Kwibuka: Hari n’ikindi Madamu Graca Machel yafasha Abanyarwandakazi

Yanditswe na Philbert Girinema
Kuya 22 Kamena 2016 saa 10:50
Yasuwe : XX
0

Uyu mugore w’icyamamare ni umwe mu bashyitsi b’ imena bakunze gusiga urwibutso rutibagirana igihe cyose asuye u Rwanda.

Umwaka ushize mu kwezi nk’uku, nibwo abagore batyaje ubwenge baturutse mu mpande zose za Afurika bateraniye i Kigali mu gikorwa cyo gufungura mu Rwanda ishami ry’umushinga New Faces New Voices (Amasura Mashya, Amajwi Mashya) Graca Machel yatangije.

Hari hashize igihe ntabona inama nk’iyi irimo abantu bahuje ishyaka riteye ubwuzu nk’ubwo niboneye. Byari ibintu bishimishije kwitegereza ukuntu abo bagore n’abagabo bari baje kubashyigikira, baturanaga isheja - iri rimwe ryari hafi kuvuna intebe bari bicayeho- bajya impaka zimbitse ku cyo bakwiye gukora kugirango umugore w’Umunyafurika abeho mu gaciro akwiye.

Ibi bihe bidasanzwe abitabiriye iki gikorwa babisangiye na Madamu Graca Machel, Umuyobozi wa New Faces New Voices na Madamu Jeannette Kagame,akaba ari nawe muyobozi w’Ikirenga w’iyi gahunda mu Rwanda.

Mu gihe twari tucyumva amagambo anyuze umutima yari amaze kuvugwa na Madamu Jeannette Kagame, Graca Machel yahise afata ijambo mu ijwi rirenze indangururamajwi zari zihari , mbese asa n’ushaka ko amagambo ye yumvikana ku misozi yose igize Afurika.

Mu by’ukuri ukurikije uko byari byifashe, nta washidikanyaga ko abo bagore bari bazindukanye ijabo bazagera ku ntego yabo yo gufasha bagenzi babo gukirigita ifaranga vuba, ngo bityo nabo bigire kandi babashe kwiteza imbere ku buryo burambye.

Niyo mpamvu nibaza nti mu gihe twenda gusoza iminsi ijana twibukamo abazize jenoside yakorewe Abatutsi, uretse ubucuruzi, ni iki kindi Abanyarwandakazi bakwigira kuri Nyirajabo Madamu Graca Machel?

Niba mubyibuka,Madamu Grace Machel yapfushije umugabo we Samora Machel mu mpanuka ikomeye y’ indege yabaye ubwo yari ari akiri mu kigero cy’imyaka 40.

Nyuma, yaje gushyingiranwa na nyakwigendera Nelson Mandela wigeze kuyobora Afurika y’ Epfo.

Muri 1994, u Rwanda rwahuye n’ ibihe bikomeye bya Jenoside yakorewe Abatutsi aho abagore benshi babuze abagabo babo mu buryo butandukanye.

Bamwe muri bo bishwe mu rugamba rwo kubohora igihugu , abandi bicwa n’Interahamwe mu gihe cya Jenoside , abandi abagabo babo bagwa mu mashyamba ya Congo barimo abahungaga kubazwa ibyo basize bakoze muri Jenoside, abandi bagwa mu mashyamba nyuma yo kubuzwa gutaha n’abafite ibyaha bishinja basize bakoze muri Jenoside.

Abenshi muri aba bagore bashegeshwe n’urupfu rw’abagabo babo nabo bari bafite imyaka iri hagati ya 20 na 40.

Mu buzima bugoye bari barimo bwo kubura ababo, igitutu cy’imiryango n’abaturanyi nacyo cyagiye kibabuza ubwisanzure mu buryo butandukanye.

Twibuke ko nta tegeko ryashyizweho na Leta y’u Rwanda rikumira umupfakazi kongera gushyingirwa, mu gihe nyir’ubwite yafashe icyemezo kandi bikaba bikurikije amateko. Nyamara biragoye ko umugore w’Umunyarwandakazi wapfushije umugabo we cyangwa watanye n’umugabo yafata icyemezo cyo kongera gushaka adahawe urw’amenyo cyangwa ngo avugwe nabi hitwajwe ko ngo yataye umuco. Nubwo hari abitwa ko ngo babishyigikiye, usanga nabo ibyo kongera gushaka k’umugore runaka nabo babyogeza nk’igikorwa cy’ubutwari.

Kubw’amahirwe, muri iyo nama y’abagore b’inkorokoro, nishimiye kumva ko abayitabiriye bahurizaga ku kugira inama abagore kurenga iyo myumvire y’abantu batuma bagendera mu kigare bagahitamo ibibasenya ngo bagambiriye gushimisha abandi hirya.

Uyu mwanzuro w’inyamibwa wafatiwe muri iyi nama, watumye nongera kwibaza nti noneho se bakomerejeho bakanagira inama abagore b’Abanyarwandakazi bapfushije abagabo cyangwa abatandukanijwe nabo bakava muri icyo kigare bagakurikiza urugero rwa Madamu Graca Machel bakongera bagakobwa impundu zikavuga?

None se umugore wishimye siwe ukora ibijya imbere?

Graca Machel yakwigirwaho n'Abanyarwandakazi benshi
Madamu Jeannette Kagame ubwo yatangaga ubutumwa mu itangizwa ry'Umuryango New Faces New Voices

Abagore bakora mu ngeri zinyuranye bari bitabiriye itangizwa rya New Faces New Voices

Claudine DeLucco Uwanyiligira


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza