Hazashyirweho ingoro y’umurage w’amateka y’ingabo z’u Rwanda

Yanditswe na Philbert Hagengimana
Kuya 4 Nyakanga 2015 saa 07:00
Yasuwe :
0 0

Mu bihugu bimaze gutera imbere uhasanga ingoro z’umurage zinyuranye. Buri ngoro ikagira umwihariko. No mu Rwanda hatangiye kugaragara ingoro z’umurage zifite umwihariko, nk’iy’ibidukikije iri mu ntara y’uburengerazuba. Amateka y’ingabo nayo ari mu bishyirwa mu ngoro y’umurage. Nko mu gihugu cya Misiri, mu murwa mukuru, Cairo, hari ingoro y’umurage ya gisirikari irimo amateka y’ingabo kuva ku gihe cya ba Farawo.

Mu Rwanda ingoro y’umurage w’amateka y’ingabo ishyizweho yaba ifite umwihariko. Hashyirwamo ibyaranze ibikorwa byo kwagura u Rwanda no guhagarika jenoside. Bimwe mu byo mbona byajyamo :

Imyambaro

Nk’uko ubisanga mu zindi ngoro z’umurage w’amateka y’ingabo, igice cy’imyambaro kiba kirimo ubwoko bw’imyambaro ingabo zambaraga kuva cyera. Guhera ku birenge kugera ku mutwe. Birumvikana ko uko cyera byari bimeze nta mafoto yabagaho. Niho hakoreshwa amashusho ashushanyije cyangwa abumbye. Muri iki gice hamurikwa ibirango by’imitwe y’ingabo. Izo ku butaka, mu kirere no mu mazi. Hanagaragazwa urutonde ruriho amazina y’imitwe y’ingabo zo mu gihe cya mbere y’umwaduko w’abazungu. Ubu urwo rutonde ruri mu ngoro y’umurage iri i Huye mu Ntara y’amajyepfo.

Intwaro

Izo ntwaro, nk’uko n’ahandi ubihasanga, si izigezweho gusa (zitwa iza kizungu). Ahubwo ibyo abantu bakunda kwirebera ni intwaro za gakondo zifashishwaga cyera, n’amazina yazo. Ku by’ubu, hakajyamo ibyifashishwa ku butaka, mu kirere no mu mazi. Aha ninaho hajya ibindi bikoresho nk’iby’itumanaho. Abariho ubu n’abazavuka bazakenera kumenya uko cyera, mbere y’ubukoloni, ingabo zahanaga ubutumwa ku misozi, ku manywa cyangwa nijoro.

Aha ninaho kandi hagaragarizwa uburyo bw’ubwikorezi (transport) bw’abantu n’imizigo ku rugamba. Ese ko ubu hari imodoka nini, indege n’amato, cyera ingabo zakoreshaga ubuhe buryo ? U Rwanda rwagutse hakoreshwa iyihe transport ? Bagendaga ku maguru gusa ? Igisubizo cyajya mu byamurikwa muri iyo ngoro.

Ibidasanzwe ku rugamba no guhagarika jenoside

Muri iki gice hajyamo ibihe binyuranye ingabo zari ku rugamba. Uko ibinyejana byagiye bikurikirana. Abariho ubu n’abazavuka bazakenera kumenya uko u Rwanda rwagutse. N’ubwo hari ababizi babyize mu ishuri, ni byiza ko byajya no mu ngoro y’umurage mu bisobanuro birambuye biherekejwe n’amakarita.

Muri iki gice kandi niho hagaragarizwa intambara zahanganishije amahanga Abanyarwanda bagizemo uruhare nk’intambara ya mbere n’iya kabiri y’isi.

Ni naho hashyirwa iby’ingenzi byaranze urugamba rwo kwibohora no guhagarika jenoside yakorewe Abatutsi. N’ubwo hari ingoro zihariye kuri ibi zatangiye gutunganywa, ntacyo bitwara iyo usanze ibikorwa bimwe na bimwe mu ngoro z’umurage zitandukanye mu gihugu.

Abazavuka mu bihe biri imbere, igihe abafite ubuhamya bw’uko jenoside yahagaritswe bazaba batakiriho, bazakenera kubigaragarizwa mu bisobanuro bihamye nk’ibimurikwa mu ngoro z’umurage.

Hirya no hino, aho nasuye ingoro z’umurage w’amateka y’ingabo nasanze ibikorwa byinshi ibihugu bibihuriyeho. Ariko, mu Rwanda niho usanga ingabo zari mu rugamba rwo kwibohora zahagaritse n’ubwicanyi bw’indengakamere nka jenoside, nta mahanga abikoze. Iyo uganiriye n’abanyamahanga usanga batabifiteho amakuru. Hari abibwira ko jenoside yahagaze ku bushake bw’abayikoraga, abandi bakibwira ko LONI ariyo yayihagaritse. N’itangazamakuru ntirikunze kugaragaza abahagaritse jenoside yakorewe Abatutsi n’uko byagenze. Ibi bitiza umurindi abayikoze kuko batifuza ko hagira ukuri kwayo gushyirwa ahabona.

Ni ngombwa ko ubuhamya butanzwe n’abayihagaritse ndetse n’abayirokotse ku misozi yose y’igihugu bukusanywa mu majwi n’amashusho.

Ayo mateka agomba kugaragazwa ku buryo buhoraho mu rwego rwo kwigisha abenegihugu n’abanyamahanga kubaha ikiremwa muntu, no guha agaciro abatanze ubuzima bwabo barokora abicwaga bazira uko baremwe.

Abagore no kubungabunga amahoro ku Isi

Muri iyo ngoro, iramutse ishyizweho, hagaragazwa uruhare rw’umugore mu kubungabunga umutekano, kuva mu myaka yashize.

Ahenshi nabonye mu bihugu by’amahanga, ingabo ntizigira ibikorwa zihuriramo n’abaturage. Mu Rwanda hari ibyo zikorana n’abaturage nk’umuganda. Hari n’ibyo zibakorera muri Army week. Ingero zabyo zakwerekana uko igisirikare cyateje imbere abaturage.

Hanagaragazwa kandi uko ingabo zarizimaze guhagarika jenoside zagiye mu butumwa bw’isi, zagera mu mahanga zigakora ibitangaza ! Amakuru ava aho ingabo z’u Rwanda zagiye zoherezwa mu rwego rwa Loni cyangwa Afurika yunze ubumwe, agaragaza ko hari ibikorwa bidasanzwe bakozeyo.

Iyo abayobozi banyuranye bavuye mu bihugu byabo baje kwigira ku Rwanda, bahabwa ibisobanuro bikwiye. Ariko iyi ngoro y’umurage ishyizweho, abayisura bahakura ibisobanuro byisumbuye ku bitangwa ubu. Abaza bose baba bibaza uko iki gihugu cyavuye mu ivu gikaba kigeze aho kigirwaho n’ibindi. Amateka yajya muri iyo ngoro yaba arimo impamvu bimeze bityo.

Steven Mutangana/Umusomyi

Ibimenyetso by’amateka y’ingabo za Isiraheli (photo: Internet)
Ku ngoro y’umurage ya gisirikare New Zealand (photo: Internet )

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza