U Rwanda ntacyo ruzaba

U Rwanda ntacyo ruzaba


Yanditswe kuya 12-01-2013 - Saa 07:08' na IGIHE

Mumbabarire mpere ku nteruro wenda abenshi bumva ko atari yo yaherwaho, mvuga ngo RPF‐Inkotanyi ishingwa u Rwanda rwari rwugarijwe n’ibibazo byinshi, birimo imiyoborere mibi ishingiye ku kazu n’icyenewabo, imibereho mibi ishingiye ku bujiji n’ubukene. U Rwanda rwari rwugarijwe n’icyorezo kitaboneka henshi, cyo guheza bamwe mu benegihugu mu burenganzira bwabo ndakumirwa kugeza ku guhezwa mu gihugu ; bamwe bagahezwa kubera ubwoko, amadini, Uturere, abandi bakazira imyumvire n’imitekerereze yabo bwite.

Muri icyo gihe Isi yari ikiyobowe n’ibitekerezo bibiri : Capitalism liberalism mu Burengerazuba na communism socialism mu Burasirazuba. Izo mbaraga ebyiri zakemuraga bimwe mu bibazo zigatera ibindi. Bimwe mu byo zakemuraga ni ubukana bwa politiki ya mpatsibihugu no guhuriza hamwe mu migambi y’akagambane ka politiki. Byatezaga uguhindagurika kw’Ubuyobozi bw’Ibihugu cyane cyane ibikennye, bidashingiye ku mahame ya Demokarasi ahamye, bigatera kutagira politiki y’imiyoborere ihamye “political stability”.

Nyerere wari Perezida w’Igihugu cya Tanzania, yemeraga kuva ku butegetsi no mu buryo buziguye akemera ya Capitalisme Liberalisme yari ishikamye muri aka Karere. Imbaraga za mpatsibihugu zarindaga zikanarengera ubutegetsi bwariho mu Rwanda bwateraga ibibazo twavuze haruguru, ari na yo mpamvu yatumye uwahoze ari Perezida w’u Rwanda yanga burundu gushyikirana no gukemura ibibazo by’Abanyarwanda bari hanze y’igihugu bashaka gutaha iwabo.

Iyo yari imbogamizi ikomeye cyane kuri RPF‐Inkotanyi, yo kugera ku ntego zayo zo kubohoza igihugu no kugamburura imiyoborere mibi yari yimakajwe mu Rwanda. Nyamara mu bwitange budasanzwe n’ubushishozi buhambaye, RPF‐Inkotanyi yashoboye kunyura muri izo mbogamizi kugeza ubwo ibohoje.

None RPF‐Inkotanyi irimo yateguye isabukuru yayo y’imyaka 25 ivutse, u Rwanda rumaze amezi atari make rwugarijwe n’Intambara za politiki, ubukungu n’igisirikare byose bisubiza inyuma inzira y’ubumwe n’ubwiyunge yavuye ku 0% mu mwaka wa 1994 ikaba igeze kuri 89% mu 2012.

Ibyo byatumye Abanyarwanda basubira inyuma mu ngeri nyinshi zinyuranye ariko cyane cyane mu cyizere ku busugire bw’igihugu, ugushikama kw’Ubuyobozi na gahunda yabwo n’ibindi bijyanye n’ibyo ; akaba ari yo mpamvu nanditse ngira ngo ntange umusanzu mu kugarura icyizere cy’Abanyarwanda.

Nta kibazo cya Politiki u Rwanda rufite

Abahanga iyo bavuga politiki baba bavuga imyumvire n’uruhererekanye rw’ibikorwa bigamije kuyobora no guteza imbere igihugu. Mu buryo bwa politiki bavuga ko igihugu gifite ikibazo cya politiki iyo kidafite umurongo uhamye wa politiki, mu gihugu haboneka impaka zigamije guhindura no gukosora ibiriho, akaba ari byo benshi bita « Opposition ».

Iyo opposition ubwayo ibamo ibice bibiri, hari iyitwa Opposition Positive, iyo ikaba ari ugutanga ibitekerezo binyuranye n’iby’abayobora igihugu ariko mu ngingo zigaragaramo kudindiza imiyoborere n’iterambere ry’igihugu. Hakaba n’ibyo bita Opposition négative, iyo ikaba ari ukwanga no kwamagana buri icyo ubuyobozi bukoze, utitaye ku kamaro kabyo mu miyoborere n’iterambere ry’igihugu. Bene iyo opposition amategeko arayihanira mu ngingo zimwe na zimwe.

Kuva RPF‐Inkotanyi yatangira urugamba rwo kubohora igihugu, ntabwo yigeze igira imbogamizi zikomoka kuri opposition Positive. Ikibigaragaraza ni uko na Habyarimana wari ubangamiwe cyane no kubaho kwa RPF‐Inkotanyi, yananiwe kwerekana ibitekerezo byubaka bihinyura ibyo RPF‐Inkotanyi yerekanaga mu mishyikirano ya Arusha, kugeza ubwo ayo masezerano ashyiriweho umukono ; kugeza ubwo tariki ya 06/04/1994 yashyiraga umukono ku masezerano yo kuyashyira mu bikorwa, abahisemo opposition.

Nyuma yo kubohoza igihugu, RPF‐Inkotanyi yashyizeho umurongo wa Politiki uzirana
n’amarangamutima n’inyungu bwite, iha igihugu Abayobozi bagifite urukundo bituma cyihuta mu iterambere kandi mu mpande zose zireba ubuzima bw’igihugu.

Abanyarwanda si Abamalayika n’u Rwanda si ijuru, hakomeje kuboneka Abanyarwanda bashyira imbere inyungu zabo cyangwa z’udutsiko runaka, abo babangamiwe na politiki iteza imbere igihugu ititaye ku nyungu bwite ikanakoma mu nkokora buri wese ubangamiye inzira y’iterambere rusange, bityo hakomeza kuboneka Abanyarwanda bashinga ibyo bita amashyaka ya opposition.

Nyamara kubera kutagira ishingiro rya politiki rihamye ayo mashyaka akaba yarabuze igihagararo akaba abaho Uretse abo banyarwanda batanyurwa, ariko hari n’Ibihugu, Imiryango Mpuzamahanga n’Ibigo by’Itangazamakuru ku nyungu zabyo bwite, birema Abanyapolitiki badafite Umurongo, abo bagahora bavuga ku maradiyo ibyo bazi n’ibyo batazi ku nyungu z’abandi nabo abantu bakabibeshyaho opposition, ariko mu kuri ari ntayo.

Mu kuri rero ibyo bikaba bidateza ikibazo nyir’izina cya politiki, kuko ntawe urashyira ahagaragara umurongo uvuga ngo imiyoborere y’u Rwanda ipfuye aha cyangwa ibangamiye iterambere mu buryo ubu n’ubu. Ni yo mpamvu iyo musoma mu binyamakuru ibitekerezo by’abo ba nyapolitiki, musanga ntacyo bafite banenga politiki y’igihugu ahubwo bashyira imbere amakuru mabi n’ibinyoma ku bayobozi b’igihugu. Bityo Abanyarwanda bakaba bakwiye kugira ihumure kuko mu gihugu cyacu nta kibazo cya politiki dufite.

Intambara ya Congo no guhagarikirwa inkunga

Nta mateka azwi mu burasirazuba bwa Congo hadatutumba umwuka mubi w’intambara n’umutekano muke, ukomoka ku nama ya Berlin yo mu 1884, yagabanyije imipaka bagafata igice cy’u Rwanda gituwe n’Abanyarwanda bavuga ikinyarwanda banafite umuco nyarwanda, icyo gice bakakigira icya Congo. Ibyo biza kwiyongeraho ko abazungu bakolonije u Rwanda, Congo n’u Burundi, mu bikorwa by’ubuhinzi bw’ikawa n’ubucukuzi bw’amabuye y’agaciro. Iyo miturire benshi mu benegihugu ba Congo batari abo muri ako gace ntibigeze bayemera, bityo bakomeza kwishisha abo badasa ishusho, badahuje indimi n’umuco, bibyara amakimbirane y’uruhererekane.

Kiriya gice cy’Abaturage batuye muri Congo mu buryo cyangwa mu bundi, usanga bafite abo bahuje amasano bari mu Rwanda kandi bafite ubwenegihugu bw’Abanyarwanda ; ugasanga Umuzigaba wahungutse aturuka Tanzaniya afite babyara be bitwa Abanyamurenge n’ibindi bisa bityo.

Mu gihe ziriya mpaka n’ubwumvikane buke bibyaye intambara, byanze bikunze hari Abanyarwanda bigiraho ingaruka kuko hari bene wabo b’abanyekongo wenda baguye mu mirwano cyagwa bavuye mu byabo.

Njye ntekereza ko Isi yuzuye abahanga mu mateka, mu bumenyi bw’Isi n’ubw’inkomoka z’abantu, ibyo batabiyobewe ku buryo abanyekongo basubiranamo, maze induru zikavuga ngo u Rwanda rwateye Congo, ngo kuko abarwanyije ubutegetsi bwicyo gihugu bavuga ikinyarwanda cyangwa se bafite bene wabo baba mu Rwanda, n’ibindi byinshi bidafite agaciro byuzuye muri raporo y’impuguke za ONU.

Leta ya Congo hari igice gituwe n’abavuga ikinyarwanda, ariko umusirikare barwana iyo avuga ikinyarwanda ngo ni umusirikare w’u Rwanda. Bakabaye bavuga bati “umusirikare twafatiye ku rugamba rw’abarwanya Leta ya Congo, twabonye afite inomero imuranga (imatriculation) y’umusirikare w’u Rwanda, aho kuvuga ngo avuga ikinyarwanda cyangwa ngo asa n’Abanyarwanda.

Ikindi ni uko abo bose bavuga ngo u Rwanda rwagiye muri Congo kurwana, bari mu bihugu byinshi barwana bavuga ko baharanira imiyoborere myiza, bagiye muri Iraq, bari muri Afghanistaan, Cote d’Ivoire, barashe Libye n’ahandi henshi. Imiyoborere myiza, Demokarasi n’iterambere babona muri Congo ni irihe ku buryo barengera ubuyobozi bwayo ? Iyo usesenguye neza hari byinshi Abanyarwanda bakwiye kumenya byihishe muri biriya bibazo, kugira ngo bitabatesha igihe cyabo no kubabuza kugira icyizere.

a ‐Ubukungu

Mu bihugu by’i Burayi bwo mu burengarazuba bisanzwe bitera inkunga ibihugu bya Afurika, hamaze igihe hari ibibazo by’ubukungu bikomeye, byageze mu rwego rw’uko bimwe muri byo byari bigiye gusenyuka biturutse ku bukungu bwabyo bwifashe nabi. Kubera ubumwe bw’ibihugu by’i Burayi, byabaye ngombwa ko bifashanya mu kuzahura ubukungu bw’ibyari bigiye kurindimuka, bumwe mu buryo bukoreshwa harimo no kwizirika umukanda.

Iyo urebye inkunga bimwe muri byo bikeneye kugira ngo bizanzamure ubukungu bwabyo, usanga ikubye inshuri nyinshi iyo batera Afurika. Urugero ruto cyane ni uko mu mwaka wa 2009, Komisariya y’Umuryango w’Ibihugu by’i Burayi yemeje ko inkunga zikwiye guhabwa Afurika mu myaka itanu iri hagati ya miliyoni 264 na miliyoni 300 z’ama Euros, mu gihe mu 2012 gusa hemejwe inkunga ya miliyari 43 z’ama Euros yo guha bimwe mu bihugu by’i Burayi byahuye n’ikibazo cy’ihungabana ry’ubukungu ; akaba ari yo mpamvu mu bihugu bimwe na bimwe hatangiye kuboneka induru n’imyigaragambyo yamagana inkunga ibihugu byabo bitera Afurika.

Ngira ngo birakwiye ko tubyumva kuko izo nkunga n’imisoro y’Abaturage babo babiduha mu gihe inshuti n’abavandimwe babo ba hafi bafite ibibazo. Ni ngombwa ko babitaho mbere yacu.

Ubunyamaswa bakora ni ukutavugisha ukuri ahubwo bagashakira ibisubizo by’ibibazo byabo mu kudutera ibindi bibazo. Kwitwaza ibibazo bya Congo mu guhagarika inkunga, ku ruhande rumwe ni ugukemura ikibazo cyabo cy’ubukungu kandi gifite ishingiro, ariko ku rundi ni ukuduteza ikibazo n’umuturanyi wacu twakabaye natwe dufatanya nawe mu gushaka ibisubizo by’ibibazo byacu dusangiye, nk’uko na bo bafatanya gushaka ibisubizo by’ibibazo byabo. Ariko aho na none hahita hagaragara iyindi sura ngira ngo mvugeho muri make. Congo ni igihugu bigeze babaho neza babikesha ubwo bukungu, igihe cyose ubukungu bwacyo bwagiye bwubaka ibihugu by’i Burayi ndetse na Amerika.

Mu gihe rero bagize ikibazo cy’ubukungu baba bibutse ikigega cyabo giteretse hano iruhande rwacu, nyamara ntidukeke ko gihunikwamo, kikanavomwamo mu buryo bworoshye. Ni ngombwa ko habanza gutezwa induru, guteza intambara n’ibindi nk’ibyo, dore impamvu z’intambara zihoraho mu Burasirazuba bwa Congo.

b ‐Guhahamurwa n’iterambere ry’u Rwanda

Nyuma ya Jenoside yakorewe Abatutsi, u Rwanda rwateye intambwe idasanzwe mu iterambere rusange. Rwavuye mu bihugu bibiri bikennye kurusha ibindi ku Isi, ubu ruri mu bihugu 25, ruraharanira kuva mu bihugu byasigaye inyuma rujya mu bihugu birimo gutera imbere. U Rwanda rwavuye mu rwego rwo gukora Jenoside rugera mu rwo kurwanya no guhagarika Jenoside aho ikekwa hose ku Isi. u Rwanda rwubatse byose bishaka kwimakaza imiyoborere myiza.

Mu mwaka wa 2012 u Rwanda rwabaye urwa kabiri ku Isi mu bihugu bifite abaturage bizera abayobozi babo, ruba urwa mbere mu bihugu by’Isi bifite umutekano usesuye ; rwabonye umwanya wa kabiri muri Afurika mu bihugu birwanya ruswa no gutonesha, ruba urwa mbere mu guteza imbere uburezi bwa bose hamwe n’ibindi byinshi abayobozi bacu bahora babonera imidari tutabona aho twandika.

Uwo muvuduko w’imyaka 18 gusa, uteye ubwoba abantu bajyaga bibeshya ko Isi ibagenderaho,
kuko abayituye batangiye kubona mu Rwanda icyerekezo n’icyitegererezo cyo kwikura mu bibazo no kubyikemurira. Nk’uko bisanzwe rero mpatsibihugu ntabwo yabyihanganira, bityo bagashaka kudindiza abafite ubushake bwo kwiteza imbere.

Congo rero ni icyanzu cyoroheye buri wese, ni inzira yo guhungabanya umutekano w’igihugu
cyacu no kudindiza iterambere ryacyo, ikaba n’urwitwazo rwo kwangiza politiki yacu mpuzamahanga. Ni yo mpamvu nta bihano byafatiwe Leta ya Congo ifasha ikanatera inkunga umutwe wa FDRL umaze gutera u Rwanda inshuro ebyiri mu kwezi kumwe, amahanga yose abibona.

C ‐Gukumira

Afurika yakomeje kuba isoko ry’ibuhugu bikize, bakayikoraho byinshi binyuranye. Afurika ihaha
ibikorerwa muri ibyo bihugu ku biciro bigeneye, nyamara ibyo byose baba babikuye iwacu na bwo ku biciro bagena ubwabo. Afurika ni isoko ryo kugabanya ubushomeri i Buraya mu gihe bwiyongera iwacu.

Afurika

Abayobozi ba Afurika n’Abanyafurika ubwabo ntibigeze bumva cyangwa banabona ko bashobora kubaho batemeye ako karengane, ko bashobora kwikorera ibyo abanyaburaya batabahitiyemo cyangwa batabateyemo inkunga. Ibyo byose u Rwanda rwaberetse ko byose bishoboka. U Rwanda rwacyuye impunzi zari zimaze imyaka irenga 30 byarananiye amahanga yose, ruhagarika Jenoside ONU imaze gukuramo akayo karenge kandi ari cyo yashingiwe mu 1945.

U Rwanda rwimakaza politiki ishingiye ku muco warwo na wo ushingiye ku ndangagaciro na kirazira, ibyo bituma rwubaka ubumwe n’ubwiyunge mu gihugu cyabayemo Jenoside, igihugu kigira ingabo zifite ubushake n’ubushobozi bwo kurinda ubusugire bwacyo. U Rwanda rwateye imbere mu bukungu ku buryo ingego y’imari yarwo keneye inkunga itarenze 48%. Ibyo bituma abakuru b’ibihugu bifite ubukungu kamere buhambaye nka Gabon, bakora ingendo bakaza mu Rwanda bavuga ko baje kwiga.

Bavandimwe bana b’u Rwanda ; ubwo bubyuke ntabwo mpatsibihugu yabwihanganira cyane,
nyamara kwitwararika n’ubwitonzi bw’u Rwanda bituma batabona ubundi buryo bwo gukumira igihugu cyacu batitwaje ikibazo cya Congo.

Mu kwanzura rero ndagira ngo nibutse Abanyarwanda ko izo ngorane atari nshya ku Isi, ndetse n’izo twanyuzemo zikaba zitari zoroshye, bityo bagire icyizere cyo kubisohokamo amahoro dukomeza gutera imbere.

N’ubwo inkunga z’abazungu zadufashaga gutera imbere vuba, ariko mu kuri ntabwo zifite umwanya munini ku buryo igihugu cyahagaragara ngo ni uko batazitanga. Icya ngombwa ni Abanyarwanda kwiyumvisha ko igihugu cyabo kibareba, buri wese akagira ishema ryo kukibona gitera imbere, iryo shema rikabyara umurava n’ubwitange bwo kugiha icyo kigusaba.

Hari ibintu byinshi bitanga icyizere cy’uko umuhate n’umurava by’Abanyarwanda ubwabo bishobora gutuma igihugu gikomeza gutera imbere, cyane cyane binagaragara ko akagambane ka politiki mpuzamahanga katakigera ku byo gashaka ku buryo bwose ; ari ibyo Francois Holland ntiyari gutorerwa kuba Umukuru w’Igihugu cy’u Bufaransa, igihugu cya Palestine nticyari kubona umwanya w’indorerezi muri UN, yewe n’u Rwanda ntirwari kubona umwanya mu kanama gashinzwe umutekano ku Isi.

Ikindi ni uko mu gihe gito isura y’ibibazo by’Akarere ishobora guhinduka. Ibyo ndabivuga nshingiye ku bintu byinshi kimwe muri byo ni uko u Rwanda guhera mu kwezi kwa mbere ruri mu kanama gashinzwe amahoro ku Isi, ikindi ni uko impuguke za UN zakoze raporo y’akagambane ku gihugu cyacu zarangiza manda yazo. Ibyo bikaba bishobora kugira icyo bihindura ku ruhare rw’u Rwanda mu bibazo bya Congo.

Ariko ntitwareka no kwereka abasomyi b’iyi nyandiko ko n’imishyikirano iri kubera Kampala ihuza umutwe wa M23 na Leta ya Congo, byanze bikunze izerekana ukuri ku bibera mu Burasirazuba bwa Congo.

Mu gusoza ndagira ngo Abanyarwanda batagira ukwiheba ngo ibintu biracitse, kandi na ba bandi basigaye birirwana uturadiyo ku matwi ngo baragira ngo bumve aho FDLR yafashe n’abaje kuyishyigikira basubize amerwe mu isaho. Rwose si ubu ko u Rwanda rwahungabanywa n’utwo tubazo utugereranyije n’iby’ingutu rwikuyemo.

Mugire amahoro y’Imana.

Rizinde M. Shaffiy
B.P. 258 Kigali
E‐mail : rizindem@yahoo.fr
Phone : 07 88 30 65 48

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO