Umwuka mubi hagati y’u Rwanda na Uganda: Imbarutso y’intambara ya Kisangani mu 1999-2000

Yanditswe na Matthew Ndirima
Kuya 14 Kamena 2019 saa 08:57
Yasuwe :
0 0

Mu gihe hakomeje gututumba imvugo zitsura intambara mu bantu ba hafi y’ubutegetsi bwa Kampala no mu binyamakuru byo muri Uganda, barimo Andrew Mwenda uvuga ko Ingabo za Uganda zifata intambara yo mu 1999-2000 i Kisangani hagati y’u Rwanda na Uganda “nk’igikorwa kitararangira”, (The Independent yo ku wa 10 Kamena 2019), ni ngombwa gusubiza amaso inyuma tukareba icyakurikiye ayo makimbirane.

Mu gihe cy’iyo ntambara, muri Zaïre (yabaye Repubulika ya Demokarasi ya Congo) hari intambara y’u Rwanda rwari ruhanganye n’Interahamwe n’izari ingabo zahawe urwaho n’ubutegetsi bwasimburanye muri icyo gihugu, aho bahungiye nyuma yo kugira uruhare muri Jenoside yakorewe Abatutsi mu 1994.

Laurent-Désiré Kabila na Mobutu Sese Seko wamubanjirije, babateye inkunga ndetse babafasha kugaba ibitero ku Rwanda mu myaka ya 1990 no mu 2000. Haje n’ingabo z’ibihugu bisaga bitandatu byo mu Karere birimo na Uganda, byari bifite intego zimwe zishidikanywaho.

Yari intambara yakurikiranwaga cyane n’umuryango mpuzamahanga, ibihugu byinshi bifite ababihagarariye aho yaberaga barimo abakozi b’inzego z’ubutasi z’ibihugu byo mu Burengerazuba bw’Isi.

Muri make iyo miryango na Guverinoma zasohoye ubutumwa bwasize bukuyeho urujijo ku cyateje intambara hagati y’u Rwanda na Uganda.

Inyandiko y’Ibiro bihuza Ibikorwa by’Ubutabazi mu Muryango w’Abibumbye yasohotse ku wa 8 Gicurasi 2000, yashinje bidasubirwaho Guverinoma ya Uganda n’ingabo zayo muri RDC, nk’uruhande rwashotoranye bikavamo imirwano y’ibihugu byombi, i Kisangani.

Abayobozi batandukanye mu Isi barimo abari mu Kanama k’Umuryango w’Abibumbye gashinzwe Umutekano, bamaganye bikomeye ubutegetsi bwa Kampala, kubera gushoza intambara ubwo zasagariraga ibirindiro by’Ingabo z’u Rwanda.

“Leta Zunze Ubumwe za Amerika ziramagana zivuye inyuma igitero Ingabo za Uganda muri iki gitondo zagabye ku Ngabo z’u Rwanda…zirimo kuvogera ubusugire bwa RD Congo ndetse ni no kurenga ku masezerano ya Lusaka… Ibi bikorwa bishobora kugira ingaruka zikomeye ku mubano wa Leta Zunze Ubumwe za Amerika na Uganda.”

Ayo yari amagambo ya Richard Boucher, Umuvugizi wa Minisiteri y’Ububanyi n’amahanga ya Amerika.

Ku rundi ruhande, Guverinoma y’u Bubiligi na yo yamaganye ubushotoranyi bwa Uganda, mu ijwi ry’uwari Minisitiri w’Intebe wungirije akaba na Minisitiri w’Ububanyi n’Amahanga, Charles Michel, washimangiye ko “mu bigaragara iyo mirwano ari igikorwa cyazanywe n’ingabo za Uganda.”

Hagati aho Lieutenant Colonel Akram Hossain wari ukuriye Intumwa z’Umuryango w’Abibumbye zakurikiranaga ibyaberaga i Kisangani, yemeje ko imirwano yatangiye ubwo “Igisirikare cya Uganda cyagabaga ibitero ku birindiro by’Ingabo z’u Rwanda n’iby’inyeshyamba za RCD ku wa Gatanu ahagana saa kumi za mu gitondo, ku wa 8 Gicurasi 2000.”

Raporo kuri iyo mirwano yatangajwe n’akanama gakuriwe n’uwari Umugaba w’Ingabo z’u Rwanda (RPA) zahindutse RDF n’uwari ayoboye Ingabo za Uganda. Iyo raporo yavuye imuzi ubushotoranyi bwakorewe Ingabo z’u Rwanda biturutse kuri Brig. James Kazini, wari uyoboye Ingabo za Uganda i Kisangani.

Iyo raporo yavuye imuzi ibikorwa by’ubushotoranyi ku Ngabo z’u Rwanda byatangijwe na Brig. James Kazini wari uyoboye Ingabo za Uganda i Kisangani.

Yagaragaje ko Kazini yahoraga ashaka intambara kugeza ubwo kuyihagarika bitari bigishobotse. Ubwo iyo raporo yasohokaga, Perezida Museveni yashatse kuyitesha agaciro ntibyamuhira, avuga ko u Rwanda rwari ruhagarariwe n’abanyamategeko benshi ba gisirikare muri ako kanama kurusha Uganda, ibintu bitari ukuri.

Hagati aho uburyo ibinyamakuru bya Kampala byandikaga kuri icyo kibazo bwari butandukanye, urebye nka Monitor yo ku wa 16 Kanama 1999 yasohoye inkuru ibanza, ivuga ko abasirikare ba Uganda baguye i Kisangani bari amagana ndetse “Kazini, Otafire na Mayombo bagaterwa ibisasu biremereye.”

Nk’uko wahita ubyiyumvisha, New Vision yo yatambukije ubutumwa bwa Leta aho Umujyanama wa Perezida Museveni mu bijyanye n’Itangazamakuru, John Nagenda, umugabo wavukiye i Gahini ku nkombe z’Ikiyaga cya Muhazi, (ku ivuko ry’abandi nka Minisitiri w’Ububanyi n’Amahanga wa Uganda, Sam Kutesa), yihutiye gukoresha ururimi rwa Ngeze Hassan.

Mu gitekerezo yasohoye cyahawe umutwe ugira uti “U Rwanda rukwiye gusaba imbabazi Uganda”, (New Vision yo ku wa 4 Nzeri 1999), Nagenda ntabwo agerageza guteranya abaturage ba Uganda n’Abanyarwanda gusa, ahubwo yagaruraga urwango rwa Kangura na RTLM byo mu minsi igana kuri Jenoside.

“Uko byagenda kose, gerageza wishake mu mutima kugirira impuhwe u Rwanda n’abaturage barwo…ubu babonwa nk’indyarya n’abantu utakwizera ku buryo gukorana na bo bitoroshye nko gufata inzoka yinyagambura.”

Ni uko Nagenda yabwiye Abanya-Uganda, akoresha igereranya ry’inzoka, imvugo yakoreshejwe n’Interahamwe mu kwambura ubumuntu Abatutsi.

Mu gihe raporo ihuriweho yashyiraga mu majwi UPDF n’amahanga akabihurizaho, ingabo za Uganda zari ikomeje kubyihunza.

Raporo yasohowe na International Crisis Group (ICG) ku wa 4 Gicurasi 2000 yiswe “Uganda n’u Rwanda: Inshuti cyangwa Abanzi,” ivuga ko uku gutsindwa kwaciye igikuba mu Ngabo za Uganda. I Kampala habaye inama nyinshi z’ibanga mu gushaka igisubizo ku cyo bitaga ubugambanyi bw’u Rwanda, ari nabwo Major General Salim Saleh, umuvandimwe wa Museveni wanabaye Umugaba w’Ingabo, yatangazaga ko yiteguye gusubira bikorwa bya gisirikare.

Ku wa 30 Kanama 1999, Perezida Museveni yagejeje ijambo ku Nteko Ishinga Amategeko ya Uganda ndetse yibasira abayobozi b’u Rwanda kugeza ubwo yashatse kubagereranya n’abana.

Yabwiye abagize Inteko ati “Abavandimwe bacu bo muri RPA ntabwo bagize umwanya wo gukura uko bikwiye kugira ngo bamenye uko bakora ibintu bimwe na bimwe.”

Nyuma y’ayo magambo atsura ubushotoranyi ku Rwanda mu baturage be, icyo gihe Museveni yamenye ko uwari visi Perezida w’u Rwanda akaba na Minisitiri w’Ingabo, Paul Kagame, agiye kugeza ijambo ku baturage binyuze ku babahagarariye mu Nteko Ishinga Amategeko.

Mu kindi gikorwa cy’ubushotoranyi n’ubwiyemezi n’uburyo afata u Rwanda nk’igihugu kiri munsi ye, Perezida Museveni yohereje umujyanama we mu bya Gisirikare, Col. Kale Kayihura, nk’intumwa yihariye yari izaniye Visi Perezida ubutumwa bwihutirwa.

Museveni yatumye Col. Kayihura gusaba Paul Kagame wari Visi Perezida, kutageza ijambo ku Nteko Ishinga Amategeko y’u Rwanda. Ibyo ntibyari ukwivanga mu miyoborere y’igihugu cy’abaturanyi gusa, byari ukwishyira hejuru birenze urugero.

Ku wa 2 Nzeri 1999, Visi Perezida Paul Kagame yagejeje ijambo ku Nteko Ishinga Amategeko i Kigali, aho yagaragaje ibimenyetso atagiye mu kwibasira Uganda cyangwa abayobozi bayo.

Ku wa 16 Nzeri 1999 nyuma yo gusoza iperereza ku kanama gahuriweho mu kibazo cya Kisangani, Visi perezida nanone yasubiye imbere y’Inteko Ishinga Amategeko, aho yemeje ko ibyavuye mu iperereza byerekana ko “ryakuye kuri RPA ikibazo icyo ari cyo cyose”, nta na hamwe “ajombye igikwasi cyangwa aryarya nk’uko abayobozi ba Uganda babivuze.”

Nk’uko abayobozi muri Guverinoma ya Uganda hamwe n’ababogeza babivugaga mu bitangazamakuru, bashakaga kuririra ku byabaye ngo bagoreke amateka maze begeke ubushotoranyi bwabo ku Rwanda, bakwiye kumenya ko hari ibimenyetso kandi byanditse by’ibyo bihe; abaturage ntibateze kuyobywa n’icengezamatwara ryabo iryo ariryo ryose.

Ibikubiye muri iyi nyandiko ni ibitekerezo bwite by’umwanditsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza