Bisate Eco Lodge, Singita, imishinga igiye guha isura nshya ubukerarugendo ku bifite (Amafoto)

Yanditswe na Rabbi Malo Umucunguzi
Kuya 8 Nzeri 2017 saa 12:06
Yasuwe :
1 0

U Rwanda rukomeje kuba icyerekezo cya ba mukerarugendo badasiba kwiyongera uko bwije n’uko bukeye, bikajyana n’uko ari igihugu gifite ingagi zo mu birunga ziba hake, kikagira n’ibihe byiza bitewe n’aho giherereye ku mubumbe w’Isi.

Kubasha kwakira ba mukerarugendo bo ku rwego rwo hejuru, bafite agatubutse, bigomba kujyana n’urwego rwa serivisi bakenera ku buryo zidahungabana ugereranyije n’izo bahabwa iwabo, haba aho barara, ibyo barya n’ibindi bakenera mu minsi bamara mu Rwanda.

Muri Gicurasi nibwo guverinoma yazamuye igiciro cyo gusura ingagi kiva kuri $750 kigezwa ku $1500, bamwe batangira kugira impungenge ko bishobora kubangamira iterambere ry’ubukerarugendo mu gihugu, nyamara siko byagenze.

Umuyobozi Mukuru Ushinzwe Ubukerarugendo mu Kigo cy’Igihugu cy’Iterambere (RDB), Belise Kariza, aheruka gutangaza ko abarebwa n’izo mpinduka bo bumva neza ko ikigamijwe ari ukurushaho kubungabunga ibidukikije birimo Ingagi.

Yagize ati “Nta cyigeze gihinduka, dukomeje kubona umubare munini wa ba mukerarugendo bashaka kuza gusura ingagi. Muri uyu mwaka imyanya yo gusura yose yararangiye kandi hari n’abandi benshi basaba kuza mu 2018.”

Bisate Eco Lodge

Kuwa 1 Nzeri ku munsi wo Kwita Izina, nibwo Perezida Paul Kagame yafunguye ku mugaragaro inzu zakira ba mukerarugendo bo ku rwego rwo hejuru, Bisate Eco Lodge yubatswe n’ikigo Wilderness Safaris.

Ni inzu zubatse mu buryo bwihariye zifite isakaro hejuru irenzwaho ibyatsi, zubatse ahantu uba witegeye neza udusongero tw’ibirunga bya Bisoke, Kalisimbi na Mikeno muri Pariki y’Ibirunga.

Zifite ibyumba bitandatu bigiye biteretse mu ishyamba hagati, kandi byihagazeho kuko kuharara ijoro rimwe ni amadolari 1400 ni ukuvuga angana hafi na miliyoni 1.2Frw ku ijoro rimwe.

Uyu ni umwe mu mishinga minini izanye inyongera mu mpinduka mu bukerarugendo, harimo nka hoteli z’inyenyeri eshanu zimaze kuzura, ari nako hatezwa imbere ibintu bitandukanye bishobora gusurwa mu gihugu, ku buryo muri uyu mwaka kizinjiza miliyoni $440.

Mu myaka itandatu ishize u Rwanda rwabashije gukuba kabiri inyungu ruvana mu bukerarugendo iva uri miliyoni 200$ mu 2010 igera kuri miliyoni 404$ mu 2016.

Hoteli "Bisate Lodge" yubatse ahantu uba witegeye udusongero tw’ibirunga bya Bisoke, Karisimbi na Mikeno
Perezida Kagame aganira n'umwe mu bitabiriye umuhango wo gufungura iyi hoteli
Perezida Kagame yatambagiye mu bice bitandukanye bya hoteli
Umuntu uri ahubatse Bisate Eco Lodge aba yitegeye ubwiza bw'imisozi miremire yo mu Birunga

Singita Kwitonda Lodge

Singita Kwitonda Lodge ni indi nzu iheruka gutangira kubakwa ku mugaragaro; izubakwa n’ikigo gikomeye mu bukerarugendo Singita hakoreshejwe miliyoni $20.

Singita ishora imari mu bukerarugendo guhera mu 1993, ikaba imaze kugira inzu z’ubukerarugendo 12 muri Afurika y’Epfo, Tanzania na Zimbabwe. Intego ni ukubaka inzu nk’izo zigezweho zizajya zifasha abajya gusura ingagi muri Pariki y’Igihugu y’Ibirunga, umushinga uzatangira gukora muri Kanama 2019.

Iyi nzu yatangijwe imirimo kuwa 31 Kanama 2017, niyo ya mbere Singita izaba igize ifasha abantu kureba ingagi, mu bihugu byose ifitemo ibikorwa.

Yitegeye ikirunga cya Sabyinyo, yahawe izina rya Kwitonda, yitirirwa ingagi y’ingabo yapfuye mu 2012 ifite imyaka 40, icyo gihe ikaba yarabonetse ipfuye, nyuma y’iminsi itakigaragara mu muryango wayo.

Singita Kwitonda Lodge izaba igizwe n’inzu umunani zakira abashyitsi n’imwe ishobora kwakira umuryango, zose zikazaba zifite uburyamo 14. Kugira ngo umuntu abashe kugera ku nzu za Singita, aba bashoramari bazubaka umuhanda mwiza uzaba n’inyungu ku batuye hafi aho.

Mu gutangiza iyo mirimo, Umuyobozi Ushinzwe Ibikorwa mu Kigo cy’Igihugu cy’Iterambere, RDB, Emmanuel Hategeka, yavuze ko u Rwanda rwiteguye guha ikaze imishinga nk’iyi myinshi mu gihugu.

Yakomeje agira ati “Aka gace karimo hoteli zigera ku 100, ariko nibura 40% nizo ziri ku rwego rwo hejuru. Wenda bijyanye n’isoko dufite hano kuko dutanga impushya hafi 100 zo gusura ingagi ku munsi. Niko isoko ringana ariko ntabwo arirwo rwego rwa nyuma rwo gutanga serivisi zihanitse.”

Indi mishinga…

Hari izindi nzu zikomeye zakira ba mukerarugendo mu gihugu haba mu Mujyi wa Kigali ahabera inama mpuzamahanga zikomeye, abasura pariki y’igihugu y’Ibirunga mu Majyaruguru, iya Nyungwe i Burengerazuba cyangwa Akagera i Burasirazuba.

Five Volcanoes Boutique Hotel

Iyi Hotel iri mu Karere ka Musanze ku muhanda ugana mu Kinigi, ni imwe mu zikoreshwa na ba mukerarugendo mu Rwanda basura ingagi mu Birunga, igafasha abayigana kwizihirwa mu bikorwa birimo gusura ingagi, kunyonga amagare, kugenda mu migezi n’ibindi.

Iyi hoteli yishyuza icyumba kimwe gisanzwe 400$, icyisumbuyeho kikishyurwa 530$, naho icyiyubashye akazamuka Akagera ku $ 1,000.

Five Volcanoes Boutique Hotel yishimirwa na ba mukerarugendo bayigana ari benshi

Gorilla’s Nest Lodge

Ni ahandi hantu ho kurara mu birunga, hakikijwe n’ibiti ku buryo hizihira abahasura bahumeka umwuka uhehereye.

Umuntu uhari abasha kwitegereza ibyiza nyaburanga birimo imisozi itatse u Rwanda, hakiyongeraho isura nziza y’amashyamba ahakikije ndetse n’imirima y’ibireti bihingwa muri ako gace. Imbuga zifasha ba mukerarugendo zerekana ko kurara muri Gorilla’s Nest Lodge ari hagati ya $160 na $220 ku ijoro rimwe.

Abasura Gorilla’s Nest Lodge bahumeka umwuka uhehereye

Nyungwe Forest Lodge

Ni hoteli y’inyenyeri eshanu iherereye i Gisakura ku ishyamba cyimeza rya Nyungwe ribonekamo amoko arenga 13 y’ibisamuntu, aho umuntu aba yitegeye imirima y’icyayi.

Iyi hoteli ifite inzu ebyiri zishobora kwakira abakuru b’ibihugu, iri shyamba rikanagira umwihariko yo kuba ricumbikiye urusobe rw’inyoni ziri mu moko 275, ku buryo abakunda ubukerarugendo bwo kwirebera inyoni bahagera bakanezererwa.

Abasura Nyungwe Forest Lodge y’inyenyeri eshanu baba bitegeye ubwiza bw'ishyamba rya Nyungwe

Virunga Lodge

Ni ahantu ba mukerarugendo barara mu mpinga, bitegeye ubwiza bw’ibiyaga bya Burera na Ruhondo mu Ntara y’Amajyaruguru. Kurara muri iri cumbi ni hagati ya $826 na $991.

Ahakirirwa abagana Virunga Lodge

Akagera Game Lodge

Ni inyubako igezweho icumbikira ba mukerarugendo muri Pariki y’Igihugu y’Akagera mu Ntara y’Iburasirazuba, aho abaharaye baba bitegeye Ikiyaga cy’Ihema.

Ibiciro byo kurara mu Akagera Game Lodge bigenda bitandukana bitewe n’aho umuntu akeneye kurara bitewe n’urwego ariho, kuko bizamuka bihereye ku madolari $105, 120, $160, $170 kugeza kuri $650.

Izi nyubako kandi ziza ziyongera ku nyubako nka Jack Hanna’s Cottage, Mountain Gorilla View Hotel, Sabyinyo Silverback Lodge, Radisson Blu Hotel & Convention Centre, yakira inama n’abayobozi bakomeye ku rwego rwose na Kigali Marriott Hotel nayo iri ku rwego mpuzamahanga.

Akagera Game Lodge icumbikira ba mukerarugendo muri Pariki y’Igihugu y’Akagera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza