Kwamamaza

Ese ni iherezo ry’inzozi z’Abanyarwanda zo kubona gari ya moshi i Kigali?

Yanditswe kuya 30-07-2015 saa 06:00' na Claude Mutabazi


Hashize igihe gito Uganda itangaje ko kubaka umuhanda wa gari ya moshi uhuza Kasese na Kigali atari wo mushinga w’ibanze ahubwo ko icyihutirwa ari umuhanda wa gari ya moshi uhuza iki gihugu na Sudani y’Epfo kubera ubucuruzi buteye intambwe hagati y’ibi bihugu.

Ibi byabaye mu gihe hari gahunda ko uyu muhanda uzahuza Uganda n’u Rwanda uzaba wabonetse mu mwaka wa 2018, mu gihe kuri gahunda nshya yo kubanza uyihuza na Sudani y’Epfo, Gari ya moshi yazagera i Kigali iturutse i Kampala mu mwaka wa 2020.

Mu gitekerezo cy’umusomyi wa IGIHE, yagaragaje inkomoko ya gari ya moshi mu mateka ya Afurika, ndetse ko n’Abanyarwanda badakwiye kumva ko kuba Uganda ibabishyizemo ingufu bisobanuye ko uyu muhanda ubaye amateka mu Rwanda.

Igitekerezo cye kigira kiti “ Ubwo abakoloni bamaraga kugabana Afurika, batangiye gushaka uburyo bajya bageza umusaruro uyiturukamo ku byambu kugira ngo ubwato buwugeze i Burayi.

Mu buryo bwose bwo gutwara abantu, inzira za gari ya monshi nizo zerekanaga ko kuzikoresha aribyo bitanga inyungu nini kuko zabashaga gutwarira ibintu byinshi icya rimwe kandi zikoresheje ingufu nke.

Ibyo byatumye abakoloni b’ibihugu bimwe na bimwe bashyira ingufu mu kubaka inzira za gari ya monshi bityo mu gihe kitari kinini ibihugu byinshi bya Afurika bigira serivisi za gari ya moshi zikora neza.

Gari ya moshi kandi yakoreshejwe n’abakoroni muri serivisi za gisirikare mu gutwara ibikoresho ndetse no kurinda neza imbibi z’ibihugu bakolonizaga.

Igihe abanyafurika baharaniraga ubw’ubwigenge cyahuriranye n’umwaduko w’imodoka zihendutse bityo ubwikorezi bukozwe n’imodoka butangira kwiganza.

Amakimbirane hagati y’ibihugu, gucunga nabi umutungo w’ibihugu byitwa ko bivuye mu bukoloni, ndetse no gukurikira inyungu bwite z’abayobozi b’ibihugu bya Afrika byatumye inzira za gari ya moshi zo muri Afurika zisubira inyuma ku rugero runini ahandi kureba hafi kw’abayobozi b’ibihugu bituma batabona ko kudateza imbere ubwikorezi bwa gari ya moshi ari igihombo ku gihugu kuko gari ya moshi ari imwe mu nzira yihutisha iterambere kandi ko serivisi ya za gari ya moshi ari ubucuruzi nk’ubundi bucuruzi busanzwe bugengwa n‘itegeko rya “offre na demande”.

Ikindi kitakwirengagizwa ni uko iyubakwa ry’inzira za gari ya moshi ritwara akayabo k’amafranga bityo hakaba hakenewe gihamya ko amafaranga azishowe mo azagaruka.

Iyubakwa ny’inzira za gari ya moshi kandi rigengwa n’ibindi byinshi nk’ubushake bwa politike ndetse n’amahoro n’umutekano mu Karere izanyuramo.

Ubusesenguzi bwakozwe bwerekanye ko nta kabuza inzira ya gari ya monshi iva i Mombasa yerekeza i Kigali ariyo izungura cyane ibihugu byo ku muhora wa ruguru.

Iherezo ry’inzira ya gari ya moshi mu Rwanda?

Kuba Uganda idindije iyubakwa ry’inzira ya gari ya moshi igera i Kigali ntibyakagomye kuba iherezo ry’inzozi z’abanyarwanda kuko ubushake bw’abayobozi b’u Rwanda bwo kubaka igice kireba u Rwanda buhari.

Gusa ntirwatangira igice cyarwo Uganda itarakora igice kiyihuza n’u Rwanda kandi biragaragara ko bidatinze indi mishinga y’inzira za gari ya moshi izihutira gushaka cyane gukorana bya hafi n’u Rwanda kubera ubunini bw’isoko riri imbere mu gihugu no mu turere turukikije.

Amahoro n’ umutekano nabyo bitanga icyizere ku ishoramari mu mishinga minini nkuw’ inzira za gari ya moshi. Aha twavuga nk’umushinga w’umuhora wo hagati (Central Corridor) aho umushinga wa gari ya moshi Dar es Salaam-Kigali- Isaka wari uri hafi yo gutangira.

Igitekerezo cya Claude Mutabazi


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Location: Ndamage Building 4th floor
P.O Box: 3477 Kigali- Rwanda
Phones:
+250 788 74 29 08, +250 788 49 69 15, +250 725 94 66 08
Email:
[email protected], [email protected]

Website Developped by

Uru Rubuga Ruheruka Gushyirwaho Amakuru Saturday 30 July 2016
Copyright © 2009 -2014 - IGIHE Ltd - All Rights Reserved