Inteko Ishinga Amategeko irashimirwa akazi yakoze ku ivugurura ry’Itegeko Nshinga

Yanditswe na Kanamugire Emmanuel
Kuya 25 Ugushyingo 2015 saa 11:55
Yasuwe : XX
91 55

Ubwanditsi: Ibikubiye muri iyi nyandiko ni ibitekerezo bya Ngendahayo Aimable, umwe mu banyarwanda bagejeje ubusabe bwabo ku Nteko Ishinga Amategeko y’u Rwanda basaba ko ingingo ya 101 y’Itegeko Nshinga ihindurwa, kuko yazitiraga Perezida Paul Kagame kuzongera kwiyamamaza nyuma ya 2017. Ngendahayo ashima akazi kakozwe n’Inteko Ishinga Amategeko kandi akifuza ko mbere y’uko uyu mwaka urangira Abanyarwanda baba bamenye igihe Kamarampaka izabera.

Muri iyi nyandiko Ndahayo aterura agita ati “Ndi umwe mu banyarwanda bandikiye Inteko nifuza ko ingingo ya 101 ihinduka. Ndibuka ukuntu bitari byoroshye kumva ko ubusabe bwacu bwakwemerwa n’Inteko Ishinga Amategeko, ikagira icyo ibukoraho.

Itariki ya 21 Gicurasi 2015 ntizansibangana mu mutwe ubwo abayobozi b’Inteko Ishinga Amategeko barimo na Perezida wa Sena, Bernard Makuza bazaga kwakira ubusabe bw’ihuriro ryacu ry’urubyiruko, bwari bugizwe n’amabaruwa asaga 250 000.

Icyo gihe sinumvaga ko igihe kizagera abagize Inteko Ishinga Amategeko bose bakumva impamvu z’ubusabe bwacu, ariko ubu byaremewe kandi twiteguye gutora Referandumu tukabishimangira.

Ndashima akazi Inteko yakoze kandi ngasaba ko igihe cya Referandum gishyirwa hafi tukazatangira umwaka mushya twarayitoye.”

Jyewe nk’umwe mu Banyarwanda bifuza ko Perezida Paul Kagame akomeza kugeza ku gihugu iterambere, umutekano, amahoro asesuye, ndashima byimazeyo Inteko Ishinga Amategeko y’u Rwanda ku kazi yakoze, ikaba itaradutengushye ikadutega amatwi.

Mpora nkurikirana aho ibyo kuvugurura itegeko nshinga bigeze; ku wa mbere tariki 23 Ugushyingo 2015, ubwo Abadepite bemezaga Umushinga w’Itegeko Nshinga wari uvuye muri Sena, nabonye ko ibyari inzozi kuri benshi bigiye kuba impamo.

Nashimishijwe cyane n’uko Ingingo ya 101 twese twabonaga ko itubangamiye yahinduwe, Perezida wacu akongera guhabwa amahirwe yo gukomeza kutuyobora.

Nk’uko yatuvanye mu rwobo, ndamusaba nkomeje ko atazadutenguha, azatwemerere aziyamamaze mu matora ya 2017, kandi nifuza ko yatumara amatsiko akabitumenyesha tukazishimira umwaka turangije n’uwo tuzatangira wa 2016 nta nkomanga dufite ku mutima.”

Nyuma y’aho itegeko rizaba rivuye mu Nteko, twumvise bavuga ko Minisitiri w’Intebe ari we usigaye kurijyana imbere ya Perezida wa Repubulika kugira ngo agene igihe cya Referandum, ku bwanjye numva yabikora vuba; simutegeka, ariko nk’uko nabivuze Abanyarwanda turashaka gutangira umwaka mushya ibyo byaravuye mu nzira.”

Nishimiye ko ubusabe bwanjye n’ubw’abandi Banyarwanda bwakiriwe kandi nkaba mfite n’icyizere cyuzuye cy’uko Perezida Paul Kagame na we azatwemerera agakomeza urugamba yatangiye rwo guteza imbere Abanyarwanda no guhesha agaciro Umunyarwanda aha ari hose ku Isi.

Nk’umunyarwanda ukunda igihugu cyanjye ntewe ishema no kubona Abanyarwanda twese tuzahuriza kuri YEGO, tugatora Itegeko Nshinga ryacu binyuze muri Kamarampaka, maze n’Intore Nkuru dukunda Nyakubahwa Paul Kagame akazatwemera gukomeza kuduteza imbere.

Nari natangiye mbisaba, ariko mbisubiremo, mu cyifuzo cyanjye ndasaba ko iri Tegeko Nshinga rivuguriye mwaridushyikiriza vuba bishoboka tukaritora ku mugaragaro nk’uko Abanyarwanda twakomeje kubisaba."

Ngendahayo Aimable ari kumwe na bagenzi be bajyanye ubusabe bwabo ku ivugururwa ry'ingingo ya 101 y'itegeko nshinga, nu Nteko Ishinga Amategeko

Igitekerezo cya Ngendahayo Aimable


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE