Ibitekerezo by’umwanditsi Yolande Mukagasana ku buhamya bwa Mwamini wahamijwe ibyaha bya Jenoside

Yanditswe na IGIHE
Kuya 17 Mata 2019 saa 01:02
Yasuwe :
0 0

Ku wa 8 Mata 2018, Nyirandegeya Mwamini Espérance wakatiwe gufungwa burundu nyuma yo guhamywa ibyaha bya Jenoside, yatanze ubuhamya muri Gereza ya Nyarugenge i Mageragere bugaruka ku buryo yijanditse mu mugambi wa Jenoside yakorewe Abatutsi.

Ni ubuhamya bwanatambutse kuri IGIHE mu nkuru no mu mashusho kuri uwo munsi. Nyuma yabwo, abantu batandukanye babutanzeho ibitekerezo. Kuri uyu wa Gatatu tariki 17 Mata umwanditsi w’ibitabo Yolande Mukagasana nawe yoherereje IGIHE inyandiko ikubiyemo ibitekerezo bye ku byatangajwe na Mwamini.

Yolande Mukagasana waburiye umugabo we n’abana muri Jenoside, azi cyane Mwamini kuko babaye abaturanyi by’igihe kirekire mbere y’uko ibintu bihindura isura. Yandikiye ubwanditsi bwa IGIHE agaragaza ko Mwamini atavuze ukuri mu buhamya bwe. Ibitekerezo bye bikubiye muri iyi nyandiko yasabye ko twatangaza uko iri.

Inyandiko ya Yolande Mukagasana

None tariki ya 17 Mata 2019

Maze iminsi numvise ubuhamya bwatanzwe n’abagororwa, ariko ubwatanzwe na Nyirandegeya Mwamini Espérance bundushije ingufu nanirwa guceceka.

Nkuko mwahaye urubuga uwo Nyirandegeya Mwamini Espérance kuri televiziyo yanyu ndabasaba ko natwe nk’ababaye abaturanyi be kandi tukaba tukiriho mwaduha akanya ko kugira icyo tuvuga ku buhamya bwe.

Perezida wa Repubulika y’u Rwanda Paul Kagame yashimye abarokotse Jenoside yakorewe Abatutsi mu 1994 kubera ko bihanganye bikomeye. Ntabwo yabeshye kuko byabaye nko kumira ibuye rishyushye, kandi turamushimira inzira yatunyujijemo, akadutekerereza twe tutakibasha gutekereza, tukubaka igihugu ari nacyo cyatumye tubona aho tuvugira.

Ubwicanyi bwakorewe Abatutsi muzi ko bwahereye mu 1959, nyamara abarokotse, ari abahunze, ari n’abasigaye mu gihugu nta n’uwabonye uwo aririra nkanswe kuvuga. Umugabo wanjye wari waragizwe imfubyi kuri Noheli mu 1963 ntiyariraga ntiyanabivugaga, nanjye yagiye ambwira ibice akananirwa gukomeza.

Murumva ko ntawagiraga uruvugiro. Nkaba ari nayo mpamvu nongera gushimira Perezida wacu Paul Kagame ko yaduhaye aho turirira, Leta ikanadushyiriraho igihe cyo kwisanzura tugafatana mu mugongo.

Nkamushimira ko yadufashije kudaceceka akababaro kacu, akadufasha kongera kubana nk’Abanyarwanda n’abatwiciye kubera gahunda zinyuranye zirimo ubutabera ndetse n’ ubumwe n’ubwiyunge.

Mwamini twe tubona ubuhamya bwe kuri Jenoside n’uruhare rwe yari akwiye kubwuzuza. Ntitwapfiriye gushira nawe arabizi. Mwamini rero natatubwiza ukuri kwambaye ubusa ngo anavuge abo bari kumwe ndetse areke no kubeshya ko bamuteye ubwoba bugatuma yica. Mwamini yatuye ku Cyivugiza, ndetse anagishyingirirwa i Nyamirambo yatuye mu nzu yanjye atarubaka iye, abagabo bacu nta kibazo bagiranaga.

Mwamini navuge ukuri abo yishe twese tuzi, abasabire imbabazi kuko hari imiryango yabo ikiriho. Twumvise ubuhamya bwe buradukomeretsa bikomeye, twese abaturanye nawe n’umuryango we, ababonye yambaye gisirikare n’urunigi rw’amasasu mu ijosi. Umugabo n’abana be ni inzirakarengane, ariko ibyo yakoze muri Jenoside ntibyanadutangaje kuko twari tuzi imyitwarire ye na mbere ya Jenoside.

Twateze amatwi ubundi buhamya bw’umugororwa w’umugabo bari kumwe, dusanga ahubwo uriya mugororwa we koko yaricujije abwira abagore babo n’abana babo ko bamufasha kuvugisha ukuri, agahamagara abo bafatanyije gukora Jenoside akaberekana kandi agasaba ngo bamufashe no kuvuga aho bajugunye imibiri y’abacu, banabwize ukuri urubyiruko rwavutse nyuma ya Jenoside.

Wagereranya ubuhamya bwa Mwamini n’ubw’abandi ukibaza impamvu we atavuga ibyabaye byose kandi yarabikoraga ku manywa twese tumureba mbere ya Jenoside muri Jenoside, ndetse na nyuma yayo ahungiye muri Congo. Nawe kandi akaba yari mu bifuza kurangiza akazi, cyane cyane iyo anibutse we ubwe aho yafashwe aturutse n’ibikorwa yakoraga.

Murakoze guhitisha ubu butumwa nkuko mwamuhaye urubuga akivura natwe turabikeneye, niba koko ashaka ko umunsi yatashye tuzongera tukabana tugaturana ataduteye ubwoba, akumva ko noneho natwe twabonye uburenganzira bwo kubaho tutamubona ngo duhinde umushyitsi.

Mugire amahoro

Yolanda Mukagasana

Inkuru bifitanye isano: Ubuhamya bwa Mwamini Espérance wakatiwe burundu ahamijwe ibyaha bya Jenoside (Video)

Umwanditsi w’ibitabo Yolande Mukagasana ntiyanyunzwe n'ubuhamya bwatanzwe na Mwamini mu #Kwibuka25

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza