Amwe mu makosa akomeye ashobora gutuma Ikinyarwanda gipfa, kikazimira

Yanditswe na Kanamugire Emmanuel
Kuya 17 Ugushyingo 2015 saa 05:16
Yasuwe :
0 0

Ururimi ruravuka, rugakura rutakwitabwaho rugapfa. Ibi bishobora no kuba ku Kinyarwanda mu gihe cyakomeza kuvangirwa n’imvugo zikoreshwa muri iyi minsi.
Ikilatini ni rumwe mu ndimi zigeze kwigarurira Isi, ndetse no mu Rwanda kirahagera, aho wasangaga padiri asoma Misa muri urwo rurimi, ubu rwitwa ururimi rwapfuye.

Kugeza ubu rukoreshwa muri Kiliziya Gatolika, mu nyandiko z’abahanga n’abamenyi no mu masomo ya siyansi.

Ikinyarwanda, ururimi Abanyarwanda bakesha Gihanga, Ngomijana wahanze u Rwanda, ni ururimi rw’Abanyarwanda runarengerwa n’ Itegeko Nshinga rya Repubulika y’u Rwanda.

Ururimi rufasha abantu kumvikana kuko abatavuga ururimi rumwe, byagorana ko hari icyo bageraho.

Uhereye kuri iyi mvugo, hari uwavuga ko umwe avuga Icyongereza undi atacyumva bashobora gushaka indi mvugo bakoresha, urugero nk’amarenga, nyamara amarenga na rwo ni ururimi ndetse runakoreshwa n’abantu benshi ku Isi.

Mu mateka anagaragazwa na Bibiliya, bavuga ko abantu bashatse kubaka umunara wa Babeli (Babel Tour/Tour de Babel) bashaka kugera ku Mana, ariko Imana ikaza gutandukanya indimi zabo kuko bari bahuriye ku rurimi rumwe, byatumye badakomeza kuwubaka bitewe n’ubwumvane bwabuze hagati y’abubakaga.

Ikinyarwanda kibumbye umuco w’Abanyarwanda, bigaragarira mu migani yacyo ndetse imyinshi usanga ikomoka mu mwimerere wacyo, idakeshwa indimi z’amahanga.

Iyo migani n’imvugo bigaruka ku bupfura bw’Abanyarwanda n’ibindi.

Mu Kinyarwanda harimo imigani, indirimbo, ibisakuzo n’ibindi byinshi usanga bibumbatiye wa muco mwiza w’Abanyarwanda.

Nyamara uwo muco ushobora gucika buhoro, kugeza uzimiye bitewe n’imvugo wakwita ibyonnyi byibasiye Ikinyarwanda, bikorwa n’abatabizi cyangwa abigiza nkana.

“Amazu, amakwe,amamana,amamodoka...

Ubu buryo bwose bwakoreshejwe hejuru, ntabwo ari yo mvugo nyayo ikwiye y’ Ikinyarwanda.Ahubwo imvugo yakoreshejwe ni ipfobya, itesha agaciro, isuzugura amagambo yakoreshejwe.Tekereza wumvise umuntu avuga ati “ Ariko ayo manama(makwe,mazu) yanyu ntajya arangira?”

Bitandukanye no kumva ngo izo nama zanyu ntizijya zirangira, akenshi wakumva ko uwabivuze hejuru akoresheje amanama, amakwe.... akoresha imvugo ikerensa ibikorwa.

Ibwami habagaho ibitaramo byo gusigasira umuco

Itegeko rirengera ikinyarwanda ntiryahindutse

Ikinyarwanda kigira inteko z’amazina 16 n’indangahantu eshatu.
Indanganteko ni ; Mu, ba, mu, mi, ri, ma, ki, bi, n-, n-, ru, ka tu, bu,ku ,ha ndetse n’indangahantu ku, mu,i.

Inzu ni izina ;iyo ridafite ikirigaragiye, bigoranye kumenya niba iryo zina riri mu bumwe cyangwa mu bwinshi.

Utondaguye iryo zina, ubona i-n-zu, iyi nyuguti ya n, ihita igaragaza inteko iri zina ririmo.

Ugendeye ku ndanganteko zagaragajwe hejuru, urabona ko ijambo inzu riri mu nteko ya cyenda cyangwa ya cumi.

Ijambo nk’iri riri mu bumwe, riba riri mu nteko ya cyenda, ryajya mu bwinshi, rikajya mu nteko ya 10. Urugero, nshobora kuvuga nti « Inzu yanjye irashaje (nt 9), aho ni mu bumwe, ariko navuga nti « inzu zanjye zirashaje »,(nt10) bigaragara ko ari mu bwinshi.

Amazina natangiye ngaragaza hejuru, yose ashyirwa mu bwinshi muri ubu buryo.
Ndongera ntange urugero. Ubukwe bwinshi muri iki gihe, inama nyinshi muri iki gihe zihuza abafitanye amasano, bitandukanye no kuvuga ngo amakwe menshi, amanama menshi…

Bimwe mu bibabaje ni aho usanga handitse ngo, hano twakira amanama, amakwe… bibonwa n’abantu benshi, ndetse usanga hari na zimwe mu nyandiko zikomeye zandikwa muri ubu buryo.

Ikinyarwanda gitandukanye n’izindi ndimi ?

Kera twiga mu mashuri yisumbuye, umunyeshuri yagiye gusoma ijambo Gisele , ryari ryanditse mu gifaransa (basoma Jizele), asoma Gisele, ishuri ryose rihita riseka.(byagaragaza ko yabyishe).

Mwalimu yahise amukosora na we amaze gusoma amubwira uko iryo jambo risomwa.

Bumwe mu buryo bwafasha ko Ikinyarwanda kivugwa neza, harimo ko ukosheje mu kukivuga, yakosorwa n’umwegereye ubizi neza.

Hari n’ubundi buryo bwinshi bwatekerezwaho, bwakoreshwa mu gutuma Ikinyarwanda, ikigega cy’umuco wacu kitazima.

Kenshi n’abayobozi usanga bageza imbwirwaruhame ku baturage bakibeshya bagakoresha imvugo zisa nk’izi, byagorana ku mwana wabyumvise kumukosora umubwira ko ibyo umuyobozi yavuze yibeshye.

Kuva kera Abanyarwanda bagiraga umuco wo gutaramira uwashatse(warongoye/warongowe)

Indimi z’amahanga zirindishijwe intwaro kirimbuzi

Hirya no hino uvuze mu buryo butari bwo Igifaransa cyangwa Icyongereza akosorerwa hafi. Mu kinyabupfura hari uhita avuga uko ijambo risomwa cyangwa rivugwa, akaba arakosoye.

Uvuze nabi iryo jambo ntibibuza abamuveba, kubikora, bamuseka, ibisa n’ikosa kuri uwo muntu ufatwa nk’utazi urwo rurimi uko bikwiye.

None se indimi z’amahanga zirengerwe iwacu, urwacu rupfa tubirebere bucece, turuce turumire, ubwo ntibazatwita ibicucu

Igifaransa ntigihindurwa, kubera iki Ikinyarwanda ?

Umubyeyi w’umugabo muri batisimu bamwita, Parrain(soma pare), ariko igitangaje nta Parraine(soma parene) ubaho, ahubwo habaho Marraine, kandi iyo wiga igifaransa ugomba kubimenya, ni ihame ndakuka.

Mu cyongereza naho ni uko, umugabo wa runaka bamwita husband(soma hazibandi), umugore bakamwita wife(soma wayifu). Kubimenya ni ihame nta kwirirwa ushakisha ikindi.

Kuki se indimi z’amahanga zihagazeho, Ikinyarwanda cyacu, ntikirindwe ubwangizi, ugasanga hari bamwe bakivugira uko bashatse, ubukwe buhuza benshi, inama zigirwamo byinshi, bikavugwa biteshwa agaciro, bikaba amanama, amakwe…

Mu rwego rwo kurengera Igifaransa, hariho abantu 40 bitwaga ‘les quarante immortels’ ni abahanga 40 baminuje Igifaransa bari bashinzwe kurengera ikibonezamvugo cyacyo.

Ndetse harimo n’abatari Abafaransa ariko bakivuga neza, barimo na Leopord Sedar senghor, wabaye Perezida wa Senegal.

Abarengera Ikinyarwanda barahari?

Yego, kuko inshingano bazihabwa n’Itegeko Nshinga. Hariho Inteko y’Ururimi n’Umuco.
Iyi Nteko ifite umukoro ukomeye wo kureba uburyo Ikinyarwanda kigenda gihinduka buhoro, ikaba yagisubiza ku murongo.

Yifashishije imvugo igira iti « Sigaho ntibavuga gutyo, ahubwo bavuga gutya » yafasha benshi kukivuga neza.

Komisiyo y’Igihugu y’Itorero ry’Igihugu na yo ifite inshingano zo kwibutsa Abanyarwanda umuco mwiza wo kwita ku rurimi rwabo, ntiruvangirwe n’indimi z’amahanga. Ugiye mu itorero akavayo abizi nk’uko aba azi kirazira n’indangagaciro z’umuco nyarwanda.

Imvugo z’abubu zimire Ikinyarwanda ?

Hari imvugo zitwa iz’abubu zica cyangwa zikagoreka Ikinyarwanda. Bamwe batangiye bazitirira Nyamirambo cyane ahitwa mu Biryogo, abahanzi ndetse n’abana bo ku muhanda.

Umubyeyi umwe yavuze uburyo umwana we yavuye ku ishuri, akamubwira ati ‘nabunuje’.

Akibeshya ko yambaye ubusa, cyangwa yari yambaye imyenda migufi, ariko nyuma agasanga bisobanura ko yabaye uwa nyuma mu ishuri.

Hari n’indimi z’abahanzi zigenda zivuka umunsi ku wundi, ngaho “akavumo(aho mba), imyako(ngezweho), imikasiro(umwaku), gushona (kumenya), kuyoka(kureba)..”

Ese aya magambo ko amaze kuba kimenyabose, afite aho yanditswe hazwi, cyangwa arimo kuvugwaho ngo yemezwe gukoreshwa mu Kinyarwanda gikwiye, ntabwo azakomeza kuvangira Ikinyarwanda, hatazwi aho ava n’aho agana?

Aha na ho Ikinyarwanda gikwiye kuharindirwa, kuko nibidakorwa kiravamo indimi ebyiri. Cyagombye kuba rumwe nk’ururimi udakenera ugusobanurira. Ariko iyo ukeneye ugusobanurira mu rurimi runaka ruba rwavuyemo ebyiri.

Buri Munyarwanda wese yatanga umusanzu we mu kurengera Ikinyarwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza