Umuco w’u Rwanda wanyuze abitabiriye irahira rya Perezida Kagame

Yanditswe na Mutangana Steven
Kuya 24 Kanama 2017 saa 12:29
Yasuwe :
0 0

Intore z’Urukerereza kuri twitter z’abakuru b’ibihugu ! Mu masaha make nyuma y’umuhango w’irahira rya Perezida wa Repubulika y’u Rwanda, Paul Kagame, amafoto yacicikanye ku mbuga nkoranyambaga; intore mu mugara n’umwambaro wera, abakobwa bateze amaboko baberewe mu mukenyero usa n’umutako w’imigongo, abakaraza n’imitagara y’ingoma, ni bimwe mu byo wasanga kuri twitter z’abayobozi bakomeye bavuye kuri Stade Amahoro.

Mu bakuru b’ibihugu banyuzwe bakanabigaragaza harimo uwa Uganda, Kenya, Zambia, n’abandi bayobozi banyuranye.

Mu mafoto bahisemo gushyira kuri twitter buri wese muribo yafashe amafoto meza aho agaragara ari kumwe na Perezida wa Repubulika y’u Rwanda, n’andi agaragaza ababyinnyi b’Itorero ndangamuco ry’u Rwanda Urukerereza.

Iri torero niryo ryasusurukije ibihumbi by’abantu bitabiriye uyu muhango. Abakobwa n’abahungu mu mbyino nziza, imihamirizo y’Intore, n’abakaraza bavuzaga umurishyo w’ingoma uryoheye amatwi bakiraga abashyitsi b’imena.

Abanyamahanga kimwe n’Abanyarwanda bashimye uko Urukerereza rwaserutse. Abatari kuri Stade Amahoro babikurikiye kuri Televiziyo zo mu Rwanda n’iz’amahanga zarizohereje abanyamakuru.

Umutako w’imigongo niwo wariwatoranyijwe

Uretse Itorero Urukerereza, ibindi bimenyetso ndangamuco byitaweho. Guhera mu marembo ya Stade Amahoro kugera muri stade imbere aho abayobozi bakuru baribateguriwe ndetse no mu gice giteganye naho (ahazwi nko mu 10), uciye mu byumba binyuranye binini, ku nkingi z’ingenzi, hose hari imitako myiza y’imigongo.

Uwo mutako ufite inkomoko mu Burasirazuba bw’u Rwanda, bivugwa ko waba waratangiye gukoreshwa mu kinyejana cya 18 ! Abitegereje imyambarire ntibaretse gushima umukenyero mwiza abayobozi bari bambaye.

Dukomeze duteze imbere umuco wacu. Uko wahawe umwana mu irahira ry’Umukuru w’Igihugu hateraniye abaturutse imihanda yose, byakujije ibituranga.

Perezida wa Uganda, Yoweri Museveni yahisemo kugaragaza Urukerereza avuga anyuzwe n'umubano w'ibihugu byombi
Umutako w’imigongo niwo wari watoranyijwe, wari wiganje muri Stade Amahoro
Abakobwa bateze amaboko baberewe mu mukenyero usa n’umutako w’imigongo
Abakaraza b'Urukerereza n’imitagara y’ingoma
Umuyobozi w'ishami rishinzwe guteza imbere umuco muri Minisiteri y'Umuco na Siporo, Mutangana Steven

Mutangana Steven ni Umuyobozi w’ishami rishinzwe guteza imbere umuco muri Minisiteri y’Umuco na Siporo


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza