Leta ikwiye gusaranganya ibikorwaremezo bikagera no mu byaro

Yanditswe na Richard Dan Iraguha
Kuya 11 Ukwakira 2015 saa 10:18
Yasuwe :
0 0

Iyo urebye ibyatangajwe n’ibarura ryakozwe mu Rwanda, ryagaragaje ko hejuru ya 80% by’abaturarwanda bose batuye mu bice by’icyaro. Iyi mibare uyihuje n’icyerekezo cy’igihugu kigaragara mu ngamba z’imbaturabukungu zigamije iterambere icyiciro cya kabiri (EDPRSII), aho biteganyijwe kuzamura iterambere ry’icyaro, birakwiye ko Leta isaranganya ibikorwaremezo bikagera no mu byaro.

Mu gushyira mu bikorwa icyo kerekezo, hari imijyi yashyizweho igomba kunganira Kigali, ariko bigaragara ko umujyi wa Kigali uryamira indi mijyi cyane, kuko ari wo wihariye ibikorwaremezo hafi ya byose, ku buryo bidasaranganyijwe bizakomeza kudindiza iterambere ry’icyaro.

Mu Rwanda hari minisiteri 18; MINECOFIN, MINICOM, MINEDUC, MINIJUST,MINALOC,MIFOTRA,MINISANTE,MINAFFET, MINIRENA, MININTER, MINADEF, MININFRA, MINEAC, MINAGRI,MINISPOC,MYICT,MIDMAR, MIGEPORF na MINIPRESIPRE.

Buri minisiteri yose ifite icyikaro mu mujyi wa Kigali. Ukongeraho Ibiro bya Minisitiri w’Intebe, n’ibiro by’umukuru w’igihugu.

Hari ibigo bikuru bishamikiye kuri za minisiteri ibyo bita ibigo by’iterambere (Development Board) bisaga 10; RDB, REB,RAB,NAEB, RBC, RSSB, RNRA, RCS,RGB…ibi byose nabyo bifite icyicaro gikuru mu mujyi wa Kigali.

Hari icyindi cy’iciro cy’ibigo bya Leta na za komisiyo bigera kuri 40 nabyo bikorera mu mujyi wa Kigali gusa; RRA, OAG,CMA, NISR, NISS, DGIE, NSTT, WASAC, REG, RPPA, WDA, PSC, CNLG, FARG, NLRC, NURC, ITORERO, NDRC, NYC, NCW, HEC, NCHR, SGF, RCAA, RWANDAIR, RURA, RBS, RHA, REMA, INMR, MHC, RBA, RCARMF, ONATRACOM, IPOSTA, GMO…..

Usibye ibyo bigo bya Leta usanga n’ibigo byigenga hafi ya byose bifite icyicaro mu mujyi wa Kigali; amabanki yose, ibigo by’itumanaho, inganda, za kaminuza, …

Ibigo bimwe na bimwe bya Leta bigiye gukorera mu Ntara, byakwihutisha iterambere ry’icyaro

Uhereye ku mubare wa za minisiteri, ibigo by’iterambere n’ibindi bigo bya Leta ukagera no kuri za komisiyo, nta kigo na kimwe gikoresha abakozi bari munsi ya 15.

Dufate nk’urugero; ikigo nka RAB (Rwanda Agricultural Board) gishinzwe ubuhinzi mu Rwanda kibaye gifite ikicaro mu karere ka Musanze mu murenge wa Muhoza.

Abatuye uwo murenge bakunguka byinshi kubera icyo kigo kihakorera, kuko hazubakwa imihanda mu buryu bwihuse, abayobozi n’abandi bakozi b’icyo bazajya bafata amafunguro hafi aho, birumvikana hazaboneka hoteli (nubwo yaba icirirtse).

Abaturage b’aho hafi bazagurisha umusaruro wabo n’abo bakozi.

Ikindi kandi, ibyo icyo kigo gikora kizajya kibishyira mu bikorwa byoroshye kuko n’ubundi ni ibijyanye n’ubuhinzi, kandi I Musanze barahinga cyane. Niba ari mbuto nshyashya cyangwa ifumbire, ntabwo bizongera gutinda, cyangwa igihe habonetse indwara runaka, RAB izajya ihita ibimenya ifate ingamba.
Urwo rugero rwasobanura no ku bindi bigo cyangwa minisiteri.

Iyo urebye mu bihugu byateye imbere, ibikorwaremezo biba bisaranyijwe hose mu gihugu, bigatuma ibice by’icyaro bizamuka mu buryo bwihuse mu iterambere.

Iyo usesenguye ahubwo usanga n’ibindi bigo bikomeye, ubona ko hari gahunda yo kubijyana gukorera mu mujyi wa Kigali, bigasanga ibindi.

Mu gihe icyicaro gikuru cya Kaminuza y’u Rwanda cyabaga I Butare mu karere ka Huye, cyarimutse ubu ikicaro gikuru cya UR kiri mu mujyi wa Kigali.

Ikigo cy’igihugu cy’inzu ndangamurage z’u Rwanda INMR, cyari gifite icyicaro I Butare mu Majyepfo nacyo cyarimutse kibarizwa mu mujyi wa Kigali.

Hatagize igikorwa, ibigo byose bikomeye bikaba mu murwa mukuru Kigali, byazakurura ubwiyongere bw’abaturage mu mujyi, kuko abaturage bagenda bakurikiye iterambere.

Nyamara ibyo bikorwaremezo bisaranganijwe mu turere hirya no hino, byakwihutisha iterambere ry’icyaro.

Ibikubiye muri iyi nkuru ni igitekerezo cya Richard Dan IRAGUHA
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza