Kwamamaza

Kutagendana n’ikoranabuhanga birakura benshi ku mugati!

Yanditswe kuya 31-10-2015 saa 18:16' na Mpinganzima Yvonne


Ikoranabunganga ryatumye isi iba nto, wumva ibyadutse mu bihugu byateye imbere iyo mu Burayi za Amerika na Asia, bugacya ukabisanga iwawe ku muryango! Yenda ibi ntabwo biragaragaza uburemere bwabyo bukomeye mu Rwanda, ariko ntibyabuza kubitekerezaho kuko isi ari umugudugu!

Muri ibi bihugu mvuga byateye imbere, kuri ubu usanga nk’uruganda rwahoze rukoresha abakozi bagera ku gihumbi rusigaranye 50 gusa, abandi bose bagasimbuzwa bya bimashini bita ‘robots’ akenshi zikoreshwa imirimo y’ingufu nko guterura ibiremereye no guteranya ibikoresho runaka.

Ibi biragaragaza ko hari abakozi benshi baba bahatakarije imirimo mu gihe ari yo yari ibabeshejeho, n’ubwo bizwi ko uruganda ari cyo kintu kibasha gutanga akazi ku bantu benshi, hari aho usanga zisigaranye abayobozi n’abakozi bake baba bashinzwe gukoresha no kugenzura imikorere y’izi robots zikora zidasaba umushahara.

Uretse ibi, hari aho ikoranabuhanga rimaze gukataza birenzeho, aho bakubwira ko mu Buyapani ho, hakozwe robots zifite ishusho nk’iy’abantu ndetse zigahabwa ubwenge nk’ubwa muntu, zigashyirwa hamwe na hamwe mu mirimo isanzwe yakorwaga n’abantu mu biro ‘offices’, robot ifite ubushobozi bwo kubazwa igasubiza ndetse ikaguha services zose uko uzifuza mu kigo ikorera.

Uwitwa Sawada uyobora Hotel y’inyenyeri 5 ‘Henn-na Hotel’ iherereye Ngasaki mu Buyapani, iyi Hotel ikaba izwiho kuba iya mbere mu gukoresha robots nyinshi ku isi kandi zinyuranye mu mirimo inyuranye, yemeza ko gukoresha robots nyinshi byagabanyije 70% by’amafaranga yagombaga gutangwa ku bakozi-muntu!

Abacukumbuzi mu Bwongereza (UK), bo bagaragaje ko 35% by’abakozi mu kazi muri UK bafite ibyago byo gutakaza imirimo mu myaka 10-20 iri imbere, kuko ikoranabuhanga rizaba rimaze kubona robots zibasimbura bose ku mirimo bakoraga, ndetse zigakora neza kubarusha, umusaruro ukiyongera kuko robot imwe yabasha gukoreshwa imirimo yagakozwe n’abantu 10.

Abafite ibyago byinshi byo gutakaza imirimo, ngo ni nk’abakozi bo mu ma banks, abacuruzi b’amatelefone, abakora imirimo yo kwandika dore ko izi robots ziba zaratojwe cyane gukoresha mudasobwa, n’abandi, cyane ko ubu noneho hari gutekerezwa gukora robots zajya zoherezwa ku rugamba rwa gisirikare, aho kugira ngo abantu abe ari bo bahatakariza ubuzima nk’uko bizwi ku rugamba mu buzima busanzwe.

Mu Rwanda byifashe bite?
Tugarutse mu Rwanda, yenda ibyo bya robots birahambaye ntiturabigeraho n’ubwo naho bizahagera, ariko mu gipimo gito cy’ikoranabuhanga dufite, iyo utajyanye naryo nabwo riragusiga!

Hari benshi bize kera mudasobwa zitaragera mu Rwanda mu gihe ubu ibintu hafi ya byose bisigaye byitabaza ikoranabuhanga. Birumvikana ko muri aba, abatarihuguye batakaje imirimo yabo.

Ndaguha urugero; abigaga iby’ubwubatsi kera mu Rwanda, bigishwaga gushushanya inyigo z’inyubako kuri bya bipapuro binini by’umweru bashushanyaho bakoresheje ikaramu y’igiti ‘pencil’, nyamara ubu byose bikorerwa kuri mudasobwa.

Uwize muri ibyo bihe, ubu n’ubwo yaba azi imibare myinshi ndetse afite ubunararibonye mu kubaka, nta kazi yabona, ndetse akabonye biba ari ugukoreshwa n’abafite ubumenyi mu myubakire igezweho; ikoresha bwa buhanga mu ikoranabuhanga.

Mu Rwanda, ikoranabuhanga ryageze mu bukanishi, aho amamodoka n’ibindi byuma binyuranye bisuzumwa na mudasobwa ikagaragaza ahari ikibazo, mu gihe mbere byari bizwi ko gusuzuma ikinyabiziga ari ukukijya munsi ugakorogoshora!! Byanze bikunze ahageze iri koranabuhanga, abakanishi bamaze kuhaburira imirimo kabone n’ubwo baba barakoraga neza aka kazi kabo.

Yego uko ikoranabuhanga ritera intambwe ibintu bigenda birushaho koroha, ndetse burya ni ngombwa kwiga no kugendana n’ibigezweho mu gihe bigufitiye umumaro, kugira ngo utazisanga isi yagusize.

N’ubwo bimeze bityo ariko na none, nta kibura ingaruka kuko dukoresheje nabi iri koranabuhanga byaba bibi!
Ibi ndabivugira hamwe usanga abantu bamwe baracitse imbaraga zo gukoresha imibiri yabo kamere Imana yabahaye, byaba imbaraga z’umubiri ubwawo ndetse n’iz’imitekerereze zigacika.

Dore kera abana mu ishuri bigishwaga gufata mu mutwe, urugero ni nk’uko wasangaga umwana wiga byibura mu mwaka wa Gatatu w’amashuri abanza azi mu mutwe ‘multiplication table’ cyangwa se icyo bitaga “Mara”; akaguha ibisubizo byose mu mibare ifite ikimenyetso cyo gukuba uhereye kuri ‘1×1’ ukagera ku 10×10 ntaho abikopera ahubwo iyi mibare yose imubitse mu mutwe.

Kuri ubu, ubu bushobozi bw’umutwe bwo gufata mu mutwe ntaho bwagiye ariko usanga nta gaciro bihabwa kuri bamwe, dore ko abana nabo bamenye gukoresha mubazi (calculator) yo itagora umutwe.

Ku bantu bakuru naho byaroroshye, ibibazo byose birabazwa google.
Ni byiza cyane, ariko se ubumenyi bwose bubitswe mu mashini (computer), mu mutwe twagendanamo iki? Aho ntibyaba byiza tubikoresheje byose, maze umuriro wabura, umuntu yabazwa ikibazo akagira icyo asubiza?!

Ikoranabuhanga ni ryiza cyane, rinadufasha kwihutisha byinshi mu iterambere riri mu ntego ya buri wese, ni ngombwa ko twiga ibyaryo tukagendana naryo, ariko mu gihe rikoreshejwe nabi umubiri n’ubwonko tukabyibagiza gukora neza mu buryo bw’umwimerere ‘naturally’, hagize icyangiza burundu iri koranabuhanga, wasanga umuntu asigaye ntacyo ari cyo.

robots zitanga ibyo kurya muri Henn-na Hotel izwiho gukoresha robots nyinshi mu mirimo inyuranye
Robot ikora aho bakirira abantu (kuri reception) muri Mitsukoshi department store i Tokyo
Robot ikora ak'ubuforomo kwa muganga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: info@igihe.com, marketing@igihe.com

Website Developped by

Uru Rubuga Ruheruka Gushyirwaho Amakuru Tuesday 29 Ugushyingo 2016
Copyright © 2009 -2014 - IGIHE Ltd - All Rights Reserved