Kwamamaza

Abategetsi b’Abafaransa banga Kagame cyangwa banga abaturage b’u Rwanda?

Yanditswe kuya 24-11-2016 saa 09:30' na Kalisa Rugano


Mwaramutse bantu b’u Rwanda? Uwababaza mwansubiza, mutabikora mukisubiza? Icyo bibasaba ni ugutekereza nk’uko musanzwe, cyane cyane mugasubiza agatima impembero mukibuka.

Kuki “Ndi Umunyarwanda” hari abo ibangamira? Kuki tubaho nk’uko turiho? Kuki hari Abantu badutsikamira ubutunamura icumu? Abategetsi b’Abafaransa rero, mwebwe uko mubizi, uko mubyumva cyangwa uko mubitekereza, abo bategetsi baba banga Kagame? Baba banga abantu bakaba ari ko bateye?

Twari dukwiye kubimenya nyamara. Ndi Umunyarwanda ni intego. Ubwo numva nifuza gukomeza kwandika kuri iyi ntego ya “Ndi Umunyarwanda”, basomyi mwankundira nkabanza ngasangira namwe ibi bitekerezo nifuje kubagezaho?

Abategetsi b’Abafaransa ntibadukunda, ntibigeze badukunda. Iyaba barekaga kudukunda ariko bakatureka, bakatwihorera, bikamera nk’aho kuri bo tutariho ntibadukurikirane.

Ariko ubwo muzi aho bahereye?

Nigeze gusoma agatabo kanditswe n’umwe muri bo batatwifuriza ikibi dore ko ari ntabapfira gushira, akaba yaravugaga ibyo abategetsi babwiraga abakozi babo bazaga “kuduteza imbere” ngo ko bagomba gukora ibikorwa biramba cyane cyane ngo ntibazagire amakosa yo kwigisha Igifaransa cyinshi cyazubaka ibitekerezo byo guhangana na bo. Ngo bakarangiza bababwira ko bagomba kumara igihe kirambye mu Rwanda.

Aho hantu nahasomye nk’inshuro makumyabiri kugeza igihe nsa n’uwahafashe mu mutwe. Ibitabo niko bigenda barakantwaye, ubwo nabo bari bagakeneye. Hari muri 1977.

Hari abibwira ko Abafaransa baje ku ngoma ya Habyarimana. Si ko bimeze. Abafaransa bazanye n’ubukoloni, cyangwa baranabubanjirije.

Dore uko byagenze nubwo uko byagenze ibara umupfu

- Musenyeri Hirth, Abaganda bamugeze amacumu ati ndapfuye!
Asanze yatangatanzwe aca inkeramucyamo ahungira ahari Tanganyika, atunguka iwacu ati ba! Araterwa aramera, yigisha ibyo Cardinal Lavigerie yamutoje ari kumwe n’abo bitaga ba “missionnaires” ari bo ntumwa.Yari Umufaransa wo muri Alsace-Lorraine.Uwo si umwe!

- Musenyeri Léon Classe yari Umufaransa. Abo si babiri?

- Musenyeri Déprimoz yari Umufaransa, ntibabaye batatu?

- Musenyeri Perraudin abamuzi bemeza ko yari umuhanga kandi,yari Umusuwisi wo muri Valais “Le Valais ni Intara (région ethnique) y’aho bita Suisse Romande.” Iyo ni ethnie y’Abafaransa ureke twe babigeretse ho tutagira aho duhurira na byo.

Ibyo mbe mbisubitse, nite kuri iyo “Région Ethnique” nkomeze nsasire:

- Indangagaciro zari zitugize

Abakoloni baturutse ikantarange,bavogera inyanja ya Atlantique,boga amazi magari ya Méditerranée, bataha mu butayu bwa Sahara barabugenda ari ko bagarika imbaga, bigarurira impugu n’ibihugu badukira amashyamba y’umutamenwa barayasesera n’iwacu mu misozi miremire aho inyokomuntu ikomoka bati ba!

Baza barya intobo bazita intoryi, barya ibimonyo n’umuswa, isenene n’inyoni…basanga dutunze. Dutunze inka nziza zidatunzwe no guterwa urushinge, tukamenya uko tuzivura. Dutunze inka n’inyana zazo, dufite imikumbi y’ihene,dutunze Imana y’intama tukorora izo dutunze.

U Rwanda warukorera rukagukamira. Buri gikorwa ari ingirakamaro

Inka atari intati, ari intera buntu
Za Cyamatare zokotse
Mu bicu hejuru
Zikura imbishya ku mutima
Zigatera imbiribiri ku mubiri
N’umuhutu utari azitunze
Yazitunga bakamutura umugeni!

Muti ararikoze wa musaza avuze umuhutu! Muti mwitege aho avugira umututsi…Ubwo nkaba mbabonye mutambonye!

Mbasabye ko twihangana tukareka iby’ingengabitekerezo n’imizi yayo muhumure nanjye byaranshegeshe. Kandi ntituzarwanya ikinyoma ikomokaho tudasesenguye imvugo ikomoka ku ijambo ijyana ku ntekerezo.

Abasizi b’Abakurambere bati “n’umuhutu utari uzitunze yazitunga bakamutura umugeni”.

Nguko uko badusanze abahutu, abatwa, abatutsi atari ubwoko.Tuzabigaruke ho mu yindi nyandiko,ariko iki gisigo kigire icyo kidusigira. “Umuhutu utari uzitunze yazitunga bakamutura umugeni”.

Gutura umuntu umugeni, ryari ?

Yavuye mu cyiciro akajya mu kindi, bakamwakira, agasaba agatebutsa bakamushyingira, bagakomeza bagahana inka n’abageni, abana bakavuka bakarerwa bakazabyara abandi, bagatunga bagatunganirwa, imvura igwa iwacu ikeza imirima.

Nguko uko badusanze tutaratinyuka kubaga inyana bo barazitinyuka barazibaga barazirya , agakinjiro kaba agakinjiro !

- Abo basenyeri n’abapadiri babo, ababikira n’abafurere basanze dufite icyumweru cya Gihanga, tukizi kandi tucyubahiriza.

- Icyumweru cya Gihanga cyari kigizwe n’iminsi itanu, aho buri rwego rwari rwarahariwe umunsi umwe.

1. Habanzaga iminsi itatu yo kwikorera, yari yarahariwe inka,abagabo n’abagore mu bikorwa byabo.

2. Hakurikiragaho umunsi w’Ingoma ari yo mpagarike y’igihugu.Uwo munsi Abanyarwanda bakoraga imirimo rusange yitwaga Umuganda. Abantu bakajya gushyira umuganda ku rugo rw’umutware.

3. Maze umunsi wa gatanu ukaba uw’ikiruhuko cy’umwami –Mana Gihanga.

Imirimo yakorwaga kuri uwo munsi ikaba ijyanye n’iyobokamana.Iyo ikaba iy’ubugiraneza, gusenga, gutanga amaturo, kwibariza, kuraguza no guterekera.

Nuko icyumweru kikaba umunsi wera (umwera) utagomba kwanduzwa n’ibikorwa bisanzwe, ari naho havuye ko “Wica icyumweru inkuba ikakubika mu nda”.

Abasenga Mungu mwarabibonye ko n’ibyaduka by’abakoloni bananiwe guhanagura ibyacu byose, iminsi igahinduka mu kwiyongera ariko icyumweru kikagumaho.Bataraza twateraga hejuru tugasenga:

- Tuti Seka Gasani k’i RWANDA
- Rusekere rugubwe neza
- Rusendereze amahoro n’amahe
- Rutsindire icyago n’icyagane
- Rutsindire umwanzi wo mu mirambi
- N’umurozi uvuka ishyanga
- Garika ibiganza utugabire Rugaba, Rwagisha, Rugabo maze twishyuke mu Rwanda.

Iyo ndebye ubwoba ubu bene madamu bafite ngo ibyihebe byarateye ndicecekera kuko koko bababaye, bicirwa, barira, babuze umutekano nkora uko nshoboye ngo mbumve, nanumva ko ubugome bwabo bwo buri kuri bo koko, bwateye ubw’abandi kuzura umugara ahari!

Nkibuka ubugome bwa Mitterrand n’abambari be

Hari kuri 14/07/1994, wari umunsi mukuru wabo wo kwibohora. Bari mu busitani bw’ingoro ya Elysée aho yari agiye kuganira n’abanyamakuru nk’uko bigenda iteka kuri uwo munsi. Baraganira, biza kugera aho bamubaza bati ko twumva ko jenoside yaciye ibintu mu Rwanda yica Abatutsi, tukaba twumva ko Leta y’u Bufaransa yaba ibifitemo uruhare, hari icyo wabitubwiraho ko biteye ubwoba?

Yabasubije nta mususu ati “Buriya muri biriya bihugu , abapfu ibihumbi magana abiri si ibintu bikomeye”! Uwabisubiramo uko yabivuze atiriwe aca hirya no hino ahakana, ajijisha nk’uko ubundi yari asanzwe, yabivuze muri aya magambo, “Dans ces pays-là, deux cent mille morts ce n’est pas très important”! Ibihumbi Magana abiri!Nguwo umutware mukuru wa cya gihugu cy’igihangange batangaho urugero rwa demokarasi “Le Pays des Droits de l’homme et des peoples.”

Igihugu kivuga ko ari icy’ukwishyira ukizana, uburinganire n’ubuvandimwe, (Liberté, Egalité, Fraternité), ibyo ubitunze iwe no muri we ubundi ntavanga ariya magambo…Icyasha cya mbere ni icyo.

- Alain Juppé uko babinuganuga iwabo ngo yaba ariwe wazatorwa akaba Perezida w’igihugu cyabo mu matora ataha

Uwo mugabo bamwe mu b’iwabo bamuzi nabi cyane. Ngo arirata, aragagaye, yigeze kwishora mu bujura bukomeye agikorana na Chirac wari umukuriye, aza kuhaba umugabo mu bujura bwe, yitangira shebuja aramwimana aba ariwe ucirwa imanza baranamuhana arahungabana cyane ahungira muri Canada, ipfunwe rimubanye ipfunwe!

Kwa kwimana Shebuja kwaje kumuviramo ishya, Shebuja wari akuriye ishyaka ryabo aramugororera. Jenoside yakorewe Abatutsi yabaye ari we Minisitiri w’Ububanyi n’Amahanga ku ngoma y’ubukeba ya Mitterrand na Balladur.

Uruhare u Bufaransa bufite muri jenoside yakorewe Abatutsi mu 1994 ntiyatera icyasha abandi imusize. Uwo mugabo natemera ukuri kw’ibyo yakoze, akaramuka atowe bizatugora kubana.

Niwe wivugiye adasobwa adateshaguzwa ko “U Rwanda rutinyuka rukavuga u Bufaransa, rugatinyuka rukemeza ko u Bufaransa bufite uruhare muri Jenoside yakorewe Abatutsi ari ibiterasoni n’icyaha cyo gusibanganya amateka.”

Ubwo nagerageje gushyira mu magambo y’iwacu gusa mu rurimi rw’iwabo babyumva vuba, “Faire procès à la France de porter une part de responsabilité dans le génocide au Rwanda est une honte et une falsification historique.”

Ururimi rw’umwe ngo rukamwa inshyushyu, ubwo hari abo abibwira bakabyumva bakabyemera, bakumva ko u Bufaransa butabikora! Nababwiye haruguru hariya uwo mugabo uwariwe! Ni kimwamwanya nkuko ab’iwabo babivuga, babyemeza ariko akaba azwi ko ari n’inyaryenge!

Chirac shebuja w’igihe kirekire, yigeze kubwira abo bari kumwe na nyir’ubwite ahari ko Juppé nyine ari “le meilleur d’entre nous.” Kuri Chirac ntibyari bitangaje…

Alain Juppé avuga aya magambo, Perezida Kagame yari amaze iminsi itatu nawe avuze bamubajije, ati “Alain Juppé natorerwa kuba Umukuru w’u Bufaransa, bizaba ari ryo herezo ry’imibanire y’u Rwanda n’u Bufaransa?”

Yari abajijwe na François Soudan, umwe mu bayobozi bakuru ba Jeune Afrique, ufite n’ukuri abona mu byabaye mu Rwanda, uko abona Abanyarwanda,uko abona Umukuru w’u Rwanda bigendera ku byabaye aho gushingira ku moko n’amagambo y’amatamikano. Warakoze François ….Soudan, hatagira ugira ngo ndashimira Mitterrand!

Ibyo Perezida Kagame yabivuze tariki ya 28 Werurwe 2016. Alain Juppé twabonye ko yari Minisitiri w’Ububanyi n’Amahanga wa Mitterrand kuva mu mwaka wa 1993 kugeza muri 1995. Kuva icyo gihe kugeza ubu, Alain Juppé aracyemeza ko kuvuga u Bufaransa n’uruhare rwabwo muri Jenoside yakorewe Abatutsi ari uguca inka amabere!

Uko niko kuba intagondwa ariko ubwo butagondwa bukaba bwuzuye ubugome kuko iyo kuri bose iwabo hagize igikoma igikuba gicika.

Alain Juppé n’ab’iwabo bakaba bamuziho ubwo bugome, uko kugaragaza ndetse no kuba igifura; Dans les mots des Politiques ari ko kuvuga ibyagiye bivugwa n’Abanya politiki babo,uwo mugoroba Jacques Chirac yatowe muri 1995.

Undi mugabo w’igihangange w’iwabo witwaga Philippe Séguin, utari umwanzi wa Juppé kuko bari banahuje umutwe w’Ishyaka bakaba n’abatoni b’akadasohoka ba Chirac wari umaze gutorwa yavuze aya magambo akomeye “-Ce soir je vais faire la fête. Demain, je dors.Et après-demain j’entre dans l’opposition.
- Pourquoi?
- Parce qu’avec Juppé, les conneries vont commencer très tôt.
Sinirirwa mbihindura ni bigufi, bikaba bifite uko byumvikana neza mu rurimi nyirabyo yabivuzemo biriryoheye byemye!

Nguwo Juppé utadohora, utadohoka, udakura mu ruge.
Kumurwanya tukamushobora ni ukuba Umunyarwanda uhamye, tukarwanya ibinyoma byabo tukabyereka Isi yose.

Abasenyeri , ba padiri, abafurere, ababikira kugeza no ku bafaratiri bose bavugaga ijambo rimwe rikomoka kuri Kiliziya Gatolika ikomoka ku ntumwa “ urukundo!”
“Jya usenga Mungu umwe musa, umukunde kuruta byose.”
Hari abavuga Imana mu mwanya wa Mungu,ariko kuri bo Imana yaje nyuma!
“Jya ukunda mugenzi wawe nk’uko wikunda.”

Mbega imigambi, mbega intego

Uko byaje kuyoyoka byari bisekeje iyo bitaba bigizi bya nabi!

1) Ngarutse kuri abo Basenyeri, mwese muzi imbaraga bafite ku ruhererekane rw’uko barutana. Iwabo babyita “La Cordée”. Tenir la Cordée…kuri bo, bivuga ko bafashe umugozi umwe uboshye ukannye, bakawufata bose kuva kuri Mameya n’ababikira be, abapadiri n’abafurere, kuzamuka kugera kuri ba Karidinali no kuri Papa ngo ba…Nko kuri ya ngoma…

Ba Musenyeri rero kuri jye no ku bandi bazi amateka ya bariya bantu, nta bapagani bangana nabo!Kuri jye nanone, bariya biyita ba Misiyoneri babaye, n’ubu, abafatanyacyaha b’Abakoloni.

- Badutwaye Gashamura ngo aragurira Umwami Musinga akanamugandisha, ajya kugwa i Gitega hagati y’Abarundi b’Abarimiro yari afite iwe.Turaceceka.

- Badutwara Musinga ajya kugwa Ishyanga yari afite iwe ari n’Umwami w’Igihugu cyitwa u Rwanda kitari icyabo.Turumirwa.

- Batwicira Umwami Mutara Rudahigwa agwa u Rwanda igicuri, yemwe agwa no mu maboko yabo bamujombye igishinge cya gishegesha.

Abanuganuga ukuri bakuru bakuzi, bakaba baragiye bapfa uruhongohongo bagwa ibuhunzi bari imfura zitaha iwazo, bavugaga ko hari ibigabo by’ibihambati byaba byari ibifulama cyangwa byaravuye muri Afurika y’Epfo byabyawe byororwa na Apartheid nyakubwerabwera yatwambuye Abanyafurika benshi b’imena barimo Stephen Bantu Biko na Mandela akaba yarabaye inkirirahato!

Ngo ibyo bigabo byari bihari birekereje ngo bikaba byaraje kwinjira igihe kigeze

Muribuka ko Jean Paul Harroy wari Guverineri wa Ruanda-Urundi yari afite urugo muri Afurika y’Epfo, akaza no kuhabonanira na Guy Logiest de triste mémoire wabaye ikishi iwacu…

Mwibuke ku bakuru, namwe bana mubyumvise bwa mbere mumenye, muzanakurikizeho kubaza ngo mumenye kurushaho,ko icyo gihe hari umuforomo w’Umunyekongo wari wungirije muganga De Vincke, wasohotse aboroga atabaza mu kirongozi cyose (ku bazi ibitaro bya Prince Régent aho Umwami yaguye,bifite ikirongozi kirekire cyane kigororotse kiva mu cyumba cyo kubagiramo (salle d’opération) epfo kikagera ruguru ku biro by’abayobozi (Administration).

Umuforomo rero aboroga ikirongozi cyose avuga mu Giswayile ngo “Banamuuwa mfalme wa Rwanda, banamuuwa mfalme wa Rwanda”, agenda asubiramo ngo ahari bose babyumve agenda ahunga, aza no kubura kuko bamushatse kugera iwe bakamubura!

Yari atuye muri quartier Belge nk’uko hitwaga icyo gihe hakaza kwitwa Bwiza ku Ibereshi… Bageze iwe basanga yameze maremare yambukira Gatumba-Kamaniola agana i Uvira…aranyika! Inde da!

Yari azi urwo bamukanira bamufashe. Mwibuke ko hari ku wa 25/07/1959, ni ukuvuga ko twari tukiri mu Bukoloni!Umwami wacu baramuhitana abarira bararira barihanagura.

2) Kayibanda afatanyije na Andereya Perraudin baratwivugana, abapfa barapfa ,abahunga barahunga.

Hashize igihe Habyarimana yivugana nyangufi nanone Perraudin abihaye umugisha n’Abafaransa ba Leta babishyigikiye.

Amwivugana ariwe wari waramutoye mu bandi amugira umuntu, inyiturano y’isi ikaba iyo! Abafaransa baratona baratoneshwa,nabo baratonesha…

Ibyabo na Habyarimana biba iby’akadasohoka, ari byo byatumye Padiri Alexis Kagame avuga ya nteruro ye ikomeye cyane yerekeranye n’aho byaganishaga, ati “Les Belges ont engendré et les Français portent la couronne de la maternité.”

Mu Kinyarwanda yabyise atya dore ko yari yifitiye ubuhanga yisangije “ Ababiligi barabyaye, Abafaransa batega urugoli!”

Ubwo ari ko urwango rubica hagati y’Abashiru n’Abanyenduga bitabujije ubufatanye bubisha mu gukora ibibi byose na Jenoside ikaza kuza.

Ibyari byo byose, abahekenya amenyo bayamarira mu nda, Kayibanda arapfa ntitwakoma.

Habyarimana arahanutse. Aho gukora anketi nyakuri, basimbukira kuri FPR n’abayobozi bayo bati muramwivuganye nimufatwe mufungwe babakanire urubakwiye yemwe na Perezida wacu bamugera amajanja mu mvugo ahari bashakisha n’ingiro nk’aho atagira amategeko amurinda. Ako gasuzuguro bahu …ako gasuzuguro bako…!

- Inkotanyi z’amarere

Hari umusaza witwa Bagorozi utari ntukamazina n’ubwo adakomoka kuri Bagorozi mwumva w’umusizi w’umusinga. Bagorozi uyu nawe ariko akaba Umusinga.Akaba n’inshuti nkunda kandi nubaha. Akamenya amateka agakunda no kuyasesengura.

Umusaza Bagorozi nawe wo muri Nyaruguru niwe wanyibwiriye tuganira, nkunda kumwegera ngo mvome ku isoko ati “Nta n’umwe wa kera wabarushije. N’umwe!”
Asubizayo ati iyo ubyaye urahembwa, ba sekuru b’umwana bakishima.Nyirakuru na Nyirasenge bakamusimbiza bati kura mwana uzarerwe utungane dore nta kubyara nabi nko kurumbya. Ngo bagasubiza yo bati inyana utazakama yicwa n’amata, wowe tuguhaye umugisha uzakure ube ingirakamaro.

Inda yabyaye Inkotanyi irakabyara ibyagije nta muvumo uzazibasira uwo mugisha zarawuronse urazihira, uraduhira, uzahira Afurika n’Isi kandi birarimbanyije, babaye ingirakamaro bihebuje.

Bagorozi asubizayo ati "Yaba Ruganzu yaba Mukobanya yaba Bwimba yaba Nyamuheshera yaba Rujugira yaba Mutangatiro bose babaye intwari bavana u Rwanda mu mpatanwa z’icyo gihe, kandi babaye intwari koko bo n’ingabo zabo, ariko nta wageza aho Inkotanyi zavanye u Rwanda na bene rwo."

Ubwo rero aho tuvuga ba Habyarimana, Inkotanyi zari zahanyuze!

Abari barashyekewe bayoberwa ibyari byo.Tuganira na Bagorozi, ati urabona ngo “Tube igihugu cyakijijwe n’Abana” ariko abenshi tube indashima!

Ibyo bintu birakomeye nyamara…

Abakuru muri twe bazi izurungutana ryabaye bavuze ko Inkotanyi zambutse inkiko zigana i Rwanda. Bazi ko abazi guhebeba, kuboroga no gutabaza baciye ibikuba hose kw’isi bavuza iya bahanda bati nimutabare bene igihugu rubanda nyamwinshi barapfuye bazira demokarasi n’uburenganzira bw’ikiremwa muntu buhohotewe.
Abakuru gato, mwaba mwibuka urujya n’uruza rw’abantu bari bafite amazina akomeye twajyaga twumva mu badupyinagazaga, nka Martens, Euskens, Perraudin wari wahiye ubwoba azi ko ari we bahiga wenyine, Reyntjens, Harroy wari ushaje avugira aho yicaye!

Muzi ihihibikana ryabo muri ibi bice by’ibiyaga bigari, amazuru n’amatama byatukuye, za mouchoirs zatose ngo barashaka ko Inkotanyi zisubira iyo zavuye ntizitere Demokarasi .

Tuzabigarukaho , bisesengurwe birwanye ikinyoma kibishye kandi bigitsinde.

Ubwo rero Inkotanyi zari zaje, igitutu zotsaga abagome cyumvikana mu bikorwa byose, abari barashyekewe kwica no gupfyinagaza Abanyarwanda basa n’abumva ko na nyina w’undi ashobora kubyara umuhungu!

“Ukwibyara gutera Ababyeyi Ineza”

Tugaruke aho twari tugeze:

- Sindikubwabo n’Abatabazi be bazambara ikizinga-qu’est-ce que je dis- icyashya ni cyo navugaga, cya Jenoside kugeza aho isi izashirira. Ibyaribyo byose, Sindikubwabo yabaye Perezida w’u Rwanda yahekuye, murajye mu Nzu Ndangamurage y’Igihugu murebe urutonde rw’Abadutegetse arimo.

Ntuza uwo rero Sindikubwabo ko mwumvise ko atakiriho, akaba ataraguye iwe aho yari atuye, ataraguye mu Rwanda, mwumvise abamuroshye bakabimufashamo barigeze bakopfora? Hari ubwo bigeze gutekereza ko amateka akwiye kumenya urwo yapfuye? Nyamara yabaye uwabo amezi atatu n’iminsi, atonnye, yica adakiza.
Babaye nk’abavuga bati turamukize, kandi tumukize tutakimwikoreye !
Bakaba babeshyera ubusa.

None se ko wumva bagira abo banga n’abo bakunda, ubwo we n’abandi nkawe bakerakera iyo hose barakunzwe, cyangwa barakoreshejwe?

Murumve ibya ba Musenyeri b’Abafaransa ndabyibutsa, n’ingabo zabo nyinshi zirimo n’abakirisitu bahabwaga penetensiya bagahazwa bagahabwa abusolusiyo ikiza ibyaha ikongera inema ntagatifu,mu masakaramentu harimo n’ay’ugusigwa kw’abarwayi,murumva hari ahari rwa rukundo bigishijwe?
Ahubwo ntimwumva ibyago n’ububisha bubyuzuye!

3)Tuvuge gato kuri ba opposants na oppositions zabo. Muzarebe neza.Ubwo ni ugushishoza no gusesengura.

Ndabasabye kandi mwibuke ikibazo cya cyasha natangiriyeho n’amahano n’ishyano bicyuzuye.

Ba opposants ni ba nde ?

Sinakurikije imibare ijyana n’ubuhanga bwanyihishe, ariko njya kumva uko ngenda nkura, nsaza, natwe nk’abaturage b’u Rwanda twiyongera. Ejo bundi hariya bati turi miliyoni icyenda. Ejo bundi bati twabaye icumi. Ejo bati twabaye cumi n’imwe. None ngo turakabakaba cumi n’ebyiri.

Kandi ubwo abana n’abuzukuru basigaye babyara bisukuye. Baguna!!
Za ndahekana sinziheruka hose nk’uko byahoze.Aliko turi abo. Icyo nshaka kuvuga si icyo ntaza kugira amazinda y’abasaza.

Uburondogozi bwo mubwihanganire ntimubukira sinabaha igitekerezo cyanjye. Icyo nshaka kuvuga ni uko izo miliyoni zigizwe n’abarenze 90% bari mu Rwanda. Turi iwacu kandi nta mirambo tubyuka ngo dusange yugarije amarembo, irambaraye ku nkengero z’imihanda (trottoirs) se, oya da! Turaho kandi turiho.

Ubu nta muntu utambuka ngo agutuke, agukubite inkonji,ukubitwe impfunira,utikurwe igipfunsi cyangwa ubuhiri. Yewe nta n’ugikubita inka inkaranobe!

Turaho, kandi turiho pe…muzabaze n’abandi batari njye. Maze rero: Ba opposants ni bande?

Bariho simbagaye simbapfobeje simbavugira. Bariho turabazi. Ariko ni bande? Politiki icyo yemera, nemera , ni uko guhuza ibitekerezo atari ihame. Natwe turi mu Rwanda ntimugire ngo twese turi ishyo ryahuka rikarisha hamwe , rigashoka ku iriba rimwe ikibumbiro ari icyaryo! Oya natwe ntidushoka hamwe rero, ariko tugahurira ku Bunyarwanda.

- Ba Opposants iyaba nabasabaga bakampa, babaye ba opposants politiques. Uretse benshi muri bo, bahunze basize bahekuye u Rwanda, abandi usanga benshi ari abigeze kugira icyo bapfana n’ingoma iriho.

Bamwe ndetse bakaba abigeze kurira mu biganza byayo ubu bashaka kuruma!
Muzabitekereze munaganire muzasanga abenshi biganisha ku mirire. Ikinyereka urwango Abafaransa bahora buhira, babagara, badasarura ku Rwanda, nabwo kuko Inkotanyi zihora zigabye, ikibinyereka rero nuko ibyo bita indangagaciro“Critères’’ ngenderwaho za Demokarasi bazishakira kuri bene abo!

Ni igitangaza ku bantu babyaye abahanga mu b’imitekerereze ‘les grands philosophes’ nka ba Blaise Pascal, ba René Descartes ku buryo bafite na n’uburyo bwabo ‘méthode cartésienne’ bwogeye ku Isi nk’ubwabo bihariye bufite umurongo bugenderaho ( Thèse, Antithèse na Synthèse muri yo). Bagatekereza batyo , bagatinyuka bakajya gushakira amata ku ngumba!

Ni igitangaza ku bantu babyaye, Rousseau, bakabyara Voltaire na Diderot bise abafilozofe b’urumuri ‘les philosophes des Lumières’ bakaba n’ubu bakibagendera ho!

Ni igitangaza ku bantu babyaye Corneille, Racine, Molière na Beaumarchais babaye ibihangange mu kurwanira kwibohora no kubohora abandi… Ubwo simvuze ba Hugo, Balzac, Lamartine, Dumas n’abandi bahanga babo…

Ni igitangaza ku buryo bimpa kugira uko mbibona

N’ubwo tubizi badakunda kumva ibyo badashaka kumva, reka mbe nka Runukamishyo rwa Nyaminani wa Nyamurorwa w’Umusizi akaba n’Umuhanuzi nyawe, bamutanze ati “Mvuge mpfe, mbe ntavuze mpfe, napfa mvuze!” Cyangwa nka George Orwell, Umwongereza w’umuturanyi wabo, ati “Gutinyuka kubwira abantu ibyo badashaka kumva.”

Natwe ibyo twahuye na byo wa mugani wa Rukabu,ati “Uwanyuze aho nanyuze,uwabonye ibyo nabonye,uwaciye aho naciye n’ibyo naciyemo ntaba akigira ubwoba!” Natwe ibyo twahuye na byo nitwe tubizi, bo ntibakaze kudukina ku mubyimba ngo nitubihorera bashyekerwe bice nibananirwa kutumarira ku icumu baze no kuducira imanza.

Imanza zabo nazo abantu bakarenga wa “Mugogo w’igiti uri mu jisho ryabo”, wa mugani w’umwami wabo wacu Yezu Kristu, baza kureba « “Akatsi kari mu ryacu” bakitwa abacamanza. Abagabo b’intangamugabo, abacamanza bagira icyo bapfana na babandi bakoze Jenoside, bibye, bahunze ingengabitekerezo ya Jenoside kuko batashoboye kubana n’abantu bazima, abananiwe kwinjira muri Politiki irebera bose kuko bo bamenyereye ‘’Akazu’’! Abo bose…

a) Kubaza bene abo iby’u Rwanda ni nko gukora abantu mu jisho bwa kabiri.
Kubaza bene abo ni nk’uko Abayahudi bacirwa urubanza na bene Himmler,Goering na Goebels…

Na mwe abantu basize bamaze abandi, barahungishijwe, bidatinze bakaba aribo baba abatangabuhamya b’imena ku mateka na politiki by’u Rwanda. Ari bo bashinja Abayobozi b’uru Rwanda. Hagira undi muntu uwariwe wese w’iwacu ugira uko avuga u Rwanda uko ruri bati uwo birasanzwe yaraguzwe!

Kugurwa! N’ejo bundi abaturage barenze miliyoni enye bisabiye ko Perezida uriho yahabwa amahirwe yo kongera kwiyamamaza nk’abandi, induru ziravuga bati baraguzwe, barabihatiwe, bara…bara…

Ni ukwiyamamaza si ugutwara! Bo bati naramuka yiyamamaje nta shiti ni we!!
Hanyuma se? Muribuka mu ntangiriro yo kubohora u Rwanda , bivugwa hose ko nta wakomoka muri Nyamuke ngo atware Nyamwinshi!!!

Nonese muri aka kanya arabagose bose arabacuritse abutse ibifutero ku buryo bemeza ko atabayobeye bataribona mu wundi… Nuko bakagurwa! Bo iyo bari ikantarange bagatuma abajya guperereza ngo babaze kandi bivugwe, ubuhamya butangwe, ko hari igitugu cyakoreshejwe ngo bandike biriya.

Nkaba nanjye nemeza ko ndi umuyobozi hakaza abaturage banyemeza ko bashaka uyu n’uyu ngo abatware, nababwira n’umutima mwiza ngo amakenga ashire, nti nimubyandike. Nguko!

Ba Bakunzi bacu muri za ndangagaciro za Demokarasi bafite aho babaza, bakagira n’abandi babunganira.Babandi bagiye bahunga ibyo batashoboye.

Baba barananiwe, baba barananijwe kuko nabyo bishoboka kuko dukwiye kumenya ko Politiki ihora ihinduka.

Ugiyemo ntagira amasezerano na sitati bimugenga. Politiki iraharika pe,kandi ni ku Isi yose.

b) Kujya guca urubanza, gushaka kugira ibyo umenya ku gihugu cyacu ukabaza abo, ni nko kubaza urwanira umurima n’undi cyangwa uwo mupfa inka zanyazwe.

Ni nk’uko umugabo yaba yarashatse umugore yamuharika ntabyemere akahukana, kuko asanze muri politiki y’urugo atakiri nyirankundwakazi, maze Bruguière yazajya kubaza iby’urwo rugo rw’uwahoze ari umugabo we n’umugore wundi yashatse n’abana yabyaye, akabibaza nyiramama wanjye, byanarimba akamushyira imbere y’akanama k’abakemurampaka, bikabaho bityo kuri urwo rugo imyaka n’imyaniko…
Kandi ntibabaza abakeba gusa, babaza n’inzigo…Na none kandi babazi. Ba shebuja abo barabazi, babita des opposants alimentaires bati ni imirire…ubwo mwaba mukibaza ibya rwa rwango?

Bantu b’iwacu, mwabaye mundetse nkaba nsubikiye aha, ko mbizi igihe ngihumeka, urugendo kuri ibi rukiri rurerure!

Umwanditsi Kalisa Rugano

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved