Impamvu Kigeli V Ndahindurwa atatabarizwa nk’abandi bami

Yanditswe na Mathias Hitimana
Kuya 11 Mutarama 2017 saa 03:31
29 26

Itabarizwa ry’Umwami wa nyuma w’u Rwanda, Kigeli V Ndahindurwa watanze kuwa 16 Ukwakira 2016 afite imyaka 80, ryakomeje guteza impaka ariko birangiye byemejwe ko kuwa 15 Mutarama 2017 rizabera i Mwima ya Nyanza aho yimiye ingoma.

Kigeli V mwene Yuhi V Musinga wavukiye i Kamembe mu yahoze ari Cyangugu, yatangiye muri Leta zunze Ubumwe za Amerika muri Leta ya Virginia, aho yari amaze imyaka 24 mu buhungiro.

Mu kiganiro n’abanyamakuru gisobanura itabazwa ry’Umwami Kigeli V Ndahindurwa, uhagarariye umuryango we, Ezra Mpyisi yatangaje ko nta mihango yo kumutabariza izabaho nk’uko umuco ubiteganya, ahubwo azatabarizwa mu buryo busanzwe bwo kumuha icyubahiro, kumusengera, hanyuma agatabarizwa iruhande rw’umuvandimwe we Mutara III Rudahigwa.

Ibi byatumye negeranya bimwe mu byakorwaga igihe umwami yatangaga, bitazakorerwa Kigeli V Ndahindurwa, na zimwe mu mpamvu zigaragaza ko adakwiye gutabarizwa nk’umwami.

Hari impamvu zikomeye zateraga imihango idasanzwe

Mu bwami habaga umutwe w’abiru bakaba abagaragu n’abanyamabanga b’ingoma, bakaba abarinzi b’umuco n’umurage w’i Bwami, bakaba abayobozi b’amateka y’ u Rwanda, mbese bari nk’inkingi n’urumuri rw’Igihugu. Ikindi kandi, Abiru bari abagaragu b’imbata aribo bihambira kuri Shebuja ntibagire ahandi bajya.

Aba biru nibo bakoraga imihango itandukanye y’i bwami harimo no gutabariza umwami watanze, byakorwaga n’abo bitaga abanyamugogo.

Mbere na mbere batangazaga itanga rye, bakabanza kuribwira umwamikazi kabone niyo yaba abizi, bikabona kugera no kuri rubanda.

I Bwami habaga ikimenyetso cy’ubwami [ingoma ngabe]. Iyi ngoma nayo abiru bayimenyeshaga ko umwami yatanze, bigakorwa mu buryo bwo kuyirasaga inshuro enye bayibwira ko yabyaye [yamenetse], ari nako bayihumuriza bayibwira ko bazayishakira undi mwami.

Muri iki cyiciro kandi nibwo batangazaga icyunamo cyagezaga ku mezi nk’abiri. Mu Rwanda ntawahingaga, umugabo yaziraga kwegera umugore, n’imfizi bakazisobanura n’amasumba kugira ngo zitimya.

Hatunganywaga umugogo

Nyuma yo kumenyesha itanga ry’umwami, hakurikiragaho umuhango wo gutunganya umugogo [umurambo w’umwami] ‘Kuwosa’.

Baramwogoshaga, bakamuca inzara, bakamusiga umubavu n’amavuta y’inka akuze, kugira ngo uzashenguke bitinze.

Hagenwaga umusezero

Abanyamugogo bagenaga aho atabarizwa ‘umusezero’, bakahubaka ingoro imeze neza nk’ibwami, bakaba ariyo bamutabarizamo.

Iyo Umwamikazi [umugore w’umwami watanze uzimana ingoma n’umwami mushya], bamuzanaga muri iyo ngoro, nawe yazapfa agashyingurwa hamwe n’umugabo.

Iyo ngoro yabaga yashyinguwemo umwami bayizengurutsaga urugo rukomeye, ibivumu byubatse urwo rugo bakabyita ibigabiro. Kubitema cyari ikizira.

Hari igihe byabaga ngombwa ko umwami adatabarizwa vuba. Urugero wenda igihugu kiri mu ntambara, bihutiraga kwimika undi ukomeza urugamba.

Kigeli V Ndahindurwa ntiyakorerwa imihango idasanzwe

Ahagana mu mwaka w’i 1576 kugeza 1609, ku ngoma ya Kigeri II Nyamuheshera, yashyizeho umurongo ngenderwaho ntakuka w’ubutegetsi bwa cyami, harimo n’urukurikirane rw’amazina y’ubwami ku ngoma n’amatwara yabo.

Urwo rutonde ruteye rutya: Mutara, Kigeli, Mibambwe,Yuhi –Cyilima, Kigeli, Mibambwe, Yuhi. Ni ukuvuga ko buri zina ry’ubwami ryagarukaga buri ngoma eshatu, usibye Mutara na Cyilima.

Ayo mazina yabaga afite icyo asobanura kijyanye n’amatwara n’inshingano umwami uzitwa iryo zina agomba kugenderaho. Nka Mutara na Cyilima bari abami b’amatungo, Yuhi yari umwami w’umuriro ‘kurinda ubusugire bw’igihugu’, Mibambwe akaba umwami w’uburumbuke naho Kigeli akaba umwami w’Inkotanyi wagabaga ibitero byo kwagura igihugu, kukirinda no kwihimura ku bami babaga barihaye gusuzugura u Rwanda.

Kigeli V Ndahindurwa nta mwanya wo kuyobora, kurwanira igihugu yabonye nk’uko izina rye ryabimuhagamo inshingano. Muri make, yari umwami wayoboye igihugu ariko utarabonye umwanya wo gukora inshingano yari yashyiriweho, kuko yategetse u Rwanda kuva kuwa 28 Nyakanga 1959 kugera kuwa 28 Mutarama 1961.

Imihango yose yo gutabariza umwami yakorwaga n’abiru. Ubwo Kigeli V yabundaga (yahungaga) yabasize mu gihugu, dore ko abenshi babaga ari abantu bakuze.

Repubulika yakuyeho ingoma ya cyami mu Rwanda

Uretse ibyo twavuze haruguru, ntawakwirengagiza ko ubu u Rwanda ari Repubulika kuva mu 1961. Bityo kumva ko imihango yakorwaga ibwami yahabwa intebe, kwaba ari ukwirengagiza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE