Warenganurwa gute mu rubanza rugaragaramo akarengane ubujurire butagishoboka?

Yanditswe na Munyengabe Murungi Sabin
Kuya 13 Ukwakira 2015 saa 01:33
Yasuwe :
0 0

Ubusanzwe iyo urubanza rwaciwe n’inkiko zibifitiye ububasha kandi inzira zose z’ubujurire ziteganywa n’amategeko zikaba zarakoreshejwe, urwo rubanza ruhinduka itegeko kandi ruba rugomba kurangizwa (gushyira mu bikorwa ibyo umucamanza yategetse).

Nyamara bijya bibaho ko umwe mu baburanyi cyane cyane uwatsinzwe asigara yijujuta avuga ko mu mikirize y’urubanza habayemo akarengane. Ibi bishobora kuba ari amarangamutima dore ko burya ntawe ujya upfa kwemera ko yatsinzwe kimwe nuko bishobora kuba bifite ishingiro.

Ariko se ubundi gusubirishamo urubanza rwamaze kuba itegeko (rutagishobora kujuririrwa) birashoboka? Bikorwa bite? Bikorwa nande? Bikorwa ryari? Kugeza ubu se hari aho byakozwe ku manza zaciwe n’inkiko zo mu Rwanda? Iyi nkuru iratanga ibisubizo kuri ibyo bibazo.

Gusubirishamo urubanza birashoboka kabone n’iyo rwaba rwaraciwe ku rwego rwa nyuma (rudashobora kujuririrwa)

Amategeko y’u Rwanda yemera ko iyo mu mikirize y’urubanza hagaragayemo akarengane, umwe mu baburanyi ashobora gusaba gusubirishamo urwo rubanza yisunze ingingo ya 15 y’ Itegeko n° 76/2013 ryo ku wa 11/9/2013 rigena inshingano, ububasha, imiterere n’imikorere by’Urwego rw’Umuvunyi.

Iyi ngingo ivuga ko “Urwego (rw’Umuvunyi) rufite ububasha bwo gusaba Urukiko rw’Ikirenga gusuzuma no gusubiramo urubanza rwaciwe n’inkiko zisanzwe, inkiko z’ubucuruzi cyangwa iza gisirikare ku rwego rwa nyuma, mu gihe hakigaragaramo akarengane.

Iryo suzuma n’isubiramo bikorwa hakurikijwe ibiteganywa mu Itegeko Ngenga rigena imiterere, imikorere n’ububasha by’Urukiko rw’Ikirenga.”

Iyi ngingo kandi ishimangirwa n’ingingo ya 79 y’Itegeko Ngenga no 03/2012/OL ryo ku wa 13/06/2012 rigena imiterere, imikorere n’ububasha by’Urukiko rw’Ikirenga aho mu gika cyayo cya mbere igira iti: “Urwego rw’Umuvunyi ni rwo rufite ububasha bwo kuregera Urukiko rw’Ikirenga ibirego byerekeranye no gusubirishamo ku mpamvu z’akarengane urubanza rwaciwe ku rwego rwa nyuma.”

Gusubirishamo urubanza ku mpamvu z’akarengane bikorwa bite?

Umwe mu baburanyi wumva ko urubanza yaburanye (aregwamo cyangwa aregamo) rwabayemo akarengane, yandikira Urwego rw’Umuvunyi agaragaza akarengane yagiriwe ndetse anasaba ko urubanza rwe rusubirishwamo.

Urwego rw’Umuvunyi rurabisuzuma rwabona bifite ishingiro rukandikira Perezida w’Urukiko rw’Ikirenga rumusaba ko urubanza rwakongera kuburanishwa rukanamushyikiriza raporo ikubiyemo imiterere y’icyo kibazo n’ibimenyetso bigaragaza ako karengane.

Icyo gihe Perezida w’Urukiko rw’Ikirenga afata icyemezo cyo gusubirishamo cyangwa kudasubirishamo urwo rubanza ashingiye kuri raporo ikorwa n’Ubugenzuzi Bukuru bw’Inkiko.

Ni izihe mpamvu zishobora gufatwa nk’akarengane zigatuma urubanza rusubirishwamo?

Izo mpamvu zikubiye mu ngingo ya 81 y’itegeko Ngenga rigena imiterere, imikorere n’ububasha by’Urukiko rw’Ikirenga. Iyo ngingo ivuga ko Urubanza rwaciwe ku rwego rwa nyuma rushobora gusubirwamo ku mpamvu z’akarengane zikurikira:

1. Iyo hari ibimenyetso simusiga bigaragaza ruswa, ikimenyane cyangwa icyenewabo, byagize ingaruka ku mikirize y’urubanza bikaba bitarigeze bimenywa n’uwatsinzwe mu gihe cy’iburana;

2. Iyo mu icibwa ry’urubanza hirengagijwe amategeko n’ibimenyetso bigaragarira buri wese;

3. Iyo urubanza rudashobora kurangizwa ukurikije imikirize yarwo.

Icyakora iyi ngingo ivuga ko umuburanyi wari ufite uburenganzira bwo kwiyambaza izindi nzira z’ubujurire zisanzwe n’izidasanzwe ariko ntabikore mu gihe giteganyijwe n’amategeko atemerewe gusaba ko urubanza yatsinzwe rusubirishwamo hakurikijwe izo mpamvu tuzamaze kuvuga.

Ibirego bisaba gusubirishamo imanza ku mpamvu z’akarengane biburanishwa gute?

Iburanisha ry’ibirego bisaba gusubirishamo ku mpamvu z‘akarengane urubanza rwaciwe ku rwego rwa nyuma, rikorwa mu ruhame n’ababuranyi bahari. Inteko y’Urukiko rw’ikirenga ica urubanza igizwe nibura n’abacamanza batatu (3).

Icyakora, iyo urubanza rusabirwa gusubirwamo rwaciwe n’Urukiko rw’Ikirenga, inteko iburanisha igomba kuba igizwe nibura n’abacamanza batanu (5) batarimo abari baruciye (ingingo ya 82).

Iyo Urukiko rw’Ikirenga rusanze mu rubanza rwari rwaraciwe harabayeho akarengane, rukosora amakosa yakozwe mu ica ry’urwo rubanza kandi rugatanga umurongo ngenderwaho wo mu rwego rw’amategeko mu gukemura bene ibyo bibazo. Icyemezo gifashwe ntigishobora gusubirwaho (ingingo ya 83).

Gusubirishamo ku mpamvu z’akarengane urubanza rwaciwe ku rwego rwa nyuma ntibihagarika irangizarubanza (Ingingo ya 85).

Imanza zisabirwa gusubirwamo ku mpamvu z’akarengane zimaze kuba nyinshi cyane

Nkuko imibare iva ku rwego rw’umuvunyi ibigaragaza, Kuva Itegeko Ngenga rigenga imikorere y’Urukiko rw’Ikirenga twavuze haruguru ryasohoka muri 2012 kugeza muri Kanama 2015, Urwego rw’Umuvunyi rumaze kwakira imanza zisabirwa gusubirishwamo ku mpamvu z’akarengane zisaga 4,492.

Muri izo manza 4,492 zakiriwe, kugeza muri nzeli 2015 hari hamaze gusuzumwa izisaga 3,123. Mu manza zasuzumwe (3,123), izisaga 148 (4,7%) Urwego rw’Umuvunyi rwasanze zigaragaza akarengane ruzisabira gusubirwamo mu Rukiko rw’Ikirenga naho izisaga 2,975 (95.3%) Urwego rw’umuvunyi rwasanze nta karengane karimo.

Imanza zohererejwe urukiko rw’ikirenga zirasuzumwa zose ariko siko zisubirishwamo

Imibare ituruka mu Rwego rw’Umuvunyi yerekana kandi ko kugeza mu mpera z’ukwezi kwa Kamena 2015, Ubugenzuzi Bukuru bw’Inkiko bwari bumaze gusesengura dosiye 74 mu zo bwashyikirijwe n’Urwego rw’Umuvunyi.

Muri izo 74 zasesenguwe, 48 gusa nizo zashyikirijwe Perezida w’Urukiko rw’Ikirenga ngo zisubirishwemo mu gihe izisaga 26 zagaruwe ku Rwego rw’Umuvunyi kugira ngo rusubize ba nyirazo ko nta subirwamo ryemewe.

Abasesenguzi n’abakurikiranira hafi iby’imanza bavuga ko kuba imanza zose Urwego rw’Umuvunyi rwoherereje Urukiko rw’Ikirenga zidasubirishwamo zose uko zakabaye, ari ikimenyetso gishimangira ubwigenge bw’urwego rw’ubucamanza, dore ko hari bamwe bakunze kunenga ubu buryo bwo gusubirishamo imanza ku mpamvu z’akarengane bavuga ko bubangamiye ubwisanzure bw’inkiko mu kazi kazo ko guca imanza.

Isubirishamo ry’imanza ku mpamvu z’akarengane riracyagaragaramo ibibazo bishingiye ku mategeko n’ubushobozi bw’inzego za Leta

Kimwe mu bibazo bishingiye ku mategeko bigaragara mu isubirishwamo ry’imanza ku mpamvu z’akarengane ni nko Kuba Itegeko Ngenga rigenga imikorere y’Urukiko rw’Ikirenga twavuze haruguru ritarateganyije igihe ntarengwa kigomba kubahirizwa n’umuburanyi wifuza gusaba isubirishwamo ry’urubanza rwe ku mpamvu z’akarengane.

Ibi hari abashobora kubyuriraho bakanga kurangiza imanza batsinzwe bitwaje ko ngo bazajya gusaba kuzisubirishamo ku Rwego rw’Umuvunyi (N’ubwo twanabonye ko gusaba gusubirishamo urubanza ku mpamvu z’akarengane bidahagarika irangiza ry’urubanza).

Mu gukemura iki kibazo, birakwiye ko Itegeko Ngenga rigenga imikorere y’Urukiko rw’Ikirenga rivugururwa rikagena igihe ntarengwa cyo gusubirishamo urubanza ku mpamvu z’akarengane.

Hari kandi n’ikibazo umuntu yavuga ko gishingiye ku bushobozi bw’inzego za Leta n’ubwo gishobora no gushakirwa umuti mu buryo bw’amategeko.

Icyo kibazo nta kindi ni umubare munini cyane w’imanza zisabirwa gusubirwamo ku buryo Urwego rw’Umuvunyi rudashobora kubahiriza igihe cy’amezi atatu (3) cyo gusubiza abaturage ku bibazo by’akarengane baba bagejeje ku Rwego rw’Umuvunyi nkuko biteganywa n’ingingo ya 44 y’ Itegeko n° 76/2013 ryo ku wa 11/9/2013 rigena inshingano, ububasha, imiterere n’imikorere by’Urwego rw’Umuvunyi.

Iki kibazo gishobora gushakirwa umuti mu rwego rw’amategeko havugururwa iyo ngingo ya 44 maze Urwego rw’Umuvunyi rukongererwa igihe cyo gusesengura imanza zisabirwa gusubirishwamo ku mpamvu z’akarengane ruba rwakiriye, wenda kikaba cyashyirwa nko ku mezi 6.

Bitihise Urwego rw’Umuvunyi rugashakirwa abakozi bahagije bashobora guhangana n’ubwinshi bw’imanza zisabirwa gusubirwamo ku mpamvu z’akarengane.

Ababuranyi nabo bashobora kugira uruhare mu gukemura iki kibazo birinda kwirukankira ku Rwego rw’Umuvunyi batabanje gusesengura neza niba koko imanza zabo zujuje ibisabwa ku buryo budashidikanywaho nkuko biteganywa n’ingingo ya 81 y’itegeko Ngenga no 03/2012/OL ryo ku wa 13/06/2012 rigena imiterere, imikorere n’ububasha by’Urukiko rw’Ikirenga, aho iyo ngingo igaragaza impamvu zemewe n’amategeko zishobora gushingirwaho kugira ngo urubanza rwemererwe gusubirashwamo ku mpamvu z’akarengane.

Ibikubiye muri iyi nkuru byakusanyijwe kandi byandikwa na Maurice Munyentwali.

E-mail: [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244