Transform Africa isigiye byinshi Abanyarwanda

Yanditswe na Yvonne Mpinganzima
Kuya 22 Ukwakira 2015 saa 08:38
Yasuwe :
0 0

Ni iby’igiciro gikomeye ku Rwanda n’Abanyarwanda, kwakira inama mpuzamahanga nk’iyi ku iterambere ry’ikoranabuhanga ‘Transform Africa summit’. Nasubije amaso inyuma mbona uburyo turi abanyamahirwe menshi, kuko rwose idusigiye impamba nini mu nzego zinyuranye z’ubuzima.

Iyi nama ibereye mu Rwanda ubugira kabiri, ihuza u Rwanda n’amahanga (ibihugu by’amahanga bigera muri 85), abashakashatsi n’impuguke mu by’ikoranabuhanga banyuranye. Birumvikana ko ikintu nk’iki kitabura icyo gisigira igihugu.

Muri iyi nama ‘Transform Africa summit 2015’ yahurizaga hamwe abantu 2500 buri munsi mu minsi itatu yamaze kuva itariki 19-21 Ukwakira, ahatanzwe ibiganiro byinshi bivuga ku ngingo nyinshi. Aha rero uwakira yarakiriye.

Transform Africa yaduhaye amakuru ku byagezweho tudahari
Iyi nama yashyize ku gihe abatari bafite amakuru ku bintu bimwe na bimwe byakozwe mu rwego rwo guteza imbere ikoranabuhanga, haba mu Rwanda ndetse no mu rwego rw’Akarere ruherereyemo, ku bufatanye n’ibindi bihugu.

Urugero ni ibyagaragajwe na Nyakubahwa Perezida wa Repubulika y’u Rwanda, Paul Kagame wagaragaje uburyo ubushake bwa politiki bwunganiye cyane iterambere ry’ikoranabuhanga binyuze mu guhuza ibiciro by’itumanaho (One area network) mu Karere, mu gihe bamwe bibwira ko ikintu cyose gikorwa n’ifaranga!

Aha Perezida Kagame yagaragaje ko ubu ‘bushake’ bwahinduye byinshi bidasabye ko hashorwamo indi mari, kandi ko bwakora n’izindi mpinduka nziza hagumyeho ubufatanye nk’ubu bufite icyerekezo kizima, dore ko kuva iri tumanaho ryahuzwa umusaruro uvamo wiyongereyeho 50%, ibiciro nabyo bikagabanuka ku kigero cya 30% ngo rigere kuri bose.

Iyi ni inyungu yageze kuri benshi barushaho gusabana no kungurana ibitekerezo byubaka binyuze muri iri tumanaho, cyane ko Minisiteri y’Urubyiruko n’Ikoranabuhanga yo itangaza ko kuva hahuzwa uburyo bwo guhamagara mu Karere, mu kwezi kumwe abahamagara hagati ya Uganda n’u Rwanda bari bamaze kwikuba 400%, naho ubu bakaba bamaze kwikuba 800%.

Twamenyeshejwe ko kugeza gahunda ya mudasobwa imwe ku mwana ‘One laptop per child’, yatumye hatangwa izigera kuri 244,793 mu mashuri 722 mu gihugu.

Uretse abana bigishwa ikoranabuhanga bakiri bato, hari abatari bazi ko magingo aya ibirometero 3000 byagejejweho umuyoboro wa internet, ku gishoro cya Miliyoni 130 z’amadorali ya Amerika yashyizwe muri iki gikorwa.

Nta washidikanya ko kimwe n’ibindi byagezweho, gushyira ikoranabuhanga mu izingiro ry’ibikorwa binyuranye byarushijeho kandi bizanarushaho kuzamura urwego rwa Afurika ubusanzwe itaragiraga aya mahirwe afasha kwihutisha iterambere, none kuri ubu umusaruro wabyo ukaba unagaragarira mu mpinduka y’ubuzima bwa benshi mu baturage.

Transform Africa yahishuye ibibazo bimwe na bimwe
N’ubwo hagenda haterwa intambwe mu guharanira kudasigwa n’ibihe, iyi nama ku ikoranabuhanga yagaragaje ko hari imbogamizi zicyitambitse mu mayira, mu gihe zidakuweho zikaba zitatuma icyerekezo cyo kubaka urwego rw’ikoranabuhanga ruhindura imibereho y’abaturage bo mu bihugu bya Afurika kitagerwaho uko byifuzwa.

Hari mu biganiro by’umunsi wa mbere w’iyi nama, ubwo impuguke n’umwarimu akaba n’umushakashatsi mu by’ubumenyi n’ikoranabuhanga, Prof. Romain Murenzi yeruraga akagaragaza ko hakiri ikibazo ku rwego rw’ubumenyi n’amahugurwa bitangwa mu mashuri makuru na za Kaminuza zo muri Afurika, by’umwihariko mu bijyanye n’ikoranabuhanga.

Aha yagaragaje ko 10 kugeza kuri 20% by’abarimu mu mashuri makuru muri Afurika, ari bo bafite impamyabumenyi z’ikirenga, bityo hakaba hadatangwa ubumenyi bukenewe, dore ko burya ngo kugeza ubu Afurika ifite 2% by’amakuru, nabwo kandi 75% byayo bikiharirwa na Afurika y’Epfo na Misiri!

Ntibyoroshye! Ku bana b’abakobwa ho, Madamu Jeannette Kagame yagaragaje ko hakorwa ibishoboka byose mu gufasha kuzamura umwana w’umukobwa no kumushishikarira iby’ikoranabuhanga ndetse bikaba bigenda bitanga umusaruro.

N’ubwo bimeze bityo, aha naho hagaragajwe imbogamizi, aho Umuyobozi w’Umuryango World Wide Web Foundation wakoze ubushakashatsi ku bijyanye n’uko abagore bitabira gukoresha internet mu bihugu byo munsi y’ubutayu bwa Sahara, yavuze ko basanze 50% byabo batagera kuri internet ugereranije n’abagabo.

Aha, ubu bushakashatsi bwagaragaje ko abagore 25% bakoresha internet bashaka akazi, naho abagore 8 mu 10 bakayikoresha bari ku mbuga nkoranyambaga nka Facebook n’izindi, iki kibazo ngo kikarushaho gukomera mu Mijyi ifite icyuho mu buringanire bw’uburezi.

Transform Africa yatanze inama
Kimwe n’uko ntawe ukora ubushakashatsi ngo agaragaze ibibazo areke gutanga ibisubizo byafasha kubikemura, iyi nama nayo yari iteraniyemo impuguke n’abashakashatsi bazi byinshi mu bibazo biboneka mu rwego rw’ikoranabuhanga. Bityo banagira inama batanga ku byagiye bigaragara nk’ibibazo muri uru rugendo ryo guteza imbere ikoranabuhanga.

Ku kibazo cy’ubumenyi budahagije butangwa mu mashuri makuru na za kaminuza muri Africa, Prof Murenzi yatanze inama asanga yasembura ubumenyi n’ikoranabuhanga ku Mugabane wa Africa. Iyi nama ikaba ko hashyirwa imbaraga mu bumenyi butangwa mu myaka 15 ya gahunda y’iterambere rirambye (SDGs), kugira ngo abiga bazave mu mashuri babasha guhangana ku isoko ry’umurimo ku isi.

Ku kibazo cy’igipimo cy’ikoreshwa ry’ikoranabuhanga kikiri hasi ku bagore n’abakobwa bo muri Africa, Madame Jeanette Kagame we abagira inama yo kwitinyuka, kuko nta bumenyi umugabo yagira ngo umugore abubure afite ubushake, cyane ko ababigerageje bo bamaze kwera imbuto.

Hari ikibazo cy’ikoranabuhanga rishobora gukoreshwa nabi, cyangwa se rigatwarwa uko ribonye na nyir’ukurikoresha, aha navuga nk’impaka zishobora kuba zarakemuwe n’inama Perezida Kagame yatanze ku bijyanye n’ikoreshwa rwa telefoni zigendanwa ku bana mu mashuri.

Perezida Kagame yavuze ko atekereza ko imikoreshereze ya telefoni itaremerwa yaba ari igamije kuzikoresha ku zindi mpamvu, ati “… zishobora gukoreshwa mu mashuri igihe cyonyine zaba ari ibikoresho nkenerwa mu masomo y’abanyeshuri.”

Igira uruhare mu izamuka ry’ubukungu bwacu mu buryo bumwe cyangwa ubundi
Kuba Transform Africa ari urubuga rumwe mu zimurikirwamo imishinga inyuranye ya benshi biganjemo urubyiruko ndetse hakabonekamo ihita ibona abaterankunga bicaye aho (mu bashoramari bitabiriye inama), ni ikintu gikomeye cyane kidateza imbere nyir’ukwiga umushinga wenyine, ahubwo kinagabanya umubare w’abatagira imirimo kikabahindurira ubuzima, dore ko imyinshi mu mishinga itoranywa aba ari izatanga akazi no ku bandi.

Aha haraniyongeraho amadevize igihugu cyinjiza mu nzego zinyuranye, aturutse muri aba banyamahanga baba baje batugana, bakagura imitako yacu, bagatembere mu bice nyaburanga mu gihugu cyacu n’ibindi.

Ni byinshi umuntu yavuga ko Abanyarwanda bungukiye mu nama nk’iki kimwe n’izindi twakira mu gihugu. Navuga ko tuba duhishiwe mu gihe cyose abahanga baba bahagurutse bakaza badusanga iwacu. Ni igihe cyiza rero cyo kwakira ibishya byatugirira umumaro no kurushaho gufunguka mu mitekerereze.

Yeho birumvikana ikoranabuhanga ntiryahindura ibintu ako kanya, bisaba ubundi bumenyi buhindura imyumvire, ndetse no gukora cyane, bityo rya terambere rikagerwaho.

Ikoranabuhanga ryaba imbarutso y’imibereho myiza y’abaturage mu nzego zose z’ubuzima, bikanateza imbere Afurika n’isi muri rusange, gusa ibi ni urugendo nk’izindi, dore ko byatangajwe ko ibihugu 33 muri 43 bikiri inyuma mu ikoranabuhanga, ari ibyo muri Afurika.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza