Ubutinganyi: Agahugu katagira umuco karacika!

Yanditswe na IGIHE
Kuya 15 Werurwe 2017 saa 12:01
Yasuwe :
0 0

Kuva mu mpera z’icyumweru gishize inkuru ikomeje guca ibintu mu itangazamakuru no ku mbuga nkoranyambaga, ni iy’abakobwa babiri, Ndayisaba Ferrand na Umuhoza Rebecca, bemeranyije kubana kandi bombi bahuje ibitsina. Ibi byateye benshi kwibaza ku ngingo ijyanye n’ubutinganyi ndetse bamwe ntibarya indimi babyita amahano mu Rwanda.

Umushinga w’urugo rwa Ferrand na Rebecca watumye benshi bacika ururondogoro. Usomye nko mu bitekerezo byagiye bitangwa ku nkuru yatangajwe na IGIHE kuri iki Cyumweru tariki ya 12 Werurwe 2017 ahagana 18:30, bamwe babibonye nk’agahomamunwa abandi bavuga ko ishyano ryacitse umurizo mu rwa Gihanga, mu gihe hari na bacye badaca ku ruhande bakavuga ko ibyabaye ari uburenganzira bwite bw’aba bombi.

Benshi hanze aha ariko, urebeye hamwe muri rusange inkuru ya Ferrand na Rebecca yabaciye umugongo. Nta mugayo kuko abanyarwanda barenga 96.5% ari abakirisitu, abandi 2% bakaba abayisilamu, mu gihe abadafite idini bagera kuri 2.5% kandi imyemerere y’aba izirana urunuka n’ubutinganyi. Ngira ngo muribuka ibyabereye i Sodoma na Gomora ndetse n’inkurukizi zabyo nk’uko bivugwa muri Bibiliya.

Turetse ariko n’imyemerere y’amadini, abanyarwanda aho bari hose, yaba mu Rwanda ndetse no hanze, bakunze kurangwa no gukomera cyane ku muco. Mu mateka y’u Rwanda ndetse n’imyemerere bimaze imyaka irenga 1000 bishinze imizi nta butinganyi bwigeze buvugwamo, ku buryo rero kuba hari bene wacu bakwifata bagakora ibyakwitwa amahano mu rwa Gasabo, byumvikana neza ko benshi hanze aha babyakira nk’ishyano ryaguye.

Usibye umuco n’imyemerere ishingiye ku madini, amategeko y’u Rwanda ntaho avuga ubutinganyi ahubwo. Itegeko Nshinga mu ngingo yaryo ya 17 rigira riti “Ugushyingiranwa k’umugabo umwe n’umugore umwe gukorewe mu butegetsi bwa Leta ni ko kwemewe”.

Gusa ariko si ubwa mbere ibibazo by’ubutinganyi bivuzwe mu Rwanda ndetse bariya bakobwa sibo ba mbere beruye bakavuga ko bakundana kandi bahuje igitsina, bakanatangaza umushinga wo kubana.

Muri rusange abatinganyi mu gihugu baracyari mbarwa, ariko nta wakwihandagaza ngo ahakane ko bahari kuko iyo baba badahari iyi ngingo ntiyari guhagurutsa uwahoze ari Minisitiri w’Ubuzima ngo akore ubushakashatsi bw’amapaji 37 ku bagabo bo muri Kigali bakorana imibonano mpuzabitsina na bagenzi babo. Ubu bushakashatsi yabukoze mu 2009 agaragaza ibyago aba bantu bafite ku bijyanye no kwandura agakoko gatera Sida.

Dusubije amaso inyuma, hambere aha hari abasore babiri b’abanyarwanda bifuje gukora ubukwe, gusa ibirori bahisemo kubyimurira muri Afurika y’Epfo kure y’amaso y’ababajora, umugambi wabo bawusohoza amahoro.

Yewe aha mu gihugu hari n’amatsinda abatinganyi bahuriyemo, kandi imibare igaragaza ko gahoro gahoro bagenda biyongera. Muri ayo matsinda niho bahurira bakavuga akabari ku mutima, bagaterana ingabo mu bitugu bitewe n’uko biyumva umwe ku wundi. Nko mu mwaka ushize IGIHE yabashije kumenya amakuru y’abasaga 200 muri Kigali bahawe amahugurwa ajyanye n’uburyo bwo kwirinda Sida.

Biratungurana cyane kubona umusore w’inkorokoro wakoze imyitozo yo kubaka umubiri akazana ibituza na bimwe bita ‘pinya’ yerura akavuga ukuntu yihebeye abahungu bagenzi be, ko atajya yikoza inkumi bibaho yemwe na zimwe zo muri Kigali zireba icyoroshye ugasanga atajya azibenguka. Biratungurana kandi kubona wa mukobwa mwiza abasore baryanira inzara yarihebeye mugenzi we bakuranye, bararanye ku ishuri ryisumbuye…

Hari amashuri yisumbuye yakunze kuvugwamo abahuje ibitsina bakundana hirya no hino mu gihugu, cyane cyane ay’abakobwa ndetse hari n’amwe yagiye ashyirwa mu majwi. Mu minsi ishize kandi ikibazo cy’ubutinganyi cyavuzwe mu ikipe y’umupira w’amaguru y’abakobwa ya AS Kigali ndetse bigera n’aho gikurikiranwa n’ababishinzwe.

Iyo bigeze muri Gereza ho biba ibindi bindi muri make. Hambere aha hari abasabiye abagororwa kujya bagira igihe cyo kubonana n’abagore babo mu rwego rwo kugabanya ubutinganyi buri ku gipimo kijya kuba hejuru muri gereza zo hirya no hino mu gihugu iyo ugendeye ku buhamya butangwa na bamwe mu bahoze ari abagororwa.

Ibi n’ibindi byinshi ni bimwe mu bigaragaza ko ikibazo cy’ubutinganyi gihari, kabone nubwo kiri ku rwego ruri hasi ku buryo nta wagishyira mu bibazo bikomereye igihugu, ariko kirahari, ku buryo usanga hanze aha ikiri kwibazwa cyane ari ukumenya icyakorwa ngo buhere mu bihugu byo hanze aho usanga bwimakajwe.

Ubundi ubutinganyi ni iki?

Ubutinganyi busobanurwa nk’ibyiyumviro by’umuntu runaka biganisha ku kuba yakwisanga ku wo bahuje igitsina. Bavuga ko bishobora guturuka ku misemburo y’umubiri w’umuntu (hormones), ku ngirabuzima fatizo (genetic) cyangwa se sosiyete umuntu arimo (entourage).

Tugendeye kuri izo mpamvu eshatu, mu Rwanda usanga icyahindutse ari sosiyete. Uko iterambere rigenda riza niko ingingo zimwe na zimwe zitavugwagaho cyangwa zitahabwaga agaciro zigenda zihabwa agaciro muri sosiyete nyarwanda. Sosiyete nyarwanda yigira byinshi mu mahanga bijyanye n’iterambere ku buryo usanga uko amahanga agenda aha intebe ubutinganyi ari nako mu Rwanda bigenda biza ugasanga wa muntu wari warihishemo cyangwa se yaratwikiriye bya byiyumviro bw’ubutinganyi, yumva afite uburenganzira bwo kwerura ko akundana n’uwo bahuje igitsina.

Buturuka kandi no ku bindi... twavuga ku mibereho y’umuntu runaka wenda wakomerekejwe mu rukundo n’umukobwa agahitamo kwihebera mugenzi we bahuje igitsina, ikoranabuhanga, na za film, aho usigaye usanga izi zizwi nka ‘serie’ zibereyemo abantu bakundana bahuje ibitsina. Hambere aha siko byari biri ariko ubu zisigaye ziri ku yindi ntera cyane cyane mu zituruka mu Burayi na Amerika, aho ubutinganyi bugaragazwa nk’ikintu kigezweho.

Uburenganzira bw’abatinganyi usanga bubungwabungwa cyane ku buryo n’ibihugu byagerageje gushyiraho amategeko ahana ibikorwa byabo, wasangaga bimeze nk’ibikojeje agati mu ntozi kuko amahanga, cyane cyane ibihugu bikize, yahitaga atangira kubyamagana mbese ukabona ko hari ikintu runaka kibiri inyuma gikomeye kandi bigoye kumenya impamvu yacyo. Urugero rwiza ni abaturanyi bo muri Uganda, Museveni yatanga ubuhamya ku itegeko yasinye mu 2014 n’uko yaje kwisubiraho akarisinyura ibyari ibyuya bimaze kumuhindukana amaraso.

Gusa ariko twe nk’abanyarwanda, dufite imyemerere ishinze imizi kuva mu binyejana birenga 10, ni ngombwa cyane ko duharanira ko umuco wacu n’umuryango nyarwanda bisigasirwa kuko aho bukera twazasanga twarahindukiye tukareba igitsure ikiduhatse.

Iyo bushegeshe umuryango bugera hose

Ibikorwa by’ubutinganyi byakunze kuvugwa no mu bakomeye, bize kandi bafite amazina akomeye muri sosiyete (hari n’abajya bashyira mu majwi abami bagiye barangwa nabyo).

Dufashe urugero muri Kiliziya, ubutinganyi bwakunze kuvugwa muri iri dini cyane cyane mu bihayimana ndetse n’uwigeze kuba umushumba waryo ku Isi, Papa Benedigito XVI abyemeza mu gitabo cye ko i Vatican hari itsinda rishyigikiye ubutinganyi ryashakaga kugira uruhare mu byemezo byose byafatwaga.

Umushumba wa Diyosezi ya Kabgayi, Smaragde Mbonyintege, nawe aherutse kwemeza ko ubutinganyi muri Kiliziya bubamo ariko bujya kugera mu bihayimana bwarayogoje umuryango. Ibi bisobanuye ko ari umwera wakwiriye hose.

Yavuze ko iyo umuntu abaye umutinganyi yarihaye Imana hari ingamba nyinshi zo kumufasha, gusa ntakurwa mu bihayimana ariko ngo iyo abivuze mbere y’uko ajyamo ntabwo yemererwa.

Mbonyintege yigeze no guhamiriza IGIHE ko hari abakirisitu bamugana bamubwira ko ari abatinganyi, ariko ngo icyo akora ni ukubatega amatwi, akabagirira impuhwe kuko usanga ari abantu nk’abandi muri sosiyete, bazi ubwenge, bakora nk’abandi ndetse bafitiye igihugu akamaro nk’abandi baturage.

Yongeraho ko nubwo imiterere yabo ari ingorane, abagira inama yo kutiheba, bakamenya uko bayitwaramo ntibasambane bagategereza igihe bazapfira. Iyo niyo nama ya Mbonyintege, nicyo abona cyakorwa. Wowe uhagaze he?

Ese koko hari abatinganyi basabye kwemerwa mu Rwanda barenzwa ingohe?

Mu minsi ishize IGIHE yagiye ihabwa amakuru ko hari amatsinda y’ababana bahuje ibitsina yasabye kwemererwa gukorera mu gihugu nk’imiryango itegamiwe kuri leta, ariko yakwandika ntasubizwe ahakanirwa cyangwa ngo yemererwe.

Umuyobozi ushinzwe imitwe ya Politiki n’imiryango ishingiye ku madini mu rwego rw’igihugu rw’imiyoborere, Aime Barihuta Haba, yadutangarije ko batarabona inyandiko isaba ko abatinganyi bemererwa gukorera mu Rwanda.

Yagize ati “Icyo kintu ntacyo turabona, kandi banaramutse baje, twebwe mu byo dusaba ntabwo ibyo tubijyamo. Icyo navuga ni uko nta muryango wari waza ngo bavuge ngo turi umuryango w’abatinganyi turashaka kwandikwa.”

Asobanura ko icyo bareba ari uko sitati zabo zihuje n’amategeko agenderwaho, hanyuma bagasaba ibyangombwa by’uko abayobozi babo batafunzwe na raporo y’inama y’inteko rusange yemeje sitati zabo.

None hakorwe iki?

Ni aha buri wese gutekereza icyakorwa mu gusigasira umuryango nyarwanda ariko bigakorwa mu nzira ziciye mu mucyo kuko hambere aha hari uwavuze uburyo ubutinganyi busigaye ari iturufu yifashishwa cyane n’abashaka kujya i Burayi na Amerika, bakabwitwaza bavuga ko mu gihugu babamo bahutazwa maze ibihugu bikize bikabasamira mu kirere bibabwira biti ni muze hano nta n’umwe uzabareba ikijisho.

Iyo bene aba bantu bageze iyo mu mahanga, baba bageze ku nzozi zabo, bagahwabwa amafaranga runaka yo kubafasha, n’ibyangombwa nkenerwa mu buzima ubwo uwari ubayeho ari umukene agasirimuka n’uwari umunenganenzi adashaka gukora ngo atere imbere akagereka akaguru ku kandi by’iteka.

Dukomere ku muco wacu mwiza wa Kinyarwanda, dutoze abana bacu kuwukuriramo, ikizira gikomeze kuziririzwa na buri wese nk’uko byahoze kuva mu myaka 1000 irenga ishize. Bajya bavuga ngo agahugu katagira umuco karacika.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza