‘Ubufatanye bwa FDU-Inkingi na PS bugamije guhisha uruhare rw’u Bufaransa muri Jenoside’

Yanditswe na Kanamugire Emmanuel
Kuya 2 Ugushyingo 2015 saa 02:47
Yasuwe :
0 0

Ubwanditsi : Ibikubiye muri iyi nyandiko ni igitekerezo cya Alain Ngirinshuti, Umunyamabanga mukuru wa Ibuka mu bihugu by’i Burayi. Mu gitekerezo cye agaragaza uburyo bamwe mu bayoboye Ishyaka riri ku butegetsi mu Bufaransa, PS bagize uruhare muri Jenoside yakorewe Abatutsi mu Rwanda, aho kugira ngo bisubireho bakaba bakomeje ibikorwa bipfobya bikanatoneka abacitse ku icumu. Ikindi atemera ni uko ishyaka FDU-Inkingi ryagize uruhare mu kunga Abanyarwanda.

Nk’uko bimaze kugaragara kenshi, amateka mabi n’uruhare ryagize muri Jenoside yakorewe Abatutsi bikomeje gukurikirana ishyaka rya politiki ryitwa PS, Parti socialiste riri ku butegetsi mu Bufaransa.

Ishyaka PS riri ku butegetsi mu Bufaransa nta na rimwe ryigeze ryitandukanya n’uwahoze ari Perezida w’ubufaransa, François Mitterrand, akaba anafatwa muri iryo shyaka nk’intwari, kandi bazi neza ko yagize uruhare rukomeye mu gufasha ubutegetsi bwateguye bukanashyira mu bikorwa Jenoside yakorewe Abatutsi mu Rwanda.

PS ikomeje kunangira umutima, aho kwisubiraho

Igitangaje, aho kugira ngo iri shyaka risubize amaso inyuma ngo ryisuzume kuri aya mateka mabi agayitse n’urahare bamwe mu bariyoboraga babigizemo rikomeje kunangira umutima.

Urugero rugaragara ni nk’aho tariki ya 19 Ukwakira 2015 hari hateganyijwe inama kuri Jenoside yakorewe Abatutsi mu Nteko Ishinga Amategeko y’Ubufaransa, iri shyaka PS rigafata icyemezo cyo kuburizamo iyo nama, bityo bituma abari bayiteguye bayimurira muri Sena.

PS ntiyanyuzwe kuko itagarukiye aho, ku itariki ya 20 Ukwakira 2015 yatangaje ku rubuga rwayo ko ishyigikiye Victoire Ingabire n’ishyaka ayoboye FDU-Inkingi ndetse irarengera itanga amasomo ya demukarasi ku Rwanda.

Iyo witegereje uruhurirane rw’ibi bintu bibiri mu gihe kimwe usanga kuvuga kuri Jenoside yakorewe Abatutsi n’uruhare rwa bamwe mu bari mu nzego z’ubuyobozi bw’u Bufaransa bitoroshye ; bakora ibishoboka byose ngo bikingire ikibaba.

Usanga buri gihe iyo iki kibazo kivuzwe, aboyobozi bo mu Bufaransa bahita bashaka ibyo bavuga bibi kuri Politiki iriho mu Rwanda, bitanagize aho bihurira na Jenoside n’uruhare rwabo.

« Biteye isoni kuvuga ko FDU-Inkingi yagize uruhare mu kunga Abanyarwanda »

Ikindi giteye isoni n’agahinda kandi kinagaragaza ubujiji mu kutamenya amateka y’u Rwanda n’Abanyarwanda, ni aho iri shyaka PS ryo mu Bufaransa ryihanukira ngo rirashima "urugamba rw’imyaka itari mike mu kunga abanyarwanda" ishyaka FDU-Inkingi ryakoze.

FDU-Ikingi iyobowe na Victoire Ingabire ikomoka ku gatsiko ka Polilitiki kitwaje intwaro kavukiye i Mungunga ahahoze hitwa Zaïre, muri mata 1995.

Uwo mutwe wari wariyise mu gifaransa "Rassemblement pour le retour des réfugiés et la démocratie au Rwanda (RDR) ". Ucishirije mu Kinyarwanda bivuga« Ihuriro riharanira gutahuka kw’impunzi na demokarasi mu Rwanda. »

Benshi mu bashinze RDR bari bamaze gukora Jenoside n’ubundi bwicanyi bwibasiye inyokomuntu mu Rwanda, bihutiye guhakana no kwemeza ko ibyo byaha baregwa bitabayeho, kugira ngo batagezwa imbere y’ubucamanza.

Ako gatsiko ka RDR karimo abicanyi ruharwa kakoze inyandiko muri Kamena 1996, bise "Le Conseil de Sécurité de l’ONU induit en erreur sur le prétendu « génocide Tutsi au Rwanda » ihakana ku mugaragaro Jenoside yakorewe Abatutsi, ikanemeza ko Jenoside ari ikinyoma FPR yahimbye.

Bamwe mu batangije RDR basinye iyo nyandiko twavugamo abicanyi ruharwa nkaThéoneste Bagosora, Jean-Bosco Barayagwiza, Ferdinand Nahimana, Anatole Nsengiyumva, Laurent Semanza, bose bakatwiwe n’Urukiko Mpuzamahanga rwashyiriweho u Rwanda Arusha,TPIR.

Alain Ngirinshuti, Umunyamabanga mukuru wa Ibuka mu bihugu by’i Burayi

Abandi banyamuryango bakuru n’abarwanashyakaba RDR, barimo Victoire Ingabire, ntibigeze na gato bitandukanya ku mugaragaro na bagenzi babo bahamwe n’ibyaha mu manza baciriwe na TPIR cyangwa n’izindi nkiko, ahubwo, nk’uko byagaragaye mu nama yabereye i LaHaye mu Buholandi mu Gushyingo 2009, bashyigikiye abo bicanyi, bakanahakana ko hakozwe Jenoside yakorewe Abatutsi.

Muri ako kanama i La Haye, Charles Ndereyehe, umwe mu bungirije Victoire Ingabire ushakishwa na Polisi mpuzamahanga, Intepol kuko aregwa kuba yaragize uruhare muri Jenoside yakorewe Abatutsi, yafashe ijambo nk’umuvugizi wa FDU-Inkingi asobanura uburyo bakwiye gufasha no gutera inkunga abakatiwe na TPIR.

Si ibyo gusa kuko RDR yayobowe na Victoire Ingabire guhera muri 2000 ikaba yaraje guhinduka FDU ifitanye umubano n’agatsiko k’abicanyi n’iterebwoba kitwa FDLR.

Ibi bigaragara mu nyandiko zakozwe n’akanama nyir’izina k’umutekano muri Loni.

« Imikoranire ya FDU-Inkingo na FDLR irazwi »

Inyandiko zitandukanye zerekana ko Victoire Ingabire yajyaga mu nama ahuriramo n’abagize umutwe wa FDLR zashyizwe ku mugaragaro.

Muri izo nyandiko twavugamo raporo y’impuguke za Loni ifite inyito ya "Rapport final du groupe d’experts sur la République Démocratique du Congo- S/2009/603"yerekanye ko Victoire Ingabire yajyaga muri izo nama zihuza FDLR ndetse n’abayitera inkunga zitandukanye.

Ngirinshuti ati tutibagiwe ko FDLR ikubiyemo abakoze jenoside benshi, ibimenyetso byinshi simusiga biri mu nyandiko mvugo za ONU bigaragaza ko FDLR yica abantu batagira ingano, gufata abagore ku ngufu, bikaba ari intwaro y’ubwicanyi n’iterabwoba mu burengerazuba bwa Congo.

‘PS ikwiye kugaragaza uruhare rw’u Bufaransa muri Jenoside’

Ikigaragara ni uko uyu mutwe wa Politiki PS wo mu Bufaransa, wirengagiza ukaniyibagiza uruhare abayobozi bawo bagize muri jenoside yakorewe Abatutsi ukomeje guhitamo nabi.

Nkaba nibaza niba inkunga ya politiki bateye Victoire Ingabire uyobora umutwe wa Politiki nk’uyu, atari ugukomeza umurongo w’inkunga bateye « Hutu Power » mu myaka ya 1990.

Iki kibazo ntituzahwema kukibaza igihe cyose PS itazashyira ingufu mu kugaragaza ukuri n’uruhare rw’Abafaransa muri Jenoside yakorewe Abatutsi ari na ko tuyisaba kwitandukanya n’abasize bahekuye u Rwanda.

Twakwibutsa ko iri shyaka PS ritumira FDU-Inkingi mu nama nkuru yaryo(congrès), ritigeze ryitabira na rimwe ubutumire mu mihango yo kwibuka Jenoside yakorewe Abatutsi, ibi bitugaragariza ko batigeze bitandukanya n’abakoze jenoside, kandi ko nta agaciro baha abishwe n’abacitse ku icumu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza