Kinyamateka yari mu mugambi wa Jenoside nka RTLM

Yanditswe na IGIHE
Kuya 23 Ukuboza 2016 saa 10:50
Yasuwe : XX
0

Mu bitangazamakuru byahembereye ingengabitekerezo yo kurimbura Abatutsi, abantu benshi bibuka ibya ORINFOR nka Radio Rwanda n’Imvaho, ibinyamakuru bya MRND/CDR nka Kangura, Nyiramacibiri, Umurwanashyaka, Radio RTLM, n’ibindi ariko bakibagirwa Kinyamateka ya Kiliziya Gatolika. Kubyibagirwa ni ugucurika amateka.

Iyi ni inyandiko ikurikira iya mbere nise “Abasenyeri Gatolika mu Rwanda bakwiye kwisabira imbabazi mbere yo kuzisabira abandi.”

Ikinyamakuru Kangura cyanditse amategeko icumi cyise ay’Abahutu. Irya nyuma muri ayo ni “Revolisiyo ya rubanda yo muri 1959, Kamarampaka yo muri 1961 n’ingengabitekerezo ya gihutu bigomba kwigishwa Abahutu bose aho bava bakagera. Buri Muhutu wese agomba gukwirakwiza yivuye inyuma iyi ngengabitekerezo. Umuhutu wese uzatoteza mugenzi we w’Umuhutu kubera gukwirakwiza no kwigisha iyi ngengabitekerezo, azafatwa nk’umugambanyi.” (Kangura No. 6 urup. 8 -Ukuboza 1990)

Kangura yakanguye Kinyamateka

Iri tegeko ryabaye umusingi n’intwaro y’abategura jenoside. Ibyakozwe na PARMEHUTU nibyo byababeraga urumuri nk’uko KINYAMATEKA ya Kiliziya yabishishikariye nk’inararibonye mu bitangazamakuru mu Rwanda.

Mu nyandiko yahawe umutwe “Parmehutu ishyaka ry’irirwanyi” ikitirirwa ‘Muhorakeye D.’ (KINYAMATEKA N° 1340 urup. 3– Gashyantare II 1991) yavuze ibigwi bya PARMEHUTU ko “Yaciye burundu ubuhake n’ubuja; yahaye umuhutu agaciro mu Rwanda; yashinze Repubulika ku itariki ya 28/1/1961; yagejeje igihugu ku bwigenge ku itariki ya 1/7/1962; kandi yahamije Repubulika irakomera kandi itari ibuze abanzi bakomeye, itsinda inyenzi burundu mu 1967.”

Kuvuga ko PARMEHUTU yagejeje u Rwanda ku bwigenge ni ikinyoma cyambaye ubusa. Ubwigenge twabonye PARMEHUTU ntiyabushakaga mu 1962. Yabushakaga mu 1987. Ubwanditsi bwa Kinyamateka ntaho buvuga ko iryo shyaka ryashingiye ku irondabwoko rigakora rigashinga politiki y’ubwoko kurusha igihugu. PARMEHUTU yakoze jenoside mu 1959 na 1963-4. Ibyo kwangaza abantu mu mahanga ni PARMEHUTU yabikoze ibitewemo inkunga n’Ababiligi. Ibyo byose ubuyobozi bwa Kiliziya Gatolika by’umwihariko Musenyeri André Perraudin n’abapadiri bera bari babiri inyuma.

Iyo nyandiko ya Kinyamateka, yatinze cyane ku kwerekana ko kuba ishyaka MRND ryaratengushye amatwara ya MDR-PARMEHUTU, aribyo byatumye ngo “Inyenzi n’ibyitso” bibyutsa umutwe.

Kinyamateka yabanje gukangurira urubyiruko rw’Abahutu kwanga Abatutsi hakoreshejwe igitekerezo mpimbano.

Iti “Iyo mvuze ko umuhutu yahawe agaciro, abasore batazi ingoma y’abatutsi, ari yo ya gihake ntibashobora kubyumva. Kugira ngo mwumve neza ukuntu umuhutu yari asuzuguwe, nimusome kano gakuru.

Hari umwana w’umuhutu wigeze kwinjira mu rugo rw’umututsi, ahasanga intebe, iyi ya Kinyarwanda, ayicaraho. Bene urugo bari bayimutsinzeho ngo akabya kwigereranya, bene intebe bayimuhubuzaho barayoza, bayanika ku kazuba kugira ngo ubuhutu uwo mwana yasizeho buyishireho. Iki si igiparu gusa byarabaye kandi abo byabayeho nibabisoma bazabyibuka!”

Utugani nk’utu (fiction) twanditswe henshi, tuvugwa henshi nta kindi tugamije uretse gutsindagira urwango mu Banyarwanda babarirwaga mu Bahutu. Ni n’inyigisho zari zarashyizwe mu mashuri. Ni inyigisho y’urwango rukomoka ku irondabwoko (racism) yacengejwe n’abarimo abamisiyoneri.

Iyo nyandiko yavuze ko ngo hari bamwe mu ba “Patoro” bitwara gitutsi cya kera!” Kinyamateka iti: “Ng’ibyo ibisigisigi bya gihake mujya mwumva!”

“Ibyo byose rero PARMEHUTU yari yarabiranduranye n’imizi, ahubwo ndibaza rwose ukuntu byashoboye gushibuka.”

Uko gushibuka kw’icyo bise imizi ya gihake, Kinyamateka yerekanye umuti wabyo

“Ubwo rero gihake yongeye kugariza u Rwanda, Inkotanyi zikaba zitugera amajanja, ka gapariti kacu, (kandi Fondateri wako yigeze kuvuga ko tuzakifuza), gakwiye kugaruka. Ako gapariti si akandi ni PARMEHUTU ... Mu gihe cyaryo, umuhutu yari umuhutu nyine… PARMEHUTU ishoboye gutsinda iyi ntambara turwana n’Inkotanyi kandi ishoboye no kuvugurura ibitekerezo by’Abahutu bamwe bibagiwe iyo yabakuye. Parmehutu irinda Abatutsi ibishuko byo guhinduka ibyitso kuko ibumvisha ko barushywa n’ubusa, kandi na bo baba babyibonera.”

Kinyamateka yerekanye isano hagati ya PARMEHUTU na MRND. “Erega M.D.R irajya gusa na M.R.N.D. imwe ni mubyara w’indi!” Ngo aho bitandukanira ni uko MRND irimo abanyamurengwe kandi “yuzuye Inkotanyi n’ibyitso byazo.”

Kinyamateka yaburaniye PARMEHUTU ko itigeze ikora amakosa, ngo ahubwo n’amakosa yaba yarakozwe ari ukubera abarwanashyaka bayo. Bashingije PARMEHUTU kubera ko “Politiki yayo irumvikana. Ntihatira Abanyarwanda ubumwe budashoboka ahubwo ibabuza kwenderanya.” Iyi mvugo ya Kinyamateka niyo yabaye politiki n’igitongero (slogan) ya MRND/CDR. Ko Abahutu n’Abatutsi badashobora kubana, n’ubumwe bwabo budashoboka. Jenoside ni uko yategurwaga.

Harya ngo Kiliziya Gatolika ntacyo yanditse gihamagarira cyangwa gishishikariza abantu gukora jenoside? Ngo nta ntwaro zatanzwe? Nifuza ko Abasenyeri Gatolika mu Rwanda bazirikana imvugo y’iyi nyandiko MUHORAKEYE D. ibashimira ibigwi by’ubugome bwa PARMEHUTU.

Ibaze ikinyamakuru cya Kiliziya kivuga ngo: “PARMEHUTU yo ntiyatinyaga kwikiza ku mugaragaro abantu yabonaga ko badakurikiza amatwara yayo. Umbwire umuparmehutu uzi wigeze agambanira Repubulika! Mbwira ibyitso wigeze wumva ku gihe cya PARMEHUTU? Byari gukandira he?”

Gushishikariza gukora jenoside ni iki? Amateka ya jenoside yagiye ikorerwa Abatutsi mu bihe bitandukanye, azi ko iyi mvugo ya Kinyamateka yari iyo gushishikariza gukora jenoside mu buryo butaziguye.

Ibyitiriwe MUHORAKEYE D. sibyo byonyine Kinyamateka yanditse ikangurira Abanyarwanda bamwe kwanga Abatutsi no gushyigikira umugambi wa Jenoside.

Kinyamateka yongeye kwandika indi nyandiko na yo ishishikariza abantu kwikiza Abatutsi. Iyo ni iyiswe ‘Ibihe rurimo si ibyo gukinishwa’ yitiriwe Nkurikiyimana J. (KINYAMATEKA N° 1344 urup. 11– Mata II 1991)

Mu mugambi wose wa jenoside, abayitegura babikora babyita kwifasha cyangwa kwitabara. Kuri bo igice kimwe cy’abantu (bazakorerwa jenoside) baba ari ikibazo gikeneye igisubizo, kandi kirambye. Kubarimbura kikaba aricyo gisubizo bakora.

Iyo nyandiko itangirana imvugo iryoshye ikurura uyibona “Basomyi ba Kinyamateka murambe. Basomyi nshuti, umuririmbyi yaravuze ati “Ibihe birakomeye…” Padiri nawe buri gitondo, muri misa, abwira Nyagasani ati “Ibihe turimo ubisakazemo amahoro…!”

Akurikizaho ko abasomyi bakwiye gusaba Nyagasani “amahoro” kandi “ahamye” … atari amwe “ashingiye ku kwiheba, ku bwoba cyangwa igitsure.” Mbese buri wese agashyira mu gaciro akibwiriza.

Kinyamateka iti: “Dusanzwe tuzi ko Imana ifasha uwifashije. Kuyisaba amahoro ni byiza, ndetse ni na ngombwa, ariko tugomba natwe gushyiraho akacu. Akacu tugomba gushyiraho, ni ko gatumye mfata iyi karamu, kugira ngo ngeze kuri bagenzi banjye ibitekerezo mfite kuri ibi bihe turimo, maze twese hamwe twifashe Nyagasani abone aho ahera aduha ku mahoro ye.”

Ni inyandiko ibwira Abahutu kudashira amakenga Demokarasi y’amashyaka menshi. Muri ibyo byose se demokarasi iri he? Nta ho, ahubwo ni ya nda nini bajya bavuga! Bantu mwiruka mu mashyaka, bamwe muzi Ingoma ya gihake, mukamenya na Repubulika zombi. Mushyigikire ibyiza mwabonye, ibibi mwabonye mubihigike.”

Iyi ni na yo mvugo yakoreshejwe na MRND/CDR ikaba n’umusingi wa HUTU-PAWA. Ntibyaba ari ugukabya uvuze ko HUTU-PAWA yatekerejwe na Kiliziya mbere y’abandi dore ko n’abasenyeri babo bari mu cyiswe “Comite de Contact” bashyigikiye ko CDR ijya muri leta kandi ari amahano.

Ku bijyanye n’amashyaka menshi Kinyamateka iti: “Demokarasi rero ni iki? Demokarasi ni ubutegetsi bwa rubanda.” Ongeraho nyamwinshi.

Abateguye Jenoside, bakoze uko bashoboye ngo byumvikana ko kwica Abatutsi biri muri gahunda yo kwikiza umwanzi w’igihugu. Aho kwitwa Jenoside bikitwa intambara. Mu babikoze mbere ni Kinyamateka ya Kiliziya Gatolika. Intambara leta yarwanaga na leta ntiyitwe icyo ari cyo, ahubwo ikitwa icyo itari cyo kandi itegeko rya 10 ry’ay’Abahutu ya KANGURA bikubahirizwa.

Umwanditsi wa Kinyamateka ati: “Iyi ntambara turimo, jyewe ndahamya ko ari intambara y’amoko, kandi ifite umuzi muri REVOLISIYO ya rubanda yo mu mwaka wa 1959. Ibi Inkotanyi zarabigaragaje, zibasira Abahutu, zinabacyurira ko batumye ba se na ba sekuru b’Inkotanyi bahunga. Iyi ntambara ni intambara Abatutsi bashoje, kugira ngo bisubize ubutegetsi banyazwe na revolisiyo y’abaturage. Iyi ntambara ni intambara Abatutsi bashoje, kugira ngo babone uko baryoza Abahutu, ibyo bakoreye Abatutsi.” Imyaka yishwemo cyangwa Abatutsi bagatotezwa bikabije Kinyamateka yarayibukije, ni 1959, 1963 na 1973.

Iyo nyandiko igakomeza igira iti: “Twese twibagirwa vuba. Twese twibagirwa vuba, cyangwa intamenya yishwe no kutamenya! Ari Abatutsi bibagirwa vuba, kandi si jye wa mbere ubibabwiye, ari Abahutu bibagirwa vuba, dore ko bo basanzwe ari n’abapfayongo (naïfs). Kuri iyo ngingo turahwanye, Abahutu bagakizwa n’umubare wabo mwinshi, kandi ni na wo uzakomeza kuba amizero yabo. Ngicyo icyo Abatutsi bibagirwa. Ikindi Abatutsi bibagirwa ni ubuhake bwamaze hafi imyaka 400 bakandamiza Abahutu. Ikindi Abatutsi bibagiwe, ni uko ari bo batumye rubanda yivumbagatanya muri 1959. Bibagiwe kandi ko, kuva icyo gihe kugeza magingo aya, bagerageje kenshi kwisubiza ubutegetsi ku ngufu, kandi nta na rimwe batatsinzwe, nk’uko Perezida yabibabwiye, kandi abizi by’imvaho. Ngicyo nanone icyo Abahutu bibagiwe, ni uko Abatutsi batazaruhuka badasubiranye ubutegetsi, maze ngo barikoroze, uretse ko umubare mwinshi w’Abahutu utazatuma babugeraho.”

Ni Kiliziya ivuga ngo “nk’uko Perezida yabibabwiye” bidatandukana no kuvuga ngo “nk’uko Ivanjili ibivuga.” Perezida Juvénal Habyarimana watangaje umugambi wa jenoside ku wa 28 Mata 1991, Kinyamateka yasubiyemo amagambo ye, irayemeza, inasaba n’abandi ko bayemera. Yari IMVAHO.

Ibyo Kinyamateka yanditse nibyo byaje gushyirwa mu bikorwa n’ Ingabo z’u Rwanda (FAR) mu 1992 basobanura umwanzi uwo ari we. UMUTUTSI n’ABAHUTU bivumburiye ubutegetsi. N’indirimbo za BIKINDI Simon ni aho zaganishaga mu ndirimbo ye “AKABYUTSO” abantu benshi bazi nka “NANGA ABAHUTU”.

Muri iyo ndirimbo yunga mu rya Kinyamateka (yita Abahutu abapfayongo) avuga ko yanga “Ibihutu bigendera inzira ubugari, Ibihutu bidashishoza, ibihutu byegura bikarwana intambara bitazi imvano yabyo…”

Abo Kinyamateka yita abapfayongo, BIKINDI akabita “Ibihutu…” ni abatarashakaga kujya mu mugambi wo kurimbura Abatutsi. Yari inkunga n’intwaro ikomeye muri jenoside.

Iyo urebye ibyo Kinyamatekayanditse, ninde ukwiye kubibazwa uretse Abasenyeri Gatolika mu Rwanda? Ari ababibemereye banabishyigikiye, n’abo byakoze mu nda. Imvugo y’ubugome yanditse muri iki kinyamakuru nta muntu ku giti cye wabibazwa udahereye kuri nyiracyo. Inama nkuru y’abasenyeri mu Rwanda (Episcopal Conference) kuko ariyo nyiri ikinyamakuru.

….Biracyaza…


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza