Kwamamaza

Ubushishozi ni indangagaciro y’ingenzi ku bayobozi

Yanditswe kuya 20-07-2015 saa 11:52' na Gasana Sébastien


Nta na hamwe ku Isi umuntu yabaho ngo abe umuntu nyawe atari muri sosiyete, ni ukuvuga atabana n’abandi. Kandi nta sosiyete y’abantu n’imwe yashobora gutera imbere idafite ubuyobozi buboneye.

Ibi rero bikerekana ko burya abayobozi, cyane cyane abayobora abantu benshi, baba bafite inshingano zitoroshye, kubera ko muri sosiyete, buri wese (cyangwa se hamwe n’abandi), aba afite amateka ibyo yifuza, hamwe n’ubushobozi bishobora kuba ari umwihariko we, amateka y’ubuzima bwe yihariye.

Ni yo mpamvu kugira ngo ibintu bigende neza, abafite iyo nshingano yo kuyobora abandi no gufata ibyemezo, mu nzego ndetse n’intera zitandukanye, basabwa kugira no kurangwa n’indangagaciro zinyuranye.

Ubu tukaba tugiye kuvuga, muri macye, ku ndangagaciro y’ubushishozi; ariko ibyo tuvuga tukabyerekeza gusa ku rwego rw’imicungire y’ubuyobozi cyangwa imiyoborere. Twavuga kandi ko tutareba uko inzego zubatse, ahubwo ubu tuvuga gusa ku bazirimo n’uko bakora.

Umuyobozi ushobora gutuma abo ayobora, cyangwa sosiyete muri rusange, batera imbere kandi bakagera kubyo bifuza dusanga agomba guhora yita ku bintu byinshi kandi binyuranye, ariko bimwe muri ibyo twavuga nk’ibi bikurikira:

• Kumenya gushyira abantu mu myanya bakwiye (bashoboye)

Kubera ko umuyobozi, uwo ari we wese, adashobora gukora wenyine atifashishije abandi ngo agire icyo ageraho, ni ngombwa ko agira ubushishozi mu gushaka cyangwa se guhitamo abo bakorana kugira ngo ibyo bagomba gukora bigende neza.
Iyo umuntu yitegereje hirya no hino mu nzego zinyuranye, i Rwanda cyangwa ahandi, hari ubwo biboneka ko, rimwe na rimwe, hari ubwo ibintu bitagenda neza, cyangwa se imirimo ikorwa nabi bitewe n’uko abantu (abakozi) bashyizwe mu myanya badafitiye ubushobozi kandi nyamara haba hari abandi babishoboye.

Ibi rero bituma imbaraga zagombaga gukoreshwa kugira ngo sosiyete itere imbere, muri rusange, cyangwa se ku buryo bwihuse, zisa n’aho zititabwaho ngo zibyazwe umusaruro. Bityo igihugu cyangwa sosiyete, muri rusange, ku buryo ubu n’ubu, kikabihomberamo.

• Kugenzura ibikorwa no kubiha agaciro bikwiye

Iyo abantu bakora cyangwa se bahawe akazi bagira n’inshingano basabwa kugeraho no mu gihe runaka. Nyuma y’igihe cyateganijwe rero, kugira ngo ibigomba gukorwa bigende neza, ni ngombwa ko uwatanze akazi akagena n’inshingano amenya gusuzuma niba ibyo yifuzaga byaragezweho.

Iryo genzura rituma abakoze neza babishimirwa, ku buryo bunyuranye, ndetse bikaba byanatuma bazamurwa mu ntera. Abatarakoze ibyo bagombaga nabo bagira uko babibazwa.

Iyo iryo genzura rikozwe neza bituma buri muntu (buri mukozi), ku rwego rwe, arushaho guharanira gukora neza no kutirara kugira ngo azabashe kuzamuka mu ntera cyangwa se kugira ngo yirinde kuba yahanwa cyangwa akadindirira ku rwego ariho.

• Gutinyuka gufata ibyemezo biboneye

Abayobozi bashobora gutera impinduka nziza muri sosiyete ni abashobora gufata ibyemezo bikomeye iyo ari ngombwa. Muri buri sosiyete habonekamo abantu, kubera impamvu zinyuranye, batifuza impinduka (change), ndetse zaba zigiye kuba bakazirwanya cyangwa se bakazazemera bigoranye. Nyamara hatabayeho impinduka muri sosiyete, nta terambere, ryashoboka.

Abayobozi bakorera neza abo bayobora na sosiyete barimo ntabwo batinya cyangwa bihunza gufata ibyemezo bya ngombwa, kabone n’iyo byaba bikarishye cyangwa bishobora kuba byagira bamwe bibabaza. Icya ngombwa ni uko ibyo byemezo biba bigamije inyungu rusange za sosiyete cyangwa igihugu kandi ntibibe bigambiriye kugira igice iki n’iki cy’abanyagihugu bibangamira ku buryo bugambiriwe.

• Kumenya igihe gikwiye cyo gufata ibyemezo bikomeye

Baravuga ngo “buri kintu kigira igihe cyacyo”! Umuyobozi urangwa n’ubushishozi ntabwo afata ibyemezo bikomeye ku buryo buhubutse ahubwo arabanza akagisha inama abajyanama be kandi akajya inama n’abo bafatanya mu buyobozi. Mbere yo gufata ibyemezo bikomeye (bizagira ingaruka zikomeye kuri sosiyete) ni ngombwa kubanza gusuzuma niba bizakirwa neza, ku buryo bitatera imidugararo.

Hari ibyemezo, n’iyo amaherezo byaba bizagira ingaruka nziza kuri sosiyete, biza mu gihe kidakwiye bigatuma bitakirwa neza; bityo ntibishobore kugirira abantu akamaro.

Mu kwanzura twavuga ko umurimo wo kuyobora ari umurimo w’indandasimburwa muri buri sosiyete y’abantu, kandi ukaba usaba ubushishozi kugira ngo ibikorwa byose bigire ingaruka nziza kuri sosiyete. Umuyobozi ushishoza iteka arangwa no gushyira mu gaciro, mubyo akora byose.

Dr. Gasana Sébastien


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Location: Ndamage Building 4th floor
P.O Box: 3477 Kigali- Rwanda
Phones:
+250 788 74 29 08, +250 788 49 69 15, +250 725 94 66 08
Email:
[email protected], [email protected]

Website Developped by

Uru Rubuga Ruheruka Gushyirwaho Amakuru Monday 8 August 2016
Copyright © 2009 -2014 - IGIHE Ltd - All Rights Reserved