Itangazamakuru murireke ribe itangazamakuru, ubuhirimbanyi mubuharire impirimbanyi nyazo

Yanditswe na Alex Rutareka
Kuya 15 Gashyantare 2017 saa 10:12
Yasuwe : XX
0

Ibyumweru bishize byatumye itangazamakuru ryo mu Rwanda ryongera kwibazwaho nyuma y’ifungwa rya Shyaka Kanuma, umwanditsi mukuru w’ikinyamakuru The Rwanda Focus ubu cyavuye ku isoko, ukurikiranyweho ibyaha birimo kunyereza imisoro.

Nk’umuntu twakoranye muri icyo kinyamakuru The Rwanda Focus, natekereje ko ari ngombwa kugaragaza bimwe mu bintu byerekana uko ubwo bucuruzi bwakorwaga, ndetse n’impamvu bishoboka ko zaba zaratumye ashaka guhindura ibyo yakoraga nk’uko byavuzwe.

Mu gutangira, njye na bagenzi banjye Kanuma adufitiye imishahara ya miliyoni 40Frw ataduhembye mu mezi menshi ashize, n’ibyo yatugombaga mu guhagarika amasezerano. Nubwo yishyuwe amafaranga n’abo yamamarizaga n’abandi hatandukanye, ntabwo yubahirije amasezerano twagiranye.

Twe nk’abantu twahoze turi abakozi ba The Rwanda Focus na Focus Media twagejeje iki kibazo mu nzego zitandukanye.

Twakigejeje mu bugenzuzi bw’umurimo mu Karere ka Gasabo kuwa 28 Ukwakira 2016, tunitabaza Urwego rwigenzura rw’Itangazamakuru (RMC), Inama y’Igihugu y’Itangazamakuru, Urwego rw’Igihugu rw’Imiyoborere (RGB) na Sendika y’Abakozi (Labour Syndicate- SENJOUSMEL) ariko ntacyo byatanze.

Kuwa 22 Ukuboza 2016, twagannye inzira z’inkiko kuko twumvaga itegeko rigomba kuduhesha ibyo twakoreye.

Ubundi sinkunda guca ukubiri na mugenzi wanjye w’umunyamakuru, ariko ntabwo akiri umunyamakuru, ni we se?

Yavugiye mu ruhame ko yatangiye “ubuhirimbanyi” bwa politiki. Birumvikana ntabwo akiri umukoresha wanjye kuko yafunze ikinyamakuru atanaduteguje, yanga kwishyura abakozi n’andi madeni yose, ahubwo ahita ajya gukusanya amafaranga yo gushyira mu ishoramari rye rishya!

Nari kwishimira ibyo yakoze iyo abanza kwishyura imyenda yose afitiye abakozi be na nyir’inyubako yakodeshaga. Ubu buhirimbanyi bugamije kuyobya uburari ku bantu bari mu gihugu no hanze yacyo, ngo azimanganye ibikorwa bibi yakoze.

Kubera iki umunyamakuru ufite uburambe akaba na nyir’ikinyamakuru yakora ibintu bimeze gutya? Ni gute Umunyamakuru wigenga mu Rwanda, Umunyafurika wifitiye icyizere, ajya gusaba amafaranga muri Ambasade y’u Bwongereza, Amerika na Uganda?

Ko nta cy’ubu cy’ubusa nk’uko twese tubizi, none ni iki izi Ambasade zamusabaga ko na we azishyura? Ibyo utekereje bishobora kuba bimeze nk’ibyanjye.

Hagiye hagaragara ibimenyetso bitandukanye muri ibyo byose simbyiteho uko bikwiye. Kuri ubu Kanuma ari gushinjwa amanyanga mu mafaranga harimo no kunyereza imisoro no kwanga kwishyura amadeni yari afitiye abantu batandukanye, byatumye nsubiza amaso inyuma, ntekereza cyane ku muntu twahoze dukorera n’akaga twashoboraga kwikururira mu buryo tutazi.

Rwanda Focus yigeze kuba ikinyamakuru cyizewe. Itsinda twakoranaga ryakoreraga ibishoboka rikandika inkuru zifatika ku Rwanda. Twumvaga ibinyamakuru byinshi bihomba bitewe no kutanoza ibyo bakora, kunanirwa guhangana no kunanirwa kugendana n’uburyo bugezweho, ariko twakoraga neza nka kimwe mu binyamakuru byandikaga mu Cyongereza, nubwo ibinyamakuru byasohokaga bitageraga kure n’abasura urubuga rwacu ntibabe benshi.

Ubu nibwo mbona uko twabeshwagaho n’igitutu Shyaka Kanuma yashyiraga ku bigo byigenga n’ibya leta, akabaka amafaranga menshi ngo atabandikaho inkuru mbi cyangwa kuri politiki y’u Rwanda n’abanyapolitiki.

Ndibuka ko imigirire nk’iyo yari ifitwe n’ibindi binyamakuru birimo Umuseso na Newsline, na byo Kanuma yari umwe mu babishinze.

Si ubwa mbere agerageza kwigira intwari y’impirimbanyi agamije kubona amafaranga ndetse n’abantu bamuhange amaso; yabikoze mu 2001 agira ngo abone igihembo cya CNN gihabwa Umunyamakuru w’umwaka muri Afurika.

Ntabwo nigeze nita cyane ku buryo ubukungu bwari buhagazemo mu kinyamakuru, ariko nk’uko byatangajwe, The Rwanda Focus ikurikiranyweho kunyereza imisoro, yose hamwe ingana na miliyoni 150 Frw.

Ibigo byinshi na byo bivuga ko binyuze kuri Kanuma, ikinyamakuru cyabonye amamiliyoni menshi yavuye mu misoro y’abaturage, ayahabwa mu buriganya.

Ku bwanjye ni ingenzi cyane kumenya aho aya mafaranga yarengeye kuko atigeze ashorwa mu bikorwa by’ikinyamakuru.

Nakunze kumva ko kuvuga “itangazamakuru risaba abantu amafaranga ngo ritabavuga nabi” bidakwiriye igihe hagamijwe kugaragaza imikorere y’itangazamakuru mu Rwanda. Gusa ibi bintu byangije ugutekereza kwanjye itangazamakuru nk’umurimo wiyubashye wo gukorera abaturage.

Iyo uwahoze ari umukoresha wawe n’umwanditsi wawe mukuru yirata ko yijejwe inkunga muri za ambasade nyuma y’uko Leta yari ihagaritse kugira andi mafaranga imuha, akavuga yeruye ko yanabibwiye Umukuru w’Urwego rw’Igihugu Rushinzwe Iperereza ari mu biro bye, ukabona ko ntacyo yitayeho, ntacyo wakora uretse kugwa mu kantu no gutakaza icyizere.

Dukeneye itangazamakuru rifite ubushobozi, ryiza, ryigenga n’abanyamakuru bafite amahame bagenderaho mu gihugu cyacu.

Tunakeneye kandi imiryango itari iya leta ikora, yifitiye icyizere n’impirimbanyi zigenga ziharanira zikanateza imbere uburenganzira bw’Abanyarwanda, bitari uguhabwa amabwiriza n’abanyamahanga bafite izindi ntego zihariye, nk’uko twagiye tubibona muri Afurika ku mayeri yo gucamo abantu ibice hagamijwe kubigarurira.

Amazi yamaze kurenga inkombe ariko nashimye ko bitahita ntacyo mbivuzeho.

Alex Rutareka, wahoze ari Umwanditsi muri Rwanda Focus


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza