Ibyifuzo by’abaturage bishimangira ihame ry’iterambere igihugu kimaze kwimakaza

Yanditswe na IGIHE
Kuya 16 Ukuboza 2016 saa 02:06
Yasuwe : XX
0

Mu gihe twiteguraga Inama y’Igihugu y’Umushyikirano iteranye ku nshuro ya 14, abaturage bahawe urubuga rwo kuganira ku nsanganyamatsiko y’uyu mwaka igira iti “Dufatanije Twubake Igihugu Twifuza”; bahabwa rugari ngo batange ibitekerezo ku gihugu bifuza mu myaka iri imbere.

Nakomeje rero gutega amatwi nkumva ba nyir’igihugu basaba ibintu binyuranye. Ibyifuzo byiganje ni ibijyanye no kwegerezwa ibikorwa remezo birimo kongera ingano y’amashanyarazi, kubaka imidugugu y’icyitegererezo, imihanda ya kaburimbo, n’amavuriro, gusakaza ikoranabuhanga, ndetse no kurushaho gusigasira ihame ry’ubumwe n’ubwiyunge.

Aho nabyumviraga hose naramwenyuraga. Icyatumaga nseka ntibyari ugusuzugura ibyo bavugaga. Ahubwo nahitaga nibuka aho u Rwanda ruturutse muri iyi myaka makumyabiri n’ibiri n’uko abantu bari babayeho nyuma y’uko abakoze Jenoside yakorewe Abatutsi basenye igihugu kugera ku musenyi.

Ku mutima nti ese iyo abaturage b’icyo gihe iyo baza kubazwa icyo bifuzaga bari kuvuga iki? Nk’iyo babazaga amashanyarazi kuri bose, nahitaga nibuka ukuntu mu mpera za 1994 zishyira 1995, iyi Kigali ishashagirana, amashanyarazi atari ku rutonde rw’ibyifuzwa kuko ntayari ahari kandi si nayo yihutirwaga. Udutadowa twari twarabaye ntaho ntinya mu gihe abasilimu bo hejuru babarizaga aho bakura buji zaka neza kurusha izindi.

Nyuma y’imyaka 22, igihugu kivuye muri iri curaburindi, ubu umuhigo wa Guverinoma y’u Rwanda n’uko muri 2018 amashanyarazi azaba yariyongereye akagera kuri megawati 563, avuye ku 185 zihari kuri ubu.

Ku bijyanye n’imiturire mu midugudu, icyihutirwaga icyo gihe cyari ukubona aho umuntu akinga umusaya akenshi hakoreshejwe ikoranabubingwa dore ko ikoranabuhanga ryo ryari ritaragera no mu nzozi. Icyo gihe, kongera guharura imigenderano niwo wari umuhigo, iby’imihanda y’imikara ni ibya none.

Ibyifuzo by’abaturage bishimangira ko hari iterambere ryagezweho kuko kuri ubu icyerekezo cy’igihugu n’uko mu 2020 nibura Abanyarwanda bagera kuri 70% bazaba batuye mu midugudu y’icyitegererezo ifite amazi, amashanyarazi n’ibindi bikenerwa mu buzima bwabo. Ibarura ry’imibereho y’abaturage riheruka ryagaragaje ko Abanyarwanda batuye mu midugudu y’icyitegererezo bageze ku gipimo cya 56%.

N’ubwo ari uburenganzira bw’abaturage gusaba ko Ubumwe n’Ubwiyunge bwagerwaho ku rwego rwo hejuru, ntibimbuza gusubira inyuma ngo nibuke ko u Rwanda rukizuka, ubuzima bwari agatogo kabishye wa mugani wa bamwe.

Urwikekwe rwari rwose, uwatashye ataramenya aho ashinga ibirenge cyane cyane ko bari bataramenya umwere n’umwicanyi, abacitse ku icumu bakivirirana ku mubiri no ku mutima, n’ibindi byinshi bitari gutuma hari ugira icyizere cy’ubumwe n’ubwiyunge.

Mu bushakashatsi bwakozwe na Komisiyo y’Igihugu y’Ubumwe n’Ubwiyunge ku gipimo cy’ubwiyunge mu Rwanda cya 2015 (Reconciliation Barometer 2015), bwerekanye ko Abanyarwanda bateye intambwe ishimishije cyane mu bwiyunge ku kigereranyo cya 92.5%, buvuye kuri 82.3% muri 2010.

None uyu munsi 2016 abaturage barema bati ubumwe n’ubwiyunge bwacu twagezeho nimushikame tubishimangire. Niyo mpamvu ngira nti “ni byiza cyane kureba iyo tujya ariko kwibuka aho tuvuye n’aho tugeze ni umukoro ukwiye kubanziriza buri ntambwe yose duteye.”

None se wa mugani w’Umunyarwanda utazi aho avuye hari ubwo amenya aho ajya?


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza