumurusha, amubaza ati ‘‘Kuki Abahutu bashatse kukwica, kuki byabaye kiriya gihe ntibibe mbere yaho? Kuki ari Umuhutu wakurokoye?”

Yasubije ko “Ukomeje gutekereza utyo ntaho waba utandukaniye n’abaje baguhiga. Abababibyemo amacakubiri bashaka ko n’ubundi mutekereza mutyo.’’

Yahise yanzura kuba impirimbanyi yo kwibohora kwa Afurika, kurwanya ubwoko, ivangura no gucamo abantu ibice mu buryo bwose.

Dr Rwamasirabo yahise ajya muri FPR, yaje kurwanya ingengabitekerezo ya Jenoside.

Guhura kw’aba bagabo babiri, Dr Rwamasirabo ntibyamutunguye kuko yari asanzwe azi abantu nk’aba.

Umubiligi yageraga ikirenge mu cya ba sekuru agerageza gucamo ibice Abanyarwanda mu gihe Dr. Rwamasirabo na bagenzi be bo muri FPR barwanye ndetse bahagarika Jenoside n’ibyo Umubiligi yari agamije.

Bombi bahuriye mu Bubiligi bazi neza ko urugamba rwabo rutarasozwa.

Uyu Mubiligi kuba yaratsinzwe ntibyamubujije kongera kwisuganya, gushaka abo bakorana no gukomeza kubiba ingengabitekerezo ye.

Dr Rwamasirabo aracyahari, natwe urubyiruko rw’Abanyarwanda turahari.

Ni uko basezeranyeho, buri wese aca ukwe.

Bucyeye ejo bundi, itsinda ry’abashakashatsi batatu barimo Bert Ingelaere na Marijke Verpoorten bo muri Kaminuza ya Antwerp (ha handi Reytjens yigisha) hamwe na Andrea Guariso wo muri Trinity College Dublin muri Ireland, bashyize ahagaragara icyo bise ubushakashatsi buvuga ku busumbane bw’amoko n’ihame ry’uburinganire n’ubwuzuzanye muri politiki y’u Rwanda n’u Burundi izwi nka ‘When Ethnicity Beats Gender: Quotas and Political Representation in Rwanda and Burundi’.

Ubu bushakashatsi ntaho bwari butandukaniye na rwa rutonde rwatangajwe na Reytjens mu mpera za 1990, bugerageza guca ibice mu bayobozi b’u Rwanda mu moko y’Abahutu n’Abatutsi.

Nyuma ya Jenoside yakorewe Abatutsi, politiki igendera ku moko no kubaza abantu ubwoko bwabo yaraciwe burundu.

Abashakashatsi uburyo bakoresheje busa n’ubwa ba sekuru b’abakoloni bifashishije igihe bazaga mu Rwanda. Nko gupima amazuru, igihagararo cy’umuntu n’uko asa, aho yavukiye n’imyaka ye mu kumenya ubwoko.

Ikindi kibazo cy’ubu bushakashatsi ni uko bwashingiye ku makuru yakusanyijwe mu 2007, yavugaga ku mibereho yo mu Rwanda y’imyaka yo hambere mu kugaragaza ko uburinganire hagati y’ibitsina atari ikibazo kiri mu Rwanda ahubwo igihari ari uburinganire hagati y’amoko.

Ishuri rya Antwerp ryahoze iteka ari icuriro rya politiki ivangura amoko yo kubibwa muri Afurika.

Nyuma y’imyaka 25 atarabona viza imwemerera kwinjira mu Rwanda, Reytjens, uri mu banditse itegeko nshinga rutwitsi ryatumye amoko ashyirwa mu ndangamuntu, bigatuma Abatutsi bahigwa bukware, ntaranyurwa. Aracyagerageza kohereza abazakomeza kumufasha gucamo u Rwanda ibice bihishe inyuma y’“Ubushakashatsi bwa kaminuza.”

Kuba Reytjens n’abo bakorana basohora raporo nk’iyi, ntibyantunguye. Natunguwe no kuba ubu bushakashatsi bwaratewe inkunga na Kaminuza y’Umuryango w’Abibumbye.

Nagerageje kwibaza ku itsinda rya ba baganga b’Aba-Nazi, Josef Mengele, Eduard Wirths na Aribert Heim, batewe inkunga na Loni ngo bakomeze iyicarubozo n’isuzuma ry’urukozasoni ku Bayahudi aho byari bimenyerewe gukorerwa muri Auschwitz cyangwa Antwerp, nyuma y’imyaka 25, Jenoside yakorewe Abayahudi izwi nka Holocaust ibaye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza