Congo yagombye gutanga indishyi ku banyarwanda bahohotewe

Congo yagombye gutanga indishyi ku banyarwanda bahohotewe


Yanditswe kuya 22-10-2012 - Saa 04:52' na Ntarugera Deo Koya

Hirya no hino mu mijyi itandukanye nka Bruxelles na Goma, Abanyarwanda bakomeje guhohoterwa, bagakorerwa ibikorwa byo guhonyora uburenganzira bwabo ndetse hakazamo no kwicwa, byose bikorwa n’Abanyekongo ubwabo tutirengagije n’inzego z’umutekano.

Ibi byanteye kwicara ngira icyo nibariza abayobozi b’u Rwanda n’aba Repubulika Iharanira Demokarasi ya Congo ngo bansobanurire icyo bakoze kugira ngo uburenganzira bw’Abanyarwanda bwakunze guhonyorwa bukurikiranwe ni biba ngombwa bahabwe n’indishyi.

Ndibaza nti “Ese Leta y’u Rwanda yaba yarirengagije ko Abanyarwanda bahohotewe na Repubulika Iharanira Demokarasi ya Congo? Ese Perezida Paul Kagame yaba atibuka ko afite mu nshingano ze kurengera no kurinda uburenganzira bw’Abanyarwandanda? Ese Perezida Kagame yaba agitekereza ku mwanya n’igihe gikwiye kugira ngo afate ibyemezo?”

Ibyo byemezo biramutse bifashwe bigomba kuzaba iby’ubushishozi, bikurikije amategeko y’igihugu ndetse n’amategeko mpuzamahanga.

Kuva ikibazo cy’Abanyarwanda n’Abanyekongo cyavugwa, twashima Ikinyamakuru IGIHE kitahwemye kubidutangariza. Leta y’u Rwanda ntiyigeze itangaza uburyo bwo kurengera Abanyarwanda bahohoterwa n’Abanyekongo. Iki kibazo cyavuzwe cyane n’ibinyamakuru nyamara ku rundi ruhande ntabwo cyari gikwiye guharirwa abanyamakuru n’inzego za Poloisi gusa.

Ntibyumvikana. Iki ni ikibazo mpuzamahanga, ni na yo mpamvu kigomba gukemurwa mu nzira zubahirijwe amategeko mpuzamahanga.

Si ibanga, Abanyafurika na Guverinoma zabo bagaragaza kutita kubibakorerwa, rimwe na rimwe ugasanga birengagiza icyubahiro cyabo, kutavogerwa, inshingano zabo mu kubahiriza uburenganzira bw’abaturage babo, baba abatuye mu gihugu imbere cyangwa ababa hanze yacyo.

Ahanini Leta zo muri Afurika zirengagiza ibiteganywa n’Itegeko Nshinga aho usanga bamwe mu bayobozi birengagiza inshingano zabo mu guharanira ubusugire bw’ibihugu byabo.

Ntibyumvikana ukuntu hari aho usanga batekereza ko ikiremwamuntu ari nk’imbwa ukubita, ukayitoteza ndetse ukayica igihe icyo ari cyo cyose ushakiye.

Abanyekongo, Abanyarwanda ndetse n’Abanyafurika muri rusange bakabaye bazi neza ko no guhohotera imbwa ari icyaha nk’ibindi byose.

Ariko se Leta ya Congo yaba ifite uburenganzira bwo gukomeza gushingira ku kinyoma cyo kwica ku bwinshi Abanyarwanda n’Abanyekongo bavuga ikinyarwanda?

Perezida Joseph Kabila wa Congo yaba azi neza ko igihugu cye cyashyigikiye ibikorwa by’itsembabwoko rikorerwa Abahutu n’Abatusi b’abanyekongo?

Perezida Kabila yari ataravuka igihe igisirikare cya Congo cyakoraga itsembabwoko aho Abahutu n’Abatutsi bo muri Congo bicwaga bazira ubusa. Aho hari mu 1965.

Impapuro dufite zerekana ko Perezida Joseph Kabila yavutse mu 1972. Ubwo bwicanyi ntibwategereje ko avuka. Ubwa kabiri ni ubwakorewe Abahutu bo muri Kongo hagati y’ukwezi kwa Werurwe na Nzeri 1993. Ese ubu bwaba bwaratewe ni iki?

Tutagiye kure ibi bibazo byatangiye nyuma y’uko ingabo za Kinshasa zari zimaze gutsinda intambara yari yabahuje n’Abanande, Abanyanga, Abahunde n’Abatembo bayobowe na Kaseso.

Icyo gihe Abahutu bimwaga uburenganzira bwabo bwo kwitabira ibiganiro kuri Demokarasi. Ibi bikaba byarabaye hagati ya 1991 na 1992. Icyo gihe kandi abo banyekongo bashinjwaga ko ari Abanyarwanda badakwiye kwivanga n’Abanyekongo.

Icyo gihe icyari gisigaye ni ukwica imiryango y’Abahutu yabarizwaga i Walikale, Masisi na Rucuru mu rwego rwo kubahagarika kugira ngo batitabira amatora yagombaga kuba muri Congo.

Ubwoko bw’Abatutsi barabwihoreye bitavuze ko hari izindi mpuhwe bari babafitiye ahubwo ngo ni uko babafataga nk’aho atari Abanyekongo dore ko bashimwaga ko batateje imirwano. Nyamara kandi ku rundi ruhande ibi ntibyakuyeho ko hagati y’umwaka wa 1991 na 1992 baba baragiye babuzwa kwitabira inama zakorerwaga mu gihugu cya Congo zigamije gusuzuma ibibazo by’icyo gihugu.

Mu byukuri iyo congo yiyemezaga gukora ubwicanyi ntiyarobanuraga ngo uyu ni Umuhutu cyangwa ni Umututsi. Twafatira urugero ku byabereye i Walkale, Masisi na Rutshuru ubwo Abanyekongo bicwaga ngo ni uko bavuga ururimi rw’Ikinyarwanda.

Mu 1993, uwari Guverineri wa Kivu y’Amajyarugu n’uwari umwungirije, bose bakomokaga mu bwoko bw’Abanande n’Abanyanga, Kalumbo na Bamwisho, abo ba Guverineri ni bo mu by’ukuri bari bahagarikiye ubwicanyi bwakorwaga buzwi nka Jenoside y’Abahutu.

Icyo gihe Abatutsi n’ubwo bicwaga ariko byo ntibyatangajwe nka Jenoside. Aha twavuga nk’ubwicanyi bwabaye hagati ya 1994 na 1996 ndetse n’ubundi bwabaye hagati ya 1998 na 2002.

Abaminisitiri babiri b’Abanyekongo barimo Didier Mumengi na Yerodia Ndombassi batangarije amagambo akarishye ibinyamakuru aho wasangaga bavuga ko umwanzi wa Congo ari Umututsi. Ibi bikaba ntaho bitandukaniye n’ibyatangazwaga na RTLM igihe yirwaga isaba ko Abatutsi bakwicwa mu Rwanda.

Ndibuka ko iki kibazo cyafashe intera ndende kugeza aho Guverinoma y’u Bubiligi yari yafashe icyemezo cyo guta muri yombi Minisitiri Yerodia Ndombassi mu 1994. Gusa uyu muminisitiri ntiyafashwe kuko nyuma yo kumenya ko ashobora gutabwa muri yombi ntiyigeze ava muri cCngo ngo abe yakwerekeza mu Bubiligi.

Ubu bwicanyi bukorerwa Abanyekongo bavuga Ikinyarwanda kandi bugakorwa n’Abanyekongo ubwabo ntawatinya kuvuga ko buganisha kuri Jenoside.

Akanama gashinzwe umutekano k’Umuryango w’Abibumbye kagomba kumenya ko ubwicanyi bukorerwa muri Congo ari Jenoside ikorerwa Abahutu n’Abatutsi b’Abanyekongo bavuga Ikinyarwanda.

Ibi biteye isoni kubona abantu bicwa Isi irebera ntigire icyo ikora. Byaba bitandukaniye he se n’ibyaberereye mu Rwanda mu 1994 cyangwa ibyabereye i Burayi no mu Budage igihe hakorwaga Jenoside y’Abayahudi?

Tugomba kwamagana ibikorwa n’ibitekerezo biganisha kuri Jenoside hanyuma tukihesha agaciro nk’ikiremwamuntu. Ese ninde uzi ko hari uzamwubaha igihe we atabashije kwihagararaho ngo yihe n’agaciro?

Mu rwego rwa Dipolomasi, Minisitiri w’ububanyi n’amahanga w’u Rwanda agomba kwandikira urupapuro Ambasaderi wa Congo, rumugaragariza ko u Rwanda rutishimiye ibikorwa by’ihohotera bibera muri Congo; ndetse uhagarariye Loni i Kigali akagira uruhare mu gushakira umuti ibyo bibazo.

Abanyarwanda bahohotewe n’abishwe, imiryango yabo igomba guhabwa impozamarira. Ibi bigakorwa n’abayobozi ba Congo, Loni igatanga impozamarira kuri izo nzirakarengane.

Leta y’u Rwanda igomba gukurikirana icyo gikorwa ku banyarwanda bahohotewe n’inzego z’ubutegetsi za Congo bityo abahohotewe baba bakiriho cyangwa barapfuye na bo babone uburenganzira bwabo bavukijwe.

Ubusanzwe Minisitiri w’ububanyi n’amahanga w’u Rwanda yaba yarigeze yandika urwandiko navuze haruguru? Niba ibi bitarakorwa byaba byiza bihise bikorwa urwo rwandiko rugashyikirizwa Ambasaderi wa Congo n’uhagarariye Umuryango w’Abibumbye mu Rwanda kuko rwose ibi birarenze kubona abantu bicwa nk’aho batagira kirengera.

Nasoza nsaba sosiyete sivile n’abikorera ku giti cyabo guhaguruka bakazamura ijwi, bagasaba abanyamategeko kuyashyira mu bikorwa kugira ngo uwo ari we wese ufite uruhare mu kwica no guhohotera abanyarwanda abe yahanwa hatitawe ku wo ari we.

Ndashimira ibinyamakuru nka IGIHE bitahwemye kugaragariza Isi yose akarengane kagiriwe abanyarwanda hirya no hino ku Isi bazira ibibazo by’intambara zo muri Congo nyamara ntaruhare bazifitemo.

Ntarugera Deo Koya
e-mail: ntarugera@yahoo.fr

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO