Umuzimu utera Umujyi wa Kigali uturuka he!

Yanditswe na Philbert Girinema
Kuya 18 Gashyantare 2016 saa 10:52
Yasuwe : XX
0

Kera abakurambere bacu iyo babonaga umuntu waguye mu bintu bwangu bikamuviramo umurengwe ukabije,bagiraga uburyo bwinshi bwo kubigaya. Hari ubwo bavugaga bati runaka arengwa gitwa.Icyo gihe babaga bavuga wa wundi urengwa akaririmba bukamukeraho cyangwa bene wa wundi urengwa agakora uko ashoboye ngo bose bamenye ko yahembutse! Naho iyo babonanga umwe urengwa akumva yabaye igitangaza kugera ubwo bimutera kurengera, hari ukundi bamuvugiragaho. Mu mvugo nkuru (ariko ubu ni imvugo dukumira kubera impamvu z’amateka) baravugaga ngo “Koko burya umuhutu urenzwe arenza Nyina akaguru”! Cyangwa bati n’ubundi “Umurengwe wica nk’inzara!”.Mumbababire izi mvugo sinzigaruye ngamije gukomeretsa amahame meza yo gukumira imvugo zitanya Abanyarwanda ahubwo ndagira ngo zimfashe gusobanura uko mbona bamwe mu bayobozi, cyane cyane mpereye ku Mujyi wa Kigali.

Muri iyi nyandiko ndatangira nsobanura uburemera bw’Umujyi wa Kigali mu miyoborere y’igihugu (1), mvuge ku bagiye biyitirira ibigwi byo kuwuteza imbere mu buryo bwo kurengera (2) hanyuma nsoze nerekana ko ntaho turagera ku buryo 2017 tuyitegerejeho byinshi(3)

Umujyi wa Kigali, igihugu mu kindi !

Umujyi wa Kigali ni ikintu gikomeye cyane kubera impamvu zinyuranye. Icya mbere ni uko ari umurwa Mukuru ukaba igicumbi cy’ubuyobozi ku buryo u Rwanda,no mu ntambara rwarwana n’umwanzi, ruramutse rutakaje Kigali kaba kabaye. N’’ikimenyimenyi iyo tuvuga igihe intambara yo kwibohora yarangiriye dufata itariki ya 4 Nyakanga ari nayo yajyanye n’ifatwa rya Kigali mu gihe nyamara tuzi neza ko uwo munsi urugamba rwari rugikomeza.

Icya kabiri ni uko Kigali ari irembo rikuru ry’igihugu maze kuko umushyitsi w’Imena wese usuye u Rwanda bwa mbere ari ho ahingukira ndetse n’uhavuye bwa nyuma ni ho ahagurukira. Bityo rero 90% by’ibyo ubonye u Rwanda bwa mbere asigarana mu mutwe ni bya bindi akubita amaso akirukandagiramo cyangwa bimwe akebuka bwa nyuma avuye mu gihugu ari na yo mpamvu Kigali iri mu isura u Rwanda rufite. Ni yo mpamvu usanga abavuga iterambere ry’u Rwanda bagera kuri Kigali bagacika ururondogoro mu gihe nyamara ibyaro byacu bigifite byinshi byo gukora ngo dushyikire byinshi mu bihugu bya Afurika.

Icya Gatatu ni uko Kigali icumbikiye hejuru ya 80% by’ubukungu bw’igihugu. Nta mugayo kandi niho Ikigega gikuru BNR n’imitamenwa yuzuyemo amafaranga y’ubwoko bwose biri, niho hubatse imiturirwa yatwaye amafaranga atabaze. Abakire b’ikirenga bakomeye tuzi nka ba Makuza nyiri Rwanda Foam, ba Mporanyi nyiri Soras, Rugenera wa Radiant, n’abandi benshi b’ibikonyozi nk’abo niho baba, bo n’indi mitungo yabo itabaze. Wongereho ko n’ibigega bya Lisansi na Mazutu ariho byibera hariya mu Gatsata.

Icya kane ni uko Kigali ari yo ntaho y’abahagarariye amahanga n’imiryango mpuzamahanga mu Rwanda. Abazungu, Abashinwa, Abahinde, Abarabu, mbese amoko yose ku mpamvu zinyuranye niho yibera.

Icya gatanu gikomeye ni uko n’umusoro munini w’igihugu hejuru ya 50% ariho ukomoka uramutse unabariyemo na Bralirwa ihafite icyicaro.

Ongera kuri ibi byose umuntu atanarondora ngo abirangize ko Kigali ubu ituwe n’abantu barenga miliyoni imwe n’igice ari byo kuvuga ko hejuru ya 10% y’Abanyarwanda ariho bibera. Ndetse mu minsi iri imbere bitezwe kwiyongera. Nushaka unongereho ko Umuyobozi w’Umujyi wa Kigali mu baturage bawutuye ayobora haba harimo na Perezida wa Repubulika .

Ibi byose mvuze n’ibindi ntarondoye icyo byerekana ni uko Kigali ari ikintu gikomeye mu buzima bw’igihugu ku buryo uhawe kuyobora Kigali aba ahawe inshingano zikomeye koko haba ku bw’umuzigo akorewe cyangwa icyizere aherejwe. Ndetse na protocole y’igihugu irabyerekana kuko mu birori bikuru byinshi aba ariwe musangwa mukuru.

Hari abarengwa bakarengera

Iyi mvugo nyikomoje ku nyandiko nasomye ku IGIHE yerekeranye n’ibyo uyobora Umujyi wa Kigali ubu yemereye abanyakigali yiyamamaza. Mbere yo kubitindaho ariko reka mbanze mvuge ko byanyibukije byinshi by’abandi bamubanjirije. Byanyibukije igihe cya Mutsindashyaka akoresha imvugo zishongora akavugira kuri Radiyo y’Igihugu ngo “Abantu batuye mu tuzu tumeze nk’ibyari by’inyoni tuzadusenya”. Icyo gihe ntiyanavuze niba bene two bazubakirwa, ntiyanasobanuye nibura niba bikozwe ku mpuhwe zo kwanga ko zibagwa hejuru! Oya! Yarihanukiriye arahubuka abihonda aho, maze asiga abamwumva mu ihurizo ryo kwibaza ngo ese arabivuga nka nde? Ese ni FPR yamutumye? Ese na Perezida Kagame uyobora iki gihugu niko abibona? Nyamara abakoranye nawe bya hafi bahamya ko iyo yabaga ashaka guhitisha icyemezo afitemo inyungu kandi bose batabona kimwe, bwo yarihanukiraga ati na Mwenyewe (Nyir’ubwite) arabizi tuba twabivuganye!

Mutsindashyaka yarinze ava mu Mujyi wa Kigali azi ko nta wundi wawuyobora. Yari azi ko awuvuyemo wahinduka ibihuru, yari azi ko aramutse agiye kubakisha ibikwa imishoro byagaruka, ko amataji ya Rukarakara yagaruka. Yagiye asigaye yiyitiranya na Kigali!

Nyuma ya Mutsindashyaka Umujyi wa Kigali wayobowe na Aissa Kirabo Kacyira. Kirabo yatangiranye umutima muhanano ubona harimo ubwitonzi bw’uweretswe amakosa y’ uwamubanjirije. Nyuma y’ibyiza byinshi yakoze nawe yaje kunanirwa kwikura Umuzimu utera Kigali y’umujyi kuko ku bakoranye nawe yaje kugaragara nka Nyirandabizi wumva bake mu bo bakorana. Uko Kigali ikura yakuranye nayo, maze ibigwi by’u Rwanda mu kugira umujyi ucyeye abigira ibye bimuviramo n’igikombe yahawe. Erega yaracyakiriye arikiriza aratuza aratimaza ati ndi Ndabaga nkaba igitangaza cy’i Rwanda! Umubi ni uwavuga ati iki gikombe reka ncyakire ariko ubundi si njye! Byaranamuhiriye kuko byamuviriye kubengukwa ubu akaba yungirije uyoboye ishami rya Loni ry’imiturire ku Isi. Isura y’u Rwanda tujye tuyubaha irahaha!

Kirabo yaragiye haza Ndayisaba w’ikinyarwanda cyiza n’ikinyabupfura cy’igiseminari. Yasubizaga mu buryo burimo uburere, akibuka kuvuga ngo tuzagira gutya aho kuvuga ngo nzagira gutya. Maze aho twabaga twicaye tuti ntureba ahubwo umwana wize akanarerwa! Abandi ndetse bati ariko ubundi FPR uyu mugabo w’imfura yari yaramubitse he? Umuzimu wa Kigali y’umujyi ariko ntugira intsinzi kugera magingo aya. Ninaho nashakaga kugera. Ndayisaba yaje kugira gutya yadukana imvugo zo kurasana no gukocora aba atangiye kwesa imihigo ya Mutsindashyaka mu gushira isoni abaturage ku mugaragaro. Icyo gihe bamwe bibajije niba iyi mvugo FPR iyemera cyangwa niba yarayobotse irya Bernard Ntaganda. Ubundi Ndayisaba mu ruhame ati erega ndakomeye kuko nkorera neza neza mu biro Habyarimana yakoreragamo! Habuze gato ngo anavuge ko ari we wamusimbuye. Mu gihe twari tukiri muri ibyo ejo bundi aha igihe yahererekanyaga ububasha afata ibigwi bya shebuja byose ati ”n’ubwo ntakunze kubyiyitirira ibyo nabagejejeho ni byinshi” kandi nimuntora nzabagezaho byinshi mpereye ku mashyanyarazi yo mu Gatare”. Habuze gato ngo yongereho ati ni njye Kagame ka Rutagambwa bababwiye! Koko Ndayisa? Oya! Nubaha abakuru nkubaha inzego ariko hari ibyo na njye mbona nkavuga nti oya.

Muri politiki ntawiyitirira ibigwi bya benshi, ntawufata gahunda y’iterambere ry’igihugu ngo ayiyamamarizeho kereka iyo ari we ukiyoboye. Ahubwo ahandi abanyepolitiki b’inyaryenge n’ibyo bakoze babigira ibigwi by’imiryango ya politiki bakomokamo. Mushake rero umuraguzi w’umuhanga twirukane uriya muzimu wa Habyarimana utuzingira abayobozi!

[Batatu ba mbere hejuru uhereye ibumoso] Sebatware André, Renzaho Tharcisse, Mariko Kabandana. [Uhereye ibumoso ku murongo wo hasi:] Musoni Protais, Mutsindashyaka Theonetse, Aissa Kirabo Kacyira na Fidèle Ndayisaba; bamwe mu bagiye bayobora Umujyi wa Kigali mu bihe bitandukanye mu myaka irenga 25 ishize

Iterambere rya Kigali mu biganza bya Kagame

Kigali y’ubu ni igiteranyo cy’ibitekerezo, ibyifuzo, inama Kagame ubwe yagiye ageza ku bayoboye umujyi batandukanye mu bihe bitandukanye, ndetse rimwe na rimwe bikaba ngombwa ko abibahatira.

Irya mikindo yahinduye Kigali urukerereza abazi ibanga ryayo ni mbarwa. Icyo nzi ni uko kuva aho aho izava, aho izaterwa, uko izaterwa byabanje kuba impaka ndende kuko bamwe bibazaga ukuntu warimbura bya bivoka byari bihari ngo uhatera imikindo itagaburira abana! Abandi ngo imikindo ntiyakura i Rwanda kubera ko itaberanye n’ibihe byaho. Habaye igitsure cya Kagame ubwe ngo ya mikindo ifatwe nk’ingagi! Icyavuyemo murakireba kuko amahanga yacitse ururondogoro!

Imishinga nko kubaka Hotel Serena, Kigali Convention Centre iyi irangiye abenshi bumvaga idashoboka ngo kuko abaterankunga bahita bafunga robine ngo turisumbukuruje. Byagiye bisaba umuntu nka Perezida Kagame waretse kubirebera mu ndorerwamo za gifongisiyoneri na kidipolomate kugira ngo ababaze ati ariko niba mwemera ko byakunguka kandi byagira akamaro reka tubikore ejo uzabona neza ko abo babirwanya batazaba babishimagiza. Uyu munsi niko bimeze kandi.

Kugeza 2006 ibice bya Kigali hafi ya byose byasimburanaga mu icurabulindi uretse Kiyovu y’abakire. Mu mwiherero w’abayobozi wa 2006 ni bwo Perezida Kagame yaciye iteka ko hakorwa ibishoboka byose umuriro ukaboneka n’iyo waba uhenda ariko ukaboneka kuko ari yo ntango y’iterambere. Bwarakeye ibiciro byikuba kabiri twitotomba gato ariko igihugu kigura imashini zihenze zitanga umuriro umwijima ujya mu mateka. Ubwo ntihazabura undi ubyiyitirira.

Abajya bitabira inama zo mu rwego rw’igihugu za FPR babashije kubona kenshi Perezida Kagame ahagurukanye abayobozi ku kibazo cy’amazi. Ubwo ikibazo cy’amazi cyaherukaga kuba ingorabahizi yahaye umwitangirizwa uwari Misitiri Bikoro ngo gikemuke. Mu gihe kidatinze ya mazi ya Nyabarongo yagabanije ikibazo mu Mujyi wa Kigali. Nyuma yabokeje igitutu kenshi ngo umushinga wa Mutobo wihutishwe gikemuke burundu. Ejo bundi mu gihe Kigali yakiraga CHAN ibura ry’amazi ni ko gatotsi kabaye mu kwakira abashyitsi. Hari ababyishimiye bavuga ngo nibura Kagame abimenye gikemuke.

Ikintu Kigali isumbya indi mijyi ya Afurika ni ziriya nzira zubakishije pave z’abanyamaguru. Zirimo kubaha abagendesha amaguru, zirimo kubarinda kugongwa n’imodoka, zirimo kwagura imihanda, zirimo igisirimu usanga i Buraya gusa. Kugitekereza ni yo yabaye impinduka nkuru mu mitunganyirize y’Umujyi Perezida Kagame yazanye. Kandi uzarebe neza uzasanga mu mateka abayobozi b’ibihugu b’imbonekarimwe baragiye barangwa no gufata igihe cyo gutunganya no kubaka imirwa mikuru.

Muri za 2000 kugeza 2003 waparikaga imodoka mu mujyi ukabanza kuvanamo radiyo kuko wagarukaga ugasanga bayibye. Abantu bibwaga ku manywa ndetse za Nyabugogo ho mayibobo zari zararemye imitwe ifite amazina nk’iyiyitaga Abamarine! Hari ababirebaga bakabona ari ibintu bisanzwe ndetse bamwe ngo ntaho bitaba no mu mijyi mikuru nka Nairobi na Kampala ni ko bigenda! Umutekano wagize ugaruka nk’umuriro wabuze maze Kigali iba umujyi wonyine ugendwa nta nkomyi kugera mu gicuku. Ababaye ba Komiseri nka Mugambage, nka Gahonzire, cyangwa Gasana iyo ubateze amatwi bakubwira inkeke Kagame yabahozagaho kuri icyo kibazo cy’umutekano muri Kigali.

Muzi akavuyo kabaga mu Mujyi wa Kigali mu itangwa ry’ibizamini bya permis, mu mikorere ya polisi yo mu muhanda. Ibi byo Perezida Kagame yabihinduriye kuri Radiyo twese twumva abaza impamvu. Ubanza ari yo mpamvu ntawundi urabyiyitirira.

Izi ni ngero nke ntanze mu bikorwa byinshi bigaragaza ko ibitekerezo n’igitsure cya Kagame ari byo byabaye inkingi ya kanagazi ubushake bw’Abanyarwanda bwubakiyeho Umujyi wa Kigali.

Kigali ya nyuma ya 2017

Kubaka umujyi ni urugendo rurerure. Ntabwo warundanya inzu ya Makuza ku ya Rujugiro, BK na ECOBANK nurangiza uvuge ngo wubatse umujyi. Turashaka Kigali itandukanye n’indi mijyi ya Afurika. Nisabire abayobozi b’IGIHE n’abandi bose mu bakomeye bazasoma inyandiko yanjye kuzambwirira Kagame muti: “Munezero ukuzi utamuzi ariko akagukurikira buri munsi azi byinshi washobora. Uti kandi azi ko ibyo ushatse bishoboka kuko utavirira icyo wiyemeje. Kuko utajya uhuga utageze ku mugambi. Kuko utajya ukoresha uburyo busanzwe gusa mu gushakA ibisubizo. Kuko uzwiho no gukoresha bwa buryo budasanzwe ( unconventional ) iyo bibaye ngombwa. Uti none Munezero aragusabye ngo utangire usuzume ibi bintu 10 akwisabiye ubishyire mu migambi yawe ya 2017 kugira ngo Kigali igere aho igomba kugera.

1. Mu minsi mike ugenza imodoka muri Kigali azaba asigwa n’umunyamaguru kubera imodoka nyinshi, byaba byiza hakozwe icyo mu bindi bihugu bita Ring ari wo muhanda uzengurutse umujyi ushamikiyeho ubwinjiro bwinshi, uwo muhanda wakabaye uhera Runda ukambuka Butamwa, Nyarurama, Gahanda ukambuka Kabuga ukazaca inyuma ya za Kagugu ugera mu Gatsata.

2. Minibisi nto nka Hiace na Coaster gahoro gahoro zizagende ziva mu nzira maze zisimburwe na Bisi nini cyane ku buryo kuri buri nzira ( ligne) Bisi yajya ihaguruka buri minota itanu itagombye gutegereza kuzura.

3. Hakwiye gutangira gukorwa inyigo y’uburyo kuva Karuruma kugera Kanombe unyuze mu mucyamo w’igishanga cy’inganda hazacishwa Tram ( ni ukuvuga ka gariyamoshi gato gatwara abagenzi gatwarwa n’amashanyarazi) nk’uko birimo bikorwa ubu muri Ethiopia.Icyo gihe byakwihutisha urugendo muri biriya bice bigendwa n’abantu benshi kandi byatuma abakoresha imodoka benshi baziparika.

4. Imihanda yo mu mujyi irubakwa igahita isenywa n’imvura kubera kutagira inzira zitwara amazi, hakwiye gushyirwa ingufu mu kubaka inzira z’amazi nk’imiferege na za ruhurura mbere yo kubaka indi mihanda mishya

5. Kaburimbo ijya mu mihanda igendwamo n’abahatuye gusa ntikwiye kuba umuzigo wa Leta gusa mu bice nka Nyarutarama , Kiyovu, Kacyiru, Kimihurura na Gacuriro ahubwo bene yo bakwiye gutanga 50% kandi iyo mihanda ikubakwa mu bikoresho bidahenze ahubwo ikarindwa kunyuzwamo amakamyo. Kabone n’iyo iyo 50% yabo yaba mu mwenda bazagenda bishyura Leta gahoro gahoro.

6. Parikingi zizarushaho gukenerwa mu mujyi rwagati. Ishoramari muri izo parikingi ku bufatanye bw’abikorera, Banki, Ubwishingizi na RSSB bikwiye koroherezwa kuzubaka ku buryo zajya zishyuzwa. Hamwe mu ho zikwiye kujya harimo ahahoze Benalco, Camp Kigali n’ahahoze Rwandatel hafi ya Saint Michel. Icyo gihe umujyi waba uw’abanyamaguru n’utumodoka tuwuzengurukamo tw’amashanyarazi dutwara kuri make ubyifuje.

7. Umujyi wa Kigali nta biti ukigira aho bukera urahinduka ubutayu. Hari hasigaye impinga ya Mburabuturo none nayo bayashijemo hagati ishyamba bararyogosha bahazamura etaji. Ubu se koko na byo tubitabarize Kagame nk’aho ba Mukankomeje batabona? Impinga za Rebero, Nyarurama, Jali, Jabana zikwiye kuba ndakorwaho. Kugira ngo dukomeze duhumeke umwuka mwiza hakwiye kubaho itegeko rihatira buri wese gutera ibiti 10 mu kibanza cye kandi utabikoze agacibwa ihazabu Leta ikabimuterera. Birababaza iyo ubona amafoto y’umudugudu wa Gacuriro n’uwa Kagugu ukabona amategura habe n’ikibabi! Imbuga zitoshye na zo zikwiye gukomezwa kubakwa aho abantu batuye abana bakabona aho bakinira. Ibiti bikwiye gukomezwa guterwa ku nkengero z’imihanda imikindo ikaguma hagati gusa. Uziko mu mujyi wa Kigali uretse imbuga ya Minadef, iya Primature na ya yindi yo mu Kanogo nta zindi mbuga zitoshye rusange( public garden) zihaba? Iya Minadef yo sinyibara kuko nta n’ubwo ari public!

8. Imodoka zinywa lisansi nyinshi z’amajipe ntabwo zakabaye zisora ibihumbi 250 nk’utumodoka duto twa starlet na Corola. Hakwiyeho kubaho umusoro w’ibidukikije uca intege abafite imodoka zanduza ikirere.

9. Imodoka ya kabiri mu rugo ikwiye kugira umusoro wihariye mu rwego rwo guca intege ishoramari mu modoka zanduza kandi zongera ubukene mu ngo z’abirarira.

10. Ku wa Gatanu no ku wa Gatandatu mu buryo bw’indengategeko abatarama bakwiye gukomorerwa maze kugera nibura saa sita z’ijoro mu kadomo ibitaramo nka gakondo, igisope, karaoke n’ibindi bikorerwa ahantu hafunguye kubera umwihariko wabyo bigatuma abatarama batarikesha babyitabira. Ibi birakwiye kuko nta mujyi w’ubwigunge kandi abantu bose si ko bakunda kujya mu byo bita night club.

Mu nyandiko itaha tuzakomeza tureba n’ibindi byagezweho ariko twerekana ko tukiri kure dukomoza ku bindi bikwiye guhabwa priority.

Pacifique Munezero- Kimihurura Rugando


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE