Ni ngombwa gushishoza mu kibazo cy’u Rwanda na Uganda

Yanditswe na Albert Rudatsimburwa
Kuya 7 Werurwe 2019 saa 09:38
Yasuwe :
0 0

Umuyobozi Nshingwabikorwa w’umuryango Oxfam International ukorera mu Bwongereza, Winnie Byanyima, umuturage wa Uganda, amaze iminsi yunga mu ijwi ry’abashaka kumvikanisha ko u Rwanda rukwiye gufatwa mu buryo bumwe na Uganda mu kibazo cy’umubano utameze neza hagati y’ibihugu byombi.

Mu ntangiro z’uku kwezi, u Rwanda rwafashe umwanzuro ukomeye wo kugira inama abaturage barwo kudakomeza kujya muri Uganda.

Ku mpamvu zitandukanye n’iki kibazo, byakurikiwe n’uko imodoka ziremereye zabujije gukomeza gukoresha umupaka wa Gatuna ziturutse muri Uganda, ahubwo zisabwa gukoresha uwa Kagitumba zinyuze mu misozi ya Mirama.

Ariko abayobozi muri Uganda bakomeje gutera hejuru, bamwe bavuga ko Kigali irimo “kubangamira Uganda mu bijyanye n’ubukungu” kandi u Rwanda rwaragaragaje ko uyu mwanzuro ugamije kwihutisha ibikorwa byo kubaka umupaka uhuriweho wa Gatuna ku ruhande rwarwo.

Mu gukomeza kugaragaza ibitekerezo by’abanya-Uganda, Byanyima yanditse kuri twitter ibintu byinshi. Ku 3 Werurwe 2019 yanditse ati “Kubera iki abaturage barimo guhurika bene aka kageni kandi icyo bakeneye ari ukwishakira amafaranga, bagatunga imiryango yabo, bagasura abavandimwe n’inshuti? Abayobozi bacu batugomba ibisobanuro. Ni gute ibintu byageze kuri uru rwego, ni ibiki birimo kuba hagati yabo? Ibi ntabwo biri mu nyungu zacu.”

Yongeyeho ati “gufunga imipaka no kubangamira urujya n’uruza rw’abantu n’ibicuruzwa bibangamiye inyungu n’imirimo.”

Yasabye ba Perezida bombi Museveni na Kagame anyuze ku mazina bakoresha kuri twitter, ati “Mufite ibisobanuro mutugomba nk’abaturage. Muzirikana inshingano zanyu banyakubahwa?”

Biratangaje kuri Byanyima kujya guhuza ibintu hagati y’umuyobozi w’u Rwanda na mugenzi we wa Uganda kandi bidahuye. Urwego rwe rumwemerera kuba yamenya byinshi ku miterere y’ikibazo hagati y’u Rwanda na Uganda.

Bivuze ko ari mu mwanya mwiza kurusha benshi, wo kugira icyo akivugaho nk’umuntu ufite amakuru. Ariko asa n’uwishyira hagati agasaba abandi kumenya inshingano zabo, akirengagize ize nk’umuntu ufite icyo azi.

Ariko kubera ko yigeze kwandika kuri Twitter asaba Museveni kuba Perezida w’Umuryango wa Afurika y’Iburasirazuba, bisa n’ibigaragaza ibyo umuntu akeneye kumenya byose ku bijyanye n’uko yaba ntaho abogamiye mu kibazo.

Ku bushotoranyi bwose bwa Uganda, u Rwanda rwakomeje kugendera ku mategeko n’amabwiriza mpuzamahanga, rurengera buri munya-Uganda wese uri ku butaka bwarwo.

Ku rundi ruhande, inzego z’iperereza za guverinoma ya Museveni, atari n’inzego z’iperereza gusa ahubwo n’inzego nk’Urushinzwe abinjira n’abasohoka muri Uganda, zikomeje gukorera ibyaha abanyarwanda.

Ibibazo by’abanyarwanda Urwego rwa Gisirikare rushinzwe Iperereza, CMI, rwashimuse, rukabafunga binyuranyije n’amategeko, bagafungwa nta byaha bakurikiranyweho, bagakorerwa iyicarubozo, bimaze kuba byinshi cyane ku buryo nta wabirondora.

Ibinyamakuru byo mu Rwanda byanditse inkuru nyinshi z’banyarwanda bakorewe iyicarubozo cyangwa bashimuswe ntibongere kubonana n’imiryango yabo.
Nka Rene Rutagungira abakozi ba CMI bamushimutiye mu kabari muri Bakuli mu murwa mukuru Kampala, ari kumwe n’inshuti mu ijoro ryo ku wa 8 Kanama 2017.

Yafungiwe mu kigo cya gisirikare cya Makindye mu buryo bunyuranyije n’amategeko, ndetse hari amakuru ko yakorewe iyicarubozo. Hari abandi benshi bagiye bavanwa mu gihugu ku ngufu binyuranyije n’amategeko, byose byaravuzwe.

Abantu basomye ibyabaye kuri Fidele Gatsinzi wagiye gusura umuhungu we muri Mukono Christian University ubwo CMI yamushimutiraga ahitwa Ntinda ku wa 22 Ukuboza 2017. Iyicarubozo yakorewe ryari rimuhitanye, rimusiga atabasha gutambuka none ubu agendera mu kagare.

Mu bashimuse Gatsinzi harimo umunyarwanda yaje no kumenya witwa Kayumba Rugema (wirirwa ku mbuga nkoranyambaga za RNC asebya ubuyobozi bw’u Rwanda).

Gatsinzi avuga ko Rugema yamututse, amukwena ati “aha ni Kampala ntabwo ari i Kigali”. Kuba RNC ikora muri ubwo buryo bweruye nabyo bisobanuye byinshi umuntu yakenera kumenya ku mikoranire y’uyu mutwe w’iterabwoba na Kampala.

Kugeza uyu munsi umubare w’abanyarwanda bavanwe muri Uganda ku ngufu - iri jambo rikoreshwa nabi, irya nyaryo ni ugusukwa hanze kuko nta mategeko agenderwaho – guhera muri Mutarama 2018, barenga 900.

Nta muntu wagaragaza umuturage wa Uganda uburenganzira bwe bwahonyowe mu Rwanda. Umunya-Uganda wese ufashwe hari icyaha akekwaho arakimenyeshwa, agahabwa umwanya wo kwiregura imbere y’urukiko, na ambasade ikamenyeshwa agifatwa.

Winnie Byanyima mu kujya kunenga Perezida Kagame mu buryo bumwe na Museveni, nta na kimwe akomozaho muri ibyo.
Ari mu guhakana gusa nk’uko bimaze gucengera abanya-Uganda benshi bakomeye. Batagendeye kuri gihamya n’imwe ishimangira ibyo bavuga, bahisemo uko babona ibintu nko kuvuga ngo “icyo Uganda irimo gukora nicyo n’u Rwanda ruri gukora.”

Impuguke zigaragaza ko ibitangazamakuru byo muri Uganda byanengwa kuba byarananiwe gukurikirana inkuru ikomeye kurusha izindi ku Isi, y’uburyo leta yihindutse abaturanyi.

Icya kabiri, Uganda yonyine niyo icumbikiye, itera inkunga ndetse igafasha byuzuye imitwe y’iterabwoba by’umwihariko RNC na FDLR, yiyemereye ko irwanya umuturanyi.

U Rwanda ntirukorana n’imitwe cyangwa abantu barwanya Uganda. Ikibabaje kurushaho ni uko CMI na ISO byakomeje kubuza amahwemo abanyarwanda baba muri Uganda, mu nyungu za RNC ya Kayumba Nyamwasa.

Abanyarwanda bakorewe iyicarubozo bakagira amahirwe bagasohoka muri Uganda ari bazima, bavuga uburyo iyicarubozo rya CMI rikorwa akenshi n’abavuga Ikinyarwanda nk’uko Gatinzi yavuze kuri Rugema.

Damascene Muhawenimana wo mu Karere ka Nyamasheke we yibuka uburyo, mu Ukuboza 2018, abantu yabashije kumenya ko ari abakozi ba CMI bamushimutiye kuri Sitasiyo ya Polisi ya Nsambya, bakamujyana aho yakorewe iyicarubozo.

Uyu mugabo w’imyaka 37 wari wagiye muri Uganda mu Ugushyingo gushakisha umuvandimwe we wari wabuze, yamaze ukwezi mu nzu ya CMI akorerwa iyicarubozo.

We avuga ko abakora iryo yicarubozo ari abanyarwanda kubera ko aribo “bonyine bashobora kuvuga Ikinyarwanda nk’uko abo bakivuga, kandi bazi byinshi ku Rwanda.”

Ni ibintu bizwi ko abagize RNC bakorana bya hafi n’inzego z’ubutasi bwa Uganda. Zibafasha mu bikorwa byo gushaka abambari.

Ibi byose byagiye bivugwa mu bitangazamakuru byo mu karere. Raporo y’impuguke z’Umuryango w’Abibumbye yasohotse ku wa 31 Ukuboza 2018, igaragaza neza uruhare rwa Uganda mu bikorwa by’iterabwoba ku Rwanda.

U Rwanda rwoherereje ubuyobozi bwa Uganda ubutumwa bwinshi rwamagana ibyo bikorwa. Rwatanze ibimenyetso byose kuri bagenzi barwo b’i Kampala, ariko ntacyo bakoze.

Ariko abantu bagakomeza kuvuga ko u Rwanda narwo rurebwa n’ikibazo mu buryo bumwe, mu biri hagati y’ibihugu byombi.

Nta nubwo byaba ikinyoma cy’uko “u Rwanda ruri kuneka kuri Uganda” cyatangajwe n’ibinyamakuru byegamiye kuri Museveni bigamije kuyobya amakuru. Ni gute abantu bageze mu myaka 62 baba za maneko? Cyangwa abana bagiye kureba babyeyi babo? Cyangwa ababyeyi bonsa impinja z’amezi atanu? Cyangwa abaturage basanzwe bambuka umupaka bagiye gusura abaturanyi hakurya y’umupaka wa Uganda?

Kugira ngo ibyo binyoma byemerwe ko abo bantu ari ba maneko, umuntu agomba kubanza kumvikanisha amakuru menshi atari yo ku Rwanda.

Ariko igikomeye, hari ikibazo kitarabonerwa igisubizo: Ni uruhe ruhare ku mutekano w’igihugu wa Uganda rwakumvikanisha impamvu yo gufatwa gutya kw’abanyarwanda b’inzirakarengane mu nzego zishinzwe iperereza za Uganda?

Abantu nka Byanyima ntabwo babaza icyo kibazo kuko bumva ko niba guverinoma ya Museveni ivuze ibintu, ari uko bikwiye kuba.

Mu kunanirwa kubaza iki kibazo, bahinduka nk’undi muntu uwo ari we wese witesha amahirwe yo kuba yagaragara nk’udafite aho abogamiye.

Albert Rudatsimburwa ni umusesenguzi mu bya politiki y’ibiyaga bigari, akaba impuguke mu itangazamakuru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza