Nyampinga w’ u Rwanda akwiye kuba isugi

Yanditswe na Munyengabe Murungi Sabin
Kuya 28 Ukwakira 2015 saa 12:35
Yasuwe : XX
0

Ubwanditsi: Ibikubiye muri iyi nyandiko ni ibitekerezo bwite by’umusomyi wa IGIHE witwa Richard Nteziryayo. Yanditse igitekerezo gikubiyemo ingingo zishimangira ko umukobwa wese uhatanira kuba Nyampinga w’u Rwanda akwiye kuba isugi bityo bikazaba umuti urambye wo guhangana n’ibibazo bituruka mu busambanyi no kudaha agaciro ubusugi. Uyu musore ari umwanditsi w’ibitabo akaba n’umushakashatsi.

Nyampinga w’u Rwanda akwiye kuba ari umukobwa: uhiga abandi mu bwiza n’ubuhanga , intangarugero muri byose, icyitegererezo, arangwa n’imico myiza ijyanye n’imigenzereze ya Kinyarwanda, afata ibyemezo byiza kandi ari Isugi.

Mubyukuri ikintu cyiza wakorera igihugu cyawe ni ukubyara ukakirerera, uburere ni umusingi ufatika w’ubuzima. Tureke kwibindikiranya duhitemo igikwiye tunabone icyo twakagombye kubona gikwiye gukorwa kuko urubyiruko by’umwihariko abakobwa ni bo buzima shingiro bw’igihugu cyacu none n’ejo hazaza.

Iki kintera gusaba uyu muti usharira kuri bamwe

Iki gitekerezo nubwo gisharira kuri bamwe ariko ni ingenzi uramutse ugisesenguye neza, nigishyigikirwa na Minisiteri y’Umuco ndetse buri Munyarwanda akacyiyumvamo tutibagiwe abagira uruhare mu gutegura aya marushanwa kizafasha mu bukangurambaga bwo gushishikariza urubyiruko by’umwihariko abakobwa agaciro k’ubusugi.

Mpamya ko ubusugi bwataye agaciro nshingiye ku mibare iri muri RDHS 2014-15 (Rwanda Demographic and Health Survey) itangwa n’ ikigo cy’igihugu cy’ibarurishamibare mu Rwanda (NISR).

Byagaragaye ko hari umubare munini w’abana bavuka ku babyeyi bakiri bato b’abakobwa bari hagati y’imyaka 15-19 bigateza ibibazo by’uburwayi n’impfu tutibagiwe gucikiriza amashuri yabo. Iyi mibare igaragaza ko 7% babyaye abana , 6% bari bamaze igihe gito babyaye, 2% bari batwite mu gihe ubwo ubu bushakashatsi bwakorwaga.

Umubare w’abakobwa bari hagati y’imyaka 15-19 babyaye uragenda wiyongera ku buryo bwihuse 1% ku bafite imyaka 15 kugeza kuri 21% bafite imyaka 19.

Ingaruka z’ibyo bamwe bita iterambere no gusirimuka

Muri Kigali bizwi ko ari abasirimu bajyana n’ibigezweho kandi bajijutse, imibare yabo iri hejuru kurusha mu bindi bice by’igihugu aho 10.2% babyaye abana, 6.5% bamaze igihe gito babyaye naho 3.7 % batwite abana ba mbere mu bakobwa 357 bafite hagati y’imyaka 15-19 babajijwe mu mujyi wa Kigali.

Hanze aha hari imyitwarire mibi n’ibikorwa bibi byinshi ku bakobwa byitirirwa iterambere n’ubusirimu mu ntwaro zikomeye twakwifashisha mu gusigasira umuco no kwirinda ingaruka, iya mbere n’uguha ubusugi agaciro kabwo. Twirinde kumira bunguri imico y’ahandi dukwiye kuyishungura tugaha ijambo abakobwa nyabo bujuje indangagaciro na kirazira by’umuco nyarwanda.

Hari ubushakashatsi butarakorwa

Ntabwo harakorwa ubushakashatsi ku bakobwa batakaje ubusugi cyangwa abakiri isugi. Tugendeye ku mibare yakozweho ubushakashatsi nagaragaje haruguru y’abakobwa babyaye ndetse n’abari batwite bafite hagati y’imyaka 15-19 mu gihe ubushakashatsi bwakorwaga, tukongeraho imibare itazwi y’abakobwa bagannye inzira yo kuboneza urubyaro batarashaka abagabo byemewe n’amategeko, abasambana bakoresheje udukingirizo, gukoresha ibinini bibarinda gusama, hari n’abazi kubara bakamenya ibihe byabo by’uburumbuke hanyuma muri icyo gihe bakirinda gukora imibonano mpuzabitsina kugirango badasama, sinakwibagirwa n’abakuramo inda bamaze gutwita n’ibindi byinshi ntarondoye.

Ibyo byose mvuze ubihurije hamwe imibare byatanga yatuma ubona aho ikigero cyo gutakaza umuco ukubiyemo uburere n’ubusugi kigeze ku bana b’abakobwa.

Ibi si ukubuza abakobwa umudendezo

Bikwiye gufatwa nk’ingaruka mbi z’ibikorwa by’umukobwa mu buzima busanzwe kuko nta wakuraho ingaruka mbi ku mukobwa wasambanye cyangwa wasambanyijwe ahohotewe yaba kuba yakuramo indwara nka SIDA, imitezi na mburugu n’izindi ntarondoye, inda y’indaro ndetse no gutakaza ubusugi.

N’ubusanzwe mu gutora Nyampinga akanama nkemurampaka kagira ibyo kagenderaho hagatsinda umwe ubikwiye kandi ntawe baba babujije uburenganzira bwe ahubwo harebwa uwujuje ibisabwa birimo ubwiza bw’inyuma, ubuhanga, impano ndetse n’uburyo uwatsinze yasubije ibibazo.

Mpagaze nemye ndasaba ko mu gutora Nyampinga w’u Rwanda hashyirwamo itegeko risaba umukobwa wese uhatana kuba ari isugi. Mu by’ukuri nta maranga mutima akwiye kuba mu marushanwa akomeye gutya ku rwego rw’igihugu, uko babuza umukobwa mugufi cyangwa ubyibushye cyane kuyitabira kandi atari we wiremye ni nako umukobwa utari ‘Isugi’ adakwiye kuyitabira.

Kuba Isugi bikwiye gusubizwa agaciro

Ubusugi nka rimwe mu mapfundo y’uburere buranga umwari w’ u Rwanda, birakwiye ko Nyampinga aba ari isugi mu rwego rwo guha umuco ireme no gushishikariza abana b’abakobwa gukomera ku busugi.

Ubusugi ni ikimenyetso cy’umukobwa ufite umuco n’uburere bwiza, cyera mu muco nyarwanda iyo bashyingiraga umukobwa hanyuma umugabo we agasanga ari isugi yahaga umuryango w’umukobwa inka mu rwego rwo gushimira ababyeyi be ko bareze neza kandi byaheshaga ishema umuryango ndetse bigatanga urugero rwiza mu bandi bakobwa batarashaka.

Ubudasa mu mikorere n’imitekerereze bitanga ibisubizo by’ibibazo by’Abanyarwanda
Nubwo mu bindi bihugu atari ko babigenza ngo harebwe Nyampinga w’isugi twe mu Rwanda tumenyereye kugira ubudasa mu mikorere no mu mitekerereze bishingiye ku muco wacu. Nta gitangaza kirimo rero bishyizwe mu bikorwa amarushanwa yo gutoranya nyampinga agiye yitabirwa n’abakobwa b’isugi gusa.

Nkuko mubizi kugeza ubu ni uko ibisubizo by’ibibazo Abanyarwanda bagira bituruka mu muco nyarwanda, n’ubusugi rero ni kimwe mu bisubizo by’ibibazo byinshi abakobwa bahura na byo mu buzima bwa buri munsi.

Kudashyigikira iki gitekerezo n’ukwereka urubyiruko by’umwihariko abakobwa muri rusange ko gusambana atari icyaha ndetse ntacyo bitwaye.

Inyungu dukwiye kuvana mu gutora Nyampinga

Amarushanwa ya Nyampinga w’u Rwanda aramamara cyane hirya no hino mu gihugu no hanze yacyo ndetse atwara akayabo k’amafaranga menshi cyane kandi utsinze mbona ahabwa ibihembo bihanitse ku rwego rwo hejuru kandi bifatika. Bisobanuye ko koko ko Nyampinga akwiye kuba ari umukobwa uhiga abandi mu mico no mu myifatire tutibagiwe ubwiza n’ubwenge.

Ibi rero bikwiye kugirira umumaro buri wese kugera kuri wa mwana wo mu cyaro binyujijwe mu bukangurambaga bushingiye ku kuba abahatanira kuba Nyampinga ari isugi. Bizafasha umuryango nyarwanda mu burere bw’abana babo kandi bushingiye ku muco kuko ubusugi buhatse byinshi byarinda abakobwa kuraruka no kwishora mu bikorwa bishyira ubuzima bwabo mu kaga.

Biramutse bizwi ko Nyampinga ari isugi yaba icyitegererezo ku bandi bakobwa none n’ejo hazaza byibuze Abanyarwanda bakagira icyo bungukira mu marushanwa yo gutora nyampinga w’u Rwanda.

Bizambura agaciro imvugo zivuma ubusugi

Nyampinga azaba ari intangarugero mu bakobwa kandi nawe bizamutera ishema bitume buri mukobwa aharanira kumera nkawe. Igikomeye ni uko bizatesha agaciro imvugo y’iki gihe aho abantu usanga bavuga ko nta bakobwa b’isugi bakibaho ndetse ko nta mumaro wabyo. Hari abakobwa ubaza uti ‘ese uri isugi?’ akagusubiza ati ‘Iwacu bararoga se?’

Ibi bizarandura burundu imyumvire iri muri bamwe ko nta mugabo ucyita ku busugi,bizagabanya inda z’indaro, uburaya mu bakobwa, gushaka imburagihe, ubusambanyi mu rubyiruko buzacika.

By’usenyuka kw’ingo z’abashakanye biturutse ku gucana inyuma bitewe no kutanyurwa n’imibonano mpuzabitsina bizagabanyuka kuko umugore w’ isugi atagereranya abagabo anyurwa numwe azi, bizaca ruswa ishingiye ku gitsina kuko buri mukobwa azaba yaracengewe n’agaciro ko kuba ari isugi, bizaca icuruzwa ry’abana b’abakobwa rimaze kuba ingeso biragoye gucuruza isugi, bizagabanya ikwirakwiza ry’indwara zandurira mu mibonano mpuzabitsina n’ibindi byinshi ntarondoye kandi bizongera kugarura agaciro k’ubusugi n’umuco mu bana b’u Rwanda.

Nanzura...

Birakwiye kandi biratunganye ko iki gitekerezo gihabwa agaciro muri iki gihe, guhera mu marushanwa ya Nyampinga w’u Rwanda kugeza mu marushanwa abera mu mashuri makuru naza kaminuza tutibagiwe.

Mucyo duhitemo inzira itubereye nk’Abanyarwanda kuko nta waturusha kumenya ibyiza bikubiye mu muco wacu. Nitugira Nyampinga w’isugi bizaba ari agahigo ntagereranywa mu ruhando mpuzamahanga kuko yaba ari ‘umukobwa koko uhiga abandi muri byose, atari umugore wiyise umukobwa’.

Ir. Richard Nteziryayo
Emaii: [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza