Kwamamaza

Ese gusibiza umunyeshuri bituma arushaho gutsinda neza?

Yanditswe kuya 10-10-2016 saa 12:24' na Tombola Felicie


Abantu bamwe bakunze kujya impaka ku bijyanye no gusibiza umwana mu ishuri (mu mashuri abanza),aho usanga ababyeyi n’abarimu yemwe n’ubuyobozi bw’ibigo by’amashuri butabivugaho rumwe.

Hari abavuga ko umunyeshuri watsinzwe adashobora gukurikira amasomo ye mu cyiciro yimukiyemo, bityo ko kumusibiza bwaba ari uburyo bwo kumufasha kuzamuka neza, ariko hari n’ababibona ukundi.

Dr Sebaganwa Alphonse,Umwarimu n’Umushakashatsi muri Kaminuza y’u Rwanda,Koleji y’Uburezi akaba n’impuguke mu myifatire, imitekerereze, n’imikorere ya muntu biganisha ku burezi, by’umwihariko impuguke mu gufasha abana bari munsi y’imyaka 12, bafite ibibazo byibahiriye by’imyigire, yatanze igitekerezo cye ku bijyanye no gusibiza abana mu mashuri.

Avuga ko gahunda y’uburezi kuri bose yashyizweho ahanini kugira ngo abana benshi cyangwa bose bagane ishuri kandi bagire ubumenyi n’ubushobozi bw’ibanze bukenewe.

Gusibira rero, ngo biganisha rimwe na rimwe ku kureka ishuri kandi bigahenda Leta ndetse n’ababyeyi kuko iyo umunyeshuri asibiye arihirwa inshuro ebyiri mu mwaka umwe.

Uretse ikiguzi cy’uburezi cyikuba kabiri mu mwaka umwe ku munyeshuri wasibiye, Dr Sebaganwa asanga gusibira bidafasha umwana gutsinda neza.

Ni ryari umuneshuri asibizwa ?

“Gusibira bikorwa iyo umunyeshuri atashoboye kugira ubumenyi n’ubushobozi busabwa na gahunda y’amasomo bimufasha gukurikira neza ayo mu mwaka ukurikira.

Ariko rero umuntu yakwibaza urwo rugero rw’ubumenyi rufatirwaho urwo ari rwo kuko ibigo by’amashuri bisibiza abana ku buryo butandukanye, hamwe basibiza umwana wagize amanota ari munsi ya 50%, ahandi munsi ya 40%, ahandi munsi ya 60%, hari n’aho basibiza munsi ya 70%.

Ibyo ari byo byose, gutsindwa mu ishuri biragaragara ko bidafatirwa ku rugero rumwe n’ibigo by’amashuri.Ikindi ni uko, uko gutsindwa bidaturuka igihe cyose ku munyeshuri nk’uko benshi babyibwira.”

“Byanze bikunze imitunganyirize y’ikigo cy’ishuri, imikorere n’imibereho ya mwarimu, ubumenyi n’ubushake bwa mwarimu, ibikoresho by’ishuri, umubare w’abanyeshuri mu ishuri, amasomo menshi, abarimu basimburana mu ishuri n’ibindi, biba bifite uruhare rutaziguye muri uko gutsindwa.”

Dr Sebaganwa asobanura ko impamvu zifatiye ku munyeshuri ubwe, ndetse n’umuryango akomokamo zifite umwanya ukomeye mu myigire y’umwana nko gukererwa mu ishuri, gusiba kenshi, kudafashwa gusubiramo amasomo, gukoreshwa imirimo ivunanye, amakimbirane mu muryango n’ibindi.

Gusibiza umwana ntibikwiye kureberwa ku manota gusa

“Bitewe n’uko impamvu zitera umwana gutsindwa ari nyinshi, ku bwanjye numva gusibiza umwana bitareberwa ku manota gusa, ahubwo haba hakwiye kwigwa neza impamvu nyakuri, akaba ari zo zishingirwaho mu gufata icyemezo kandi n’ababyeyi bakabigiramo uruhare.

Iyo umunyeshuri asibiye hatitawe kuri ziriya mpamvu zose, ashobora nubundi kongera gutsindwa nyuma yo gusibira kuko impamvu nyakuri ziba zititaweho bikamudindiza.

Ubushakashatsi bwerekana ko gusibira bidindiza umwana kurusha uko bimufasha kuko ubumenyi bwe bwiyongeraho akantu gato cyane cyangwa ntihagire n’icyiyongeraho.

Bivuze ko iyo umwana yimuwe nubwo yaba afite amanota ari munsi y’ayo ikigo gifatiraho, ashobora gukora neza kurusha uwo bari mu rugero rumwe wasibijwe.
Kutiyizera, ipfunwe ryo gusibira n’ibindi bishobora gutuma umwana wasibiye yongera agatsindwa.”

Icyemezo cyo gusibiza umwana cyane mu mashuri abanza, kiba gikwiye gushingirwa ku mpamvu zidasanzwe kandi zumvikanyweho n’ababyeyi ndetse n’umwana ubwe ku buryo hakorwa amasezerano yanditse hagati y’impande zombi (ikigo n’ababyeyi) buri ruhande rukiyemeza icyo rugiye gukora kugira ngo ibibazo umwana yagize bikemuke, kuko burya ntabwo aba ri we wenyine byaturutseho,

Ubu buryo bushobora no gukoreshwa mu gihe hafashwe icyemezo cyo kwimura umwana kandi bigaragara ko afite impuzandengo y’amanota “idahagije” hakarebwa uburyo bwo kumukurikirana hagati y’ababyeyi n’abarimu, kuko ni byo bishobora gufasha umwana kurusha kumusibiza.”

Dr Sebaganwa Alphonse,Umwarimu n’Umushakashatsi muri Kaminuza y’u Rwanda,Koleji y’Uburezi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved