Ibyo Perezida Kagame yagejeje ku Rwanda bizorohereza uzamusimbura

Ibyo Perezida Kagame yagejeje ku Rwanda bizorohereza uzamusimbura


Yanditswe kuya 28-02-2013 - Saa 14:32' na Kim Kamasa

Nyuma y’inama yahuje abakada bakuru b’Umuryango FPR Inkotanyi na Chairman w’uwo muryango Perezida Paul Kagame wahise abaha umukoro w’uburyo mu mwaka wa 2017 ubwo manda ye izaba igeze ku musozo hazabaho ‘Impinduka no gukomeza ibyagezweho mu mutuzo (Change, Continuity in stability), uyu mukoro wazamuye impaka ndende haba mu banyamuryango ba FPR ndetse n’abatari abanyamuryango bawo.

Imwe mu mpanvu zikomeye zituma izi mpaka zibaho ndetse zikaba zanakomeza kugera mu 2017, ni ibikorwa by’indashyikirwa Perezida Kagame yagejeje ku banyarwanda mu myaka 18 gusa nyuma ya Jenoside yakorewe Abatutsi mu 1994.

Mu gihe Isi yose yabonaga ko bidashoboka ko u Rwanda rwazongera kuba igihugu nyuma y’ibyarubayeho, Perezida Kagame yayoboye igihugu mu buryo butuma buri rwego rw’ubuzima ruzamuka ku muvuduko udasanzwe, aha ntibisaba no gutanga ingero kuko nzi neza ko namwe amaso abereka ibirerenze ingero nkeya nshobora kubabwira kuri iyi paji.

Ibi ni byo bituma benshi mu banyarwanda bagira impungenge z’uburyo Perezida Kagame yazasimburwa ndetse nta na gihamya bafite cy’uko uzamusimbura yazakomeza icyerekezo no guhindura imyunvire igamije iterambere, Perezida Kagame yamaze kubaka mu banyarwanda ari na yo ituma igihugu gishobora kugera ku byananiye ibindi bihugu.

Ni na yo mpamvu mu mpaka zigibwa na benshi muri iki gihe, usanga bagaruka ku byifuzo byo kuba Itegeko Nshinga ryahindurwa kugira ngo Perezida Kagame yongererwe manda, mu gihe nyamara ubwo yatangaga umukoro iyi ngingo ntayo yavuzemo.

Cyakora ariko, reka twe nk’Abanyarwanda tureke kwikunda, twibuke ko uyu mugabo yatanze ubuzima bwe kuva mu myaka ya za 1970 ubwo yemeraga kujya mu gisirikari cy’ikindi gihugu, kugira ngo aheshe ijambo Abanyarwanda bari barahejejwe ishyanga. Iyi nzira akaba yarayikomeje ayobora urugamba rwo kwibohora rwatumye Abanyarwanda n’u Rwanda turi aho turi ubu, ndetse tunazirikane ko yashoboraga kubura ubuzima bwe kubera twe.

Perezida wa Repubulika afungura uruganda rw'amakaro i Nyagatare

Ni na yo mpamvu twakabaye dufata umwanya wo kwigira ku byiza bye kugira ngo hazaboneke abazusa ikivi yatangiye (N’ubwo nemeranya na benshi ko ashobora kuba ntasimburwa). Na ho ubundi byaba ari uguhabwa isomo n’umwarimu mwiza ukwigisha, ukajya unamusaba kugukorera ibizamini.

Cyakora ariko, ku bwanjye mbona ko uzasimbura Perezida Kagame akazi kazamworohera bitewe n’uko azaba yaraharuriwe inzira. Nemera ko inzira iganisha u Rwanda aheza ikiri ndende, hari n’aho igera igafungana.

Niba Perezida Kagame yarashoboye kugeza ubwisungane mu buvuzi (health care) ku basaga 90% by’Abanyarwanda, abanyehuri bakaba bigira ubuntu kugera mu mashuri yisumbuye, ibikorwaremezo bikaba bikomeje kugezwa no mu byaro, abaturage bakabasha guhabwa inka bakama ayo gukoresha mu rugo bagasagurira amasoko, Kaminuza zikaba zaravuye kuri imwe zikagera hafi kuri 30 n’ibindi ntarondora; harya ubwo ngo umusimbura wa Perezida Kagame azitwaza iki kugira ngo adakomeza iyo nzira?

Rwose ndumva neza umuturage wo mu Karere runaka wahawe inka na Perezida Kagame, akaba ubu ashobora kuba we n’umuryango we banywa amata batarabyigeze, ndetse bagashobora gusagurira isoko amafaranga avuyemo akabafasha kwikenura, abana be bakaba bigira ubusa. Uyu rwose ntawundi yakumva ariko hari n’abafite inshingano yo kubumvisha ko amategeko agomba kubahirizwa.

Reka tunavuge kuri Perezida Kagame nk’umuntu na we ukeneye ikiruhuko nyuma y’imyaka itabarika akorera Abanyarwanda, ariko ibyo nta kibazo gikomeye kibirimo kuko ahora ashishikajwe n’icyafasha Abanyarwanda. N’ubwo hari abo njya numva bavuga ko tudakwiye kumva iby’abanyamahanga dukwiye gukora ibyacu uko tubishaka, ariko tunazirikane ko aba banyamahanga batanga hafi 48% mu ngengo y’imari yacu, kandi bakanafata ibyemezo bihubutse uko bashatse nta n’impamvu bafite, dukwiye kwirinda kubaha impamvu.

Reka mvuge ko uko byakorwa kose Perezida Kagame akongera kuyobora igihugu, byafasha mu gihe runaka, ariko byanze bikunze hari igihe runaka azaba atagishobora gukomeza uyu murimo. Igikwiye rero ni uko habaho amahirwe yo gukomeza kumwigiraho igihe agishoboye.

Igitekerezo cyasohotse bwa mbere mu IZUBA RIRASHE

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO