"Perezida Kagame ntakeneye Manda ya 3, Abanyarwanda nitwe tumukeneye"

Yanditswe na Philbert Girinema
Kuya 2 Nyakanga 2015 saa 07:43
Yasuwe :
0 0

Mu gitekerezo cya Bosco Ngabonzima, Umunyarwanda uba muri Diaspora mu Bwongereza, akaba n’umuvugizi wayo avuga ko Perezida Kagame adakeneye manda ya gatatu ahubwo ko Abanyarwanda aribo bakeneye ko akomeza kuyobora igihugu.

Mu gitekerezo cye, Ngabonziza agira ati " Ingingo ya 101 ivuga ko Perezida wa Repubulika atorerwa manda y’imyaka irindwi. Ashobora kongera gutorwa inshuro imwe. Nta na rimwe umuntu yemererwa gutorerwa manda zirenze ebyiri ku mwanya wa Perezida wa Repubulika.

Ibyifuzo by’Abanyarwanda nta kindi n’uko bifuza ko iyo ngingo yahinduka igakuraho inzitizi z’uko Nyakubahwa Perezida Paul Kagame adashobora kongera kwiyamamariza kuyobora u Rwanda mu mwaka wa 2017.

Bosco Ngabonzima aha ikaze Perezida wa Repubulika i Londre muri 2014

Abanyarwanda si abana kandi bazi kureba neza aho bavuye naho bageze ubu ng’ubu, amateka y’u Rwanda yabahaye isomo rihagije ku buryo badashobora kwihanganira no gushukwa buhumyi nkuko byabagendekeye mu myaka ya mbere yo kwibohoza aho byaje no kubageza kuri Jenoside yakorewe Abatutsi mu mwaka wa 1994.

Abanyarwanda bazima rero batari abashaka kwirengangiza ukuri cyangwa se ngo bavunire ibiti mu matwi bazi neza aho ukuri guherereye, akaba ariyo mpamvu abasaga miliyoni 4 z’Abanyarwanda bamaze gusinya amabaruwa basaba Inteko Inshinga Amategeko ko bahindura iyo ngingo ya 101 maze bakazabona uko bongera kwitorera Nyakubahwa Perezida wa Repubulika Paul Kagame kugira ngo agume abayobore, kuko bo bazi ko bakimukeneye.

Babona ko u Rwanda rukimukeneye kugira ngo agume arugeze ku bikorwa byinshi by’intagereranywa tutashobora kurondora hano ngo tubirangize ariko cyane cyane iby’ingenzi ni ukuguma kunga ubumwe bw’Abanyarwanda, iterambere ryihuse kandi rusange mu Banyarwanda no mu Rwanda hose, ubuzima bwiza kandi buzira umuze ku Banyarwanda bose,umutekano w’u Rwanda ndetse n’uw’akarere muri rusange n’ibindi.

Abasakuza rero batabona neza ko Abanyarwanda ari bo bakeneye Perezida Kagame kugira ngo agume abayobore nibo ba bandi usanga bavuga cyane bakirukira kuvuga no gushaka kwerekana ko Perezida Kagame ariwe ushaka manda ya 3.

Abakurikirana neza nta na rimwe Perezida Kagame mu gihe amaze ayobora u Rwanda yigeze agaragaza ko akeneye kwiyongeza manda, nkuko ubwe akunda kubyivugira akenshi abantu dusimbukira ahatari ngombwa gusimbukirwa, agasanga ibibazo babibariza aho bitagomba kubarizwa,ibisubizo aho bitagomba gushakirwa.

Ibibazo bya manda bibazwe Abanyarwanda kuko ni nabo bafite ibisubizo byayo kandi niba ntibeshya ngira ngo ababaza icyo kibazo batangiye kubona ibisubizo bivuye mu Banyarwanda.

U Rwanda ruracyafite ingorane n’imbongamizi nyinshi zituruka hirya no hino ndetse n’akagambane ka bamwe mu Banyarwanda ndetse n’imiryango mpuzamahanga n’ibihugu bimwe na bimwe by’amahanga kugeza n’ubu bataramenya ibanga Abanyarwanda bagendana bihora bibashengura bikabatera n’ishyari,cyane cyane abatishimiye Umuyobozi wacu w’indashyikirwa Nyakubahwa Paul Kagame ibyiza akorera u Rwanda n’uburyo akunzwe n’Abanyarwanda ndetse n’inshutu z’u Rwanda.

Abanyarwanda ntabwo dushobora kwihanganira kubona ibimaze kugerwaho hari ikintu icyo ari cyose cyashobora kubisenya,niyo mpamvu tugomba kubirinda neza n’ubwenge bwacu ndetse n’umutima wacu, niyo mpamvu Abanyarwanda tuguma gusaba ko ingingo ya 101 yahinduka kuko twizera neza nta gushidikanya ko bizaguma kurindwa neza ndetse tukagumya kugera kuri byinshi mu gihe tuzaba tuyoborwa na Nyakubahwa Paul Kagame.

Ntabwo nshidikanya ko hari ibirura biri hanze na hafi y’u Rwanda birekereje ngo birebe ko umurinzi w’Abanyarwanda na bo muri rusange bakwibeshya bagahumiriza ho gato ubundi bakabaca mu rihumye bakaza gusenya kuko nta kindi kizima bagaragariza Abanyarwanda uretse inyota y’ubutegetsi no kubiba amacakubiri mu banyarwanda.

Abo ngabo mu gihe tugezemo ubu nta mwanya bafite mu Banyarwanda n’abakiri inyuma yabo igihe kirageze ngo bahumuke barebe umuntu bave ku giti, kuko nikimara kubumana kizabahirimana aka ya mvugo ngo ‘Va ku giti dore umuntu’.

Turacyakeneye kwiyubakira u Rwanda,turacyakeneye kwiyubakira inzego zikomeye, nkuko Perezida Barack Obama yabivuze ati “Afurika ikeneye inzego zikomeye nticyeneye abantu bakomeye” nibyo koko ariko njyewe ntabwo nemenyeranya nawe neza kuko inzego zikomeye zubakwa n’abantu bakomeye,ahubwo dukeneye abantu bakomeye n’inzego zikomeye.

Ni gute uzubaka inzego zirwanya Ruswa mu gihugu mu gihe wowe uzubaka udakomeye? Ese urwo rwego ruzapfa rukomeye da? Ni gute uzubaka inzego z’umutekano w’igihugu mu gihe wowe uzubaka udakomeye.

Njye simbizi ubwo mwambwira,gusa amateka atwereka ko aho hose izo nzego zikomeye ndetse no muri USA kwa Obama izo nzego zose yubahiriza akanazirinda zubatswe n’abantu bakomeye mu gihe kandi kitari gito, njyewe nkaba mbona mu Rwanda turi mu nzira nziza zo kubaka izo nzego mu miyoborere myiza ya Nyakubahwa Paul Kagame.

Kuyavuga si ko kuyamara gusa abatabizi bamenye ko Abanyarwanda ari twe dukeneye Perezida Paul Kagame ngo akomeze atuyobore, icyo dukwiye ahubwo gukora ni ugukomeza umurego wo kubimwumvisha no kubimusaba, ariko twizera neza ko adashobora gutenguha Abanyarwanda, niyo byaba ngombwa tuzamuhongera ibyo dufite byose ni byanga tumuhongere amaraso yacu. Ntitwakwihanganira guhara umuyobozi w’intagereranywa nka Paul Kagame."

Igitekerezo cya Bosco Ngabonzima
Umuvugizi w’Abanyarwanda batuye muri Diaspora mu Bwongereza n’Umunyamabanga mukuru w’Abacitse ku icumu rya Jenoside yakorewe Abatutsi bahatuye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza