Uko FPR yahoze ni ko iri ni nako izahora (Igice cya gatanu)

Yanditswe na Tom Ndahiro
Kuya 8 Nzeri 2017 saa 12:47
Yasuwe :
0 0

Ndereyehe Charles Ntahontuye, icyamamare mu gutoza ingengabitekerezo ya Jenoside, akomeje kwibera mu Buholandi. Mperuka nibaza niba Ndereyehe “yaba agishaka amafaranga muri icyo gihugu yo kwambura “Inyenzi-Inkotanyi” imbunda.” Igisubizo ni ‘Oya’ na ‘Yego’.

Igisubizo ni ‘Oya’ kuko ibyo kwambura imbunda abo yitaga “Inyenzi-Inkotanyi” bitagishobotse n’ubwo izina ‘Inkotanyi’ ryandikwa ritangijwe n’inyuguti nto. Impamvu si iyindi, ni uko ububasha n’ubushobozi byatumye guverinoma yatwereraga amafaranga itsindwa mu w’ 1994 byikubye inshuro zitabarika.

Igisubizo cyaba ‘Yego’ kuko icyo yashakiraga imbunda mu w’1994 cyari ugufasha Leta ye yakoraga Jenoside y’Abatutsi nk’uburyo bwo kurwanya FPR-Inkotanyi. Mu mutwe we n’abo batekereza kimwe iyo ntambara iracyahari. Soma inyandiko nise ‘Urutonde rw’Abanyeshuri n’Abatoza b’Ubugome na Jenoside’.

Iyo ngengabitekerezo baracyayikomeyeho, n’ikimenyimenyi ni uko akiri umuyobozi mu mutwe wabyawe na RDR yashinzwe n’Abajenosideri mu w’i 1995. Uwo mutwe ni Forces Démocratiques Unifiées (FDU-Inkingi), aho usanga Ndereyehe ahorana inshingano zikomeye.

Hari ubwo Ndereyehe aba ari Komiseri ushinzwe ‘Politiki’ bisobanura ko ari we uba ashinzwe kunononsora ingengabitekerezo ya politiki bagenderaho. Iyo mirimo akaba ayimazemo igihe. Uretse kuba yari Perezida wa Cercle des Républicains Progressistes (CRP) kuva igitangira mu w’i 1992 yari no mu itsinda rishinzwe ‘Isuzumamikorere no gutanga umurongo ngenderwaho’ (Evaluation et Orientations).

Rumwe mu mbuga zo kuri murandasi zikorana na FDLR na FDU-Inkingi rwigeze gutangaza ko kuva ku wa 21 kugeza ku wa 25 Mutarama 2011, intumwa za Komite Nshyigikirabikorwa bya FDU-Inkingi zibitumwe n’iryo shyaka zagiranye umwiherero n’intumwa z’Ihuriro Nyarwanda/Rwanda National Congress (RNC) mu gihugu cy’u Busuwisi. Izo Nshingano zikanavugwa mu itangazo rya FDU-Inkingi ryo ku wa 6 Gashyantare 2011.

Abari muri iyo nama bahagarariye FDU-Inkingi ni Nkiko Nsengimana, Dr. Mberabahizi Jean Baptiste, Ndereyehe Charles na Musangamfura Sixbert. Abo muri RNC bari Condo Gervais, Musonera Jonathan, Ngarambe Joseph na Gahima Gerald.
Uburambe mu ngengabitekerezo kirimbuzi

Imyanzuro y’iyo nama igaragaza ko Ndereyehe Charles ari we ushinzwe ingamba (Strategies) muri ‘Komite nshyigikirabikorwa’ bya FDU-Inkingi. Ibyo bikerekana ikizere bamufitiye mu rwego rw’imitekerereze n’uburambe abimazemo.

Hari inshingano usanga zigenerwa abantu bizewe mu ngengabitekerezo ya Jenoside. Iyo kunoza ingamba. CRP igishingwa, itsinda ryo ‘Gusesengura no kunoza Ingamba’ (Analyse des Strategies) ryayoborwaga na Nahimana Ferdinand. Akazi ashobora kuzakomeza gukorana na Ndereyehe kuko yafunguwe.

Ntihazagire uwo bitangaza wumvise mu minsi itaha imiryango imwe nka Human Rights Watch na Amnesty International, kimwe n’itangazamakuru mpuzamahanga bavuga ngo ‘Nahimana Ferdinand utavuga rumwe na Leta y’u Rwanda yavuze ibi n’ibi…’ Babuzwa n’iki se kubivuga kandi bavugira FDU-Inkingi nk’aho hari aho itaniye na CDR!

Hari n’izindi nyandiko usanga zivuga ko Ndereyehe ari we ushinzwe “Information” bisobanura ko ingamba za propaganda ikwiza ingengabitekerezo ya Jenoside bikiri kuri we guhera muri Mutarama 1992 kugeza ubu.

Kubwira Leta iyobowe na FPR-Inkotanyi ngo yemere FDU-Inkingi, yatangijwe n’abateguye bakanakora Jenoside bazwi nka Ndereyehe Charles, Bagosora Theoneste, Nahimana Ferdinand, Jenerali Bizimungu Augustin n’abandi nk’abo ni agasuzuguro n’urwango rukabije.

Ni nko kubwira Abadage n’u Burayi, mu myaka mike nyuma yo gutsindwa kwa Leta ya Hitler n’aba Nazi, ngo bemere umutwe wa politiki washinzwe na Martin Bormann, Heinrich Himmler, Joseph Goebbels, Hermann Göring, Wilhelm Keitel, Albert Speer, Joachim von Ribbentrop n’abandi nk’abo.

Ku itariki ya 13 na14 Nzeri 2014, i Alost mu Bubiligi, habereye Kongere ya FDU-Inkingi iyobowe na BAHEMBERA Eric. Mu byo iyo Kongere yakoze harimo ugushyiraho ubuyobozi bw’uwo mutwe ugendera ku ngengabitekerezo ya Jenoside.

Mu buyobozi bw’uwo mutwe, ndavuga ku bo nzi gusa: Ingabire Victoire Umuhoza— wari muri CDR akaba yaranayoboye RDR imyaka hafi icumi akaba yitwa ko akiyoborera muri gereza; BUKEYE Joseph — wahoze ari muri MRND/CDR akaba yaranabaye Komiseri ushinzwe propaganda muri RDR akoresha izina ry’irihimbano Nzabandora Chris na Mushyandi Joseph— ushinzwe amategeko. Mbere ya Jenoside Mushyandi Joseph ni we wayoboraga NGO/ONG yitwa Ligue Indépendante pour la Défense des Droits de l’Homme (LIDEL) yaburaniraga MRND/CDR.

Abandi nzi ibyabo ni ushinzwe ububanyi n’amahanga akaba n’umuvugizi wa FDU-Inkingi witwa Justin Bahunga. Uyu Bahunga, mbere no mu gihe cya Jenoside, yakoraga muri Ambasade y’u Rwanda muri Uganda akorana na Ambasaderi Kanyarushoki Claver. Bombi, uko bari muri MRND/CDR ni nako bari mu batangije RDR bakanayibamo abayobozi.

Undi iyo Kongere yagumijeho nk’umuyobozi ni Ndereyehe Charles washinzwe kuyobora “propaganda” muri FDU, ibye bikaba byavuzwe. Uwashinzwe Iperereza muri FDU, ni Major Karangwa Pierre-Claver.

Mbere no mu gihe cya Jenoside, Major Karangwa Pierre Claver yari akuriye urwego rw’ubutasi (G2) mu buyobozi bukuru bwa Jandarumori. Uyu Karangwa ashinjwa kugira uruhare rukomeye mu kwicwa kw’Abatutsi hafi 50,000 mu yahoze ari Komini Mugina. Karangwa na we yamaze imyaka myinshi mu gihugu cy’u Buholandi.

Twibutse ko uyu Bahembera Eric wabaye umuhuza n’umuyobozi wa Kongere ya FDU-Inkingi, ari we wakatiwe igifungo n’urukiko rw’i Stuttgart mu Budage kubera uruhare rwe mu gutera inkunga umutwe w’iterabwoba wa FDLR. Yakatiwe muri Kamena 2017.

FDU mu Rwanda?

Iyo Kongere yo mu w’i 2014, yatoye uwitwa Twagirimana Boniface ngo abe Visi-Perezida wa mbere wa FDU-Inkingi. Si umuntu uzwi cyane. Ku wa 6 Nzeri 2017, Bahunga Justin yasohoye itangazo rigenewe abanyamakuru avuga ko hari abayobozi n’abanyamuryango babo bafatiwe i Kigali na Polisi y’u Rwanda.

Muri iryo tangazo rya FDU-Inkingi havugwamo Twagirimana Boniface; Twagirayezu Fabien (ushinzwe ubukangurambaga); Léonille Gasengayire (umubitsi wungirije), umukozi wabo umwe yavuze izina rimwe “Alphonse” n’ushinzwe kwita ku busitani “Julien”.

Nkibisoma nibajije niba ari byo koko ko Twagirimana Boniface ari uwatorewe kungiriza Ingabire Victoire mu 2014. Niba ari we koko, akaba yakoreraga hano mu mudendezo, ni amahano! FDU-Inkingi kugira icyicaro mu Rwanda bivuga ko MRND/CDR bikihafite. Kugira ngo bikihagire ni uko hari amahame aba yirengangijwe harimo n’Itegeko Nshinga rya Repubulika y’u Rwanda tugenderaho ubu. Ni ukwiyibagiza inshingano yo kurwanya ingengabitekerezo ya jenoside n’abayikwiza.

Umushakashatsi Tom Ndahiro

Biracyaza…


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza