‘Abanyarwanda ntibakwiye kureka ifi bafite mu biganza ngo bakurikire iri munsi y’ibirenge’

Yanditswe na Philbert Girinema
Kuya 18 Kamena 2015 saa 05:06
Yasuwe :
0 0

Umunya-Senegal, Fousseyni Diarra, ufite inkomoko muri Mali wahoze ari umupilote w’indege yagize icyo avuga ku cyifuzo cyagejejwe ku Nteko Ishinga Amategeko y’u Rwanda cyo kuvugurura Itegeko Nshinga bityo Perezida Paul Kagame akabasha kwiyamamariza manda ya gatatu.

Mu gitekerezo cye asobanura ko iyi ngingo yagarutsweho cyane mu bitangazamakuru ndetse inanengwa na bimwe mu bihugu avuga ko bitekereza ko ibindi biri munsi yabyo.
Avuga ko icy’ibanze hagomba gutekerezwa uko ibihugu byabonye ubwigenge ndetse hakanagaruka ku bibazo byagiye bigaragara nyuma yabwo aho usanga hari n’aho ibisigisigi byabwo bikigaragaza.

Asobanura ko kubera ubukoloni Afurika yakunze kuba ‘agatebo’ kakira ibitekerezo bitandukanye bivuye ahandi ndetse inaba isibaniro ry’intambara za politiki n’ubukungu byose byatewe n’abashaka inyungu runaka gusa ngo ntabwo ari uko Afurika itari ifite ubushobozi cyangwa gushaka kwishyiriraho umurongo w’aho ishaka kugana hagendewe ku muco bityo uyu munsi akaba atariko bikwiye kuguma.

Avuga ko n’ubwo ubwigenge bwabonetse mu nzira zitandukanye ariko na nyuma yabwo byabaye ingorabahizi ku kuyiyobora aho haburaga babifitiye ubushobozi bahagije kandi n’inararibonye zikaba zari zikiri nke.

Ati “Uyu munsi Afurika yuzuye abadogiteri, abahanga, inararibonye ndetse n’abahanga ku by’Itegeko Nshinga n’abandi, bamwe muri bo ndetse bafite ubumenyi bwo hejuru bufasha mu kugena icyerekezo cy’iyi si aho abantu no kubaho kwabo bitagifatwa nko kwivanga.”

Yongeraho ko Itegeko Nshinga rishobora guhindurwa bitewe n’ibihe igihugu kigezemo n’ibisabwa n’amategeko ariko hakibandwa ku nyungu z’abaturage.
Anenga ibihugu by’amahanga byitwaza ijambo ‘Demokarasi’ hagamijwe gukomeza kwibasira abayobozi ba Afurika mu gihe nyamara kandi hakomeza gukorwa ibyaha bitandukanye mu izina ry’iyo Demokarasi.

Ku Banyarwanda, avuga ko bafite igihugu gitatswe n’amahoro n’ibirunga byiza bityo bakaba bagomba no ku bisigasira; ndetse ko Demokarasi bigeze kuzanirwa n’abanyamahanga nta kindi yabasigiye uretse urwango yabibye mu bana b’u Rwanda bikarangira umwana yishe undi, Abanyarwanda bakicana byose biturutse kuri urwo rwango n’ivangura moko.

Diarra ashima Perezida Kagame ku bwitange yakoresheje agakura Abanyarwanda mu kaga maze akabasubiza agaciro; aho yasubiyemo amagambo yavuzwe n’uwitwa José Marti (ufatwaa nk’intwari muri Cuba) wagize ati ‘Ubushobozi bw’abayobozi ntibugaragarira mu bantu ahubwo bugaragarira mu byo babakorera.’

Akomeza avuga ko Abanyarwanda ko bafite umuyobozi mwiza n’igihugu cyiza cy’amahoro nyuma ya Jenoside yakorewe Abatutsi ariko kikaba cyarabashije kwiyubaka nyamara benshi barakibonaga nk’ikitazongera kubaho.

Ashimangira ko Abanyarwanda bakwiye kumenya icyo bashaka ndetse bagaharanira kubigeraho, Fousseyni Diarra yakoresheje imvugo ya gihanga ati “Ntimukareke ifi mufite mu biganza kubera iri munsi y’ibirenge byanyu.”

Yakomeje agira ati “sinasoza iki gitekerezo ntavuze ku magambo yigeze kuvugwa n’umwarimu mu by’amategeko aho yagize ati ‘Iyo habaho inganda zikora abayobozi b’ibihugu by’Afurika kubera abaturage bacu, byihuse uruganda rwa Paul Kagame rwari kuba intangarugero.’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza